من جعل نفسه .... !

( من جعل نفسه قمامة بعترته الدجاج )

مثل قديم عندنا عن نفسي بكرهه اوي من كتر ما سمعوني هو في حياتي و برغم ما فيه من الصحة بس بجد كرهتو و هقولكم القصة

اصلي انا الكبيرة بين اخواتي ال 3اللي بعدي على طول بيني و بينه 5 سنين يعني الكل بيعاملني اني اكون زي الأم ليهم و لازم علاقتي بيهم يكون فيها احترام و ادب بس غلطو في الطريقة اللي تخليهم يعاملوني باحترام و ادب

كانو فاكرين دايما نه لما يكون في حدود بينا هيحترموني انه لما اعاملهم من فوق وافكرهم دايما اني اختهم الكبيرة هيحترموني كل ما احاول العب معاهم ماما تقولي المثل ده ( يا ريم من جعل نفسه قمامة بعترته الدجاج ) كل ما احاول اقربلهم و افهمهم الاقي المثل حاضرلحد ما بقت حياتي محصورة على علاقتي بماما بعيدا عن اخواتي كانو هما دايما عالم بعيد عني بيضحكو ويلعبو و انا يدوب بشاركم بحذر و بحدود عشان مافقدش الاحترام

و نتيجتها عالمي بقى هو عالم الكبار عالم بابا و ماما و اخوالي

كبرت قبل و قتي و سبقت بتفكيري سني فقدت علاقتي الوطيدة باخواتي

و زاد البعد الفكري بيني و بين صحباتي بقيت سبقاهم بقيت مش عارفة اعيش

سني زيهم بقت افكر في كل لحظة بجدية بقت الحياة كلها متخدة عندي بالعقل

لما اتعزم حفلة مش بعرف ارقص و ادلع و افرح زيهم كل ما احاول ابقى زيهم

بنت في سنهم احاول اكون وحدة منهم الاقي المثل حاضر قدامي و اتكسف

اقول معقولة ياريم انتي العاقلة تتنطي و تعملي زي البنات دي اومال الاحترام فين

لغاية ما بجد فاض بيا و زهقت بقيت ضايعة وسط الناس اللي حواليا

تعبت و انا سابقة سني تعبت وانا احسب الدنيا بالورقة والقلم

زهقت من عالم الكبار اللي دخلته قبل الاوان تعبت من احساس التوهان

قررت اجرب ارجع لسني اراقب اللي حواليا ابقى واحدة من بنات جيلي

افكر زيهم اعمل زيهم اضحك و البس زيهم مش معنى كدة اني بقيت تافه

او فقدت قاعدة الاحترام بس بقيت اعيش معاهم افهم جيلنا اخد اللي يعجبني

استتمتع بالحياة زي اي بنت في سني اسيب التفكير و القلق اشوف الحياة

بغير الجدية و حسابات الورقة والقلم

قررت اجرب انزل لعالم اخواتي الصغار افهمهم اقرب منهم اعيش معاهم

اصغرسنيني و تفكيري عشان اوصلهم ارمي المثل ده ورايا اتجاهل نظرات

ماما و باباالعب معاهم ازعل منهم و يتخناقو معايا اتعصب عليهم و يتعصبو

مني اهزرمعاهم و يضحكو معايا احب اللي بيحبو و اكرهو اللي

بيكرهو اناقشهم في اللي يفهمو اسمع اللي بيفكرو فيهم

واللي نفسهم يقولو

و النتيجة الغريبة انو المثل كان غلط كل السنين الي ضاعت بيه و

هنا المثل كان غلطو الاحترام ما راحش بالعكس ده زاد اوي اوي

صحباتي بقيت قريبة منهم بقيت اقرب حد بيرجعو ليه في مشاكلهم

بقو اكتر حد بيسمعو لكلمته و مشورتو انا بقو يجوني في مصايبهم

قبل افراحهم بقيت المقر الامين لأسرارهم و اخبارهم ما بقاش في

خوف مني زي زمان ما بقوش شايفني اكبر من سني خلاص

بقيت وحدة من سنهم

اخواتي كلمتي بقى ليها مكان كبير عندهم ما بقتش امر زي زمان

بقت قبول و احترام بقيت مكان الثقة ليهم بقيت ملجأ لمشاكلهم

بقيت مستقر لحيرتهم بقيت بير اسرارهم بقيت ساعات احس

اني اقرب للإم ليهم بقو يشوفو و سط القسوة حنيتي عليهم

بقو يحسو وسط عصبيتي بخوفي عليهم بقت قعدتي معاهم مش

حمل كبير يخليهم يسكتو بالعكس يمكن يستنو اجي عشان عن

اللي خانقهم يفضفضو صحيح لسه ساعات بتطلع الاخت الكبيرة

بس بقو قريبين اوي بقو حتة مني بقو بجد ولادي ايوة مش

اخواتي بقو ولادي انا بقيت احس ليا حق فيهم بقيت بحس

اني ربيتهم وكبرتهم بقيت استنى يوم فرحتهم قبل يوم فرحتي

بقيت نفسي في الحظة اللي اشيل ولادهم بقيت اتمني

كلمة خالتي و عمتي

و في الاخر لا بقى فيه قمامة ولا الدجاج اللي فيها هيبعترو