كتير بلاقي مواضيع عن الطفولة
و ازاي كل العالم عايزين يرجعو اطفال
و يعيشو احساس الطفولة و براءته وكل
مافيه من روعة من غير مسؤليات ولا هم ..
بس الغريب اني مختلفة مش عايزة ارجع
طفلة و اعيش الطفولة من جديد بجد
لما بقيت اقرا المواضيع دي بدور جوايا
كتير على الاحساس و الحنين ده
بلاقي اني ماليش خلق ارجع طفلة
و اعيش حالات الطفولة و مافيها من
جهالة و براءة و ... الخ
يمكن العكس صحيح جوايا احساس
عايز يخرج من الماضي والحاضر و
يروح لبكرة عندي فضول اعرف ايه
اللي في المرحلة الجاية من حياتي
هبقى ايه ؟! هكون فين ؟! هتبقى حياتي
ازاي ؟! .. نفسي اوي يجي بكرة على خير ..
يمكن الحالة الوحيدة اللي اتمنى او عايزة
ارجع بيها للطفولة و ايام ما كنت طفلة
لما ربنا يكتبلي و يبقى عندي انا طفلة
ساعتها بس هرجع اعيش الطفولة من
تاني بكل لحظاتها و تفاصيلها
و احساسها ..
هناك 14 تعليقًا:
احساس الطفوله موجود جوانا كلنا بس بدرجات مختلفه
جميل ان جواكى فضول للمستقبل
بس لازم يكون احساس الطفوله برضه جواكى
لأن الطفوله مش ماضى
الطفوله احساس بفترة بريئه من حياتنا
فترة من غير هم ولا مسئوليات
تحياتى
سلام ياريم
:)
لما قلتي مش عاوزة أرجع تاني طفله
كنت منتظرة بجد تقولي أعيش الاحساس ده تاني مع بنتي
وابتسمت لما وصلت لآخر البوست ولقيت اللي كنت منتظراه
ربنا يسعد أيامك
:)
هييييييييه هييييييييه
اول تعليق ليا
استنى التعليق التانى بقى
انها اجمل الايام تشعرنا بالبراءه
تشعرنا بالامان
تشعرنا باننانطير فى عالم مليى بالحب
دكتور عمرو
هو اكيد الطفولة جوايا مش هتتمحي
و بيجي اوقات بتظهر بس مافيش الحنين
الكبير ده اني ارجعلها من تاني
ليساندرا
طيب سعيدة انه توقعك رسم الابتسامة على شفاهك
اصل اكيد اي وحدة هترجع طفلة مع طفلتها
بسمة
مستنينك
رومانسي
ياما انك بتعبر عن احساسك بالطفولة
يا انك فهمتني غلط
انا اقصد انه ماعنديش حنين دلوقت للايام دي و ماليش نفس بصراحة ارجعلها
تاني
يعني مش عايزة ارجع طفلة
عارفة المشكلة فين بالنسبالى..انى ما عشتش الفترة دى بالطريقة اللى كل الناس عاشوها..حاجة صعبة اوى انك تتولدى كبيرة
عارفة .. انا واحة بفكر كتير في ايام الطفولة ..
بس و انا بقرا كلامك كنت بفكر ...
اني متمناش بردو أرجع لفترة طفولتي أو أعيدها ..
احنا يمكن بياخدنا حنين أكتر لمواصفات المرحلة دي لما بنفتقدها دلوقتي ..
الأمان المطلق للدنيا ..انعدام المسؤليات .. الخيال الحر .. مليون حاجة كانت سهلة و موجودة في الطفولة .. دلوقتي أصعب .. بس مش مستحيلة ..
مدونتك حلوة اوي .. و حبيت الحاجات اللي عالجنب دي
:) :) :)
آية
يمكن الحاجات اللي قولتيها هي اللي فعلا
بتخلي كتير من الناس عايزين يرجعو اطفال
نورتيني باول زيارة و يرب ما تكونش الاخيرة
ياسمين
اسفة نطت تعيقك اصل النت عندي مخرف و بيشتغل بالطريقة اللي بتعجبه
بصي في حالتك بقى عيش طفلة وانتي كبيرة رغم اني فعليا ما عشتش طفولتي الا اول 5 سنين بعدها لقتني على الطول الاخت الكبيرة و المسؤولة و كل حاجة بتوقع فوق دماغي بس برضو ماليش نفس ارجع طفلة
عارفة انتي تقريبا ممكن تعيش كطفلة في حالة وحدة انك تلاقي اللي يعملك كطفلة مش يستهيفك يعني و يستصغر تفكيرك لا يحترمك كأنثى بس يعاملك و يحسسك انك طفلة بكل مافي الكلمة من معنى
عارفة انا نفسي ارجع للطفولة عشان ارجع اشوف والدي الله يرحمه
مش بحن لطفولتي انا لاني كنت طفلة كبيرة و اكبر من عمري
لكن بحن لناس كانوا موجودين في طفولتي
بحن لبيتي و انا طفلة للعبي للكرتون لجيراني
لكن صعوبات كتير مريت بيها و انا طفلة مش حقدر اعيدها تاني !!! |
لينو
ربنا يرحم والدك و يحسن اليه
بصي في حالتك ده مش حنين للطفولة ده حنين لا شخاص مش اكتر
و ماتعرفيش يمكن بكرة يجيب حاجات احلى من امبارح و اليوم ماحدش عارف
ربنا يكتبلك الخير و الهنا دايما
إرسال تعليق