اول ماطلع الاختراع ده افتكر ايامها كان
زي البعبع بالنسبة للناس
وبقى خطب الجمعة و التحذيرات و انه
رجس من عمل الشيطان و كان لو حد
عنده نت يالهوي بيبقى شهقة طويلة و
خبطة على السدر و هما بيقولو البيت
الفلاني عندهم نت .. ياساتر عندهم نت
و ياويل لو حد في العيلة دي عمل حاجة
غلط ده لو ولدهم وقع الطلبات بتاعت البيت و هو
راجع يبقى السبب هو النت و طبعا ما
هو اهله جابو له نت مستنين ايه لازم
يبوظ ويوقع الطلبات ..
ده في ناس كانت بتوصل بيهم انه
يقاطعو اي عيلة عندها نت مقاطعة ولا
مقاطعة المنتج الدنماركي و اليهودي
في وقتنا الحالي ..
انا بقى رحتلي في النت بدأتها بسبب الجامعة
اصل عشان نواكب التطور والتوكنيشن يعني
الجداول و تضبيطهم و النتايج بتبقى ع النت
و مع الوقت و الابحاث المطلوبة طبعا
جيبنا نت و كأننا جبنا عفريت في البيت
الثواني كانت محسوبة في قعدتي عليه
افتكر اول مرة دخلت نت خالي وبابا كانو
قاعدين ورايا تمام يشوفو هعمل ايه و ادخل فين ؟
و كأني هبلة يعني لو هعمل حاجة مش ولابد
هعملها وهما لازقين فيا كدة ..
بعد بقى الرقابة ما هديت و اطمنولي و انا الكبيرة
برضو يعني عاقلة بقيت اخد حريتي اكتر
بس كانت كل متعتي اني ادخل غوغل
و اطلع صور حاجة غريبة بس كنت بحبها
اوي وخاصة الصبح لو عندي اجازة ..
و مع التطور عرفت المنتديات و طبعا عيني
اتفتحت على الواقع المؤلم اصل اهلي زمان يعني
كانو مفهميني انه العرب اخوة و كلنا بنحب
بعض ولا عندنا خلافات و لاحاجة و انه اليهود
الوحشيين هما الي بيعملو حاجات و يقولو كلام
وحش عشان نكره بعض ( اهلي بقى طيبين
و مثالين و عايزين بنتهم تطلع كويسة ) بس
طبعا لقيت الواقع عالم تاني من خلال المنتديات
و شوفت الحب العربي على اصوله
يالهوي على كمية الشتايم و المشاكل بين العرب
في المنتديات خصوصا الخليجية ( انا خليجية على
فكرة بس للتنويه ) و الفاظ عمري ماسمعتها
من امثلة افقع وجهك يال ... و يلعن خشتك يال...
و يا ....... يا ....... و اصلا انتو ...... و احنا
اللي مش عارف ايه لحد ماكرهت تربية اهلي
لانهم ضحكو عليا بس طبعا دي الصدمة
الاولى بعدها اتكيفت مع الوضع و هجرت النوع
ده من المنتديات نهائي ..
بس طبعا برضو لقيت اجابيات و عرفت
ناس و عقليات حبتها و احترمتها
و عرفت ناس من جنسيات تانية و عرفت
عن الحياة في بلاد تانية و العادات المختلفة
عن حياتي و بلدي ..
بعدها جاه الماسنجر بقى ولمة البنات فيه
و التهيس للصبح تجربة حلوة و طبعا انا
كنت اخاف اقول لحد عندي ايميل اصلي
كنت فاكرة الماسنجر هو الشات و طبعا
الشات منكر و حرام و صياعة و انا بنت ناس
بس بعدين اكتشفت انهم غير بعض خالص
فاعذروني بقى مش هتكلم عن الشات لاني
عمري ما دخلته والله ..
و في الفترة الاخيرة جات المدونة و طبعا
دي احلى مرحلة في حياتي مع النت حاجة كدة
غريبة و صفحة مع الوقت بتبقى انت بتقول
فيها كل اللي نفسك فيه و تخرج كل الي
جواك و طبعا عالم بيضم كل من هب و دب
بقى الصايع و المحترم .. المتشدد و المتحرر
.. السياسي و الهياف .. المريض نفسيا و السوي
عالم تلاقي فيه تفكير جديد و تعرف ناس جديدة
من غير ارتباط حقيقي و مؤلم وده احلى مافيه ..
اخر حاجة بقى حاليا الاختراع العظيم الي اسمه
.. Facebook .. ده اللي مش عارفة افهمه
عملته نوع من الفضول للتعرف على الوحش
اللي مخوف اهل السعودية و العالم العربي و بيوصل انه خطب
و زواجات بتبوظ لانه الطرف التاني مشترك
في الفيس بوك و بيبقى ده سبب كافي للانفصال
و تلاقي البنت كدة مرعوبة لا حد من اهلها
يعرف انها مشتركة في الفيس بوك
و كمان عشان مابقاش جاهلة و اكون مواكبة
العصر و اعرف اتكلم عن الفيس بوك بثقة
و من ساعة ما عملته و صحباتي شغالين
تهزيء فيا انتي اصلا عاملاه ليش ؟ و ايش التخلف
اللي انتي فيه ؟ و لما ماتعرفي للشي تشتركي
ليش ؟ لا بتدخلي و بتنضمي لجروبات و لا
بتدخلي شات مسويته ليش ؟!..
بجد نفسي افهم زعلانين هما ليه يعني عاملاه
مع الخيل ياشقرة و انتو ايش لكم؟! ..
و مؤخرا كانو اهل الفيس بوك عشامنين
فيا على اساس اني عربية يعني و هماعايزين
يعملوه بالعربي و عايزين تأيدي معاهم
بس شكلهم زهقو و هما بيستنوني و عملوه
عربي و خلصو الموضوع و طبعا قالولي
لو عايزاه عربي اغير اللغة و انا بعين قوية
طبعا غيرته لعربي قولت يمكن استوعبه احسن بس
للاسف بجد مش عارفة اتعامل مع الصفحة
الميتة دي و اديني ادخل افتح ساعات و انسى
بيه و ارجع اقفله على اساس اني انا كمان
بفسبك زي الناس يعني و احيان اعمل لفة
كدة على الجروبات و اعمل بحث و اشوف
بقى الناس اللي هبلة و اللي جادة اللي بتهيس
و اللي مقرفين و مرضى و هلم جرو لسه
بدخل اشقر عليه الى حين ميسرة بقى
و لما يدخل الاختراع ده مزاجي ..
و اخيرا بجد اشكر كل حد فيكو قرى البوست
ده لحد الاخر لانه طويل اوي و ان اللي كتبته
نزلته من غير مارجع اقراه .. فلكم جزيل الشكر ..
هناك 9 تعليقات:
انا قريته لحد الاخر تصدقى :))
بصى الانترنت ده بالنسبالى كان وسيلة تسلية مش اكتر ولا اقل..اول ما طلع كانت قعدتى عليه من باب الفرجة على العالم الغريب ده..ما كنتش بقدر استحمل القعدة عليه مدد طويلة..و ما زلت الحقيقة
و وقت الكلية كان الانترنت ده شر لا بد منه عشان احاول استغنى عن الكتب على قد ما اقدر..
لحد ما اكتشفت المنتديات و فضلت متابعاها من بعيد لبعيد لمدة مش اقل من سنتين..و كل ما افتكر انا ازاى خدت الوقت الطويل اوى ده عشان اشترك بضحك على نفسي اوى :D
و بعدين كنت متاكدة انى مش هكمل شهرين تلاتة بالكتير فى المكان ده عشان كده ولا كان هاممنى ان الناس تعرفنى ولا تعرف اسمى لانى كده كده مش قاعدالهم D:
و كنت شايفة انه قمة الهبل انك تعرفى ناس من مكان مشبوه زى ده..لحد ما انضميت للهبل اللى كنت بتريق عليهم دول :D
و اخيرا جت المدونة اللى كل يوم اقول ده اخر موضوع و هقفلها و مش عارفة ايه اللى مانعنى لحد دلوقتى بجد :S
يبقى واجب اشكرك على قرايته
سنتين عشان تدخلي منتدى لا على كدة انا اشجع منك هو في البداية زوت اسمي طبعا بس بعدين بقى عادي الموضوع
و بالنسبة للمدونة بجد دي فيها سحر غريب افتكر اول ماعملتها بقيت مش طايقة و همسحها فجأة لقتني مش قادرة و بحبها اوي انا بقيت اقول ربنا يستر منها
و منوراني دايما بجد يا ياسمين
ذكرياتي مع النت
حكايات نبقى نحكيها لعيالنا لما يبقى النت بقى شيء من الماضي
هههههههههه
تصدقي مش فاكرة التفاصيل لية معاه
ااه على فكرة انا كمان قريته للاخر
لنون
شكرا ليكي انتي كمان
و تصدقي عندك حق في نحكي لعيالنا دي و انا اللي لما ماما تقعد تحكيلي على الماضي اقول يابختهم عندهم ذكريات على رايك شكلو على زمان عيالنا النت ده و الكمبيوتر هيبقو تراث
هههههههههه
هو فعلا طويل
بس جميل
انا لحد انهاردة امى بيبقى هاين عليها توقف عليا خفير الساعه او الاتنين اللى بفتح فيهم النت
يله مسيرها تتعود
انتى بقى فعلا حد لطيف جدا وسعيده لانى عرفتك
على فكرة انا مصرية خليجية
تسلمي يا قلبي على كلامك كلك زوق
و منرة المدونة و الله
أنا قرأته للآخر فعلاً ياريم
ومش حسيت انه طويل ولا ممل خالص
بس انتي بقي سيادتك مختفيه ليه من وقت ؟؟
ياريت تبقي تطمنيني عليكي
تحياتي
و ده اهم حاجة انكو ما تحسوش بطوله
و انا الحمدلله كويسة و موجودة بس زي ماتقولي مكسلة اكتب و اعلق اليومين دول
معلش سامحينا على التقصير
إرسال تعليق