من فترة كنت عاملة اغنية فيروز انا لحبيبي رنة العيلة
بصراحة كنت بستمتع بمنظر اللي حواليا لما يكون
المتصل اخويا او بابا او خالي مع النغمة بتحس الكل
بيرد معايا و ياسلام لو كان اخويا بحس ودانهم بتكبر
ناحيتي زي افلام الكارتون و ترجع تصغر لما يعرفو
هوية المتصل بالنسبة لي ..
احنا بجد حشريين و نفسيتنا سودة ..
************
لما يتقدم عريس و يذكرو مميزاته و يقولو
ماشاء الله عليه متدين بيصلي و يصوم
طيب مش المفروض انه مسلم يعني لازم يكون
بيصلي و يصوم مش ميزة اكسترا يعني ..
************
احنا العرب مانعرفش نتناقش مع بعض نعرف
نشتم بعض نمسك لبعض على ذلة نردح لبعض
لكن نقاش حقيقي و جا وحاد لسه بدري على
ثقافتنا البسيطة ..
************
يمكن جيل احفادنا يقدر يعمل امة اسلامية
موحدة بس جيلنا لا اصل جيلنا لسه
بيحب يتخانق على اللي جدك السابع عشر
عمله مع جدي السادس عشر و نفتح الكتب
و ايوة الحتة دي اللي هذلك بيها و ايوة الحتة
دي اللي هشتمك بيها يبقى مش احنا جيل الوحدة ..
************
لما حد يكلمك او يجادلك باسلوب راقي و محترم
و انت ترد باسلوب حاد ووقح و يتخلل ردك
بعض العبارات الي متصحش اعرف انك
قليل ادب لا تقولي تلقائي ولا طبيعي ولا عصبي
ولا اللي في قلبي على لساني ولا صريح
انت بس حد قليل ادب
************
لما الراجل يقول لمراته شوفتي انا كويس
معاكي قد ايه و مش بضربك زي رجالة تانية
طيب مش المفروض دي من الرجولة انك
ما تضربش ست يعني..
************
مش عارفة فين الرومانسية او التضحية
في صور القلب اللي منزوع من الصدر
و الدم بيتساقط و يقطر
دي مش رومانسية دي قوف و وحشية
*************
تزعل هالدنيا و ماتزعل حياتي انا
بحب الاغنية دي رومانسية و اقصى
تعابير الحب للمرأة بس لو فرضنا
كدة والدته قالت لو اتجوزتها لا انت
ابني و لا اعرفك هيرضي مين ؟!
يبقى من الاول بلاش دقة الصدر
الجامدة بتاعت الرجالة و خصوصا
لما يبقو مش عارفين او مش قد نتايج
الموضوع ده ..
************
خد بالك عليا
من فترة اليسا نزلت الاغنية دي
و البنات هجمو عليها بشراسة و كل وحدة
بقى زعلانة من خطيبها او حبيبها او بعد
و اهمالها ياتهدي الاغنية دي ليه يا تعملها
رنة يا توقيع منتدى المهم في حاجة هو ممكن
يشوف الاغنية و تدقه بيها
بس اللي محتاج يفتكر قيمتك او قدرك باغنية
عيدي النظر في علاقتك بيه ..
************
استغربت لما دخلت مدونة الاخ محمد سلطان
و لقتيه في اكتر من مرة كاتب اغنية ليوري
مرقدي اصلي افتكرت اني الوحيدة اللي ممكن
اسمعه من ردة فعل اللي حواليا و انه ذوقي
زبالة و افتكر او ما جبت البومه ماما حاولت
تمنني مرة بالحزم ومرة بالمحايلة و جبيته طبعا
وقتها ماكانش فيه حمل من النت كتير
بس بتعجبني حالات اللعب البسيطة باللغة
و الكلمات المجنونة و الاحداث الملخبطة
اللي بتحكيها اغانيه صدقوني بتشبهنا اوي
رغم اني فعليا اتأثرت بكلام من حوليا
و بطلت اسمعه ..
************
لو كان في حياتك وحدة بتحبها
و حاسس انها بتحبك اعمل خطوة اولى
و قربلها و لو حسيت او اتاكدت انها
مرتحالك و في شعور ليك من ناحيتها
مهما تصدك او تبعدك اوعى تسيبها
لانه طاما خايفة على قلبها كدة يبقى
بتحبك لو خافت منك و بعدتك صدقني
دي عايزاك و بتحبك ..
************
وبموت فيه موت طول مانا وياه
ماهو معنى الحب لقيته معاه
وازاى انساه وازاى ينسى
وانا ليا معاه حكايات فى هواه
من ساعة اصالة ما حبيت و هي
قلبت طفلة قلبها ابيض و حابه
الحياة و الفرحة و هي كدة الانثى
لما تحب و تتحب بجد بتبقى
طفلة كلها حياة و فرحة ..
هناك 32 تعليقًا:
بوست رائــع ياريم :)
* هذا حال العرب كل واحد يستنى الذله من الثاني .. كل واحد ينظر لغيره وكإنه خالي من العيوب .. نفسنا ضاقت ببعض وهذا خلانا في مصدر ضعف .. الله المستعان..
* فكرتيني بعبارة حلوة بتقول ( لا تنتقد ذوق زوجتك فلقد اختارتك اولاً ) D:
* الحب حلو .. جميل جدااا ورائع
بس محتاج لقلبين يفهموا الحب صح .. الحب ماهو اني احبك وتحبني وخلاص.. الحب انك تحترمني وتقدرني .. تثق فيا وتكون محل ثقتي .. تتعامل معايا بكل صراحه واكون ليك كتاب مفتوح .. اهم شي مايكون في مجال للشك بينهم لأن الشك اذا دخل فهو كالمرض المناعي ينتشر ببطءو تأثيره ابدي ..
لو كل واحد عرف قيمة الثاني في حياته وعنده استعداد انه يتنازل في السموح صدقيني كانت المشاكل بينهم مجرد سحابة صيف عابرة .. لكن نفس كل واحد عزيزة وللأسف غرور كل طرف عاقبته بتكون وخيمه على العلاقـة ..
عارفه رأيي في مدونتك حبيبتي
ولكن البوست رائــع ويحتاج الإشادة بالفعل
ابدعتـي ياقمر :)
حبيت شخابيطك اوى يا ريم
فيروز دى حالة مستمرة من الادمان بالنسبالى..معرفش اقضى يوم من غير ما اسمعها فى البيت و فى العربية
فكرتينى بالكلام اللى بسمعه اليومين دول كلهم مقتنعين برضه انى عايشة فى قصة حب مع انى دلوقتى بالذات الحب ده اخر حاجة ممك افكر فيها..لو عندك طريقة الواحد يهش بيها الناس الحشرية من حياته قوليهالى الله يكرمك :)
النقطة دى و النقطة التانية بتاعت احمدى ربنا انى مش بضربك و مش بصبحك على بوكس و انيمك على بونية عبارة عن ثقافة غبية اتربوا عليها و انا لو من الست دى ارد و اقوله و انت احمد ربنا انى مش بنكد عليك عيشتك و اخلى العيال يصحوك من النوم و يلعبوا كورة على باب اوضتك و انت لسه راجع من الشغل و اقلب على المسلسل العربى ساعة الماتش ما ييجى ما هو هبل بهبل بقى
كنت لسه قاعدة مع واحد فرنساوى معايا فى الشغل كان بيقولى انتى عارفة اننا حاربنا الالمان 3 حروب منهم حربين عالميتين و دلوقتى لما يتكلموا عن قرارات اوروبية مصيرية بيتكلموا عن الزوج الفرنسى الالمانى..شوفتى الفرق بينا و بينهم يحزن قد ايه
قليل الادب و مخه على قده :)
فى ناس فاكرة ان مرادف الرومانسية و الحب نكد و موت و فراق و دموع و لطم و صويت..زى اللى بيستمتعوا بافلام من نوعية حبيبي دائما و انى راحلة و بين الاطلال..بجد مش بفهمهم..الحمد لله انى مش رومانسية
خد بالك عليا دى من اكتر الاغانى اللى بتستفزنى مش د بتاعت انا فرصة لو ضيعتها هتزعل عليها؟..بالذمة فى واحدة عندها كرامة تقول كده
الجزء اللى قبل الاخير ده انا متفقة معاه جدا بس رجالة كتير بيعتبروا فى ده انتقاص لرجولتهم و كرامتهم..بصراحة لما بحط نفسي مكانهم بلاقى ان عندهم حق الى حد كبير..لكن لانى من نوع البنات ده اللى عنده رعب من الفكرة فباخد صف البنت فى الاخر طبعا :)
ياااااااااااااة
مش عارفة اعلق على ولا موقف!!!
بس دى مش مجرد شخابيط
دى ارائك وحلوة اوى وانا من رايك دايما
بس احنا فعلا نفسيتنا سودة وحشريين
حلوة اوى حكاية الراجل بيقول لمراتة كويس معاكى ومش بضربك!!!
دة عايز يتعض حتة عضة على كلامة دة
المشكلة ان احنا بشر ودى طبيعتنا
*****
اقولك حاجة وحشتينى
عوووووووووووووووووووووو
هيه ممكن تكون شخابيط
بس شخابيط فيها احساس وكلام كتير قوى بين السطور
سارة
اولا سعيدة جدا بانك حروفك الجملية خطت في مدونتي اخيرا نولتينا الشرف ده يابنتي
العرب امرنا مفروغ منه خلاص
ايوة العبارة دي مهمة جدا لازم الرجال يفتكروها على طول
حلو وصف للحب و فعلا انا من الناس الي مقتنعة انه لازم في تنازل في الحب ما اقصد طبعا تنازل اخلاقي لي تنازل وتغاضي لبعض و انه لازم نتغير عشان بعض و نتكيف مافي شي اسمه انا زي ما انا مثلا لازم كل واحد يحاول يكون الاحسن للتاني ده لو فعلا في حب يبغو يدوم ويعيش
تسلمي على كلامك الحلو و انا مبسوطة مرة بتعليقك عندي والله
ياسمين
عارفة انك مدمنة فيروز بامتياز
بصي الناس الحشرية دي غرقيهم حشرية وخصوصا لو اتحشرو وفهمو عكس الحقيقة هيبعدو عنك لانه كرامتهم بتوجعهم لما يكتشفو انه اتحشرو غلط حاجة تضحك بس حقيقة صدقيني
ههههههه والله ضحكيتني طيب لما هنعيشها هبل في هبل مين يربي العيال و احنا بستهبل نسيبهم يسرحو في الشارع
ماهو انا اكشفت قد ايه احنا تافهين و بغباءنا ضيعنا نفسنا و امجادانا و عقليتنا بدال من نطورها
مش كدة برضو
هو انا مش بحب على روحي بس رومانسية بامتياز لو هلاقي الشخص الصح بس مش بحب النكد و البؤس و القرف اللي بستغربه ده
اهو بقى حتة لو ضيعتها دي هي اللي خلتني اكتب الفقرة دي بجد ياختي هانت عليها نفسها كدة و الاصعب اللي بتهديها لحبيبها في طرق كتيير تدقي وكلام كتير تعاتبي بيه و تحسسيه بس مش بالاغنية دي ربنا ما يبلانا
هو ده اللي خلاني اكتب كدة كتير بياخدوها على كرامتهم واني هجري وراها و دي مترردة ودي بتلعب و الكلام ده بس الراجل يقدر لو حب او ركز يفرق بين بنت بتلعب و بنت بتحبه بس خايفة على قلبها التانية لو ما استسلمش و فضل يقرب هي اللي هتحبه بجد و تسعده
ولانه رجالتنا كدة لازم لو قابلنا حد كويس ندي قلبنا المغامرة دي مش كتير ممكن نصادف حد كويس دلوقت
تعليقاتك بجد من اكتر التعليقات اللي بستمتع بالرد عليها
كيكتي الصغتوتة
وحشتيني يا بنتي
و عضة ايه دي يا بت هي عركة ولاد عيب خليكي بنوتة رقيقة و شقية زي ماعرفك
فرحتيني بتعليقلك و وحشتيني
رومانسي
تسلم على ذوقك وتعليقك الجميل وهو احلى و اهم الكلام دايما بيكون في الشخابيط
اسمعى على الحجار
واحد عنده رؤيه فى الحب والحياه
وغاده رجب
وبلاش المطربين الملزقين امثال تامر وهيثم
وبتعجبنى نانسى لأنها بسيطه ومباشره
حقيقى مدونة هايلة سعيد بإنى اتعرفت عليها
وإن شاء الله هكون من زوارها
دمتى بكل الود
سولي
هو غادة رجب ممكن لكن علي الحجار
بصراحة مش بحبه يمكن في تترات المسلسلات بتقبله اكتر
شكرا للمرور و الرد اللطيف
محمد جلال
ميرسي للكلام الطيب ولو انه مش اول زيارة بس اتمنى تكرر
كل دا كلام جواكى:))
بس على فكرة
متفق معاكى فى كل فقرة من فقرات البوست
وخصوصا حكاية ان الصلاة والصوم بقم ميزة اكسترا فى حياتنا
للأسف
بجد يا ريم
مجموعة اراء مميزة, اعتقد انها بشكل ما تعكس شخصية صاحبتها
تحياتى
دكتور عمرو
شكرا على تعليقك الكريم
و يسعدني اتفاقك معايا للاسف على ندرة الدين
حازم سويلم
شكرا على مرورك وردك الكريم في مدونتي المتواضعة
الله ...... الله
ايه المدونة الجميلة دى والكلام اللى كله شخابيط دة
بجد جميلة اووووووى
تحياتى
بسمة
بسمة
شكرا لكلامتك الجميلة
و اسعدني مرورك و تعليقك في مدونتي المتواضعة و اتمنى ان تكوني من زوراها الدائيمن
بوست رائع بس سيتي تقولي ان العرب اتفقو على الا يتفقو
Mustafa Şenalp
اعتذر من حضرتك لعدم فهمي للغة التركية
لكن شكرا على الزيارة و التعليق
مواطن مصري
ماهي مقيولة من زمان وخالصة
اشكرك على تعليقك
بحب روقانك وانتي بتكتبي
بحب ان انا بتفاجئ ان الموضوع خلص
انا بأيدك في كتيييير من اللي كتبتيه
الا يوري مرقدي :)
عموما كيييفك؟؟ اشنقنلك
اااه نيت اقللك اخر النصايح بتقللك
لو بتحبي حد حسسيه انك بتحبيه دخليه حياتك و تفاصيلها و انه اهم حد فحياتك !!!!
و سخرية القدر انه اللي قالها مش فاهم انه بيقول على نفسه انه برغم كل اللي اتعمله برضه مش فاهم !!!!!!
انا بأيدك انه لما الولد بيحب يقرب و يسعى و ما يزهقش بسرعة
و لما البنت تحب متحبش الا اللي مالية ايدها منه
اااه اما عن حالنا كعرب فللاسف احنا شاطرين بسسسس في الخطب و الزعيق !!!!!!!
لينو
وحشتيني فين كل الغيبة دي
بصي بالنسبة ليوري سيبه كفنان وصوت وكدة
بس اللخبطة والحالات اللي بيغنيها فيها كتير من الناس
و عن الحب الظاهر ياستي انه ده اللي بيدي الحب الطعم والعذاب و الشحتفه بتاعته
انه الاتنين مش بيفهمو بعض بس لازم يحاولو
بجد منوراني و مبسوطة برجعتك بعد الغيبة دي
شخابيط حلوة..
كل مرة اجى اقتبس حاجه اشخبط معاها الاقى اللى بعدها احلى
بس بالراحة على نفسك حبة
ومش تقلقى لسه فيه ناس بتسمع ليورى مرقدى ^_^
safa7_karmooz
ميسري على التعليق و اكيد الا مافي اللي بيسمع ليوري برضو
جميل اوى كلامك ومشاعرك عاليه اوى ربنا يكرمك ياجميله وتفضلى تحبى كل الاغانى الجميله دى
طوبة دهب وطوبة فضة
اسمك غريب
و تسلمي على الزيارة و الدعوة الجميلة دي
انا كنت غايبة عن كل حاجة لفترة
كان في متغيرات كتير بتحصل فحياتي و الظاهر ان المتغيرات دي مش ناوية تخلص
ادعيلي يا ريم
ربنا يكون معاكي و في عونك
ياحبيبتي
أنا عاجبني الموضوع ده
مش عارفة ليه
بس
على فكرة
انا بحب مدونتك
المشكلة
مش بعرف أرد
وبعدين
لعى فكرة
خليها بيضة يا ريم :)
هاتي
اعدادات
وتخطيط تقريبا
وجربي بقى :D
هي باين بتختاري القالب من غير تقريبا باين :)
على فكرة
إنتي ذكرتي مدونة محمد سلطان
إنتي أسلوبك كتير زيه
انا جربت اغيرها بس ما طلعتش حلوة يا ايمي ماعجبتنيش
دي كدة فيها برسيج اكتر ومديه عمق للالوان
إرسال تعليق