عندما يتسلل الحزن الى قلبك .. و يستبد الهم بفؤادك

فتجد لسانك ينطق بـ ( الحمدلله )

إعلم عندها انك رُزقت نعمة قد حُرم الكثير منها

فإحمد الله دائما في كل حال ..

لحظة دفء ...

كلنا اليوم اصبح تواقاً للدفء .. نبحث عنه في اي شيء

في صورة او لوحة بسيطة الحميمية
في احضان معطف او التحافة شال ..
في احتضان العشاق في الافلام الرومانسية
او حتى في ضمة كفينا لكوب قهوة اوشاي ..

فلما نزداد اليوم بروداً و جفاء ؟ .. حقاً لا أدري ؟!..

...

تك تاك تك تاك تك تاك تك تاك ......

تصحو على تلك الموسيقى اليومية التى اصبحت تكره
عبثا تحاول الهاء اذنها عنها .. تحاول اسكاتها او اخفاء صوتها
و لكنها تسمتر تك تاك تك تاك ..

تحاول مجددا و بجهد اكبر بشيء تافه او شيء مهم تظن
انها نجحت لتجدها فشلت فلم تصمت الموسيقى او حتى تبهت
بل ربما اصبحت اعلى تك تاك تك تاك ..

اخيرا تشعر بارتياح فهي متأكدة الآن ذلك اللحن سيصمت
تضع رأسها على الوسادة وتغمض عينيها و مع اذكار النوم
تسمع تلك الموسيقى من جديد فتبتسم فهي اكيدة انها هذة المرة ستصمت

تك تاك تك تاك تك تاك تك تاك تـــ .......

ماهو حرام ..

هو احنا ليه بقينا مش قادرين نقول عن الحرام حرام ؟


هل هو نتيجة رغبتنا الشديدة اننا نكون اصحاب افق واسع
وتقبل للآخر ولا هي فوبيا من التشدد يعني ؟


انا فكرت كتييير بجد عشان اكتب البوست ده اولا لاني
ما بقتش مؤمنة بجدوى ابداء الرأي نهائي ولا بحب الجدال
وشايفة انه كل حد عنده فكرته ومقتنع بيها يبقى على ايه
التعب؟ و ثانيا هل هعرف اوصل فكرتي زي مانا قصدي ؟
و ثالثا و الاهم سألت نفسي هل انا اهل اني اكتب الموضوع
ولو حد حب يناقشني في كلامي عندي القدرة على النقاش؟
قولت اجرب بقى وانا وحظي ..

المسألة كلها انه في امور في ديننا حرام ومتفق عليها
و منتهي النقاش في حرمانيتها تقريبا
في كل المذاهب و الطوائف ليه دلوقت احنا نحللها مية تحليل
ونبررها الف تبرير و نحاول نجيبلها مليون حكم يعني مثلا :


- لو اخدنا زوج خان مراته مع واحدة تانية مش ده زنا
والزنا حرام .. ليه بقى في ناس تحب تجادل الحكم
وتطلع مية حجة وتبرير ؟


- الراقصات ومشاهد سمية خشاب و غادة و نحوهما
لو جينا بجد لحكمها الشرعي فعلا مش هيبقى حرام
طيب ليه الجدل و الكلام واللت و العك
بحجة انه ده فن هي تصرفاتهم لو في اطار التمثيل
و عشان الفن مثلا هتبقى حلال؟


- شرب الخمر و القمار مش فعلا حكمها حرام
يبقى ليه بشوف دايما رد عبيط لا ده بس لعب على خفيف
ولا لا ده ويسكي مش خمرة ولا دي بس مشروبات روحية
مش كلها داخلة تحت حكم واضح وصريح ؟


- لبس المايوه مش المفروض انه حرام ده حتى لو جيبنها
بمبدأ الناس اللي بتلغي فرضية الحجاب وبتقول انه المقصود
نغطي اعلى الصدر طب يعني معقولة الله ينزل حكم الهي
بتغطية اعلى الصدرو المايوه يبقى عادي وحلال
بحجة انه لباس بحر ؟


- المثلية الجنسية و نسيبنا من المثلية في الاناث رغم اني اعرف
انه ذنب يتهزله عرش الرحمن بس برضو بيجادلو
بانه مافيش نص قرأني و نمسك المثلية بين الرجال
مش اهلك قوم بحالهم بسببها مش تبقى حرام يبقى ليه بنجادل
في حكمها اليوم ؟


عارفين اللي خلاني بجد اكتب الموضوع ده
اني في مرة قولت انا ممكن اتقبل امر ما
وكنت عارفة ومقتنعة انه حرام فبعدها قعدت اراجع
كلامي و اقول ازاي اتقبل امر انا واثقة في حرمانيته
يعني مش بس بقينا مش قادرين نقول على الحرام حرام
لا و بقينا متقبلين المنكركمان يعني حتى تغيره بالقلب
مبقاش موجود و دي في حد ذاتها مشكلة ..


على فكرة انا مش بتكلم في الاسباب و كيف وليش
انا بتكلم عن الحكم الشرعي الواضح و الصريح ليه بقينا
ننكره و نجادل فيه كتير يعني اذا الشيء فعلا حرام
يبقى خلاص نقول حرام واللي بيعمله عاصي
تاب بقى ولا راضي بعمله يدخل جنة يدخل نار
مش شغلنا بقى ده شيء في علم ربنا
بس الحكم معروف وخلاص بلاش اللف و الدوران
خوفا من تهمة التشدد الديني مايقولو متشدد
اذا الشخص مايعرفك خلاص رأييه هيفرق بإيه
ولو شخص فيه مجال يعرفك بكرة هيكتشف انك مش متشدد
من عشرته ليك يبقى ليه كل الخوف ده والرغبة الرهيبة اننا
نبقى متقبلين للآخر كدة حتى على حساب امور مسلم بيها


المشكلة انه الموضوع مش واقف على كدة بالعكس بقيت
اشوف نتيجته جيل مش هيكون عارف ايه الحرام وايه الحلال
و ده بدأت الاحظه فعلا في الاعمار الصغيرة من 15 واصغر
و حتى فنوات الدين اللي بقت كتييير اوي واللي انا بصراحة
بشوفه شي سلبي مش ايجابي مش هتبقى عامل مساعد
في انه الجيل الصاعد ده يبقى عارف فين الحرام و فين الحلال
وبعد كدة هنرجع نلوم ونعتب ونقول الفساد زاد و المشكلة فين ؟
و جيل مش عارف ايه وهو ببساطة مجرد جيل تاه بين افكارنا
و صراعتنا و تناقضنا و استعباطنا لا اكثر و لا اقل ..


مش عارفة بقى اذا قصدي و فكرتي وصلت لكم زي
ما انا عايزة وفهمتوني بجد اتمنى اكون عرفت
اوصلها ..

...

شي غريب متل العادة حبك يا حبيبي
يمكن لأنك مش عادي بحبك يا حبيبي
ساعات بشوفك قريب .. و ساعات بشوفك غريب
و انت مش غريب .. شي غريب ..

شي غريب بتشتاقلي كتير و بتخبي بقلبك
قللي .. بحبك .. شو بيصير قد الدنيا بحبك
لما بقللك لا ما تقللي .. بقلبك خبي الكلمة وخلي
الحب البيني و بينك ساكت .. و بعيد وقريب
شي غريب ..

بحبك لما بتزعل مني و بتصير تراضيني
بحبك لما تسأل عني و مابدك تحكيني
بحبك انت وساكت تحكي .. و لما تزعل ترسم ضحكة
بحبك كيف بتبقى حدي .. لما عني تغيب
آه شي غريب ..


شي غريب - جوليا بطرس

النهاردة عيد ميلادي ال 25
تصدقو انا كنت ناسياه نوعا ما واللي فكرتني بيه
صديقة عزيزة كانت اول واحدة هنأتني بيه ..

يلا كل سنة وانا طيبة اهم حاجة بجد
الحمدلله على العافية .....

فن الاستماع ...

في الجامعة عرفت صديقة ( الله يسعدها و يمسيها بالخير )
باعتبرها الى اليوم من اهم و اغلى الناس اللي مرو
في حياتي و الوحيدة اللي ممكن احكي و افضفضلها
عن كل حاجة جوايا و اي حاجة اي و مهما كانت ..
رغم اننا اصلا ماكناش صديقات لحوالي اربع سنين من
الخمس سنين بتوع الدراسة بس في السنة الاخيرة
قربنا لبعض اوي و اللي جمعنا جدا هو فن الاستماع ..

من غير اي اتفاق مسبق لقينا اننا بنعرف نسمع بعض
لو وحدة حبت تقول للتانية موضوع اذا الموضوع ده
ما كان فيه عبارة ايش رأيك ؟ او ابغى اسألك ؟
او ايش اعمل ؟ او صح كدة ؟ او ما شابه يبقى الموضوع
و الكلام اللي بيتقال مجرد فضفضة و الطرف التاني مايقولش
اي نوع من النصيحة او ابداء الرأي او اقتراح الحلول نهائي
يسمع و يسكت و لما الحكاية تخلص ننتقل لموضوع تاني
او حتى ننهي كدة ..

كان مهم جدا المستمعة فينا ما تقاطع اللي بتتكلم كتير
او لازم طول الحكاية تفضل تقول للي قاعدة تحكي
ها .. اممم .. و بعدين .. طيب .. او لو التانية ماسمعتش
العبارات السابقة تتعمد السكوت عشان تتأكد انه التانية
معها و بتسمع الحكاية و ده كان بيخلي اللي بتسمع فعلا
تركز في الحكاية و تسمعها للاخر عشان ممكن الاولى
في حالة الفضفضة تغير رأيها بعدين و ترجع في يوم تاني
و تطلب رأيي التانية و نصيحنها في الموضوع السابق ..

لو وحدة فينا مش مركزة او مش مستعدة تسمع التانية يبقى
خلاص الموضوع بينتهي برحابة صدر و من غير زعل
ولا اي ضغط او اشعار الاخرى بالذنب انها ما سمعتها
و يبقى الكلام شوية رغي بناتي و نقفل و مرة تانية
تحكي اللي كانت عايزة تقوله في المرة الاولى الا اذا
الفضفضة او الموضوع فعلا مش يستحمل يتأجل ..

للأسف حال الدنيا َحكم و الايام خدت صاحبتي دي
و انقطعت عني و عن الجميع و انا من بعد صدقاتها
فعلا قفلت باب الكلام عندي و شلت من قاموسي الخاص
كلمة فضفضة و تحولت تقريبا لمستمعة للغير فقط
ولو اتكلمت و فضفضت يبقى بحاجات مش مهمة
او لم تعد ذات اهمية عندي نهائيا لأني فهمت اخيرا
بعد محاولات بحث كتير عن وحدة زيها في صحباتي
انه صداقاتنا شيء خاص و نادر و اساسها كان

( فن الاستماع )

و اللي للأسف بقى فن منسي و مفقود جدا في الايام
دي و في الزمن الحالي ...

....

في عالم الحكمة و الأمثال قيل :

{ البعد نسيان }

فلماذا إذاً يظل اولئك البعيدون و المبتعِدون
هم اسياد وابطال كل لحظات التفكير دائماً ؟!..

ترى هل َكذب أهل الحكمة و اطلقوها
بدون تجربة و احساس فعلا ..

أم ُمتلقو الحكمة هم من يأبو التصديق انهم
لربما اضحو في عِداد المنسيين .. و لربما
عليهم الاستسلام و الاقرار للبعد والنسيان ؟!..

زويستا ...

كل سنة و انتو طيبين و يارب تبقى سنة
خير و نجاح عليكم جميعا هجريا و ميلاديا

احب اعرفكم على صاحبة الصورة
دي .. زويستا ..

اسمها خدته من صوتها اصل صوت زقزقتها
فعلا زي اسمها صوتها غريب جدا و رغم اني بحب
كل العصافير و الطيور اللي بتجي تاكل الاكل اللي بحطه
الصبح عند الشباك الا انه دي مميزة عندي ..

زويستا اول عصفورة بتيجي عند الشباك بعد الفجر مباشرة
و تقف تغرد او تزقزق بصوتها الغريب مرة لو في اكل و مرتين
لو مافيش اكل و في الحالة التانية بتطير و ترجع تاني لو برضو
ماحطتش الاكل و تغرد اربع مرات كل تغريدة باتنين
و ترجع تطير تاني و كل مرة تزيد في عدد التغريدات
لحد ما احط الاكل ..

رغم انها صغيرة جدا تقريبا بحجم قبضة طفل رضيع
بس شريرة اوي و بتهاجم كل عصفورة تسول لها نفسها
انها تحاول تاكل قبلها او حتى معها لو مزاجها مش رايق
بس بقت بتمس عليها ملائكة الرحمة ساعات
و تسيبهم ياكلو و مش بيقدر على شراستها دي
غير طائر القُمري لأنه اكبر منها طبعا
بس برضو مش بتخاف منه و تهرب زي باقي العصافير
و تسيبله المكان يا توقف جمبه لحد ما يخلص
يا تحاول تاكل من الاكل اللي بعيد عنه شوية ..

تقريبا العصفورة دي بشكل غير مباشر
بقت زي صديقة مشاغبة ليا
و بجد غلبتني على ما اخدلها صورة
فعلا مش بترضى اصورها لما ببقى واقفة بتفرج عليها
بتاكل عادي بس مجرد ماتشوف الموبايل بتطير
و كأنها فعلا مش عايزة تتصور و الصورة دي يبدو بصتلي
و خلتني اخدها و طارت على طول ..

يمكن سبب تعلقي بيها حالة شبه الوحدة او فراغ
او حتى كلامي عنها تخيلات وهي بتتصرف زي عصفورة عادية
بس انا حولتها في خيالي لصديقة

بس تفتكرو عصفورة شرسة زيها لو كانت ذكر و اكتشفت انه
حد فاكراها انثى هتعمل اي ؟؟!!... :) :) :)

اعيدو لنا اشياءنا ...

( مبدئيا الصورة مباِلغة نسبة لمغزى الموضوع
بس تحمل جزء منه و ما لقتش حاجة مناسبة تماما بصراحة
و الموضوع مش معمم نهائيا )

نبجي بقى للموضوع هو جرت العادة انه النقد الاكبر دايما للبنات
و شكل البنات و هدوم البنات و مشي البنات
فانا المرة دي عايزة انتقد شوية اللوك الجديد لغالبية من الشباب
واستعطفهم و اقولهم :

( اعيدو لنا اشياءنا )

بجد والله مش هزار نبتدي بالشعر شعر و طولتو و استشورتو و
دهنتو وسبسبتودي شعوركم بقت احلى بمليون مرة من شعورنا
فقدنا الثقة في شعورنا ماحنا بنشوف شعوركم
كلها لمعان وبريق و حيوية و بتهفف
ده حتى لما طلعت موضة الكدش دلوقتي ( اللي الشعر بيبقى زي
العش المنفوش فيها ) و ماما انتقدتهم عليها
قولتلها سيبيهم يكدشوه احسن ما يسبسبوه..

البشرة و دهنتوها و لمعتها و نعمتوها و صنفرتوها والله العظيم
اوقات لولا الحياء ببقى نفسي اسأل بعض الشباب هو ايه نظام
العناية اللي بتتبعوه للبشرة بتاعتكو من روعتها و نضارتها
انا مش ضد اهتمام الولد بس بجد بقى شيء مبالغ فيه ..

اللبس مش ممكن بمبي و فوشيا و لمعة و خرز و مزهر
ده من فترة روحت مول ياحرام و صلت بواحد من المحلات انه
يعلق على القطع النسائية لوح مكتوب عليها ( ملابس نساء )
ارحمونا شوية سيبولنا الوانا و هدومنا دي الوحدة كانت بتحس
بقمة انوثتها لما تلبس الموديلات و الالوان دي دلوقت خلاص
انوثة الالوان و الموديلات دي راحت و بدأت تنقرض
من كتر ما بقت على اجسام الاولاد

ده حتى البنطلون حزقتوه و لبستوه سكيني و القصمان حردتوها
ده احنا تقريبا مش فاضلنا غير الفستان و يا خوفي يا خوفي
يجي يوم هو كمان تلبسوه..

الاكسسوارات بقى عالم اتعزى بمعنى الكلمة اسوار و سلاسل
و اطواق شعر ( عشان تلم القوصة طبعا ) اه و حلقان كمان
حتى شنط الايد اللي كانت رمز نسائي طول عمرها بقى فيها
منها رجالي كمان بجد ناقص ايه ؟ّ!..

مش فاهمة هي الفكرة انك تبقى واد كول و روش و مودرن
و تعجب البنات اه ممكن تعجبهم و بنات وقحة ممكن تعاكسك
و تقولك واد موز كمان بس بتبقى في تظرها واد واد و بس
لايمكن تشوف في جانب منك راجل على فكرة الا فيما ندر والله
ده حتى لو عجبتها ابوها هيحترمك ازاي و يشوفك راجل
ده اذا اخوها كمان ما جابش قرارك من الاول بحكم انه
الشاب بيعرف يجيب حقيقة الشاب و يزحلقوك من اولها ..

بصراحة انتو بالتصرفات دي و الشكل ده بتخلو الرجالة جواكم
ينقرضو في عيون النساء انا بيتهيألي كم سنة قدام البنات
لما هتشوف شاب بالمنظر القديم للراجل هتلبس عرايس
و تجري وراه زي المشهد اللي في الفيلم الاجنبي ..

الموضع و المسألة قدام اوي و الكلام فيها اتكرر جدا
بس الموضوع بيزيد بشكل رهيب جدا و مش بيقل

الله يرضى عليكم ابدأو في تدارك الموقف شوية
و سيبولنا حاجاتنا بقى ..

هرتلة ِشتاء ...

بقالي فترة مش لاقية حاجة اكتبها
او الانسب مش عارفة اكتب حاجة
اصلي عايزة اكتب شيء بعيد عن الرومانسية او الكآبة
و قد ماحاولت كل اللي بيخطر على بالي
بينصب مباشرة في الموضوعين دول
جايز تأثير الشتاء و البرد كان سلبي السنة دي عليا شوية ..

فقولت من بين اجواء السما المغيمة و نسمات البرد
الممزوجة بدفئ كوب الشاي الاخضر و
تلبية لعتاب مدونتي العزيزة لطول هجراني لها
خليني بلاش افكر في حاجة معينة المرة دي و اسيب نفسي
مع الاجواء السابقة للأحرف و الكلمات تاخدني معها
و اشوف هطلع بإيه ..

مبدئيا هو ليه مافيش صور حلوة ملونة للمطر الا لعشاق
غير كدة بتبقى مسحوبة الألوان ده حتى المطر خير و حياة
بجد تعبت اوي على ما الاقي الصورة دي
و مش مقتنعة بيها تماما ..

بستغرب انه ساعات بنبعد عن حاجات بنحبها مش كره
باللعكس ده من كترحبنا فيها
بالنسبة لي الاطفال .. انا بعشق الاطفال اوي
و ماحدش متخيل قد ايه نفسي في اللحظةاللي ابقى ام فيها
حتى فكرة الزواج حبيتها بس عشان بتخلي الوحدة ام اه بفكر
في الفرح و الفستان و الزفة و كدة زي اي بنت بس اكتر لحظة
متخيلاها وراسمة لها سيناريو كامل في حياتي من اولها لآخرها
لما ابقى ام ..

بس في الوقت نفسه من كتر حبي ليهم بقيت اخاف
اشيل طفل او الاعبه و الاغيه و اهزر معاه و كدة
بخاف احبه و اتعود عليه اوي في لحظتها
و ازعل لما تيجي امه تاخده او حد يشيله ده حتى
اني لايمكن اشيل طفل الا اذا حد شيلهولي و لو بدأت الاعبه
و لقيته بيستجيب معايا و يضحك و اتعود عليه بحاول بسرعة
اشوف طريقة او حد حواليا اديله الطفل ده و اتخلص منه
حتى لو في طفل في المكان عاجبني و بيبتسملي او كدة
بحاول اتجاهل ده تماما من خوفي حد يشيلني هو
و من فترة كانت مطروحة قدامي فكرة اني اروح ملجأ ايتام
رغم عشقي للفكرة بس رعبي من التعلق بالاطفال دول
خلاني الغيها تماما بمجرد ما بدأت بوادر ليها ..
تفتكرو ده مرض ؟ّ!..


ساعات احنا بنبقى عارفين اللي يريحنا و سهل اننا نعمله
بس بنجري و نعمل عكسه مش غريبة دي ؟! ..

يعني زي مثلا لو صديقين او حبيبين علاقتهم انتهت
بس بطريقة مؤلمة شوية في بعض الاوقات القليلة
بيبقى مريح جدا اننا نسترجع لحظاتنا الحلوة معاهم
اللحظات اللي بتبعث نوع من الدفئ الجميل فينا
اللي بجد حسينا اننا بقمة السعادة فيها
ضحكنا .. هزارنا .. شقاوتنا ..
او اي احساس جميل فينا حسينا معاهم

بس احنا بنرفض ندي نفسنا اللحظة دي اوي
بنفضل حكاية والله ولا دمعة و يلا مع السلامة كتر خيري
و بكرة يجي اللي احسن منه يمكن قدام الناس ده مبرر
عشان نبان اقوياء و مش مهزومين ولا اتهز فينا حاجة

لكن لو كنا مع نفسنا ليه ما نسمحش بلحظة هتمناله الخير
و اننا لسه فينا جانب عايز الايام دي تستمر وترجع سعادتها
قد كدة ممكن كبريائنا يسيطر علينا ولا هو الخوف برضو
يعني بنخاف اننا نصعف و نفقد احترامنا لنفسنا قصدنا فمش
بنقبل نتنازلها بلحظة زي دي ممكن تزيح عنها جزء من الوجع
و مش هتوجع كرامتنا زي ما فاكرين ................

هي افكاري ما وقفتش بصراحة و لسه الحروف و الكلمات
بيجرو ايدي وراهم بس حسيتهم من كتر الجري ابتدو يلخبطو
و يدخلو في بعض مش هيخلو اللي يقرا يفهم حاجة من المكتوب
وهتبقى هرتلة شتاء بدل من وحي الشتاء بس هرتلة شتاء
احلى هبقى اطلع اغير العنوان ليها

و عموما هو مش هي دي الفكرة اساسا مش المفروض
اني مش بفكر و سايبة نفسي للكلمات و بيتهيألي
انه الحاجة اللي بيعملها الواحد ببساطة و صدق و من القلب
بتتفهم وتوصل للغيرو حتى لو ما وصلتش ا
و كانت مبهمة او سخيفة عند الغير
بيبقى صعب علينا برضو نسخر منها بقوة وبشكل مباشر
زي اغنية شوفتها امبارح لوحدة صاعدة ماعرفش اسمها
اغنيتها عبيطة جدا و صوتها وحش و كلماتها
بتقول زي حبيته مية المية و نزل دمع عينيا و ليلتي
مش معدية و سرحت في عينيه كات هتخبطني عربية
المهم و الخلاصة انها اغنية سخيفة جدا

كان لازم تضحكني سخافتها بس ماعرفتش اكتفيت اني ابتسم
اصل البنت بتغني من قلبها و تعمل تعابير مع الكلام لوشها
و تحاول بحركاتها تطلع احساس من كلام الاغنية
يعني بتغني من قلبها اوي لدرجة ماقدرتش اضحك عليها
اصلي وقتها حسيت قد ايه ده شيء مهم و بتعطي فيه
رغم سخافته في نظري جدا و اعتقد في نظر اي حد ...

وهو الظاهر احسن اتوقف كدة طالما الموضوع بدء يدخل في
اغاني و ميلودي و مزيكا و الذي منه كدة اللافكار فعلا هرتلت
زيادة عن اللزوم و ضيعت المعنى فالاحسن ما اكملش جايز
يرجع سيل الكلام ياخد مجراه في هرتلة جديدة ..

********

ِمن يهزم الثاني غلاه
جيش الوله .. جيش الحنين
ِمن يقدرك يا ذا الهوا
اللي سكنا من سنين

وين انتهي - نوال الكويتية