الكارتون

ايوة صح زي ما قال العنوان الكارتون مش عارفة ليه الكل محسسني اني غريبة

لاني بعشق الكارتون بقضي كل الوقت ع النت عشانه افضل ادور من موقع لتاني

عشان اجيب مسلسل كارتون كنت بتفرجه زمان و انا صغيرة..

اللي بيستغرب مني و اللي بيقولي ايه الروقان ده و اللي يقول يا بختك بدماغك

بس هما مش عارفيين يعني ايه عندي الكارتون ..

الكارتون عندي هو استراجاع لحياة برجع ايام نفسي اعيشها تاني برجع ذكريات جميلة

الكارتون هو طفولتي برأتي ايام ما كانت حركة بسيطة فيه بتضحكني و مشهد تاني يزعلني

ايام العبط الطفولي لما ازعل على البطل او احاميله ايام ما بتخيله حقيقة ..

الكارتون هو لمة ولاد العيلة الحلوة لما كنا نقعد نستنى وقت الكارتون عشان نتفرج

واحنا مسوطين وقلوبنا صافية لسه ما طالتهاش اوساخ الدنيا و احنا بمنتهى البساطة

لا تهذيب ولا اتيكيت بناكل زي ما ناكل ونشرب زي ما نشرب و احنا في قمة السعادة..

الكارتون هومنظر ماما و بابا ,جدتي و اخوالي و هما ببرأة بيتفرجوه بعد

سابو نفسهم و خرجو من عالم الكبار و مشاكله وتعبه ..

الكارتون هو العبر اللي في النهاية ماما بتقعد تشرحهالي و اديني بحتاجها في الحياة

عرفتو الكارتون هو ايه مش مجرد صور تتحرك بحركات عبيطة و بسيطة

الكارتون هو ماضي رقيق وجميل .. الكارتون هو عمر.. حياة .. ذكريات

الكارتون هو عندي ايام بيضة وصافية بسترجعها ايام لو يدفع نص عمري بس ارجع اعيش

احاسيسها و اضحك ببساطة و برأة ضحكتها وانا بتفرج الكارتون ..