اليوم في مجلس الامهات في مدرسة اختي
المديرة بتحكي موقف هو الاتي :
المديرة : جايبة الموبايل المدرسة ليه ؟
الطالبة : امي سمحتلي !!
المديرة خدت الموبايل لحد مايجي ولي الامرلانها
مش اول مرة ..
الام اتصلت تزعق : ليه تاخدو الموبايل انا سمحت
لبنتي تاخده المدرسة عشان تكلم خطيبها !!!!!!
هو صحيح عيد الام بس في امهات غريبة في الحياة
كل سنة و ماماتي و امهاتكو و امهات العالم طيبين
**********
حلو اوي يكون في حياتك حد ضحكته معدية
في حياتي اخويا اللي في اعدادي ما شاء الله عليه
بجد لما بيضحك لو الواحد فيه حزن الدنيا لازم
يضحك بسبب ضحتكه معدية بطريقة رهيبة
و بجد بنصحكو تدورو على حد ضحكته
معدية ساعات كتير هتكونو محتاجينها ..
**********
لحد الان مش فاهمة ايه اللي يخلي راجل
يستمر مع ست بتضربه و ايه اللي يخلي
ست تقبل على نفسها تضرب راجل لو
بيعاملها كويس و مش بيضربها ..
**********
بعض الزوجات بتوصل لمرحلة بتبقى اسفة
في اللفظ بنت هوى عشان زوجها سواء بتصرفات
معاه او تصرفات مع الناس و قدامه ارضاء ليه
لو الحاجة ماتصحش بجد و حرام اذا هو نسي
فإنتي بنت ناس و متربية مش جايبك من الشارع
يعني عشان تتطاوعيه في قرفه غصبا ..
( انا بتكلم في محرمات)
**********
والله يا جماعة في السعودية اللبن غير الحليب
عندنا حليب و لبن و زبادي و ليه انا عيلة
عشان بشرب الحليب قبل النوم زي العيال ؟
بس و ماله ايوة انا بشرب حليب قبل ما انام ..
**********
احيانا في حاجات معقدة او ممكن تكون بسيطة
بس الناس بتقعدها و ناس كتير بتمشي ورا
الناس اللي بتعقد الامور دي بس عشان ماتبانش
سطحية و تافهة زيي انا و الافلام ساعات بشوف
تفاسير سياسية و تحليلات اقتصادية لفيلم انا
بشوفه بعيون سهلة و بسيطة خالص و ده بخلي
صحباتي احيان يضحكو عليا بس مش مهم
و اصلا ليه التعقيد الزايد الحياة مش ناقصة
و بعدين ده مش تخلف ده بعتبره عمق وتميز
اني اشوف حاجة بعين تانية غير الناس ..
**********
قطعت الشوكولاتة و والله واحشاني اوي دي
بهجة عمري بس عايزة اتحدى الحزن والاكتئاب
لمرة في حياتي من غيرمساعدة خارجية و
عشان الرجيم اللي بوظته النهاردة كمان ..
**********
بعض الانانية مفيدة
صدقوني لازم الواحد يكون عنده شوية
انانية و حب الذات بشكل متوازن و صحي ..
**********
على فكرة الا الان مصرة مهند مش حلو
ولا واو زي ما بتقولو ده عادي و رجالة
عرب كتير احلى منه اتلهو بقى بس وروني
شطارتكو وانتو بتسمو اسم قديم زي خليل
زي ما اتشطرتو وسميتو مهند ..
**********
كلمة محشورة في زوري اوي اوي اوي
الغو عبارة بكره الكدب او ما بحبش الكدب
او سمي و ما بطقيش في حياتي الكدب
من قاموس العبارات بقى لانه تقريبا كلنا
كدابين بشكل او باخر
هتقولي لا انا مش كداب هقولك
خليك شجاع و صادق و قد كلمتك
راجعلي حياتك كدة و تعالى قولي لقيت ايه
هتقولي كدب ابيض هقولك الكدب مالوش الوان ..
**********
بصراحة بشوف انه البوم العسيلي ضرب مع
اغلب الناس بسبب اغنية مش زي الافلام اصل
كل واحد ووحدة حطو نفسهم بدال البطل
بغض النظر بقى عن انهم غلطو او مادوش
العلاقة و الطرف التاني حقهم او حتى
ماكانوش واضحين في العلاقة
المهم شافو نفسهم بطل الاغنية
الغلبان اللي بيتعذب و بعدها حبو الالبوم كله
عن نفسي حبيت ولد رسام رغم اني دخلت
اسمع الالبوم عشان اغنية احساسك ايه
و رغم جمال الالبوم بس لازم العسيلي يضبط
الكلام مع اللحن شوية ..
**********
يارجال العرب احتو المرأة بكل مافي الكلمة من
معنى و افهم كيفيةالاحتواء للمرأة التي معك
فكل امرأة تختلف عن الاخرى و ستنعم بالمرأة
التي طلما تمنيت وحلمت بها ..
و اذا ماحصلش او حصل العكس يبقى العيب
مش فينا العيب في الست اللي معاك صدقني ..
**********
بصراحة انا كنت بفكر انزل بوست عن الحاجات
اللي مش بحبها فيا و في بنوتة شجعتني من تحت
لتحت على ده بس مش هنزله لدلوقت على الاقل
لا مايروحش فكرك بعيد انا شجاعة زي بس اللي
هيقراه هيقول بقلدك ..
هناك 18 تعليقًا:
كل سنة و كل امهاتنا بخير و صحة يا رب
بنت خالى هى الشخص دا عندى..ضحكتها بتموتنى من الضحك بجد..ربنا يحميها
الست اللى تقبل ضرب من جوزها تستاهل اللى يجرالها بعد كدا..و الست اللى توافق تكمل مع راجل بيتضرب تبقى يا غبية يا عندها خطط اخرى :D
و مش بس فى المحرمات..انا ضد الفكرة دى قلبا و قالبا و ما بكرهش فى حياتى قد الراجل اللى تفكيره بالشكل دا..عايز تتجوز رقاصة مفيش اكتر منهم لكن ما تتجوزش واحدة بنت ناس و تطلب منها تتصرف تصرفات رقاصات بحجة انها مراتك ولازم تعمل اللى يرضيك..انت خدتها بشكل معين يبقى تقبلها زى ما هى و مش هعرف اشرح اكتر من كدا..بس النقطة دى حقيقي مهمة
هو ايه الفرق بين اللبن و الحليب؟ :)
الشوكولاتة مع قرار من جواكى انك تخرجى من الحالة دى هى الوصفة السحرية
انا معاكى جدا..اللى ما بيحبش نفسه عمره ما هيكون عنده القدرة انه يحب الناس..و اللى بيبدى الناس على نفسه هيفضل طول عمره تعيس لان جزء منه هيتوقع منهم معاملة بالمثل و دا عمره ما هيحصل
مهند بالنسبالى مش فى لستة الرجالة اساسا عشان اقول حلو ولا وحش :)
لا فى كذب ابيض على فكرة يا ريم..هو اى نعم الكذب عامة غلط لكن فى فرق بين كذبة عشان ما تخرجيش مع صحابك و فى نفس الوقت ما تزعليهمش منك و كذبة بانك تخبى حاجة مهمة عن حد قريب منك فى حياتك و له حقوق عليكى او انك تخربى بيت او توقعى بين اتنين صحاب..انا من اللى بيكرهوا الكذب و عندهم استعداد تام انهم يطردوا اى كذاب من حياتهم فورا مهما كان قريب
الاغنية دى مستفزانى جدا..كتير بيعيشوا نفسهم فى وهم مع ان الطرف التانى مالوش اى ذنب ولا وعدهم باى حاجة..اسهل حاجة يتقال ان البنات غدارين لكن الحقيقي ان ولاد كتير بجد بيستهبلوا
احتواء..هى الكلمة دى يعنى ايه؟ :D
انا حاسة اننا احنا اللى بقى مفروض علينا نحتويهم..خلينى ساكتة بدل ما اطول لسانى :D
انا بقى اكتر واحدة عايزة تشوف البوست دا..و بعدين مانا قلدتك و كتبت عن الوردة اللى بحبها اى نعم مش حلو زيك بس قلدتك برضه :D
بلاش كسل بقى و حطيه اشمعنى انا اتفضح لوحدى كدا :D
عشان تعرفى بس انه مش نص اسود دا تلت تربع :)))
ربنا يخليهالك و يحميها يارب
---------
بصي سيبك من الست اللي بتضرب لانها حكاية تانية ومتشعبة خلينا في الفتوة اللي بتضرب نا برضو بقول عندها خطط اخرى بس هي ايه لدرجة توصل تضرب زوجها ؟
---------
هو مش مهم التفاصيل من رقص وغير طالما ده برضى الطرفين و هما مبسطوين ان شاء يعملو ايه و يطلب ايه براحتهم طالما برضا بس الفكرة بجد لما يبقى شيء حرام او غصب هنا بقى اللي بستنكر الست تقبل ليه ؟ و خصوصا لو ظروفها مش قاهرها زي ستات لا حول و لاقوة لهم لانهم مقهورين من بيت اهلها و محيطها وزوجها
----------
اللبن غير الحليب هنااللبن بيبقى نقول متخمر شوية يعني تقريبا طعم الزبادي بس سايل مش جامد زي الزبادي فكتير من مصر لما بقول لبن بيبفتكروني بتكلم عن الحليب
----------
هنا بقى هقول شريرة وليكي نص اسود بدال ما تشجعني و خصوصا عشان الرجيم اني ابعد عنها تقومي تشجعني ارجعلها بينيو بينك حاسة اني مش هصمد كتير اصلا
----------
على رائيك و انا بقول حب نفسك حب و بعدها شوف الناس
---------
قوليلهم ياختي قال مهند قال
----------
ماهو لو هنقول كدة الي مخبي حاجة مهمة ممكن يقولك عشان لو قولت الحاجة دي هتاذي اللي انا مخبي عليه و كدة صدقني الكذب هو الكذب بس احنا بنلونه بس ممكن نقول في كذب مؤذي وكدب بيعدي بس كله كدب
----------
فكرتني بقصة شاب قرايتها متهم حبيبته بالخيانة مع انه ماقالهاش انه بيحبها بس هي المفروض كانت تحس بيه من اهتمامه و نظراته اللي ممكن تكون عادي بالنسبة لها لانهم اصحاب جدا و على ما يكون نفسه هي اتزوجت و قدمته عريسها على بأعز اصحابه فهو شايفاها باعته و خانت بجد لو قريتي سرد الحكاية هتحسي انه حد بسيتهبل على روحه يلا كله يحب يبقى مظلوم و الناس تتعاطف معاه
------------
ياستي اذا احتوية و يحتويني مش مشكلة احتويه و ليه لا بس لو احتويه و هو لا هعمل تفريغ اكيد بس برضو لسه في رجالة كويسة بكرة نقابلهم ( ابتسامة ) على رأي مصعب
-----------
ان شاء الله هنزله بس خليني اجمع كل حاجة بكرها فيا بجد كدة و بشجاعة و هنزله
منوراني دايما بجد
مبارح في الشغل كانو بيناقشوا موضوع ضرب الست للراجل بناء على حلقة كانت طلعت في التلفزيون ...
بصراحة في واحد كان بيتناقش كنت نفسي اقوله انت مراتة مش بس تضربك لا دي ليها الحق تقطعك كمان
بالنسبة للرجالة اللي كدة صدقيني دول مش رجالة دول شوية امراض نفسية ملهاش داعي
مهند بقى انا بشوفه ملهوش دعوة بالرجولة اصلا !! في كتير في العالم العربي اجمل بكتير بس احنا كدة بنحب الانتاج غير المحلي حتى لو كان معفن ههههه ( استغفر الله كلنا خلق الله )
اما يا ستي الكذب ... فنا بشوف في منه سكينة بتقطع اي فرصة لاي تواصل مع الشخص اللي بيكدب و في منه بيمنع كتير من جرح مشاعر ناس او اهانتهم بحقيقة ممكن ميبقاش ليها لازمة اصلا
و ياللا انولي بنصك الاسود انتي كمان خلينا نحتفل بجائزة النصف الاسود الذهبي هههه
الأخت الكريمة والصديقة العزيزة والقلم المميز ريم
جئت مسلما لألقى التحية على أخت كم كان قلمها رفيقا لسطورى فى سرائه وضرائه
قرأت كلماتك وكعادتك بكل بساطة تسبرين أغوار ألأمور وكما أضحك وأنا اقرأ كلماتك من قبيل اتلهووو الا أنى أقول معك أه والله اتلهو على عينكم
بجد أنت مميزة ياريم حفظ الله قلمك وقلبك
أخوك
نور الدين
لنوش
هو سبب ذكري النقطة دي كانت حكاية سمعتها من ماما وصل الامر فيها لانه البنت بتعمل زي والدتها و تضرب الاب كمان و جات الحلقة و كملت الباقي ياستي الله لا يبلى مسلمة براجل كد
----------
هو مش مسألة محلي و خارجي بس بجد الراجل مش بالجمال ده يعني تصدقي مرة و انا في الجيم و الكل طبعا بيتفرج كان فيه واحد اسمر كدة وشعره مجعد او فلو كدة فبقولوهم مين ده قالولي ده اخو مهند في المسلسل قولت طيب ده احلى من مهند طبعا البعض منهم نظر الي شزرا فأزرت الصمت
-----------
في النقطة دي بالذات ده قصدي احنا كلنا بنكدب بختلاف الاسباب و الالوان بس بنكدب بس لما نسمع كلمة كدب تلاقي الكل انا بكره لكداب و كره الكدب و الذي منه ده انا بحسه تناقض بصراحة طالما انا بكدب يبقى ما ينعش لما اقول و اعيد و العن في الصفة دي
يعني وجه نظر غريبة و عبيطة شوية
----------
عافاكو تمتو في الفضايح هجننو على البوست عشان كدة هعملوكو شوية تشويق
نيهاهاهاهاها
استاذ نورالدين
بجد سعيدة اوي بحضور و تعليق حضرتك و انك لسه بتابع مدونتي
و اطرائك ده بجد كتير على كتاباتي المتواضعة جدا
و يارب حضرتك تخرج من ملاذك قريب و ترجع لنا مدونتك وقلمك اللي بنستمتع بيه و مش بلحق اعلق فيه و الاقيك شايل التعليقات من البوست
في انتظار عودة ابداعاتك
يوم ام سعيد علينا كلنا و يارب يخلهملنا و يباركلنا فيهم ..
الضحكات الحلوة موجودة كتير قوى .. بس الانسان دايما مش بيشوف غير الحزن ..
بصى بعد مد الأيد على ما أعتقد ان الحياة بتستحيل انهم يكملوا مع بعض .. مفيش أسوء فى العلاقات الزوجية من مد الأيد و الاهانة بالأم و الأب .. محدش حيصفى بعد دا و محدش حينسى مهما حصل .. الحمد لله متربتش على ان أبويا بيضرب ماما أو ان أبويا بيقول لماما متضربنيش النهاردة يا بيبى :D
بصى خلينا واضحين و نفرق فى الكلام .. المحرمات فى العلاقة الزوجية معروفة للجميع .. غير كده هما حريين مع بعض .. هوا طلب منها ترقص و هيا وافقت مفيش مانع .. اما ان الزوج لما يطلب منها الرقص أهانة دى انا اختلف فيها .. و بعدين ما الزوجة ممكن تطلب حاجات تانية من الزوج .. يقولها لا اهانة .. و بعدين أيه دا اللى فاضى و بيخلى مراته ترقصله دا الواحد بيشوف دينا ولا فيفى عبده بيجرى .. و بعدين الزوج و الزوجة ستر و غطى على بعض .. هما حريين فيما تشتهى انفسهم بالرضا
و احنا عندنا حليب و لبن على فكرة .. اللبن عندنا زى اللبن اللى عندكوا .. اما الحليب فأحنا بنسميه لبن رايب .. بيبقى متخمر و بيبقى زى الزبادى بس فتافيت .. جربى اللبن الرايب أو الحليب مع قطع فراولة .. بيبقى تحفة
انا بحب اتفرج على الأفلام باكثر من منظور .. بس محدش يقولى فيلم بوحة سياسى يعنى :D
انا الشيكولاته بالنسبالى متعة .. بس مش دايما باكلها و مبحبهاش تارت او تورتة
بلا مهند بلا بتاع و بعدين انا عجبتنى الحتة بتاعة الكذب قوى .. انتى صح
الاحتواء فى رايى لازم يكون من الطرفين مش من طرف واحد .. بس دا بيبان من العنين أمتى مراتى عايزانى احتويها و امتى انا ححتاج الاحتواء .. انا برضه ضعاف قوى على فكرة :)
حستنى نصفك الاسود :D
يارب
------
اه بس الضحكة المعدية بجد حاجة تانية مهما كان الحزن بتضحكلها
-------
حلوة ماتضربنيش النهاردة يا بيبي دي
فعلا عندك حق الواحد يقول الحمدلله احنا في نعمة
-------
ماهو ده قصدي هما حرين لو مش حرام وبرضا بس المشكلة في الغصب و المطاوعة يعني ساعات الزوج بيطلب شي مش حرام بس مهين في ستات للاسف بتطاوع فيها غصب عنها مع انها مش مضطرة انا ليا صديقة فعلا اطلقت بسبب الموضوع ده زوجها للاسف من النوع اللي يقرا و يشوف وعايز يطبق ف وصلت لحالة قرف منه رغم انها بتحبه فطلبت الطلاق بصراحة ده التصرف الصح منها ماهو لو الظروف مش بتكره الست يبقى ماترضاش انها تكمل عيشة كدة
---------
طيب ليه الاغلب لما بقولهم حليب بيقولو يعني ايه بس اللي متخمر بيبقى اسمه لبن
عندنا مش حليب الحليب اللي هو اتاني اللي بتحط مع الشاي وكدة
حاسة انها بقت شيء مهم حليب ولبن و لبن وحليب مش فارقة بقى
---------
هي مش الفكرة بس الافلام الفكرة في الناس اللي مش بتقنع بوجه نظرها و بتمشي ورا غيرها لمجرد يقولو بيفهم بس في ناس فعلا بتعقد افلام زي بوحة و اللمبي
----------
انت قولت المفيد فعلا الشوكولاتة لوحدها متعة بس في التورت و غيره تبقى اكل
---------
الحمدلله في حد مؤيد في موضوع الكدب اللي ساعات بحس اننا بنخلط بينه و بين الغدر و الخداع
---------
هو اكيد الاتنين محتاجين احتواء من الاخر بس احنا اسلوب مجتمعتنا بحسها بتخلي اوي فعلى الست رد فعلى لفعل الرجل يعني هو يحتويها و هي بعدها تحتوية مش العكس دايما الراجل لازم يبدا الاول في اي حاجة بس على فكرة انا من الناس اللي بشوف فعلا الرجل الطبيعي ضعيف و محتاج كم كبيرة من المرعاة و الحنية
------
نصفي الاسود قريب ان شاءالله بس بشوقكو
نشره الاخبار دى يا رييم حرام عليكى ركزى فى موضوع يعنى كل حاجه كتباها ليها رد طويل اعمل ايه بس
اولا كل سنه وماما طيبه
اما عن الام اللى بتدى بنتها الموبيل طيب ولازمتها ايه المدرسه خليها تحب فى البيت احسن يعنى
بجد ردها كان غريب
الكدب هو الكدب مفيش ابيض وبينك
ريم تعبتينى ركزى فى موضوع
أول زيارة لينا هنا
وإنشاء الله مش الأخيرة
بس إنتي إبقي إستحملينا
عيد أم سعيد على الكل بإذنالله,وربنا يرحم امهاتنا اللي توفوا..
على فكرة
أنا عجبتني..جملة قوي من اللي انتي اكتباها على الجنب..مش عارفة..يمكن انتي ضايفاها النهاردة :) يمكن :)
آبي
منوراني والله بس انا مركزة اهو
هي بس مقتطفات كتير عليها موضوع واحد لكل وحدة فلمتهم مع بعض في موضوع
اسفة اذا دوختك معايا
و نوريني دايما
شفقة و احسان
اهلا بيكو واكيد مش هستحملكو بالعكس هنبسط بتعليقاتكو
شرفوني دايما بقى
و سعيد عليك و على مامتك يارب و ربنا يخليهالك
بس ما قولتليش ايه هي الجملة دي
ازيك ياريم
بصراحه الواحد مش عارف يشخبط معاكى فايه ولا فى ايه؟
بس هى خواطر جميله كلها
اهلا اهلا بالاخ العزيز الغايب
بجد سعيدة انك نورتني بعد كم الغيبة دي
و ان شاء الله المانع خير
و على الشخبطة انتي بس مشي الحروف و هتلاقيها بتشخبط لوحدها
بتاخدي كورس ايه ؟؟
مش عارفة ليه حاسة باحساسك دة
انا كمان مليش طولة بال على حاجة بس عارفة دة احساسي باني مليش نفس فحاجة و لا طايقة اعمل حاجة و لا حابة و لا مهتمة بحاجة مضايقني بشكل خرافي !
معرفش لو انتي زيي بس انا بحب ابقى اكتيف و متفاعلة مع الحياة
انتي طبعا غلطتي في العنوان التعليق نزل تحت شوية (^_^)
هو مش كورس من بتوع اساليب الحياة هو كورس دراسة يعني لغة و كمبيوتر وكدة
هو تقريبا وصفك لنفسك يشبهني حاليا و اتمنى انها فترة وتعدي وارجع زي ماكنت
إرسال تعليق