قبل كام يوم تقريبا الاسبوع اللي فات و انا رايحة
اصحي اختي فوجئت بهذا الخصم قدامي على غفلة
و من غير ما احس جمدت في مكاني من الخوف
و فضلت اراقب حركاته من بعيد و هو عند باب
غرفتي شوية يطلع فوق شوية ينزل و شوية يروح
يمين و شوية يجي شمال
بالعربي كدة شيء واثق من نفسه بصراحة حسيته
بيتمشى اصل طول عمري بشوف الصراصيربتجري
بس ده كان بكل ثقة بيتمشي و كأنه بيقولي :
هاع انا هو وريني بقى هتملي ايه ( وش شرير)
طبعا انا ما سكتش ابدا على استفزازه و رغم انه
بابا نايم واجهت التحدي و التعدي بتاعه ده
بكل ثقة قومت ايه ..
ندهت لماما ( يا ماما صرصار ) ( فين ؟ ) ( عند
باب غرفتي ) و ماما جات طبعا و قالت :
عادي اضربيه بالشبشب ..
تخيلو انا اضرب صرصار بالشبشب انا برضو
مقامي العالي و مستوايا ضرب شباشب انا ريم
البكرية الدلوعة الهيبة و الرزانة و الوقار ماما
عايزاني امسك شبشب و اضرب صرصار
مستحيل و طبعا قلب العند عند ماما على الفجر
( ايه رأيك انتي هتقتليه اليوم ) شكلها ماما حست
بالبوست اللي فات و بتأهلني لمهمة الام و تعلمني
ازاي ادافع عن بيتي و ولادي من الغزو الخارجي ..
و راحت ماما ورجعت لقتني نفس الوقفة فطبعا
يأست و قلبها رق ( قلب الام بقى طول عمره
شقي ) قالتلي طيب هقولك تقتليه ازاي
و كان وقتها المستفز بيمشي على باب الحمام
و تنفيذا لإرشادات ماما العزيزة قمت بالتالي :
روحت جبت المقشة الطويلة بمنتهى الشجاعة
وفتحت الباب بيها وبقى الصرصار جوه الحمام
و روحت جبت تايد في كوباية دوبته في ماية
و بمنتهى الدقة و البراعة روحت دلقاها عى الصرصار
و بفضل دقتي المتناهية مات من فوره و لما اتاكدت من
موت العدو بمنتهى البسالة وعزة الانتصار و جهت
برشاش الماية و هووووب وقعته في البلاعة ..
بجد بجد ماتصوروش فرحانة اوي بالانجاز ده
اول مرة اقتل صرصار من الحجم الكبير بالشجاعة دي
و طبعا كل ما اقابل حد في البيت اقوله اني قتلت
الصرصار و احكيله تفاصيل المعركة بتاعتي و هو
يبصلي و يسمعني و هو ساكت من الانبهار بيا ..
طبعا ماينفعش اي استصغاراو استهياف
لشجاعتي و لإنتصاري العظيم ده ضد خصم مهم
و على قدر من الهيبة بالنسبة ل 90% من بنات العالم ..
ماما اكتر وحدة كانت على حد قولها منخدعة فيا
عشان مش بعرف اقتل صرصار و فرحت لانها
علمتني اقتله و قالتلي : كدة لو يوم شوفتي صرصار
تعرفي تعملي ايه صح ؟!
انا : ايوة طبعا يا ماما اكيد حستناه يبقى كدة في ركنة
و اسيبله المكان و امشي ..
هناك 16 تعليقًا:
اه يا قاسيه يا ام قلب حجر D:
بقى تقتلي هذا الكائن الضعيف
هتروحي من ربنا فين يامفترية
بذمتك ريمو احكيلي
وقت ماجيتي تزهقي روحه كنتي عاملة ازاي
اوصفيلي حالتك النفساوية وانتي بتخلصي عليه :d
انت قلبك قاسي اوي اوي
انت مش بتحس كده وكده :d
يابنتي دي لحظة تاريخية ما تتوصف
عارفة تخليك تحسي باحساس القدماء كدة لما كانو يسو الفتوحتا و يهزمو الاعداء
حسيت كدة بنشوة غربة نشوة انتصار مع عبق الفجر ولدت رائحة لايمكن نسيانه
انا طول اليوم ده كنت فخورة بنفسي ورافعة راسي كنت اسمع هتافات الناس حواليا
بجد بجد احساس رائع يابنتي ده صرصار ابو وردان كبير يعني لازم يتطلب اقسوة و القوة و الحزم لقتله و انا انجظت المهمة بنجاح
ههههههههههههههههههه
مش قادرة اعلق صراحة
بس انا زمان كنت بطحنه و لا بهمني دلوقتي بقتله بس بقرف شدييييييد
شاطرة
بس علي فكرة لازم التمرين والا المرة الجاية لو بعيد هتحتاجي ارشادات من جديد
تحياتي
ههههههههههه
بس والله شجاعة منك انك قدرتي تقربي عليه لدرجة انك ترمي عليه التايد
و خصوصا الكبير
بس على فكر طريقة حلوة
احسن من حكاية الشبشب دية
تسلمي يا طنط مامت ريم
مع اني معتقدش اني هجربها
سلام عليكِ
فكرتينى بمغامراتى معاهم اللى لا تتعدى صويتة تلم البيت كله و بعدها قفل الباب عليهم هم و الصرصار لحد ما اتاكد انهم ادوا المهمة بنجاح
و مع انى بكره المياصة بتاعت البنات لكن كله الا الصرصار و البرص و الفار من قبلهم :D
لنوش
بجد على كدة انا اعرف سوبر بطلة و انا مش دارية
بجد بجد انت جدعة والله حتى لو بتقتليه بقرف جدعة يا لينو
كوشيا
تمرين ازاي ادور على بلاعة واقتليهم ده واحد وعمل كدة لسه هتمرن على الباقي
البركة في بابا و الشباب امال لزمتهم ايه مش هما للمهمات الصعبة
نعكشة
لا بجد لو اتزنقتي جربيها حلي تايد في ماية و ادلقياها عليه ده مات اسرع من لما بابا بيرشه بالريد او يجري و راه بالشبشب
المسألة مش محتاجة تقربي اوي بس انتي حطي كمية كفاية عشان تضمني لو دلقتيه من بعيد الماية و التايد يجرو ويجو عليه
( سؤال صغير هو انتي لاغية التعليقات من مدونتك )
يا بنتي المسألة دي لاتصنف لا من المياصة ولا دلع البنات البنت الطبيعية اللي تصوت من الحاجات دي
انتي كدة عادية والله يا حبيبتي ده صرصار مش اي كلام
اما البرص و الفار دول كائنات ذات قدر عالي الوحدة ممكن من حسن ضيافتخا تسيبلهم البيت
ربنا ميوحجناش ليها بس لو اتزنقت هجربها
يا رب بس منساهاش ساعة الزنقة
هههههه
......
ايوة انا قافلاها
...
سلام عليكِ
مين ياختي
ربنا ما يوقعك ولا يوقع اي بنت في زنقة زي دي
اهلا ريم
..............
انا جاى اسلم لقبت الموضوع خطير ودخلنا فى معارك وجهاد مرير وارادة صلبة وتحدى وعدو غاشم وكائنات فتاكة
بجد انا قلقت عليكى فى الاول لكن كنت عارف انك قدها وقدود وانك هتعمليها وانا حاطط ايدى على قلبى ياترى المعركة هتنتهى بإييه ومع كثير من الدعوات وكتم الانفاس كانت نهاية المعركة حافلة وفرحت بها اكتر من فرحتى بفوز مصر على كوتديفوار فى الماتش قبل النهائى لأمم افريقيا
والحمد لله هزمت مملكة الزواحف الظلامية على ايدك القوية اللى نسيت الحنية ومسكت المقشة المشمشية وخلصت القضية بدرجة مية مية
لكن السؤال اشمعنى تايد اعتبره اعلان عن المسحوق ليه مش برسيل أو اريل مثلا
دة اللى حيرنى ارجو اجابة حتى تنتشيلينى من غيبة جهالتى بهذا السر العميق
كل تحياتى لقلبك الجبار ولحسم مقشتك البتار وهزيمتك الندل الصرصار
المهم انت كويسة
تحياتى لك عزيزتى والى مزيد من الانتصارات فى انتظار قضائك على مقاومة الناموس حتى تتوحد الشقة تحت سلطانك بلا منازع
..
نورالدين محمود
نور الدين
ايوة كدة دي الردود اللي تفرح دي الناس اللي تقدر و تدرك مدى التعب و الصراع و الجهاد اللي تتطلبته المعركة
بجد صغت القتال بطريقة رائعة و حولته لمعركة المروض تدرس في كتب التاريخ
بس تصدق هو فعلا اشمعنى التايد مع انه كان في اومو شكلها كدة سر من اسرار ماما ماهي اكيد مش هتديني الاسرار كلها
دلوقت
و ان شاء الله زي ماجي يوم وقضيت على الصرصار و هددت ممكلة الحشرات الزاحفة هيجي يوم وا هدد ممكلة الحشرات الطائرة في القريب ان شاء الله
موقف مشابه حصل مع اختي وبنات عمي
كانوا خارجين ونازلين على السلم وفجأة وقفوا واتجمدوا مكانهم ....
كان فيه سعادة وفخامة الاستاذ فأر على السلم ، ومافيش وحدة عندها الجرأة تقوله بخ علشان يجري ...
اللي يضحك انه في الآخر طلع ميت ، بس بردوا لسا خايفين .
أنا دخلت مدونتك ولقيت البوست دا ، عجبني جدا ...
أول زيارة ليا
في آمان الله
طبيعي تصرفهم واله مش فار حقهم يجمدو
في مكانهم لحد ما يجي حد يشيله
متشكرة للزيارة و التعليق
إرسال تعليق