بقالي فترة مش بكتب بصراحة مش لاقية
حاجة تتكتب في وسط الاحداث الصعبة
اللي احنا فيها اليومين دول ربنا يكون
مع اهل غزة وينصرهم على اعدائهم
و يثبتهم يارب و يرفع عنهم ماهم فيه
و يدمر اليهود و يجعل فيهم البلاء اللي
ما يفوقو منه ويشغلهم في نفسهم يارب..
بس حبيت انزل بوست كتبته من فترة بعيد شوية عن
اجواء الحرب و الدم رغم اني والله
حاسة اني وقحة شوية و ماعنديش
احساس و انا بنزله ..
فعلا حاسة اني بقيت مدمنة
ادمنت الشوكولاتة بشكل رهيب
لازم اكلها كل يوم وخصوصا اليندت دي
لازم على الاقل تلات مكعبات في اليوم
و القطمة منها بحس بحالة خيااال و لا لما
تدوب في الفم يالهوووووووووي بحس اني
طايرة و واصلة لحالة كدة من النشوة
و ببقى قاعدة اتمنى كل ما البار يخلص
او ينقص منه مربع يطول ..
بجد لاحظت انه لو في شكولاتة ببقى
راااايقة و اول ما تخلص بدايق واتعصب وازن على اخويا
يروح يجيبها اصل للاسف مش في كل مكان
بلاقي النسبة دي لازم 70% شوكولاتة ولو
كلت غيرها يبقى بعوض بيها مؤقتا يعني
و تقريبا بقى لها ميزانية خاصة عندي و لما بلاقيها
بشتريها بكميات عشان استمتع بيها اكتر
ده البيت كله مستغرب من الحالة دي
و طريقة اكلي ليها انا في الفترة الاخيرة
لاحظت كمان اني لو حد كلمني وانا باكلها
ممكن ماسمعش هو بيقول ايه زي الاعلانات
كدة لما الناس بتروح لعالم تاني بعيد عن اللي
حواليها و كدة بيبقو ريلاكس و حالمين..
و طبعا بكتب حاليا بالوصف ده لانه بقالي
اسبوعين مش واكلة ليندت حاسة اني مكتئبة
و حاجة مهمة ناقصاني و متعة كبيرة محرومة
منها بجد نفسي فيها ..
الحالة اللي بتوصلني بيها الشكولاتة و خلاني
متعلقة بيها بجد بقى يشكنني تفتكرو بقيت
مدمنة شكولاتة بجد ؟! ..
هناك 10 تعليقات:
طب الحمد لله انها شيكولاته بس اللى انتى مدمناها
بس الاحساس دا مزيف
بجد
هى جميله اه بالنسبه ليك بس حاولى مش تتعودى عليها بجد كتير
وكمان مش تعودى نفسك انك لو مش كلتيها تبقى مكتئبه
الاخت العزيزة جداا
ريم جيت اسلم عليكى
والله انا زيك مبقاش ليا نفس حتى ادخل مدونتى وليا اسابيع مكتبتش فيها حرف الوضع فعلا يسد النفس عن كل شيء واى شيء
ارجو تكونى بكل خير معلش عكننت عليكى زيادة
تحياتى لك ايتها الاخت الكريمة
.
نور الدين
رومنسي
هو مش درجة الاكتئاب الفظيع يعني عادي
بس نوعا ما مش متفقة معاك حلو انه الواحد يتعود على حاج في الحياة تفرحه وتسعده و لو يفتقدها لو ما لقهاش و لو كان تافه زي الشوكولاتة
استاذ نور الدين
نورت لمدونة بعد الغيبة البسيطة دي
مش عكنة ولا حاجة اي حد بيحس هيبقى مدايق و زعلان من اللي بيحصل و المهازل اللي العرب باعملها
المهم ربنا مع اهل غزة يفرج عنهم كربتهم
و شرفتني بزيارة حضرتك بجد
انا اول مره اخش مدونتك ويارتنى كنت دخلتها من زمان بجد اسارت اعجابى جدا وطريقه بوستاتك جميله جدا مشاء الله عليكى بوستك رائع وجميل ربنا يبارك فيكى
ازيك يا ريم
بصى ياستى هو فى بداية البوست كنت حاسس ان حالتك عاديه
لكن لما قريت كلامك كله فاسمحيلى اقولك
انه لالالالالالالالالا
انتى مش مدمنه شيكولاته
متهيألى محتاجين لكلمه اكبر من مدمنه صح ؟
وبامن على دعائك لاهل غزه
هو بجد توقيت غريب انك تنزلى البوست ده فى الوقت ده ( بس من غير شتايم )
ادم المصري
اسعدتني بزيارتك وتعليقك على مدونتي المتواضعة و يارب ما تكونش الزيارة الاخيرة
اهلا بك بعد الغيبة يا استاذ محمود
هو يمكن الحالة كانت صعبة شوية عشان كان و قتها مافيش شوكولاتة بس الحمدلله جبتها
على رايي ماما ادمني شكولاتة قد ما تقدري و بعدها اشتكي
هو احيانا بحسه وقيت سخيف بصراحة مني بس حبيت ابعد شوية عن الاحزان اللي الكل فيها
بس البوست ده بجد بيخليني بدل ما كنت اقول الحمدلله على نعمه مرة اقولها الف مرة مقارنة بغيري بجد
صباح الخير
اسمى محمود من غير استاذ لو سمحتى هو انا بقولك يا استاذه ريم ؟
خلاص
ان شاء الله هنشيل الالقاب بعد كدة
إرسال تعليق