اليوم حسيت انه وحشتني الكتابة هنا اوي بس
مالقتيش حاجة في بالي عايزة اكتبها حاولت مرة
و اتنين و النتيجة هي هي مالقتش حاجة خالص
ولاني كنت عايزة اكتب حاجة جد او خاطرة حلوة
قولت ارجع لصندوقي و ارشيفي يمكن الاقي
شيء قابل للنشر و من اقصوصة لورقة لدفتر
راحت ايدي على اوتجرافي القديم اللي بقالي
سنييين ناسياه قولت افتكره و فتحته .......
عندي وحدة من صاحباتي لما تقابل وحدة زمان
ماشافتها تاخدها بالحضن و تقعد تطبطب جامد على
ظهرها اكنها بتنفض حاجة وتقعد تقول غبااااااااااااااار
و هي بتضحك و تعمل انها بتكح
ده حال الاوتجراف لما فتحته غبااااااااااار وهمي
و حسيته قدم خالص و الاوراق بعضعها قرب
يتمزع و ريحة الورق اتغيرت و الخطوط مش
قادرة افهمها من خربشتها يااااااااااااااااااااه ......
عارفين حسيت اول مافتحت الاوتجراف عمل
زي كتاب سحري في فيلم كارتون قاعد يخرج
الحاجات اللي جواه و هو بين ايدي شي اسم
و شي موقف و شي تاريخ بس انا ماقدرتش
استناه يطلع اللي جواه لوحده نسيت نفسي و فضلت
اقلب و اقلب و اقلب في صفحاته كاني بجري
جوا الاوتجراف و بشوف ناس قديمة اكيد
دلوقت اتغيرت بس حسيتني بقابلهم من تاني
بشوف صحباتي و احنا صغيرين اللي بظفيرتين
و اللي ديل حصان و اللي شعرها سايب
مدرساتي اللي كانت شديدة و اللي بتصتنع الشدة
و اللي حنينة و اللي طيبة كان نفسي لو ينفع اخرج
الايام دي و الشخصيات اللي في الاوتجراف و ارجع
اعملهم من تاني زي لعبة البازل كدة لحد ما الصورة
تكمل بيهم قدامي و ارجع اعيش اللحظات و الايام معاهم
الشقاوة و البراءة و القلوب الصافية ..........
عارفين احنا بجد كنا اطفال مساكين اطفال اليوم بيضيع
عليهم كتير يمكن في نظرهم كنا هبل و سخفة بس ده
من الذ مافي مراحل الطفولة .. ايوة السخافة دي بتبقى
جميلة اوي لما نشوفها دلوقت و قد ايه يكفينا تعبير
بسيط وغريب نحس بيه اننا محبوبين من اصحابنا
جدا .. طب اثبتلوكو .. لا
ولا خلي ذكريات اوتجرافي هي اللي تثبتلكو ..
اتمنى لك الفوز .. و انتي تأكلين الموز
اتمنى لك النجاح .. و انتي تأكلين التفاح
هل انت جميلة ؟
هل انت عطوفة ؟
هل انت رقيقة ؟
نعم انت جميلة
نعم انت عطوفة
نعم انت رقيقة
اكتب لك بالاحمر علامة الحب الاكبر
اكتب لك بالمائل علامة الحب الهائل
اكتب لك بالمقلوب عللامة الحب في القلوب
اكتب لك بالرصاص علامة الحب و الاخلاص
نظرت الى السماء فوجدتها صافية
و نظرت الى ريم فوجدتها غالية.
ذهبت الى الحديقة فالتقيت زهرة حمراء
فقلت من هذة الزهرة الجميلة فقالوا لي
الازهار: هذة زهرة ريم .
ايه صدقتوني ده حتى بكتبها باللالوان بس اظن كفايةكدة
اه نسيت كمان طرف الصفحة اللي بنقفله ونكتب
عليه لا تفتحيها .. و جوا نكتب شوفتك فتحتيها
او قولت لكي لا تفتحيها ..
الله على زمان ...
