x
في الحب و الحياة بحس الطرفين المفروض
يكونو زي الحرف ده يشتركو في
جزء من الحياة مع بعض و لو حصل تقاطع
في جزء تاني كمان هيتخنقو ..
************
الحب = الصبر
تصبر عليه لما ينشغل عنك او يبقى
بعيد في فترة .. تصبر عليه لما تبقى
متخانق معاه .. تصبر لما تصرفاته
مش على هواك .. تصبرعليه لما يبقى
اسهل قرار انك تنهي كل حاجة و تمشي
وتكمل حياتك تصبر لما يبقى كل اللي
في دماغك جملة ( انما للصبر حدود )
كدة يبقى اكيد انت بتحب بجد ..
بس اتأكد انه الحبيب يستاهل ..
************
من ضمن حاجات بيعملها الرجال وهما
مش واخدين بالهم انه ينشغل عن
حبيبته مرة وحدة و يفضل انه يفضى
مرة وحدة مع انه ثانية سؤال وقت
انشغاله عنها بساعة من وقت ماهو
فاضي لها بالنسبة لها ..
************
غالبا غلط البنت بيكون سببه او مقدمته كلمة
( انتي مش واثقة فيا ) المرة الجاية لما
تسمعيها فرملي وماتحاوليش تثبتي ثقتك
فيه انتي حبيتيه واديتيه قلبك و ده دليل
كافي على ثقتك فيه ..
************
من ضمن حاجات بتعملها الستات
وهي مش واخدة بالها ساعات انها
لما تحب او تتجوز بتنعزل عن كل حد
في البداية و تبقى عايشة كل وقتها
للراجل ده و لما الحب ما بيكملش او
تعدي فترة على الجواز تلاقيه هو
انشغل بحياته و ناسه حواليه و هي
لسه هتبني حياتها و علاقاتها بالدنيا
و الناس بعديه ..
************
زهقت من اسطوانة الشباب اللي عايز
بنت زمان و البنات اللي عايزة رجال
زمان .. طيب لما الطرفين بتوع
دلوقت وحشين ازاي عايزين بتوع
زمان و مش كدة يبقى احنا شبه
بعض و نستاهل بعض ؟!
اللي فوق اكيد مش تعميم هي بس شوية شخابيط
..
هناك 11 تعليقًا:
انا ممكن اقولك دى اجمل شخابيط فى الحب
ياريت كل بنت تقرا الشخابيط دى كويس
اكيد هيستفادوا
ويبقى ان شاء الله مفيش مشاكل
الله ينور عليكى
وتسلم ايدك
بس فين الست الى بتفهم ده
اغلب الستات فاهمين الحب غلط
واكثرهم يعتقد ان الحب هو ماده لتاليف مسلسلات التلفزيون فقط
وغير موجود فى الحياه
تحياتى
فعلا شخابيط مفيدة جدا
لو كل واحد و واحدة قرأوها
اكيد هيستفيدوا كتير
و ممكن تحل لحد مشكلة مش واخد باله من اسبابها
جزاك الله خيرا
انتي قلتي كلام جميل اوي وصح
وياريت اللي يقراه فعلا يستفيد
رومانسي
ان شاء الله يقروها و يطلعو بفايدة متشكرة لزيارتك و تعليقك الكري
*************
ممكن
والله موجودين صدقني بس غالبا في العالم العربي محتاجين مساعدة الراجل في اظهار الحب ده بصراحة الست بطبعها رومانسي بيحب الحب و يفهم فيه بس المحيط و المجتمع هو اللي بيخليها كدة ونظرتها للحب كدة لانه الاغلب بقى بيتسلى بالحب
شاكرة لتعليقك
موني
اتمنى فعلا اكون بالبوست ده نبهت حد لحاجة تساعده او حتى ساعدت حد فانه يدور اكتر ورا اسباب المشاكل و يدقق في التفاصيل لانه فيها غالبا بيبقى اسباب المشكلة الحقيقة
شرفتيني بتعليقك الجميل
***************
كوشيا
يارب اتمنى فعلا انه حد يستفيد
بالكلام البسيط ده ميرسي على تعليقك
صديقتى العزيزة
اللي فوق اكيد مش تعميم هي بس شوية شخابيط
..
شخابيط فى محلها وبتناقش الكثير من المواقف بطريقة جميلة
تحياتى
ميرسي على التعليق و اتمنى فعلا
انه البوست حلو وكان في مكانه
كان نفسي ارد عندك من زمن بجد بس كنت مكسوفة جدا مش عارفة ليه:)
اولا مدونتك تحفة بجد و الوانها تجنن
نيجى للموضوع بقى
اول جزء مقتنعة بيه بشدة..لازم تكون فى مساحة مشتركة و مساحة قدها لكل واحد لوحده الحب اللى من غير مساحة حرية يبقى سجن اصعب بكتير من الوحدة و بما ان ثقافة المساحة دى مش عندنا فانا واخدة اجازة طويلة من مجرد الفكرة ما اتعودتش احشر حد فى كل صغيرة و كبيرة فى حياتى
تانى نقطة اهم جملة فيها بتاعت اتاكدى انه يستاهل..بنات كتير بيدخلوا فى قصص حب و بيدوا اكتر من اللازم لناس ما تستاهلش ربع اللى بياخدوه و كنت ناوية اتكلم عن ده قريب فى البلوج
من يومين كنت بكتب عن حاجات تخلى الراجل يكسب قلب الست بسهولة كانت دى واحدة منهم..الاهتمام الصغير ده بيفرق كتير اوى..بس مش كل الناس بتفهم ده للاسف
الستات اللى من النوع ده بيبقوا اغبيا ما ينفعش حد يوقف حياته كلها على بنى ادم واحد مهما كان مهم فى حياته الصحاب و الاهل فى نفس اهمية الزوج ما ينفعش حياتى تقف على شخص واحد لو مشى لاى سبب تنهار فوق دماغى
انا من اللى عايزين رجالة زى بتوع زمان بصراحة:)
اهلا بيكي يا قمر
شرفتيني بجد بردك على مدونتي
و مدونتك من اروع المدونات عندي بصراحة
و عاجبني انك موافقاني على كل حاجة
ولو اني خايفة يطلع كل اللي بكتبه
كلام واقع فيه بكرة
بس ابقي اكتبي بوست عن الحاجات اللي
تخلي الست تكسب قلب الراجل كفايهم
كدة كسبو كتير جاه دورنا بقى
و حتة رجالة زمان فلاقيتها هما عايزين
و احنا عايزين يبقى الاتنين مع بعض
مناسبين
نصيحة من اختك اقنعي عشان تسعدي دول خلاص
خلصو من السوق
سعيدة اوي بوجودك عندي
ايمان
نورتي المدونة
**************
مصعب
اهلا بيكي في مدونتي
و شكرا على تعليقك اللي شرف المدونة
و يارب نشوفك دايما
إرسال تعليق