غيم & هدوء & بحر & هوا
ده باختصار هو الشتا بيخلق جوايا
احساس جميل نوع من السكينة بافتقدها
جدا في الصيف ..
في الشتا كل حاجة بتبقى حلوة
الدنيا رايقة فاضية بما انه جدة مدينة
ساحلية و سياحية زي ما بيقولو و اقرب
منفذ للحرم فممكن تتخيلو شكل الصيف
فيها ازاي زحمة ودوشة وحرقة اعصاب
يمكن زي الحال اللي بيشتكو منه
اهل اسكندرية كدة .. لكن في الشتا
الوضع غير كل حد راح بلده الشوراع
فضيت نوعا ما ماعدا الويك اند طبعا حتى
اخويا فرحان بده جدا رغم انه جدة زحمة اساسا
بس بقى الواحد قادر يخرج يتمشى بهدوء ..
حتى السفر في الشتا روعة في الصيف
اي بلاد مليانة سياح لكن في الشتا بتقدر
تتمشى براحتك بتشوف البلد على طبيعتها
تندمج مع اهلها تشوفهم بطبيعتهم الجميلة
بتزور كل مكان فيها بجد بتعرف
تستمتع بالسفر فعلا ..
حتى الشاليهات اللي بيبقى غزو رهيب
عليها في الصيف بتبقى اجمل في الشتا
الشتا بيبقى روقان تتجمع انت و العيلة
الناس قليلة الا اللي عايز الهدوء
القلع مافيش بسبب البرد كله لابس هدومه
فبتضمن عينيك و عين ولادك مرتاحة
حتى البحر .. و ياسلام على بحر الشتا
الموج و الغيم والبرد و الهوا اللي بيلفح
الواحد و بيبقى متلج منه بس حلو
بجد من رحمة ربنا انه ناس الصيف دي
مش بتعرف حلاوة البحر في الشتا
مش بتخيل نفسي ساكنة في مدينة داخلية
و اتحرم من البحر خصوصا بحر الشتا..
بس احلى حاجة بحبها في الشتا
.. انا ..
فيه بعرف احب بجد و حب الشتا احلى
من حب الصيف على فكرة وده حتى
في الحب اللي بين اتنين .. في الشتا
بعرف احب نفسي احب اللي حواليا
احب حياتي .. فيه ببقى رومانسية اوي
و متعتي فيلم رومانسي و بوب كورن
سخن و هدوء البيت روعة ..
فيه كمان بعرف اوي احدد اهدافي
اقرب و افهم انا ايه ؟ و عايزة ايه؟ فعلا
و حياتي امشيها ازاي و شايفها ازاي ؟
بيبقى عندي طاقة اجابية هايلة في الفصل
ده .. حتى فرحي و شهر العسل و الكلام
ده نفسي اوي كدة يكون في الشتا
.. بجد فيه ببقى في احسن حالاتي ..
ده رغم انه فعليا من سنتين او تلاتة ابتدا
يكون عندنا شتا فعلا بدرجات تحت العشرين
و تحت الصغر كمان مش شتانا هو خريف غيرنا..
انا و الشتا حالة حب من زمان اوي
حالة حب .. بنسمة رقيقة بحسها مليانة حنية
.. بغيمة كبيرة بتشوقني لللي جواها و بتبخل
عليا بيه غالبا .. بهدوء و روقان و احساس
سكينة لذيذ كدة بيخليك تحلم .. بكوباية شاي
اخضر بالزنجبيل و البابونج لاطرافي المتلجة
و ياسلام لو في ايدي اروح البحر بيها ..
باحساس سعادة و راحة عجيبة مش بيعرف
يدهالي الا هو .. هو وبس طبعا
.. الشتاء ..
هناك 12 تعليقًا:
فعلا الشتا جميل اوى
فيه هدوء وجمال
ودفء
ايوة فى الشتا تقدر تحس بقيمة الدفا
ولهذا أعشق الشتاء وأحبه
أحب دفء يدي فيه وانأ اضمها الي
أحب غيومه وسحبه ومطره
أحب فيه مشاعري المتدفقة التي تملأني
ربنا يسعدك دنيا واخرة
تحياتي
دكتور عمرو
صاحب المضيفة
بصراحة مش هزيد على كلامكو الجميل ده
و فعلا مافيش احلى من الشتا
"بس احلى حاجة بحبها في الشتا
.. انا .."
حلوة جدآ الجملة دي :)
كواحد من اهل الاسكندرية و عايش حياتي مع البحر..حاسس بالحاجات اللي بتوصفيها
يمكن بحب الصيف اكتر..بس احساس المشي تحت المطر مايتوصفش..
احساس بيرسم إبتسامة معرفش سرها رغم الاحساس الشديد بالبرد..
بس كل اللي اقدر اقوله..أهلآ بالشتاء :)
لسه امبارح عشت الاحساس ده المشي تحت
المطر الاحساس ده رهيب فعلا و مابعرفش
ايه هي المشاعر اللي جوايا فعلا كل اللي
اعرفه اني ببقى مبسوطة اوووووووي اللحظة دي
و فعلا اهلا بالشتا
شؤفتني و اسعدتني اوي بمرورك وتعليقك
اهلا ريم
...........
اشاركك الشعور بروعة الشتاء
وانا شخصيا اعشق زيارة الاسكندرية فى الشتاء لها مذاق مختلف تماما
وغير التخلص من الزحام الليل فى الشتاء له احساس مختلف
انا شخصيا أشعر بتدفق وحرارة كبيرة فى الليل الطويل
تحياتى لك
...........
نور الدين محمود
سعدت اوي بتعليقك اللي غاب فترة عن مدونتي
رغم انه غريبة مسألة الحرارة بالليل غالبا الناس بتلج
بس كل واحد واحساسه بالشتا الجميل
أحساسك يجنن
وصفك لحالة الحب دي دافي و رقيق
انا كنت طول عمري بكره الشتا بكرهه بمعنى الكلمة بحس فيه بالربة و الوحشة و الوحدة
بحس بحريتي و بنفسي في الصيف
بس دلوقتي بحب المطر جدااااااااااااااااااااا
برغم انه بيخلق دوايا حالة من الحزن الغريب و الشوق لحاجان عارفاها و حاجات لا بس بحبه جدااااااااااا
مش متخيلة الناس الي ما بتحبش المطر
ماتحبوش ازاي على رايك المطر لازم ينحب
جواه احاسيس كتير حلوة
و حبي الصيف زي ما انتي عايزة مع انه وحش اوي وحر
بصي يا ريم
بتحكي عن احساس حلو أوي
بس تعرفي
كل حد بيرتبط بجو معين
يعني انتي من بين الفصول بترتاحي وبتحب الشتا أكتر ودورتي علي اسبابك لده
لكنواحده زيي
كنت في فترة باعشق الشتا والمطر والجو ده
وفجأة بقيت بخاف منه جداً
بخاف بجد لدرجة الرعب
لدرجة محاولهالعزلة والانعزال
وباستغرب ده
ولقيتني بحب الشمس أكتر وصحيح جو الصيف مقرف بحق والناس مش بتبقي طايقه نفسها
لكن لقيت اني باحتمي بشمس الصيف
بتعطيني إحساس بأمان
لكن أظل أحب المطر في الخفاءرغم رهبتي منه
مش عارفه إيه خلق جو الرهبه ده ؟
ما علينا
احساسك بالجو ده رائع
وأتمنيلو يوم رجع ولقيت بيني وبين جو الشتا ألفه مفتقداها فعلا
تحياتي
وكل حبي
Lyssandra
ما عندناش شتا فى مصر :(
انا قربت انهار بجد..انا ما بعترفش بفصول تانية اساسا
الناس كلها الشتا عندها برد و بس انا عندى الشتا ده بالسنة كلها ببقى مبسوطة من غير سبب
بحبه و بحب كل حاجة فيه..بتلكك عشان احس بالبرد..بحب لبس الشتا و مطر الشتا و احساسى بالشتا
ما ببقاش انا غير فيه
و مابحسش بالرومانسية غير و انا بتفرج على فيلم الكارتون اللى بحبه فى البرد
ايوة كارتون انتى قريتى صح ما تتخضيش:D
تحديدا beauty and the beast
بموت فى المطر و شكل البحر بالليل
حتى اسكندرية اللى كنت بروحها متضررة بقيت بموت فيها لما عرفتها فى الشتا
لسعة البرد بتاعت الصبحية و شكل النيل وقت الفجر فى الشتا مالهمش مثيل فى الدنيا
يا ريت كل الفصول كانت شتا
ليساندرا
اكيد كل واحد بيتربط بالجو اللي يريحه
و هو الصيف مش وحش اوي يعني كفاية انه
فيه اجازة و سفر وكدة
بس اتمنى فعلا ترجعي تحبي الشتا و يفضل حب
المطر جواكي
*********
بنوتة مصرية
ازاي يعني ماعندكم شتا؟؟؟؟؟؟؟؟
اذا احنا لينا ما شاء الله تلات ايام
الدنيا بتمطر و الجو برد يبقى مصر
مافيهاش شتى مش معقول!!!!
انتي اكتر واحدة احساسك بالشتا زي احساسي
و على فكرة مش مستغربة خالص من موضوع
الكارتون انتي لو رجعتي للاوائل بوستاتس
هتلاقين كاتبة بوست كامل بس عن الكارتون
و عشقي للكارتون و استغراب اللي حواليا
من حبي للكارتون
بس حتة الفصول كلها شتى كنا هنمل صدقيني
و نكره الشتا خلينا كدة نحبه و نشتاق له
إرسال تعليق