والله حلوة ..

لو جه في بالنا نحلم بجنة قوة ايمانا هي السلام

و الدين معاملة ورسالة كاملة يعني الحكاية مافيهاش كلام

غني وحب وصلي جماعة لقبلك ساعة وربك ساعة

و الدنيا حلوة والله حلوة مش ضاحكة علينا و خداعة

ما تقولش خلصت و ذنوبي كترت ماتعيش فكرة جاي العذاب
صاحب الجلالة الله تعالى م الاستحالة ينسى اللي تاب

ربنا ما خلقناش نتألم عادي بنغلط وبتعلم
و الدنيا حلوة والله حلوة اوعى تسيب نفسك وتسلم

لو حد هانا او جرح طالنا نفتح بيبانا مانردهاش

جايز نجاحنا يكسر جروحنا و نحب روحنا ما نظلمهاش

نملى حياتنا حب وفرحة ونكتر اعمالنا الصالحة

و الدنيا حلوة والله حلوة مش ايام بتعدي ورايحة

صح بسيطة ومش بقوة باقي اغاني الالبوم بس

قد ايه رسمتلي ابتسامة امل حلوة كنت محتاجها

بشكرك بجد على الاغنية دي

منمنمات ..

و تغضب و تاخذك الحيرة بين القسوة و الغضب

ف انت لتغضب عليك ان تقسو و انت تكره القسوة

و مع تلك الحيرة يولد صراع اخر جراء غضبك

صراع بين التسامح و الكبرياء و ما اصعب كبريائك ..

و تؤرقك الحيرة و يؤلمك الصراع ليتحول الغضب لحزن

فنحن نحتاج للحزن لنشتاق للفرح و ينتهي الغضب ..

.. سيستمر الكلام ومازال للحديث بقية ..

شخابيط ...

الشخبطة تقريبا احب حاجة ليا في المدونة

بس ما كنتش عارفة اشخبط من فترة فاعذروني

لو طلعت شخبطتي مجرد كلام فاضي ..

شيء صعب اوي لما يكونو اللي حواليك مستنين

منك حاجة هما لازم يساعدوك فيها عشان تلاقيها

قد ايه و قتها بتحس انك بجد لوحدك ..

******

السوبر ماركت شكله اتأمر عليا مع ماما

في الظروف المكلكعة و التحديات دي و مش

لاقية اللي دايما بتسندي في الاوقات الصعبة

.. وحشتني يا ليندتي ..

******

يالهووووي رقبة منى زكي اتباست في الفيلم

الله يهديكي يامنى مش كنتي تخلي الراجل

يبوس كتفك اهو الكتف من الرقبة برضو

و بلاها الثورة المنية دي اللي قامت على غفلة

و قال الشات بيقول انها فضلت تقنع في

احمد حلمي عشان يحضر العرض الرئيسي

و تقوله : يا احمد مايصحش كدة لازم تحضر يا احمد

قام قالها : لا يامنى ما اقدرش ما اقدرش .

و هي تقوله : بليز يا احمد عشان خاطري يا احمد

و هو يقولها : اعذرني يا منى بس ما اقدرش ما اقدرش

( على فكرة شات مزيكا و زوم بيكتب كدة

ب قالها و قالتله )

******

بقالي فترة مش لاقياني لدرجة اني واحشاني

يارب اقابلني قريب ..

******

مسلسل اسوار الجزء التاني

رغم انه احداثه قضايا من الواقع و الصحف و

المحاكم الا انه كالعادة الوقت الي المفروض

نلتفت للمشاكل دي و نحلها قبل ماتكبر حيضيع

في سب وشتم و تهزئ المسلسل لاننا مجمتع

الازمة لازم المشكلة تصير مصيبة وظاهرة عشان

نحلها غير كدة لا دي مبالغة و احنا ماعندنا كدة ..

******

في كلمتين بجد محشورين في زوري لاهما نصيحة

ولا نقاش و لا اقناع ولا غيره

كتير بيقولو المثلين انه دي طبيعتهم اللي ربنا خلقهم

بيها و اننا بنفسر الدين غلط من الناحية دي

طيب الله ما شافوه بالعقل عرفوه يعني لما يبقى

فعل من فداحتة يتهزله عرش الرحمن و لما يبقى

فعل يخلي صاحبه من الناس اللي لاينظر الله لهم

و لما يكون فعل يتبعث نبي لقوم بس عشان يردهم

و ينهاهم عنه و يعذبو و يهلكو بسبب اصرارهم عليه

يبقى دي مش طبيعة من ربنا معلش ده ذنب و انت

عاصي زيك زي تارك الصلاة و الكذاب و غيره

و زي اي بشر مننا بيغلط ويعصي و بلاش مكابرة

اصل ربنا ما بيظلمش حد لو المثلية طبيعة في بعض

البشر ماكانش اهلك قوم بحالهم عليها دي قناعتي ..

و بخصوص النقطة دي يعني لو حد مع المثلية او

مثلي و شافها ما يحاولش يناقشها معايا و يحاورني

فيها توفير و احترام للوقت الي هيقعد يكتب فيه

و الكلام نفسه للي ناوي بس يشتم فيهم ..

******

البنات البنات الطف الكائنات

بقى مشكوك في الجملة دي بصراحة دلوقت

اللي مش مصدق يروح يزور عم يوتوب و يقوله

و النبي حتة خناقة بنات لو سمحت ..

******

مازلت مصرة و مقتنعة رغم موجه المسكنة

بين الذكور و انتشار خبث الاناث تظل الانثى هي

المتربعة على عرش الوفاء و التضحية و الاخلاص

و الصدق و الحب و الاحتواء و كل حاجة حلوة ..

بنت من البنات ..

قلب البنات زي صندوق فولاذ مفتاحه الماس

كتييير افتكرو انهم يملكو المفتاح و يعرفو قلوب

البنات بس قليل منهم اللي عرفوها بجد ..

و جوه قلوب البنات حكايات و اسرار و احلام

واحدة حلمها تطلع دكتورة و واحدة حلمها تكون

مهندسة و واحدة تحب تكون شخصية قيادية او

شخصية مهمة و مؤئرة و واحدة ممثلة و ....

و كل بنت و حلمها ..

هي بقى حلمها تتزوج و تخلف و تربي بس في البداية

زي كتير استغربتها و حسيتها تافهة و سطحية و

تفكيرها ضيق هو ده اخرها بس زواج وخلفة و

خلاص هو ده طموحها ..

بس لما قربت بجد وعرفتها لقيتها زي اي وحدة بتشتغل

وتتعب لحلمها ده بيهمها اوي شخصية الرجل المناسب

و بتفكر فيه بجدية بيهمها اوي تفهم يعني ايه زواج

و ايه المترتب عليه و ايه مسؤولياته وواجباته

بيهمها تفهم يعني ايه ام و بتهتم اوي بطرق التربية

و تحاول تفهم عقلية الطفل في جميع المراحل

يهمها تجمع الكتب و تسمع الخبراء و هما بيتكلمو

عن الزواج و التربية و تدون ملاحظتهم و تفهمها

بتركز جدا مع صديقاتها المتزوجات و تشوف اخطائهم

عشان تعرف تستفيد بكرة منها و تتفادها في حياتها

تقريبا رسمت زي خطة بسيطة مبدئية تحاول تساعدها

انها تنجح في حياتها و تعرف تديرها بشكل كويس ..

يعني زيها زي اي بنت بتتعب لحلمها مش تافهة وقاعدة

مستنية العريس و عايزة فرحها ازاي و مكياجها لون ايه

و شهر العسل مش عارفة فين .. لا بتتعلم و بتتعب و بتفهم

و بتدور في كل حاجة تخص حلمها عشان تبنيه صح

وقت ما تيجي الفرصة المناسبة ليه ..

احنا للاسف اتعودنا نظلم البنت اللي طموحها الزواج

لانه حلمها قديم اوي و تقليدي و بنساوي كل صحبات

الرغبة دي و الحلم ده ..

اللي كنت بشوفها سطحية دي علمتني انه حتى في الحلم

التقليدي ده في ناس بتشتغله و تتعب له و تبني فيه

عملتني ماحكمش على غيري قبل ما افهمه كويس

و علمتني اني مهما يكون حلم غيري تافه في نظري

احترمه واحترم اهميته بالنسبة له و تعبه عليه ..

منمنمات ..

من المستحيل ان يظل الجو مستقرا للابد

فسنة الحياة هي التغير و حتى الاجواء هكذا

فتهب عاصفة لتغير صفو سمائنا و تعكر اجواءنا

واسوء ما في اي عاصفة انها تباغتك فهي لا تنبئك

بهبوبها لتستعد لها بل تأتيك في اشد لحظات غفلتك ..

و تهب العاصفة لتجلب لك كل ما تخشاه و كل

ماتكره و تعمل جاهدا على تحاشي وقوعه ..

و هكذا كنا و كانت لنا عاصفتنا التي تحاشينها

كثيرا رغم علمنا انها ستأتي يوما فتلك هي طبيعة

كل الاشياء ولا مكان للاستثناءات ..

بداية كرهت عاصفتنا التي غافلتنا و لكني احببتها

فيما بعد .. فقد كرهتها ليس للكره بل لخوفي ان تنتصر

واحببتها لاننا تجاوزنها بنجاح رغم صعوبتها و قوتها

و اجمل جزء في تجاوزنا لها تلك الامور البسيطة

الصادقة التي ظهرت و تأكدت لدينا ..

و انتهت العاصفة و عاد صحو الايام ليجلب لنا

عواصف اخرى لنتجاوزها .... ونستمر

.. سيستمر الكلام و قد يكون للحديث بقية ..

المفروض اننا نضحك ..

مشهد او موقف

راجل و ست حامل يروحو عمارة و يعلقو لافتة

دكتور على احد الابواب و يفضلو يخبطو و الست

تصوت على انها بتولد يعني

يفتحو اصحاب الشقة و حوار سخيف من فين الدكتور

و دي مش شقة دكتور و الذي منه و اذ فجأة

يخرج من تحت هدوم الست راجل من اصحاب

القامة القصيرة على اساس انها و لدت و االناس اللي

بيتكلمو معاهم يتخضو طبعا ..

المشهد ده ماهو الا اخر حاجة شفتها من هبالة

الكاميرا الخفية

البرامج دي للاسف مابقتش تخرج عندنا عن

يا اما يقرفونا بالفنانين اللي مش بفهم ازاي لحد

دلوقت بيتخدعو و يعملو فيهم مقلب

يا اما يسألو الناس اسئلة هبلة تبين جهلهم

يا اما ينرفزو الناس او يخضوهم و حاسة انه

ده هيكون سبب نهاية الكاميرا الخفية في

العالم خصوصا و انهم مش بيراعو حتى العواجيز

المكسرين اللي وراد جدا يكونو اصحاب عيا

من قلب و ضغط و سكر و الذي منه ..

صحيح لسه في بعض مواقف و كاميرا خفية

حلوة و ظريفة بس قليلة اوي وغالبا بتلاقيها

اجنبية اما العربية فاصبحت بامتياز

كاميرا غبية مش كاميرا خفية ..

على تفصيلتهم ..

لوقت طويل من زمن طفولتي الجميلة

كان كوجي كابوتو و مش عايزة اي تريقة

فارس احلامي المنتظر بعصبيته بتسرعه

برعونته بتهوره كله حلو هو صح الكارتون

غريندايزر و البطل دايسكي بس عندي بلا

دايسكي بلا ديسك كوجي و بس ..

طبعا بتقولو ايه مناسبة المقدمة اللي مليانة

هبل طفولي دي صح ؟!..

انا هقولكو اصل و مع اجازة الصيف و كمية

الافراح المهولة اللي بتكون فيه هتكلم عن

مواصفات فارس احلامي بس مش عندي

عند الناس اللي حواليا يعني العريس اللي

العالم مفصلاه ليا ..

هبدأ بنوراة حياتنا ماما بعيدا بقى عن انه

كانت مؤمنة بطريقة رهيبة اني هتجوز بعد

الجامعة لدرجة لما تتكلم تقول في فرح بنتي

السنة الجاية او فرح ريم بعد ماتتخرج لدرجة

خلتني اشك انها مظبطة موضوع من ورايا

و العريس هيشيل و يمشي .. ماما شيفاني في

زواج تقليدي جدا جدا و عريس من محيطنا يعني

و فرح بطقاقة ( و اعرفو معنها بقى ) و فستان

بفخامة بتاع ليلي علوي في حديث الصباح و المساء

و مسكة ورد كبيرة و طويلة و ميك اب قوي و

طبعا ده عكس تماما فكرة و تخطيط ريم بس

مش بجادل و سايبة الامور تمشي بطبيعتها بكرة ..

........

صحباتي بقى بما اني طبعي هادي و عاقلة مع

الناس و حكيمة على قولتهم شايفنلي احسن حاجة

عريس رزين جدا جدا و عاقل و منتهى الجدية

يعني ماشي على المسطرة و الورقة و القلم

و طبعا ده في قاموسي راجل يخنق و يدفن الواحدة

بالحيا انا بعشق الراجل المجنون يعني كدة

اتجوز واحد يجي في عيد زواجنا ال 50

يقولي تعالي نروح الملاهي من كتر جنانه راجل

حي .. متجدد .. مجنون تحس بروح الشباب

فيه دايما طبعا معايا انا بس ..

........

نجي بقى للسن و خلوني افش خلقي معاكو بما

اننا كلنا عشرنيين الكل شايفلي الراجل التلاتني

انسب شيء ليا من و انا في نهاية ثانوي قال

نضجه يناسب هدوئي و ركازتي اللي ماحدش

عارف اني عكسها خالص في البيت مع اهلي

افتكر اول مافجرت و انا في ثانوي قنبلة اني

اكتر من 22 سنة ماينفعش ليا يالهوي على رد

الفعل و و انا تالتة جامعة برضو قولت اكتر من

28 ما ينفعش صحباتي اعتبروني مجنونة وقتها

المشكلة انه ماحدش يعرف اني مش بميل للرجل

التلاتني ابدا مش بقدر اتخيله زوج بصراحة الا

اني اكون انا و صلت للسن ده بحس الراجل

التلاتني رائع في كل جوانب الحياة الا الزواج بحسه

بيبقى فيه ممل و روتني لاقصى درجة و اسير بشكل

رهيب للعادات و التقاليد و كلام اهله سواء اللي بيقولو

ينفع او ما ينفعش لدرجة كدة تحس عنده مجلد كبير

للعادات دي لو قولتي حاجة هيروح يفره و يشوف

المجلد بيقول ينفع ولا ما ينفعش ده غير انه بيبقى

متصور لانه في مرحلة مستقرة نسبيا عن العشريني

انه عريس لقطة بقى و ما يتعيبش ولا يترفض عشان

جاهز و عنده الفلوس اكتر ..

طبعا اكيد مش بعمم خالص يعني بس بصراحة دي

نظرتي للراجل التلاتيني الي الكل شايفه انسب لي ..

........

الكل شايف انه عريسي لازم يكون كامل بكله و مجهز

كل حاجة من الابرة للصاروخ و لازم مستوى مادي

مبسوط يمكن لاني مش بتكلم كتير عن متطلباتي

انا مش رومانسية بطريقة خبزة و ملح و اعيش على

حصيرة بس كمان مش متطلبة ماديا مش عشان حاجة

بس لاني مقتنعة فعلا انه المال مهم لكن لا يجلب السعادة

و اعرف كويس جدا ايه معنى زوجين في مستوى مرتاح

جدا بس مش طايقيين بعض الحياة بتبقى تعيسة من غير

الفة وحب و تفاهم حتى و ان وجد المستوى المادي الطيب ..

*****

مش عارفة بقى بكرة هتزيد التفصيلة بإيه و تنقص في ايه

و ياترى هتكشش قد ايه و تتعرض قد ايه اهم بيفصلو ..

منمنمات ..

عالمي الذي اصبح ملكك و ليس ملكي

بعدما كنت انا من اسيره كيفما ارى ..

ان تأسر عالمي و انت حاضر منطقي اما

ان تأسره و انت غائب فهو صعب ..

في غيابك كنت اظنني استعدت سلطتي عليه

فهذا ما كان يبدو لي طوال الوقت الى ان اخلد

لوسادتي و اتذكر احداث يومي بين موقف

مضحك و مشهد مبكي و امر مبهر و غريب

اجدني قد استحضرتك في كل ذلك فمع ضحكاتي

اسمع ضحكاتك معي و عند حيرتي و اندهاشي

اتخيلك تحلل الامور لي و عند تحجر دموعي

اجدك اليد التي تحتويها لتسقط و هي تشعر بأمان..

و اغفو و انا افكر و انا اتخيل

اهذا كان ليسعدك .. ام هذا كان ليغضبك ..

اهنا كانت ستثورغيرتك .. اهنا لكان و كان و ..

و حتى اخر لحظاتي استيافظي ايها الغائب انت حاضر ..

و استسلم للنوم ليكتمل حضورك في احلامي ..

.. سيستمر الكلام و قد يكون للحديث بقية ..

الاجازة ..

مع انه فاضل لسه حوالي الاسبوعين عندنا

على امتحانات اخر السنة الا انه الدنيا

بقت زحمة اوي و بدأت بوادر الاجازة ..

و بما اننا مدينة على البحر مولات و منتزهات

اسعارها مناسبة عن باقي المدن فالمنظر اللي

في الصورة شي مسلم بيه فترة الاجازة ..

بجد الفترة دي ببقى نفس اهج من مدينتي و

اكره ما عليا اني اخرج من البيت في الزحمة

و الصخب اللي بره ..

بيقولو انه الاجازة راحة و استرخاء و تجديد

طاقة لعام جديد او العمل من جديد بس بصراحة

انا بقول الاجازة ماهي الا صيف و قرف وزحمة

و حر وشمس و زبايل الناس مرمية في كل حتة

و معاكسات و غلاسة و كمان في افراح في العيلة

يعني فستان و شعر و مكياج و سهر و صخب

و ازعاج و مجملات و كدب و ... الخ .

حقيقة بعيدا عن اني قاعدة في البيت و كل ايامي

اجازة بس مش عايزة تيجي الاجازة و لو ربنا

كرمني و اشتغلت لو اهلي ما استقوش عليا

مستحيل اخد اجازتي في ايام الاجازة ..

منمنمات ..

قطرات ندى الصباح المتراكمة على نافذتي ..

شعاع الشمس الذي يتجول في حجرتي ..

نسيم الصيف الذي احيانا يداعبني ..

حتى كوب الشاي الاخضر الذي دوما يرافقني..

و غيرها من مسلمات حياتي لم تعد سوى

كلماتك .. همساتك و دوي ضحكاتك ..

ضحكاتك التي اعجب شدة حبي لها ..

انت مجرد شخص طرقت بابي يوما

فسلبت بعفوية مسلمات حياتي

و توقف الزمن في عالمي ..

.. سيستمرالكلام و قد يكون للحديث بقية ..