الشوق الغائب ..

دي مجرد محاولة بسيطة اجرب بيها ارجع

اكتب خواطر باللغة العربية ..

لم تكن يوما القسوة من طباعها و لم يكن يوما

الغياب و البرود من عاداتها ..

هي قد تسبب حيرته .. او بالفعل سببت حيرته

و ذهبت بعقله إلى افكار خاطئة ..

هي تعي كل الاحتمالات الواردة من جراء حالتها

هذة و لكنها تؤثر البقاء الآن على ماهي عليه

.. تؤثر هذا الصمت و الفتور ..

لاتسعى لحيرته .. او حتى ان تذهب

بعقله في رحلة من الاحتمالات الخاطئة ..

فقط احست الآن انها صاحبة كل المبادرات

.. صاحبة السبق و الوجود الاول في كل

الاعياد و المناسبات و افعاله لم تعد سوى رد

فعل لمبادراتها ..

قد تكون ساهمت في اعتياده ذلك لكنها الآن

تحتاج ان يبادر بذلك الشوق الغائب .. تحتاج

ان يفتقد وجودها و يبادر للبحث عنها .. ان

يعيد إليها الآن حالة الحب و السلام التي

كانت تعيشها معه ..

ليست انانية او مدللة او لا تجيد مراعاة و

تقدير الظروف كما يبدو و هو اعلم بذلك..

فهي تدرك جيدا ماهو فيه وتحترم انشغالاته ..

و لكنها تشتاق لكي تكون من ضمنها .. لا

ان تشعر انها آخر المهام في لائحته .. و

لا تسعى ان تكون اولها بل فقط من ضمنها ..

قد يكون من العدل ان تخبره بكل ما في

داخلها و تصارحه بكل احتياجاتها و لكن

كيف سيسمح لها كبريائها ان تطلب

إهتمامه ؟! كيف تسأله امورا هي تدري ان

كل آدم يعي احتياج حواء لها ؟! ..

ربما سبب كل ما يحدث هو انه لا يعرف

انها لا تحتاج الى الجهد والوقت الكبيران

كما يتخيل .. او حتى اطنان من الرسائل او

ساعات من المكالمات .. هي فقط بضع

دقائق او حتى ثواني من وقته التى تحتاج

اليها .. فهو بعبارة او حتى كلمة قد يطفئ

في ذات الآن حيرته و شوقها .. هو لا يعي

ان كل احتياجها منصب في شعور واحد ..

انه مهما حدث اوسيحدث فلتثق دائما انه سيكون

.. موجود ..

ماضي ، امنيات و تطلعات ..

كل سنة هجرية و انتو طيبين

السنة اللي مظلومة و دايما المسلمين ناسينها .

في موجه الاحتفال و التطلعات للسنة الجديدة

قررت انا كمان اعمل بوست عن السنة الجديدة

و اهدافي و امنياتي فيها ..

ماذا حقتت في العام الماضي :

- على الصعيد الشخصي حاجات كتير اتغيرت

في شخصيتي يمكن بقيت اقوى و بقيت اقسى

شوية مع الناس ما بقتش معطاءة بهبل زي الاول ..

الحاجة الجديدة اللي دخلت حياتي و هي مدونتي

اللي بقيت بحبها اوي و بقيت بعتبرها صديقة

افضفض و احكيلها عن اللي في بالي..

- على الصعيد الاجتماعي :

ناس كتييير اكتشفت معدنها السنة دي و ناس

كتير كنت فاكراهم حاجة و ينشد بيهم الظهر

طلعو ولا حاجة و فيه اللي افتكرت علاقتي

بسيطة معاهم وطلعو صحبات بجد عموما بقيت

اقدر على الاستغناء عن اللي بحسهم

وجودهم مش لازم في حياتي ..

- على الصعيد المهني :

مازال البحث عن وظيفة جاري و مازلت

مقضياها كورسات ..

************

امنياتي بقى للسنة الجديدة :

- انه ربنا يوفقني بوظيفة كويسة احس

اني بعمل حاجة متميزة فيها .

- اني استمر مع سري الجميل و هي مدونتي

و احكيلها و اكتبلها .

- اني اخس الكام كيلو دول و اخلص و ابقى

سمباتيك و انهي حالة الحرمان اللي بعيشها .

- اتمنى اتأكد تماما من حاجة في بالي عشان

اطمن بقى و احس بامان شوية .

- انه اهلي يفضلو بخير و سعادة دايما .

- نفسي بجد الحروب تخلص و نفسي

العصبية القبلية العربية تموت و نبقى ايد

وحدة ( ده حلم طبعا ) .

- انه كل الناس اللي بحبهم و يحبوني

امنايتهم تحقق السنة الجديدة .

- مش عارفة ليه عندي احساس خفي اني

هتخطب كم مرة وهرفض و رفضي يخلق

صراعات مع اهلي و ماما بالذات مع اني

كنت فاكرة اني هتمنى اتزوج و اكون عيلة

سعيدة مع زوج يخاف الله بس لقيتني جديا

مش مستعدة للخطوة دي و لو حصلت قبل ما

اشتغل و اعمل حاجة لنفسي و ماقدرت اوفق

بين الاتنين هحس انه الزواج دمر حلمي فعلا

( ربنا يكتب اللي فيه الخير )

و اخيرا اتمنى انها تكون سنة خير و سعادة على الجميع

في عالم المدونات ..

فكرة لبوست قديمة و كتبها كتير قبلي

بس برضو حبيت اكتبه .. حبيت اكتب عن

بعض الشخصيات اللي عرفتها عن طريق

عالم التدوين..

رغم اني ماعرفهمش شخصيا بس في رابط

غريب اتولد معاهم لمجدر اني بقرا مدونتهم

و بشوف افكارهم في كتابتهم ..

**********

.. سوسن او مس سوسا ..

اول مدونة تقريبا ادخلها و اول مدونة

ضحكتني و خلتني ادمع كمان

صاحبتها بنت لذيذة اوي شخصية

دمها شربات بس تحس انها في الحياة

جدية اوي واضحة اوي و حنونة اوي

و مدونتها مهرب ليها في حياتها و مكان

فضفضة بالنسبة لها من اللي مش بتقدر تقوله

يارب تنول اللي تتمناه و تبقى احلى عروسة

بحس اني بقيت استنى اليوم ده اكتر منها

مش عارفة ليه ؟ ..

.. الغزالي ..

اول مدونة احبها و اكرهها في نفس الوقت

بتتعبني جدا و بتجيبلي الصداع لأني بقراها بكل

كياني و كل عقلي عشان اقدر افهم كتاباته

و اقول لنفسي على ايه مش راجعلها

تاني بس برجع ادخلها تاني ..

بشوف صاحبها شخصية صامتة جدا بيقول المفيد

كلمة و رد غطها مش بيحب يزود في الكلام

بحسه زي العابر على المدونة بتاعته فكرة حب

يطرحها يحطها و يراقب من بعيد ردود الافعال ..

.. انسان بلا عنوان ..

مدونة صاحبها بخيل شوية في المواضيع

بس حلوة متنوعة تحكي عن اللي بيكتبها احيان

كتيرة .. كاتبها شخصية بحسها رومانسية

اوي و العاطفة بتاخده جدا مش عارفة

في الواقع هو ازاي لكن من روح مدونته اتوقعته

اصغر من سنه عنده وعي و نضج كبير

و روح فكاهة و حزن يعني جامع من كل حاجة..

.. شيماء علي ..

مدونة عميقة و بسيطة بشوف صاحبتها تتمتع

بنضج عالي جدا بشوفها انسانة راقية

جدا من الطبقة المخملية او برنسيس زي

ما بيقولو حاجة كدة في منتهى النعومة زي

مدونتها سلسة جدا لكن عميقة تدفعك لأنك

تدخل جواها عشان تعرفها اكتر و بتندم

لو عرفتها متأخر ..

.. استاذ نورالدين ..

شخص مبدع بمعنى الكلمة خسارة لو

قلمه ظل فقط حبيس المدونات ..

مدونة هي تاني مدونة اكرهها و احبها

بس هو اخف من الغزالي يعني في بعض

الاحيان بيراعي العقليات البسيطة زيي

و بتبقى لغة مدونته سهلة بس بحب انه

بيدفعني افكر بعمق اكتر و احاول افهم

ما و راء الكلمات ..

مش عايزة اتفهم غلط بس اغلب الاحيان

لما بقراله ببقى بضحك او ابتسم بحس روحه

في كتاباته لدرجة اني بتصور وش كاتبها

يعني لما يبقى رايق بشوف وش رايق و مبتسم

و انا بقرا لما بيبقى في حالة الهام بشوف

شخص كدة في حالة الهام بيبص للسما او

ممكن ساند راسه بصباعه يعن زي الشعراء كدة

و لما بيكون متعصب بشوف وش احمر و بيزعق

و هو بيتكلم و عروقة باينة .. مش قصدي سخرية

و الله بس مدونته مدونة بقراها بالصوت و الصورة

كشخص بحترمه فوق التصورو لو كان ليا اخ اكبر مني

اتمناه زي شخصيته بنفس الحزم و الهدوء

و العقل و الرزانة و اللين و خفة الظل احيانا ..

.. ليساندرا ..

بعتبرها توأم الاستاذ نورالدين مش عارفة

ليه ؟ بس بلاقيهم شبة بعض اوي

حتى مدونتهم رغم انه مدونتها ابسط شوية

عمري ما علقت يمكن غير مرة واحدة

و ماكانش بايدي مشاعري غلبتني

مش عارفة ليه بخاف منها و من مدونتها

رغم انه ما فيهاش حاجة تخوف لكن

بحب اقرا من بعيد و اجري زي ما بيقولو

لكن اعلق كانت خطوة كبيرة اوي ..

.. انا حرة او بنت مصرية ..

اكتر مدونة بدخلها و انا رايقة و مطمنة

مدونة بسيطة و جميلة منتهى السهولة

و السلاسة و ده اللي ميزها ..

افكارها عميقة و واقعية لكن بمنتهى البساطة

مش كتير بيعمل ده بتحسها بتكتب بداخلها

لما تكتب بوست وهي متعصبة ببقى

عايزة اقولها بالراحة خرمتي الكي بورد

من كتر ما احساسها بيبان ..

بلاقني فيها في حاجات و مختلفة عنها برضو

اكتر حد مش بقلق لو اختلفت معها لأنها

فاهمة انه اختلاف فكر مش اكتر مهما

بلغ الاختلاف .. بحسها شخص مرح

نوعا ما و بتحب الضحك و رومانسية

اوي و طفلة بمعنى الكلمة بس جواها مش

بتحب توري ده للناس او يمكن مش لاقيه

فيهم اللي يفهم الجانب ده فيها فبتبان جدية كدة

وعنيدة رغم اني بحسها غير كدة خالص ..

**********

احلى مافي عالم التدوين انه علاقاتك مع

اللي فيه سطحية فعلا لكن في عمق تاني غير

اللي بيكون مع الناس اللي في الحياة و

يمكن ده اللي شدني للمدونات لاني فعلا

الفترة دي مش حمل اعمل صداقات لكن

محتاجة في حياتي ناس مختلفة فكر تاني

وجهات نظر جديدة و اسمع كلام غير بس من

غير الرابط اللي يإذيك لو انفصلت عنهم..

يمكن عشان كدة مافيش ولا حد في حياتي الواقعية

يعرف مدونتي و مقتصرة على الناس اللي

في النت و حتى مش كلهم مع انه المفروض

اقولهم يدخلوها لأني بشتكي كتير انهم مش

فاهمني بس لو دخلو مدونتي هيفهموني كويس

لكن مش قادرة اسمح بده يمكن لأنه دلوقت

لو اختلفنا بعذرهم لكن لو فهموني

مش هيبقى في شيء اعذرهم بيه فده

هيخليني ابقى اشد و اقسى عليهم و توقعاتي

منهم تبقى اكتر من اللي يقدرو عليه ..

بجد مش بس اللي ذكرتهم هما اللي مهمين

و بحب مدوناتهم في عالم التدوين في كتير والله

و مش تجاهل ليهم لكن البوست ده طويل اوي

و مش هيستحمل يبقى اطول لكن ناس

كتير لمدوناتهم مكان مهم عندي و فكرهم

رائع بالنسبة لي ..

اهو كلام و بس ..

لا تبكي على أي علاقة في الحياة لأن الذي تبكي

من أجله لا يستحق دموعك فالشخص الذي

يستحق دموعك لن يدعك تبكي أبداً..

******

لاتحمل على عاتقك سوى هماً واحداً فبعض

الناس يحمل ثلاث هموم..

هم مضى.. و هم يعانونه الآن..و هم يتوقعونه..

******

عظَمة عقلك تخلق لك الحساد ..

وعظَمة قلبك تخلق لك الأصدقاء..

******

تكلم وأنت غاضب .. فستقول اعظم حديث

تندم عليه طوال حياتك..

******

اذا توقفت الحياه في اعيننا..

فيجب ان لا تتوقف في قلوبنا...

فالموت الحقيقي هو موت القلوب ..

******

لا تــــــــــــبكــي على حبيباً رحل وخلفك أشلاء

مهشمه فلا بُد من وجود شخصاً آخر يلملم تلك

الحطام التي خلفها الحب السابق ..

******

عظَمة عقلك تخلق لك الحساد ..

وعظَمة قلبك تخلق لك الأصدقاء..
******

الندم لمن عرفوا الحب والاسف للذين لم يعرفوه..

******

يسخر من الجروح كل من لا يعرف الألم..

******

الابتسامة كلمة طيبة بغير حروف ..

**********

دول مختارات لبعض الكلام لناس مش

عارفينهم او شوية حكم زي ما بنحب نسميها ..

بنقراها في حالات مختلفة و بتوجد جوانا

احاسيس مختلفة ..

مرة بنقراها و نحس انها صح و بناخد بعضها

شعار لينا .. و مرة بنلاقي من غير ما نحس بترتسم

ابتسامة خفيفة على شفايفنا او حتى ضحكة بقرايتها ..

ومرة بنقراها بحزن و جملة فيها تنزل دمعتنا ..

و ممكن نقراها و ما نحسش باي حاجة فيها .

بس الغريب و اللي بيكون الاغلب

اننا نقراها و احنا عارفين ان الكلمات

اللي فيها صح و مع ذلك نحسها ضحك على

الدقون و اهو مجرد كلام ..

عساكم من عوادهـ ..

عيد سعيد على الكل و كل سنة وانتو طيبين

و اللي بتحبوهم ويحبوكو بس

و جميع المسلمين و تدوم ايامنا

بالفرح و الاعياد ..

بس عشان خاطري بالراحة على الخروف وانتو بتدبحوه

بجد كان نفسي احضر الدبح زي زمان بس

ما ينفعش و ارجع اقول ربنا رحمك فاكرة نفسك

قوية زي زمان دول هيحتاسو في الخروف ولا فيكي ..

شكلي خلاص بقيت نعنوعة من نعانيع دلوقت

و هيغمن عليا لو شوفت الدم في الدبح

فاعلى ايه خلي الامور في الستر..

وعساكم من عوادهـ ..

و لسه مش عارفة اخرتها ..

من ساعة ما بدأت البحث عن عمل

و ده اللي شاغلني عن المدونة الفترة دي

و انا كل مرة ليا مغامرة و بهدلة شكل ..

روحي وتعالي و اتصالات و لطعة بالساعات

و لما تجي موظفة كمان بتدلع و تمهيص على

حسك كأنه مافيش ناس متعطلة بسببها و خروج

بابا من الشغل و التوصيل و التهزيق و النصايح

طول الطريق لحد ما الواحد قرب يطق او طق فعلا ..

اخر مغامرة ليا كانت النهاردة الساعة 3 العصر

سمعت عن وظيفة ما وقولت اروح اقدم و طبعا

اللي شال الحمل بابايا الصغير الي هو اخويا

اللي اول ما رجع نزلت و روحت معاه حتى قبل

مايدخل البيت ..

المهم بدايتها كان وصف العنوان حسب ما الست وصفت

طبعا الوصف شيء و العنوان شيء و الحمدلله كان

اخويا عارف المنطقة و العمارة تحتها محلات مميزة

ماتتوهش ..

و قفنا قدام عمارة قديمة و معفنة ومدخل صغير

و مظلم اخويا بص على العمارة و بصلي من سكات

قولتله ايوة انزل معايا و نزلنا و دخلنا العمارة المشبوهة

بجد شكلها زي الكهف و دهاليز كتير و ابواب و مافيش

طيف بني ادام مع انه في اصوات و اغلبها مكاتب

محامين و طول ما احنا ماشين و اخويا عمال يقولي :

ياريم انتي متأكدة في تقديم في المكان ده اقوله : اه

يقول : طيب و نفطس ضحك ..

ركبنا الاسانسير و ده لوحده حكاية

لما بيتقفل بيطبق عليك كأنه بيقولك وحياة ربنا ماانا

سايبك و طبعا مظلم اخويا يرجع يسأل :

ياريم انتي متأكدة في تقديم هنا . اقوله : ايوة

و نضحك تاني ..

طلعنا الدور التاني مكتب 26 طلع الدور كمان

غلط يرجع اخويا يسأل نفس السؤال و ارد عليه

بنفس الجواب وبرضو نضحك ..

قولنا نطلع الدور التالت و فعلا دخلنا في حضن

الاساسنير و طلعنا و لقينا مكتب 26 كان مقفول

بيبابين باب خشب زي باب اي شقة و باب

زجاج وحديد اخويا رجع سأل نفس السؤال و طبعا

رديت عليه نفس الرد و نفس الضحك ..

ضربت الجرس فتحتلي وحدة طبعا المكان نسائي

ممنوع دخول الرجال بس مين اخويا وقف قدام

الباب و اشرف على المكان بعينه و بعدين دخلت

و فضل هو قدام الباب مستني اي حركة و ينقض ..

بعد ما دخلت بقى سألت عن التقديم للوظيفة اللي

المفروض انه تبع شركة كبيرة للمجوهرات و ناوين

يعملو فروع نسائية اديتني استمارة سخيفة حتى

لوجو الشركة مش موجود عليها ولا طالبين سيرة

ذاتية ولا حاجة حتى نمرتي مش طالبينها

هنا دخلني الشك بس قولت و ماله نكمل مع المكتب

ده و طبعا طول القعدة و بتحاول تقنع فيا و كلام كتير

و انتي جيتي عن طريق مين و اه دي مسجلة عندي

هي و اختها و تنادي على فلانة يافلانة مش فلانة

دي مسجلة عندي هي و اختها و هي تقولها : اه

المهم يعني منظر وحركات انهم مكتب ثقة ..

و جينا للبند المهم الشركة بتاعت الدهب

و المجوهرات دي المفروض هتدينا كورس

مبسط لمدة اسبوعين عن التعامل مع الدهب وكدة

اللي بتبقى في اي وظيفة مجالها محدود و بتكون

يا اما مجانا او بسعر رمزي جدا

تخيلو بقى رسوم الكورس 1200 ريال تقريبا

و اخر بند انه هما مش ملزمين برد المبلغ في

اي حالة لو ماخدتش الدورة و الدفع فوري

في نفس الوقت للمكتب ده رغم اني لا شوفت

مكتب الشركة الاصلي و لا عنوانهم فين

و رغم اني اتصلت عليهم قبل ماجي و استفسرت

عن الوظيفة لكن ما جابتليش سيرة رسوم الكورس

عرفت بقى انه الموضوع غالبا نصب في نصب

و اساسا من اول ما شوفت المكتب قولت بقى وحدة

من اكبر شركات البلد في الدهب و المجوهرات

مالقتش الا مكتب التسويق ده يعلن عن وظايفها

بعد كدة طلبو مني صورة من بطاقة الشخصية

و ما كنتش جايبها فخرجت لاخويا اللي اتحرك مع اول

حركة و قولته انزل المكتبة اللي تحت و اعمل نسخة

و راح لقاها مقفولة قولتله اقولك بينا على البيت

دول شكلهم شلة حرامية و نصابين

و خلعنا من العمارة المشبوهة دي و مش ناوينلها عودة

خالص ..

....

اول مرة اكتب بوست من غير عنوان

لاني فعلا مش لاقية عنوان ..

اكتر حد بيفهمني و يمكن الوحيد اللي

بيفهمني بيحس بيا اوي و يعرف يتعامل معايا

معاه ببقى على طبيعتي خالص مش

شايلة هم هيقول ايه و هيحاسبني على

ايه ؟!..

دايما بقولولي ليش بتدلعيه و ارد و اقول

قصدكم تقولو ليش ما ادلعه ..

معاه بحس اني بتنفس .. ايوة بتنفس

بعمل كل حاجة محرمينها عليا بحكم

اني الكبيرة و القدوة و الكلام ده

بحس معاه انه من حقي اضحك

ازعل اتعصب اصرخ وهو عادي

بيفهم كل ده و بيحتويه لما اتعصب

او ازعل بيدين الحق ده عكس الكل

بيسبني افرغ شحنتي اتكلم اقول اللي

عايزة اقوله بيسمعني بصمت و بضحكة

صغيرة و نكتة يخرجني من الحالة دي في

ثواني .. و لما اضحك او حتى استهبل عادي

بيسوق الهبل معايا مش بيحسسني انه عيب و

مايصحش و اني لازم اكون اعقل من كدة ..

لما بقعد معاه بكون مرتاحة اوي مش بيلومني

على حاجة ولا بيحسابني زي الكل.. بيقولي ياريم

دايما اعملي اللي انتي عايزة بطلي تشيلي هم

الكل و تدايقي نفسك اهتمي بنفسك وبس بطلي

تزعلي نفسك ..

الوحيد اللي بسمع كلمته حتى اكتر من والدي

مش بجادله لما يقولي لا على حاجة لانه

عمره ماقالها و جادلته الا و طلعت فعلا في مصلحتي

لا هي لا انا الولد و انتي البنت لانه مش عقليته

خالص ولا تربيتنا من الاساس و ده عنده تخلف

ولا هي لا تحكم وسلطة لانه بيعاملني زي البرنسيسة

فعلا و طلبي و رايي و كلمتي عنده مسموعة جدا

عنده البنت احسن من الولد كمان والست ممكن تفهم

احسن من الراجل عشان كدة لازم مشورتي انا و ماما

في كل شيء بيعمله و اغلب الافكار اللي في دماغه

فبقيت بثق في انها لا لمجرد خوفه و حرصه عليا

و انها فعلا لما بتتقال لمصلحتي وبس ..

رغم انه بارد اوي في مشاعره و كتوم ليها جدا

و مش بيظهرها لكن حنيته رهيبة جدا بتبان

في ابسط تصرفاته معايا في سؤاله عليا لو مش لاقيني

في تليبة لطلباتي .. حتى في رفضه اللي من تحت

لتحت لما ببقى عايزة حاجة و مالوش نفس يجيبها

بس لما بزن بيجي على نفسه واصعب عليه و يجيبها..

جناني حاجة رسمية عنده كفاية العيلة

بتاعت خمس سنين اللي فجأة و معاه هو بس بتطلع

و تصر على اللي هي عايزة بعند اطفال و هو

يضحك و يعملها لها بمنتهى البساطة و هو

بيبصلها بكل حنية .. ولو زعل في يالهوي الدنيا

بتسود عندي و ببقى زعلانة ومتعصبة لغاية

ما اشوفه راق و هدي و رجع مبسوط ..

فرحان عليا بطوله اوي ولاني قصيرة جدا

دايما يعدي من جنبي بكلمته :

( الطول عز الحمد لله الواحد طويل )

لكن على مين دايما برد عليه ( تطول تعرض انا

الكبيرة و بخمس سنين فرق ) يضحك ويمشي ..

بس جوايا بحسه الكبير وانا الصغيرة فعلا كبر

عليا مش بطوله لا بمواقفه اللي كل واحد فيها

بيحسسني بالراجل اللي جواه واللي استند عليا

رغم انها بسيطة جدا و يمكن بيقول اللي بيقوله

بضحكة او عصبية بس مش بيعرف تأثير كلامه ..

منها اذكرله اول مرة اختلف معاه بشدة

يوم ما جاتني فرصة عمل في مكان ما

مختلط و كانت اول فرصة شغل ليا

من بعد ما اتخرجت فكنت متمسكة بيها

اوي يومها رفض بشدة و قال ما لها داعي

شديت معاه و قولت : طالما ليا اب رايك ما

يهمني سكت وطنشني و مشي ..

بعدها روحتله اتكلمت معاه بهدوء عاتبته

باني بستند عليه يقوم يجي هو ضدي

قالي : انا مش رافض بسببك انا واثق فيكي

و انتي اصلا شرانية بتخوفي الرجالة الواحد

بيحس انك هتتضربيه من كتر ما انت ناشفة

معاهم الواحد يخاف يجي ناحيتك

بس انا رافض لانه انا ما ارضاش

بالفرصة المختلط دي لنفسي كيف اقبلها ليكي

انتي صعب استني فرصة غيرها و احسن

انا اول واحد اساعدك.. و فعلا اكتر واحد

بيغلب معايا في موضوع الشغل و التقديم

و بيمشي نظامه على مواعيدي ..

و قتها فهمتو وفهمت عقليته لا هو سي السيد

ولا مبدأ الراجل راجل و الست ست هو بس

اخ بيخاف على اخته اوي ..

وموقف طريف كدة لما تاخر هو و اخويا

الصغير في الغدا و انا كنت رايحة احط

لاخويا التاني سمعت كدة كلام من حوار بينه

و بين ماما قالتله خلاص ريم تحطلك و هو بيرفض

و جيت لقيته في المطبخ قولتله احطلك الاكل

فيها ايه قاللي ببساطة ( ليه لا انا عيل و لا انتي

خدامة عندي مو مستاهل الموضوع ) ..

مواقف صغيرة زي دي منه هي اللي حسستني

انه راجل بجد مش مستغل انه الولد في مجتمع

مديه الحق ده بكل مافي الكلمة من معنى

و حقه يتصرف زي ما يحب.. مواقفه هي اللي

خاتني اثق فيه .. احترمه اعامله كاخويا الكبير

مش الصغير ..و ما ارفضلوش طلب ..

تصدقو والله بحسد مراته اللي

ما بانلهاش اثر عليه لو عرفت تتعامل معاه

هتبقى سعيدة اوي .. اتمناه فعلا في الشخص

الي ربنا يختاره ليا كزوج بس بدون حتة المشاعر

اللي مش بتبان دي اصلي هنا ببقى ست تفاهة

بتحب المشاعر و الكلام الحلو..

اخر حاجة هقول بجد ربنا يخليلي هو و اشوفه احسن

واحد في الدنيا اشوفه ناجح ونال كل امانية ..

و افرح بيه عريس و ازفه لعروسته واحملها وصية

انها تحافظ عليه لانه بجد هدية ربنا ليها و احلى هدية ..

.. و طبعا اللي فوق في الصورة ده مش اخويا للمعلومية بس ..

حالة حب

غيم & هدوء & بحر & هوا

ده باختصار هو الشتا بيخلق جوايا

احساس جميل نوع من السكينة بافتقدها

جدا في الصيف ..

في الشتا كل حاجة بتبقى حلوة

الدنيا رايقة فاضية بما انه جدة مدينة

ساحلية و سياحية زي ما بيقولو و اقرب

منفذ للحرم فممكن تتخيلو شكل الصيف

فيها ازاي زحمة ودوشة وحرقة اعصاب

يمكن زي الحال اللي بيشتكو منه

اهل اسكندرية كدة .. لكن في الشتا

الوضع غير كل حد راح بلده الشوراع

فضيت نوعا ما ماعدا الويك اند طبعا حتى

اخويا فرحان بده جدا رغم انه جدة زحمة اساسا

بس بقى الواحد قادر يخرج يتمشى بهدوء ..

حتى السفر في الشتا روعة في الصيف

اي بلاد مليانة سياح لكن في الشتا بتقدر

تتمشى براحتك بتشوف البلد على طبيعتها

تندمج مع اهلها تشوفهم بطبيعتهم الجميلة

بتزور كل مكان فيها بجد بتعرف

تستمتع بالسفر فعلا ..

حتى الشاليهات اللي بيبقى غزو رهيب

عليها في الصيف بتبقى اجمل في الشتا

الشتا بيبقى روقان تتجمع انت و العيلة

الناس قليلة الا اللي عايز الهدوء

القلع مافيش بسبب البرد كله لابس هدومه

فبتضمن عينيك و عين ولادك مرتاحة

حتى البحر .. و ياسلام على بحر الشتا

الموج و الغيم والبرد و الهوا اللي بيلفح

الواحد و بيبقى متلج منه بس حلو

بجد من رحمة ربنا انه ناس الصيف دي

مش بتعرف حلاوة البحر في الشتا

مش بتخيل نفسي ساكنة في مدينة داخلية

و اتحرم من البحر خصوصا بحر الشتا..

بس احلى حاجة بحبها في الشتا

.. انا ..

فيه بعرف احب بجد و حب الشتا احلى

من حب الصيف على فكرة وده حتى

في الحب اللي بين اتنين .. في الشتا

بعرف احب نفسي احب اللي حواليا

احب حياتي .. فيه ببقى رومانسية اوي

و متعتي فيلم رومانسي و بوب كورن

سخن و هدوء البيت روعة ..

فيه كمان بعرف اوي احدد اهدافي

اقرب و افهم انا ايه ؟ و عايزة ايه؟ فعلا

و حياتي امشيها ازاي و شايفها ازاي ؟

بيبقى عندي طاقة اجابية هايلة في الفصل

ده .. حتى فرحي و شهر العسل و الكلام

ده نفسي اوي كدة يكون في الشتا

.. بجد فيه ببقى في احسن حالاتي ..

ده رغم انه فعليا من سنتين او تلاتة ابتدا

يكون عندنا شتا فعلا بدرجات تحت العشرين

و تحت الصغر كمان مش شتانا هو خريف غيرنا..

انا و الشتا حالة حب من زمان اوي

حالة حب .. بنسمة رقيقة بحسها مليانة حنية

.. بغيمة كبيرة بتشوقني لللي جواها و بتبخل

عليا بيه غالبا .. بهدوء و روقان و احساس

سكينة لذيذ كدة بيخليك تحلم .. بكوباية شاي

اخضر بالزنجبيل و البابونج لاطرافي المتلجة

و ياسلام لو في ايدي اروح البحر بيها ..

باحساس سعادة و راحة عجيبة مش بيعرف

يدهالي الا هو .. هو وبس طبعا

.. الشتاء ..

من رقص .. نقص ..

المثل ده عندنا بيتقال للوحدة لما بتبقى

مش بتتهد من كتر الرقص ..

يعني في كل فرح تلاقيها فوق الكوشة مع

كل اغنية شغالة هز .. كل ما تسمع لحن

عاجبها تلاقيها بتتتمايل وتهز ..

فبيقولولها من رقص .. نقص بمعنى هو

في الاخر شيء ماهو طيب فخفي على نفسك

الموضوع قديم شوية بس من شوية كنت

بتفرج على احدى قنوات الاغاني

ولا خلونا نتكلم بوضوح و صراحة

قناة مزيكا وجاه اعلان لهدى و بتتمايل

و زكي يا زكي .. سيبنا من هدى لأني كنت

بتفرج على اللي ورا هدى رجالة طول بعرض

و بشنبات كمان و اقفين يترقصو

ولا اجدعها بنات كليبات وفي تحسهم

رجال كبار معدين التلاتين .. ولا البرنامج

اللي فيه الاخ ماعرفش اسمه ايه .. اللي

فرحان انه اشهر راقص شرقي في

مصر و الناس بتيجي تتفرج عليه ..

و عشان ما ازعلش حد و يقوللي

بتتكلمي على مصر ليه و مالك ومالها

لاني بقيت بسمعها كتير.. كلنا في الهوا سوا

حتى هنا في الخليج بقى الموضوع بزيادة

افتح روتانا خليجية اشوف جلسات

الطرب الخليجي اتفرج على شباب

يهزو الوسط و الجسم زي اللبان

و الله اجدع من اجدع بنت خليجية..

و في العيد على البحر كمان مسابقات

رقص الولد يتمايل و يتميع في التوب

ولا بنت العشرين و يقولولي نحارب شباب

الكول ورقص الراب و الهيب هوب

و الله عليا يبقى كول يرقص راب

وهيب هوب و لا المياعة اللي بنشوفها

من اصحاب الثياب و الشماغ و العقال ..

بجد بقى حد يقولي

خير ايه اللي حصل ؟!

هو في ايه في الدنيا ؟!

اذا كان البنت لما ترقص كتير بيتقالها

من رقص نقص افهم يقوم الشاب

يهز الوسط ليه ؟!

مافي رقص للرجال اقرصوه لازم

الرقص بتاع الستات ده ؟!

يعني معلش ده اللي بيهز الوسط بالذمة

هيخرج ايه للمجتمع هتشكم مراتك

بكرة ازاي ؟! دي من اول خناقة هتقولك

روح بالله عليك و انت مش فالح غير

في الهز..

ابنك هتقولو عيب و خليك راجل و اعمل

ماتعملش على اي اساس ؟!

على اساس يلا اديله و شوف الرعشة ازاي

و لما يجي يتجوز يقولو والدك بيشتغل

ايه يقولهم رقاص هيتشرف بيك ازاي

بنتك هتربيها على القيم ازاي ؟!

ولا لما تيجي تتجوز بالذمة تتباهى

بابوها قدام زوجها وترفع راسها بيه

ازاي ؟! شبكتها هيكون طقم صاجات مثلا..

بجد مش عارفة اقول ايه بس انا محروقة

اوي و مقهورة موووت على الرجال دي

اللي اخرتهم بقت هز الوسط ..

و لسه يابنوتة تقولي لي مش بتحبي يقولولك

بقيتي راجل و انتي بمية راجل .. ماهو لما

الراجل يعمل كدة يا قلبي لازم عشان جدعنتك

و قوة شخصيتك تبقي راجل ..

براءة صندوق ..

قال : قولي احبك

قلت : و لكني فعلا قلتها

قال : و كيف لم اسمعها ؟!

قلت : قلتها في صمتي في شوق عيناي

بنبضات قلبي و لمسة يداي ..

قال : لكني اريد ان تسمعها اذناي ..

قلت : و الميزة في ذلك ؟!

قال : لكي اشعر حلاوتها و استمتع بها ..

قلت :و لكنك تسمع الجميع باذناك تسمع الكذب

والنفاق تسمع كل الوان السباب و رياء الناس

تسمع كل المجاملات و اعذب الكلمات فما

الذي سيميز كلمتي ان سمعتها بأذناك ؟! ..

قال : و انا ايضا

قلت : انت ايضا ماذا ؟!

قال: الم تقولي احبك

قلت : ولكني لم انطقها بعد؟! ..

اللي فوق ده عبارة عن خرابيش

بعنى الكلمة و ركاكة فظيعة وملل

في الاسلوب .. دي ماهي الا عبارة

عن قصيدة من اوائل ايام الثانوي

لقيتها صدفة من سنة ومت عليها من الضحك

اصلي افتكرت احساسي بيها اول مرة كتبتها

احساسي اني كدة عبقرية وشاعرة حساسة

فرحتي و انا باخدها لصحباتي و بيقروها

بانبهار و الله حلوة ياريم ..

لكن دلوقت بقراها و انا ميتة يااااااه

ايه الهبل ده معقول الواحد كان فاكر حاجة

بالعبط ده مهمة لا و كنت شايفة اني استاهل

عامود في مجلة او صحيفة اصلي مش اقل

من اللي بيكتبو ماهم بيكتبو زي الكلام ده

عامود مين ده انا لو حصلت هامش

على طرف المجلة كتير عليا ..

بس بجد عجبني احساس قد ايه الواحد

كان بريء كان عبط زي ده عبقرية

عنده .. كان حاجة تافه كدة تفرحه

مش زي دلوقت صعب حاجة تعجبه

حتى الفرحة بيستكترها على نفسه

و بقى يتفنن يلاقي ازاي الحزن

..

قررت ارجع ادور على الحاجات القديمة

جمعتها في صندوق كل ما اتوه وعايزة

ابعد عن العالم ارجع للصندوق ده

و ادخل العالم اللي فيه انسى نفسي معاه

اضحك .. ابكي .. اتريق المهم في الاخر

ارجع شوية لريم بتاعت زمان

شخابيط في الحب ..

x

في الحب و الحياة بحس الطرفين المفروض

يكونو زي الحرف ده يشتركو في

جزء من الحياة مع بعض و لو حصل تقاطع

في جزء تاني كمان هيتخنقو ..

************

الحب = الصبر

تصبر عليه لما ينشغل عنك او يبقى

بعيد في فترة .. تصبر عليه لما تبقى

متخانق معاه .. تصبر لما تصرفاته

مش على هواك .. تصبرعليه لما يبقى

اسهل قرار انك تنهي كل حاجة و تمشي

وتكمل حياتك تصبر لما يبقى كل اللي

في دماغك جملة ( انما للصبر حدود )

كدة يبقى اكيد انت بتحب بجد ..

بس اتأكد انه الحبيب يستاهل ..

************

من ضمن حاجات بيعملها الرجال وهما

مش واخدين بالهم انه ينشغل عن

حبيبته مرة وحدة و يفضل انه يفضى

مرة وحدة مع انه ثانية سؤال وقت

انشغاله عنها بساعة من وقت ماهو

فاضي لها بالنسبة لها ..

************

غالبا غلط البنت بيكون سببه او مقدمته كلمة

( انتي مش واثقة فيا ) المرة الجاية لما

تسمعيها فرملي وماتحاوليش تثبتي ثقتك

فيه انتي حبيتيه واديتيه قلبك و ده دليل

كافي على ثقتك فيه ..

************

من ضمن حاجات بتعملها الستات

وهي مش واخدة بالها ساعات انها

لما تحب او تتجوز بتنعزل عن كل حد

في البداية و تبقى عايشة كل وقتها

للراجل ده و لما الحب ما بيكملش او

تعدي فترة على الجواز تلاقيه هو

انشغل بحياته و ناسه حواليه و هي

لسه هتبني حياتها و علاقاتها بالدنيا

و الناس بعديه ..

************

زهقت من اسطوانة الشباب اللي عايز

بنت زمان و البنات اللي عايزة رجال

زمان .. طيب لما الطرفين بتوع

دلوقت وحشين ازاي عايزين بتوع

زمان و مش كدة يبقى احنا شبه

بعض و نستاهل بعض ؟!

اللي فوق اكيد مش تعميم هي بس شوية شخابيط

..