بعض انثى ..

الموضوع طويل آوي مع الاعتذار ليكو

ساعات بتنط في دماغ الواحد فكرة أو ياخد باله
من حاجة فجأة لاعلى البال و لا الخاطر زي بعض
أغاني بسمعها من فترة لفترة
فجأة خدت بالي آوي إنها ممكن تبقى حكاية أنثى

جيتي و صيرتي انتي الابقى انتي الدنيا و الأيام
انتي الحاضر انتي باكر انتي العذب من الأحلام

ولادة البنت بيبقى فيها فرحة بعيدا عن المتخلفين طبعا
بتحسها ابتسامة حياة كده الدنيا بتنور اكتر يمكن
لأنك بتحس إنها مخلوق رقيق اوي من ساعة ما تتولد
بتحس انه مخلوق حنين و بريء و قوي بضعفه بس جاية
البنت بجد بتخلق حالة حلوة عن اغلب الأهالي

البنية حلوة البنية

مرحلة الشقاوة بقى و الروج و الكعب بتوع ماما و كده
تحس عندك لعبة متحركة في البيت مش بتمل و تشبع منها
ابد و تحس انه البيت بيضحك بيها و بيعيش بيها

جئتك وحدي يا مدرستي اهدي زهرا لمعلمتي

أغنية هبله من الطفولة بس شوفت فيها مرحلة الاعتماد
على الذات اللي بتبدأ تكبر و الوحدة تحس إنها زي ماما
و تبقى عايزة قال تساعد في البيت و تبهدله طبعا بس هي
مرحلة نضج مبكر مش شرط تستمر خالص مع البنت
مش عارفة ليه

امورتي الحلوة بقت طعمه و لها سحر جديد

دي بقى بجد بداية الصراع و التناقضات و كل حاجة
حلوة و وحشة الأغنية بتتكلم عن المراهقة اكتر فترة
البنت بتحب تبان بس برضو تلاقي بنت عايزة تختفي من
بصات الناس ومعاكستهم بسب ملامح جسمها اللي جعلتها
أنثى تناقض بين إحساس بالأنوثة و إنها عايزة الكل يحس
جمالها و تفكيرها و طبعا جمالها اكتر
و بين عيب و لا و ما يصح و انتي كبرتي و هنا بتبقى بجد
بداية حاجت كتير و مفترق طرق يبدأ فيه اختلاف البنات

مانتش قد الحب يا قلبي ولا قد حكاياته
ليه عايزني من دلوقتي احكيلك رواياته

طبيعي البنت بتبان اوي في المرحلة دي و قصادها
ابن الجيران هو كمان كبر و الشنب بدأ يخط بقى بس تلاقي
بنات و ده الأحسن في رأيي بتخاف و بتحس انه بدري ممكن
يحصل إعجاب بس عند خطوة اكبر بتوقف و بنات أكيد
بتكمل و شيء يفشل و شيء ينجح بس مش عارفة
ليه هو غالبا بيبقى ابن الجيران

خبيتلك وردة حمرا .. مقطوفة بأول عمرها
ما داقت من طعم الغمرة .. غير حبة ندى

ده الوقت المناسب مش مهم انت الأول و لا التاني في
حياة البنت زي ما ولاد كتير بتفكر المهم انك تيجي في
الوقت المناسب
هتلاقي إحساس اللي أول مرة تحب و أول مرة تشتاق
و أول مرة تخجل و كل شيء هيكون أول مرة لو جيت
بس في الوقت المناسب

شي غريب متل العادة حبك يا حبيبي
و يمكن لأنك مش عادي بحبك يا حبيبي

على فكرة فعلا الأنثى كائن صعب فهمه
يمكن يكون لأنه إحنا مش عارفين عايزين إيه
خصوصا من الراجل سيبكو من طيب وحنين
و الذي منه كل الموصفات التقليدية دي لأنه كتير مننا بتبقى
مش عارفة هي عايزة إيه أو فاكره إنها عايزة
حاجة في وقت هي محتاجة عكسها إحنا محيرين اوي
لنفسنا و ليهم بس حيرتنا دي من أحلى مافينا و اللي
بيشدهم أصلا لينا ..

ما بحبش حد يشوف أي دموع في عينيا
علشان لا أصعب عليه ولا يزعل عليا

كبرياء غريب في قوته بيتولد في مرحلة الصبا
عند البنت ساعات بيبقى طالع في حاجات بسيطة و سخيفة
حتى بس هي بتكبر تلاقي مجتمع فعليا مسيطر عليه
و دورها و وجودها متقنن بقوانين ادم فبتقرر تربي كبرياءها
ده مندري كبرياء بيكون في ذروته وقت الشباب
و يبتدي يخفت بريقه مع الزمن

أنا بتنفس حرية ما تقطع عني الهوا
و لا تزيدها كتير عليا أحسن ما نوقع سوا

تمرد صارخ لأقصى درجة يمكن لأنه الكبرياء بيبهت
بحاجات عادية يمكن بحب يمكن بأهل يمكن بأولاد
بحاجات كتير الكبرياء بيبتدي يبهت قصاد تضحيات
الأنثى الفطرية أو مجبرة بس في الحالتين هي بتتوجع
و لأنه الصرخة تعبير الموجوع بتصرخ هي بتمرد ..

مفكر انه صوتك أعلى يعني أقوى انت و اعنف
ولامرة أنا صوتي بيعلى يعني بقبل أكون الأضعف
أنا بعطي للنهاية .. و ما بطلع ورايا

بعد فترة بيبدأ تعبير من نوع اخرأو صراخ من نوع
آخر صراخ التحدي بصمت و صبر بتكون هي المغلوبة
في الأول بس بعدها بتبقى الغلبة ليها و بتوصل بتصبر
بس في آخر الحكاية غالبا بتوصل بس للأسف نتائج
التحدي ده فردية إلا حد ما و صعب تتعمم لأنه أصلا مش
كل أنثى قادرة على صرخة التحدي ..

هالوردة دبلت بكير حلوة بعدا حلوة كتير
ماعادت شافت ها الشمس و الدنيا كلها مشاوير

فعلا بتدبل الوردة زي أي وردة حقيقة بتبدل
بس مش كل وردة بتدبل زي التانية أو بنفس
سرعة التانية بتلاقي وردة بتدبل قوية
و وردة بتدبل ضعيفة و وردة بتدبل بشموخ و وردة
بتدبل منكسة في النهاية الورد الحقيقي لازم يدبل
مع الزمن بس بعد ما ينشر عبير ابدي حوله
حد بيحتفظ بيه و حد تاني عنده العبير ده بيتمحي


في الآخر المرة دي هستلف عبارة إيمان
مش عارفة بس آسفة .. آسفة ع البوست ده