اختلف المضمون .. و الاناء واحد ..

مبدئيا مش هعرف اصنف الفئات اخوان سلفين وهائبين

متحررين مش عارفة ما تربتش على كدة و عمر اهلي

قالولي الدين بصنف الناس كدة لذلك هكتفي باني

اقول هما فريقين الفريق الاول متشدد و الفريق الثاني ضده..

دهشت عندما دخلت مدونتين ضد الحجاب او النقاب و

هجومهم على فئة متشددة ولا علاقة لتشددها بالدين الذي

اعرفه ولا الاسلام من اسلوبهم في التكفير و الارهاب ..

و هرود امثلة لما اعتقده مذهب كل من الفريقن..

---------------------

الفريق الاول يرى انه الولي على دين الله و هو من يفهم

الدين حقا و يعي معانية

الفريق الثاني يرى ايضا انه هو من فسر الدين كما اراد

الله و هو من يحمل لواء التحرير

-------------------

الفريق الاول تمسك برايه و كفر كل من على غير منهجه

و وجهته و طريقه

الفريق الثاني حقر و استهزاء بكل من هو ضده و لا يعي

اويدعو بمبدائه

------------------

الفريق الاول حكم بالمظهر و عمم شكل للمسلم من غيره

اصبحت انت من غير اهل الدين

الفريق الثاني ايضا حكم بالشكل و الثياب و منها اصبحت

من السفهاء المتخلفين

-----------------

الفريق الاول صنف من لاترتدي النقاب بالسافرة و

العاهرة و انها لاتعي الدين

الفريق الثاني على نفس النهج صنف المنقبة بالمتزمتة

المتشددة لا راي لها و لا كلمة بل لعبة في ايدي عابثين

-----------------

الفريق الاول يبغضك و يغلظ علي بالقول لمجرد انه

كلامي ليه بوجه مكشوف ولو من وراء نقاب مستعد

لتقلبي و مناقشاتي بصدر رحب و صوت عادي حتى

و لو كنت ضده في فرضية النقاب ..

الفريق الثاني ايضا استهزاء و رفض و نبرة احتقارلي

لاني اختلفت مع من وراء نقاب و لو كنت بوجه

مكشوف لاجلس معي و حدثني و ناقشني و باحلى

النبرات والطف الكلمات ..

--------------------

الفريق الاول اختار جهاده بالعنف والتكفير و التشدد
و التفجير و الارهاب

الفريق الثاني اختار جهاده بالشتم و اللعن و السباب
و التحقير باقذع الالفاظ و العبارت

-----------------------

ما ادهشني مدى التطابق بين الاثنين على الرغم من

الحرب و قوة الاختلاف كلامهما نفس اللاسلوب و ماوجدت

اسلوب احدهما في دين ولا في مناهج وسير النبيين فكلاهما

اسير لثياب و قطعة قماش كلامها يمشي حاملا قلمه و

يعطي الدرجات الفريق الاول غير المنقبة اكس و المنقبة

علامة صح و الفريق الثاني العكس .. كلاهما مليئ

بالكره و العنصرية و بعض العصبية القبلية ..

الفريق الاول نسي انه خلف الحجاب والنقاب ربما

توجد شخصية بلا اخلاق و خلف خصلات الشعر

توجد شخصية متدينة محترمة و الفريق الثاني ادعى

انه احسن و ليس بهو احسن فهو ايضا نسي

انه خلف الحجاب و التقاب ربما توجد عقلية رائعة

و متفتحة و خلف خصلات الشعر توجد عقلية

ورأس عنصرية فارغة ..

كلا الفريقان نسي الانسان الذي تحت هذة الثياب ..

كلاهما اصبح اسير في حكمه و مقيد بقماش فهل

هناك فرق اما انا وحدي من ارى وجهة التشابة هذا ..

اما انا منقبة سعودية مسلمة متدينة و متحررة لا

انتمي للفئة الاولى و لست من افراد الفئة الثانية ..

انا فرد في فئة ثالثة فئة احتوت على اناس من كل

الفئات يرتدون كل الازياء وكل انواع القماش .. اناس

من مختلف الاديان سماوية و بشرية .. اناس من كل

الجنسيات عربية او اجنبية .. اناس من كل المذاهب

الاسلامية .. فئة اتعامل كرسولي بالحسنى فيها مع

كل انواع البشرية طالما احترمتني ولم تبغي لي الاذية ..

ما يميز فئتي انها تعايشت مع بعضها رغم كل

التعارضات ..تكون فيها الاخوة والصداقات

رغم كل الاختلافات .. فئة سمت و رقت بانها

عرفت معنى الانسانية و جعلتها اساس التعامل بين

بني البشر .. فئة تحررت من الالوان و

انواع الاقمشة و الثياب و اختلاف اللسان ..

فئة اختلفت في كل شيء مع الاخر و لكنها نجحت

في تقبله .. فئة جعلت الحوار و احترام الاخر

شعارها فاستطاعو بحب ان يكونو اخوة .. فئة كلا

فيها عرف معنى الدين و مامعنى انسان ..

تلك فئتي التي اغفلتم وجودها بعد ان اعماكم

غبار الكره لبعضكم و صم اذانكم عن صوتها دوي

قنابل السباب و الشتائم و التكفير في مابينكم ..

تلك هي فئتي التي جمعت من كل ما ناديتم به

و تجردت من كل ما ملئكم من تفريق بين الناس

و كره للاخر لمجرد انه ليس على فكري و

منهجي و ليس عقله كعقلي ..

لا يهمني راي كلا الفريقين الاول والثاني فيي

لاني اعرف ارائهم مسبقا و ماذا ستقول احرفهم

و اجابتهم !! فليس غرضي من الموضوع اقناع

الفريق الاول لانني و بعد كلاماتي سلفا اصبحت

عندهم مرتدة.. و ليس هدفي ارضاء الفريق الثاني

لاني اعلم اني عنده مجرد رجعية مختلة ..

موضوعي ماهو الا تذكير بفئتي اللتي انتمي اليها و

اشعربراحة فيها فئة استطيع فيها ان احب من هم

غيري وان احترم من اختلف عني .. فئتي التي

افخر بها فهي لما تقيدني في تعاملي مع غيري بلون

و مذهب او بلد و لباس .. فئتي التي تربيت فيها بعيدا

عن الكره و الرفض والاستصغار فيها .. فئة كان

معدن الشخص فيها هواساس حبي و صداقتي له

و انا اعامل الاخر كانسان ..

ففئتي بمنهجها و مبادئها اعتقد انها و صلت للقمة

عند جميع الاديان و امنت بالسلام الذي هو

من غايات الاسلام ..

رمضان كريم يا كل فئات المسلمين

و دمتم سالمين ..

احلى هدية ..

ده هدية الاخت العزيزة ليساندرا

شكرا بجد على الهدية الحلوة دي

و ربنا يبلغك رمضان باحسن خال

و يباركلك فيه ..

عشان نرمضن صح ..

وحشتني المدونة جدا و المدونين وعالم التدوين

ماتخيلتش يوم انه ارتبط بالعالم ده كدة

اعتذر مرة تانية عن غيبتي وتأخري بالتعليلقات

لمشكلة في النت ..

------------------

احب اباركلكو بالشهر و اقولوكو رمضان كريم

بعد الزحمة طبعا ومبارك عليكو الشهرو كل سنة

وانتو بخير ويارب يبلغنا هو في احسن حال ..

و اسأل الله انه يكون شهر مكسب لينا جميعا و

نخرج منه باكبر قدر ممكن من الحسنات..

اسأل العلي القديرانه يقدرنا على الصيام الصحيح

و يبعد عنا التعصيب بحجة الحر و الصيام ..

و اننا نتقن عملنا و نخلص فيه و مش العكس لاننا

صيامين وتعبانين ..

و يارب نقدر نخفف من الاكل ومايبقاش الفطار

اول همنا ز كأنه اخر يوم هناكل عشان نقدر

على صلاة التراويح بإخلاص ..

و كمان نقدر نبعد نوعا ما عن كم المسلسلات
الرهيب و نتفرغ لقراءة وختم القرآن ..

يارب نقدر ننسى اللهو و الانبساط و الاختراع

الظريف اللي اسمه الخيم الرمضانية و نعرف

قيمة الفرصة العظيمة دي ..

و انه العشر الاواخر ما تضعيش مننا في جري

السوق عشان ملابس العيد كانه عمرنا ما هنلبس

تاني و ننسى تحري ليلة القدر والاعتكاف ..

دي شيء بسيط جدا من الامور اللي بنوقع فيها

في رمضان و الي يارب رمضان ده نقدر ننجو

منها هي و غيرها كتير من الاخطاء ..

اسأل الله انا يباركنا و يبارك لنا في هذا الشهر

و نكون من الصوامين القوامين و ختام

القرآن و واصلي الارحام .. ان نكون من من

ينالو المغفرة والرحمة و العتق من النار ..

اسأل الله ان نكون من من غسلت قولبهم عن لهو

الدنيا و طهرت بحب العمل للقرب من الله ..

و اخيرا اكثر ما اسأل الله لنا ان يثبتنا على ذلك

بعد رمضان وماكتب لنا في هذة الدنيا من ايام ..

هو و هي في شخابيط بنوتية ..

البوست ده عبارة عن شوية كلام على اراء متعلقة

بالبنات اوالولاد و ممكن حاجات عن الحياة

اراء مختلفة او متاشبهة مترابطة او متفرقة

كتير يبقى لكل وحدة فيهم بوست لوحدها لانها

في النهاية مجرد شخابيط ...

----------------

قالوا لازم الوحدة تتجوز واحد اكبر منها على الاقل بعشر

سنين عشان تحترمه ..

طيب مش غريبة انه اللي بشوفه دلوقت العكس ؟!

الاحترام مش بالعمر لانه الزواج بيدوب الفرق الاحترام

بحاجات تانية كتير ..

----------------

هو صحيح هيفا و هبي رمز الانوثة الطاغية ؟!

بس عشان حبايب هيفا ما يفهمونيش غلط الست

حلوة فعلا و انا شخصيا شايفاها جميلة جدا بس

يعني ايه الانوثة والاغراء في وحدة بتتلوى على الحصى ؟!

--------------

تصدقو فعلا لو الشباب بطل يعاكس البنات بنات كتير

هتحترم نفسها اصلي في المول شفت بنتين عمالين

يدورو و يلفو عند شلة شباب عشان يعاكسوهم بس

الشباب مش واخدين بالهم و شكله مش في دماغهم

و البنتين خلاص اتوترو وزعلو جامد و بوا ماشين

زعلانين و مكشرين لحد ما الشباب خدوا بالهم في

اخر لحظة من البنتين و ابتسمولهم والله بس ابتسمولهم

البنتين وشهم اتغير و ورد و الابتسامة الحلوة

طلعت بس عشان ابستمولهم تخيلو لو كل شاب

طنش البنات اللي زي دول كدة مش كانت البنات

احترمت نفسها اصل مافيش حد هيبصلها تتزوق

لمين ياريت بس نجرب كدة يمكن تنفع ! ..

--------------

الرجالة عندنا اليومين دول بقت تتطلق مراتاتها عشان

معجبين بمهند بغض النظر عن انه الستات مزودينها و

اللي هما طلبو الطلاق من نفسهم

مش غريبة دي مع انه الستات ياما استحملت

مشوار طويل مع الرجالة ابتداء من يسرا و باسكال و نوال

و حاليا هيفا و نانسي و اليسا و نساء البرتقالة و التفاحة و ..

و الطريق لسه مكمل و من رحمة ربنا لو اقتصرت مغامراته

و اعجابه على نساء الفن و مش نساء الواقع ..

هو صحيح الست غير الراجل يعني بس مش قادر تستحملها

مهند ده حتى يمكن مش معجبة بيه بي اهي محاولة تغيظك

و تحسسك بالنار اللي بتحسها هي تقوم بدال ما تتعدل وتبقى

رومانسي معها ترمي اليمين اومال العصمة فضلت في

ايدك ليه ؟! و ليه ربنا فضلك بالقوامة مش عشان حكمتك

و ترويك و عقلك .. يلا ماعلينا ..

--------------

هو الفرح مش المفروض يبقى زي ما اتسمى يعني الناس

تكون فرحانة طيب ليه المعازيم مش بيفرحو يشتغلو نم

على اهل الفرح ؟ و ليه دايما اهل العرسان بيتخنقوا ؟

على كدة مش المفروض نخترعله اسم تاني؟!..

-------------

(مو مهم الفرح و تكاليفه و تجهيزاته المهم العروسة تصمد )

كلمة شاب سعودي وسط موضة العرايس اللي بقت بتخلع

من اول شهر و اول اسبوع و اول يوم و حتى بعد الفرح

مباشرة ( والله العظيم حقيقة ) ..

--------------

قالو الحب عطاء بلا مقابل

بصراحة بحس المقولة دي كدب الحب اخد وعطاء بين

اتنين و العطاء من طرف واحد الا ما يقتل الحب في يوم

اذا كان رب العالمين اللي المفروض نعبده من دون ما نستنى

مقابل من كتر نعمه علينا مقابل عبادتنا واخلاصنا و طاعتنا

بيزيد نعمه علينا في الدنيا و يرزقنا الجنة في الآخرة ..

حتى عطاء الأم بمقابل و مقابله انك تفرحها بيك و تحن

عليها و تراعيها في كبرها صحيح هو مقابل فيه

مصلحتنا بس برضو مقابل يبقى ازاي الحبيب ياخد

بلا مقابل ؟! ..

---------------

قريت في مجلة موضوع عن ضرب الستات

واحد اكاديمي و يمكن صيدلي بيقول : الست لازم

تتضرب و تنهان عشان تتعدل و مراته تحمد ربها انه

بيخليها تشتغل عشان تصرف على ملابسها و زينتها و

مكياجها و لو يوم قصرت في حقه ياويلها و انه دي

الطريقة الوحيدة عشان الراجل يقوم الست و يبقى

راجل حقيقي مش رجل ناقص ..

طيب يا ابو المراجل رسولنا عليه افضل الصلاة و

السلام عمره ماعمل كدة ولا وصى و لاامر بكدة ده

كان العكس تماما يبقى مين اللي راجل ناقص ؟!..

----------------

بنتقص جدا الراجل اللي يأمر الست بحاجة لمجرد

انه الراجل و عايز كدة طيب ايه الانجاز اللي عملته

و ايه المرجلة في ده ما طبيعي في الاخر كلمتك

هتمشي لانك الراجل يبقى ايه الفخر و الابداع

و العظمة في ده ؟! ..

----------------

بيقولو الراجل اللي تتعاكس بنت تخصه و ما

يدافعش و يتخانق لها مش راجل ..

كلام سليم ومية مية بس مش دايما

اصله لو كانو اكتر من تلاتة يبقى تصرفه غباء

و اهدار لكرامة البنت اللي معاه هتقولولي لا و

وازاي كدة هحكيلكو على موقف و انتو احكمو ..

وحدة اعرفها راحت البحر مع اخوها في العيد و طبعا

بيبقى زحمة وشباب رخمة عاكسوها قام اخوها

اتحمق و دق الصدر وراح يتخانق معاهم وطبعا هما

اكتر منه ضربه و بالصدفة ابن عمه وشلته عدو

و طبعا دخلو يساندوه وجات دورية الشرطة ولمت

كل الشباب و ده اللي بيحصل عندنا بما فيهم اخو

البنت و طبعا البنت فضلت لوحدها و كل من هب و

دب بيعاكسها و يرزل عليها و يرقمها و هي ما كانش

معاها موبايل وقتها في الاخر قررت تاخد تاكسي

بس مشكلتها ماتعرفش توصف بيتها فطلبت من سواق

التاكسي يوصلها لمعلم قريب من بيتها ( وطبعا من

حسن حظها انه السواق بيخاف ربنا لانه ممكن طالما

عرف انها مش عارفة طريقاه يخطفها و شوفو انتو

هيحصل ايه ) المهم اتصلت من عند بقال و جم اهلها

اخدوها و طبعا انهالت عليها سيول التهزيئ على انه

هي السبب في اللي حصل لخوها ..

موقف زي ده انهي اكرم للبنت فيه انا كبنت شايفة

اكرملي اخويا يتنازل عن كبريائه و ياخدني من

المكان و نمشي على البيت معززة مكرمة بدال اني

اتبهدل بالشكل ده و لا ايه رأيكو؟!..

اقرو القصة كويس اوي قبل ماتحكمو ..

---------------

اسخف نصيحة سمعتها :

دلع البنت وانوثتها فن لازم تتقنه من قبل الزواج

و تمارسه و تشوف تاثيره و اتقانها ليه ..

لحد الزواج مقبول بس قمة السخف اللي بعد كدة

يعني الوحدة تروح تتدلع على البقال ولا سواق

التاكسي حضراتكو ؟! ..

كفاية اهدار لكرامة المرأة تحت شعار الانوثة ..

حالة غضب ..

شوفتو الولد ده اللي في الصورة دي بجد حاسة

نفسي عاملة زيه كدة مليانة بغضب فظيع مش

عارفة جاي منين و ليه ؟!

غضب على كل اللي حواليا و ما حواليا نفسي

اعمل اي حاجة انفس عن غضبي ده ..

نفسي في حد اتكلم معاه يمكن ارتاح بس عايزة

الحد ده يكون بيسمع مش عايزة قرف ابو

العريف الداء العربي الشهير و يقعد ينطلي

بحلول و نصايح و حكم يسمعني من سكات ..

و مش يسمع و خلاص كمان لازم يسمع و يحس

و من غير كلام و انا حاسس بيكي و عارف اللي

انتي فيه و الكلام ده و التعاطف البايخ ده

اللي ببيخليني عايزة اولع في اللي قدامي و

اهب فيه هو انت دخلت قلبي عشان تحس بس

عايزة اتكلم برضو مع حد يحس بيا و باللي اقوله

و يقعد ساكت ما يتكلمش واحس انه بيسمعني

و هو بيحس ..

ولا مش عايزة اصلا اتكلم مع حد .. عايزة اقعد

لوحدي في مكان بعيد مافهوش حد اعرفه ..عايزة

اقعد قدام البحر طول اليوم لوحدي .. مش عايزة

خروجة عائلية و جو لطيف مش طالبة لاطافة دلوقت ..

عايزة ابقى لوحدي بعيد عن كل الناس .. لا عايزة

اهل ولا اصحاب و لاحبيب ولاحتى المدونة دي

اللي بحبها لاني مش طايقها هي كمان معاهم دلوقت ..

عايزة اكون انا و ريم و بس .. عايزة اتنفس شوية

عايزة احس اني حرة ..اضحك ..ابكي .. اصرخ ..

اكسر الدنيا .. اتصرف بعقل ..اتصرف بجنان انا

حرة .. عايزة احس بنفسي احس اني حرة ..

و اللي بيزيد غضبي اني وسط الغضب ده بظلم

ناس كتير معايا بتحبني و خايفة عليا و دايما بسألو

عني و فاكريني بس انا مش طايقهم و حاسة انهم

تقال على قلبي .. حتى في الجيم اي وحدة بتقرب و

تحاول تصادقني بخترع مية موضوع عشان اوصلها

كلمة وحدة الفترة دي مش عايزة اعمل صاحبات ..

اه بدايق و انا بقولها كدة واصدمها و انا عارفة انها

حابة نبقى صحاب و ارتاحتلي بس معنى اننا نبقى

صحاب اني اقلق عليها و افرحلها .. ازعل لزعلها و

اشيل همها .. معناه سؤال و تليفونات .. ايميلات

ومسجات .. معناه اني اعيش معها مشاكلها .. و

اشاركها ضحكتها .. ده معنى الصداقة عندي صداقة

يعني اعطي و انا دلوقت مش قد العطاء تعبت و انا بدي

والله تعبت و ماعدش ليا نفسي ادي حد حاجة ..

ما اديت زمان وخدت ايه كل اللي بعمهل في لحظة

بيتنسي لا و كمان مش من حقي ازعل و انا اتغيرت

اقولكو ابقو سددو الديون الي عليكو ليا بعدين

تعالو ازعلو واتكلمو ..

بقيت مش طايقة حاجة من كتر الغضب اللي ماليني

واللي زاد الغضب ده اكتر اني بعد ما رجعت من

الجيم لقيت اخويا زعلان وانا لما اخويا بيزعل

الدنيا بتسود في وشي مش بطيق يزعل او حد

يزعله صحيح انه بقى احسن وبيضحك

بس برض زعلني زعله اوي ..

حاسة بخوف من حالة الغضب دي .. خايفة

على نفسي لاني كاتمة كل الغضب ده جوايا و

مش راضية اطلعه .. خايفة لاني حاسة نفسي

قنبلة موقوتة ماشية مستنية تكة و تنفجر ومش

عارفة من تعيس الحظ اللي هتنفجر في وشه

و مش فارقة معايا هو مين طالما مش اخويا ..

اول مرة احس بكدة اول مرة ابقى مكبوتة بغضب ..

اول مرة الاقيني مش انا .. اول مرة اعصابي

تخذلني و احس اني مش مستحملة .. اول مرة

احس فعلا اني عايشة حالة غضب..

كشف المستور ..

ده واجب اجباري من مستر نور الدين

و بصراحة مش واجب ده كشف المستور

ولاني طبعا فاضية وقاعدة في البيت دايما

وجزء كدة ضغنن خالص خالص جوايا فاكر

انه اشتاق للدراسة و المذاكرة وايامها فقلت

اعمل الواجب بدري

بصراحة انا عاجباني الصورة اللي حاطتها

فوق اوي ياجماعة

المهم

الواجب هو ما يلي :

---------------------

1- أذكر صفتين لا يعرفها من يحدثك لأول مرة

ممكن اني مرحة اوي وبحب الضحك لاني غالبا ببان

جد شوية و اني مجنونة اوي لاني دايما ببان عاقلة ورزينة

--------------------

2- أذكر صفتين يراها الناس فيك وهى ليست كذلك

- اني مش بزعل و اخد على خاطري بسرعة و بعدي كتير

بس ده مش حقيقي انا بفتكر الاذى كويس جدا جدا بس

الشخص بيحدد موقفي منه بباقي تصرفاته او انه يبقى في

نظري اقل من اني اتعب نفسي وابين زعلي له عشان كدة بعدي

- اني قوية وصلبة بس الحقيقة اني ضعيفة اوي بس هما مش بياخد

بالهم و بيتخدعو بالمظهر و مش بيحالو يحسو ضعفي و احمد ربنا

على كدة

----------------------

3- أذكر ثلاثة من مدوناتك المفضلة

كان نفسي اكتب اكتر من تلاتة بصراحة

- مدونة امل قبل ما تمسحها بس هختار غيرها

- طبعا مدونة مستر نور الدين

http://n78mg.blogspot.com/

- مدونة انا حرة

http://banoutamasreya.blogspot.com

- مدونة الطريق الى الكوشة

http://misssosa.blogspot.com/

----------------------

4- لو معك ثلاث وردات لمن تهديها

- ماما

- اخويا

- التالتة هقسمها نصين و هتحفظ بنص منهم

----------------------

5- من هو افضل رئيس عربى برأيك برر بسببين

هههههههههه

والله كلهم اضر.. قصدي زي بعض بس

ممكن الشيخ زايد حاكم الامارت الله يرحمه

خدم بلده و وصلها لمصاف الدول المتقدمة

---------------------

6- شخص كنت تتمنى وجوده بحياتك من زمان

مافيش او ما اقدرش اجزم بحاجة دلوقت

---------------------

7- شئ فعلته وندمت

- حاجة كدة احتفظ بيها لنفسي بلاش فضايح

- تقدر تقول ندمانة اوي

اني اتخصصت التخصص بتاعي في الجامعة

لكن برجع اقول الخيرة فيما اختاره الله يمكن خير

انا مش شايفاه دلوقت

---------------------

شئ لم تفعله وبردو ندمت

الحمد لله لحد دلوقت مافيش حاجة وصلت معايا

لدرجة الندم اني معاملتهاش بحلق نفسي دايما

و الحمدلله غالبا ربنا بيعوضني باحسن

---------------------

9- حلم تتمنى تحقيقه

- اني اشتغل و ادعولي بقى

- اني اقدر لو مرة اكون زي ما اهلي يتمنو

عشان احس انهم فرحانين بيا بس ما اعتقدش

هيرضو مهما حصل و اعمل بيلاقو عيب فيا

- اني ابقى ام و اربي عيالي كويس

و يكونو شخصيات تفرح بجد

----------------------

10- إختصر نفسك فى ثلاث أسطر

ده سؤال صعب اوي بصراحة اصل تلات

سطور قليلة على ريماية حبيبة قلبي

ريم انسانة راضية و صبورة بكلمة تسعدها

بنت هادية جدا ورزينة بس انفعاليه اوي

لكن لو استحملتها و احتويتها في اسوء حالتها لاني

صعبة وقتها بتملكها و بتفضل شايلة الجميل ده العمر كله

و تقدرك اوي (اخويا الوحيد اللي فهم الجانب ده) ..

بسيطة و سهل التعامل معها بس لازم تكون حذر

لانه هدوءها مصيبة بس الناس بتفتكر انه روقان

لكن لو وصلت للهدوء التام الاسلم جدا تخرجها

منه بتبقى واخدة بالها من كل حاجة كويس اوي بس

بتسكت ومش بتعرف تبين زعلها نفسي ازعل زي الناس..

بتحب الحياة املها الكبير تبقى ماما في بيت هادي من غير

دوشة وفيه حب ومودة ورحمة و احترام وتفاهم و يكون

جمبها انسان حنين يطلع الطفلة الرقيقة اللي حبسها سنين

تحت قناع الاخت الكبيرة العاقلة والرزينة و اللي بتتحمل

المسئولية و يعرف يتعامل معها اوي ويديها الامان

و لازم يعرف يخليها تعيط في حضنه و ما تبقاش قوية

وصلبه قدامه لازم يعرف يحتويها جدا لالالالالازم

يخليها معاه تبقى ريم بجد مش اللي الكل يعرفها ..

هما بقو تقريبا 18 مش تلاتة مش كتير عليا اكيد

----------------------

أهدى التاج لثلاثة مدونين

- اهديه لشمس صاحبة مدونة جديدة لسه

- انسان بلا عنوان

- قباري

و طبعا اي حد عاوز يحله ما يمنعش برضو

---------------------

دمعة شوق..

عندما يقترب موعد حديثها معه يرتجف قلبها من السعادة

تدق نبضاته لحن جميلا مرحبا به ..

عندما تستمع اليه و هو يتحدث ترتسم بلا شعور ابتسامة

هادئة وحنونة على شفتيها فهي تعشق ضحكته و تتعمد

اضحاكه احيان كثيرة لتستمتع بها . .

تحب الاستماع اليه رغم سرعة كلامه في بعض الاحيان

و التي تعجزهاعن فهم مايقول لاختلاف اللهجات ..

حتى عندما يسترسل في الحديث عن تخصصه وعمله

الذي يعشقه رغم علمه الاكيد بعدم معرفتها و فهمها

لاغلب تفاصيله تزداد تلك الابتسامة في الاتساع مع

اتساع سعادتها به..

و هناك في عينيها الحالمتان دمعة تحاول مجاراة تلك

الابتسامة في الظهور ..

دمعة لطالما جاهدتها في كل حديث معه كي لا

تسقط ويشعر هو بسقوطها..

دمعة تأبى الاستسلام و الرضوخ لامر صاحبتها

بان تظل حبيسة في تلك العين بل و تزداد قوة

في كل لحظة تزداد هي فيها ضعفا فهي مازالت

تريد ان تبقى تلك الفتاة القوية في عينيه..

تريد ان تظل تلك الصامدة لا من ستظهر دموعها

تعبها و ضعفها..

و لكن دمعتها اصبحت اكثر اصرار وضراوة

فهي لاتفهم مراد صاحبتها .. لا تعي انها لا تحاربها

و لم تتعمد يوما الوقوف في وجه سقوطها ..

كل مافي الامر انها تريد ان تنتظر الوقت المناسب

لتحررها من تلك العينين .. اللحظة التي تكون

فيها هي له .. تريدها ان تسقط لتجد في انتظارها

يديه .. لتجده مستعدا لاحتوائها بين ذراعيه ..

و لكن هل لدمعة الشوق هذة ان تعي ذلك؟!

هل ستفهم يوما تلك الرغبة وتحترم هذة الامنية ؟!

أم ستظل تنتظر لحظة الضعف لتسقط و تخذل

صاحبتها و تعلن ضعفها و شوقها ؟!..

الأخيرة هي الارجح فالتي قبلها ربما مستحيل

فتلك دمعة اعتادات على ربح معاركها .. دمعة

طالما كانت كلمتها هي الامرة و الاخيرة ..

فهي ببساطة دمعة الشوق ..

--------------------------

اعتذر للاستاذ نور الدين وكل اللي مدايقهم

الخط وعايزين اكبره لانه ده الحجم ماقبل

الاخير واكبر حجم الشكل فيه

بيبقى بشع و الكلام بيكون فوق بعض و

القراءة هتكون اصعب معلش استحملوني

و لكم مني كل الشكر والاعتذار

معضلة الحب الاول ..

الحب الاول موضوع قديم ويمكن استهلك فيه الكلام بس

عمره ماينتهي

اللي خلاني افكر اكتب في الموضوع ده هو اني من يومين

كنت بلف على المدونات و استوقفني بوست في احدها

بيقول : انه اغلب البنات تفضل انها ترتبط او تتجوز

شاب ليه علاقات قبلها يعني مقطع السمكة وديلها

و انه الشاب العكس عايز يبقى اول حب للبنت

طبعا البنات اللي قالت كدة فعلا غبية لانها ماتعرفش

يعني ايه تكون حب الشاب الاول اللي مستعد يفديه

بروحه و اللي بتبقى لو كان حب حقيقي صاحبته هي

الحبيبة الاولى و الاخيرة ولو عرف بعدها مية بنت

بتفضل دي هي حبيبته و لو كانت عملت فيه ايه

و حتى لوكان ارتبط و حب و اتجوز غيرها

و كانت بتموت فيه و مافيش فيها عيب يظل في

جانب خفي جواه يتمنى لو كانت الزوجة دي هي

الحبيبة الاولى و اللي عايش معاها رغم حبه

الشديد لزوجته و معرفته انها كنزلذلك بشوف

انه البنت تكون حب الشاب الاول اهم من انه

الشاب يكون حبها الاول ..

كذلك غباء الشاب اللي عايز يكون الحب الاول

وممكن تلاقيه بيرفض بنت ناس و تصون اسمه

عشان هو مش الاول في حياتها مع انه ممكن

يتجوز وحدة نقول انها اي كلام و توهمه انه الاول

لانه الحب عند الست هو المعاملة و الحنية

و الامان و حط مية خط تحت الامان ده هو

مفتاح الحب عند الست مش انك تكون الاول

والاخيرو حتى لو حبت قبلك بمعاملتك الحلوة

حتيجي تسألها بعد سنين تقولك لا انا الحمدلله

اني اتجوزت زوجي مش حبي القديم لا يمكن

كان هيسعدني زي زوجي و نادرا ماهتلاقيها

عكس كدة لانه زي ماقلت الست فعلا بتملكها

بالمعاملة الحسنة انما لو حبها الاول

كان بيعاملها احسن منك فخدها ضمان انها

لايمكن تنساه و هتتمناه بدالك كل يوم ..

على فكرة الكلام ده بجد مش جايباه من عندي

انا زي كل الناس كنت فاكرة فعلا انه الحب

الاول عند الست بيعيش للابد و عند الراجل

بيتنسي بس لغاية ما ماما قالت الكلمة دي

(الست تحب بالمعاملة و الحنية) قعدت افكر

فيها كتير و اراقب صحاباتي و البنات اللي

حواليا اللي حبت و ما كملش حبها و اتجوزت

حد تاني و كان زوج رائع معها لقيت الكلام

صح جدا و حتى عن طريق المقالات اللي في

المجلات و اراء الناس اصحاب التجارب و

منتديات النت لقيت الكلام فعلا حقيقي

الراجل عمره ما ينسى حبيبته الاولى و فعلا

تلاقي جانب جواه لسه بيتمناها زوجته و ام

عياله حتى لو زوجته رائعة و بيموت فيها

تلاقي ذكريات الراجل و كلامه عن حبه

الاول اغلبه عن البنت نفسها ابتسامتها و

عيونها و شعرها و لما حصل ماعرفش

ايه في اليوم الفلاني و لما زعلت منه في

الموقف العلاني المهم هي بطلة الذكريات ..

من الناحية التانية لاحظت انه الست لو اتجوزت

حد تاني و احسن المعاملة و احتواها و كان زوج

رائع ذكرياتها بتنحصر على الاغلب في الاحاسيس

احساس اول مرة دق قلبها احساس اول لمسة ايد

احساس اول مرة كلمته احساس اول مرة قالت

بحبك تلاقي كلامها دايما انا اول مرة قابلته حسيت

اول مرة كلمته حسيت فعليا بلاقي كلامها متركز

بهي حست ايه اول مرة مش بالشخص نفسه و

شكله وتفاصيله ..

طيب ليه الاختلاف ده ليه الست عايزة تكون

الاخيرة و الراجل الاول ..

اعتقد يلخص ده المقولة التالية ( كلا يرى الناس

بعين طبعه ) فعلا بلاقي ده السبب الراجل

بيفتكر انه الست بتحب الاول للابد زيه و انه

هو اللي بيكون حبيبها عشان كدة بيحاول يكون صاحب

المكان ده للاعتقاده انه بيدخله واحد بس و مش

بياخد باله انه الست بالمعاملة و انه اول اخير مش

فارق عندهاعاملتها كويس هتحبك و تبقى تاج راسها

عاملتها وحش هتلعن اليوم الي اتجوزتك ولو كنت

اول حب برضو هتكرهك و التجارب كتير ..

و كذلك البنت بتفتكر انه الراجل زيها مش مهم مين

جاه و عدى قبلها طالما هي كويسة معاه و بتحتويه

و تفهمه و تسهر على رحته يبقى كدة هي الكل في

الكل و هتنسيه اي حد قبلها بمعاملتها وحبها ليه

عشان كدة بتبقى عايزة تكون الاخيرة و المنتصرة اللي

نسته كل الماضي و مش بتكون واخدة بالها من الجزء

الصغير الي في قلبه اللي لسه محتلته حبيته الاولى

اللي لسه جواه بيتمناها رغم انها غالبا بتاخد بالها بعد

كدة لانه فعلا الستات بتحس بالحاجات دي اوي بس

مش بتبين ويساعدها غرور الراجل في نفسه و اعتقاده

انه قادر يخبي عليها بس لو بتبحه بجد اكيد هتحس ..

-----------------------------------------------------

ساعات بيطلع الحب الاول حقيقة تعيش لاخر العمر

في جو من الحب والاحترام والتفاهم و بيبقى احلى

حلم في الدنيا بيكمل و يتوج و قصة الكل يحكيها

و ساعات كتير برضو بيطلع مجرد وهم و مراهقة ..

عن تجربتي الشخصية حبي الاول

كان نوع من الوهم والمراهقة قريبي و اول ولد

افتح عيني عليه و شخصية قوية و سابق سنه

و زاد الوهم ده اخته اللي كانت بتنقلي كلامه عني

لانه بحسب عاداتنا مش بنكشف على القرايب الولاد

ولو اني كنت صغيرة اولى اعدادي بس اهو ماما

امرت و انا نفذت فما كانش فيه اي نوع من

الكلام والاتصال بينا

بس تصدقو طرافة الموضوع و الصدف اللي خلاني

اصرف نظر عنه انه من النوع اللي بتحبه البنات

مقطع السمكة وديلها و البركة في اخته اللي كانت

بتنقل بطولاته ظنا منها اني كدة هحبه اكتر زائد

عدم اكتراثه بالدراسة لدرجة اني و صلت اولى

ثانوي وهو فيها رغم انه اكبر مني ب 3 سنين

وده لانه مش هامه لوجود ظهر كبير داعمه و

هو فعلا ظهر كبير جدا يخليه يشتغل و يدرس

في اي مكان هو عايزه في المملكة و برا مش في جدة

بس و ده اللي نفرني منه رغم صغر سني الا اني

كنت بحب موت الولد الجاد اللي كدة بحسه

بيتعب و يشقى ورا مستقبله لو عيلته مين بحب

الولد الملتزم اللي لما يرتبط بوحدة يحترمها

فعلا و يلتزم بيها مش يشرب من كل كاس شوية

و بكرة لما اتجوزه و اربي بنتي كويس الاقي ذنب ابوها

بيتخلص فيها بحب احسه راجل بعقله مش راجل

بشهوته زائد عدم احترامه لامه و اخته و انا عندي

الي مالوش خير في اهله مالوش خير في حد

دي كلها اسباب خلتيني بمنتهى البساطة في اجازة

الانتقال للثانوي ارميه ورايا و انساه و وقتها قلت

لنفسي بالحرف ( مش هو ده يا ريم اللي يستاهلك

و لا هو اللي بتستنيه و تتمنيه ) ..

-------------------------------------------------

احببت ان اضيف ان البوست ليس مقصود منه

حقيقة مطلقة تعمم على الكل ففي الاخير لكل

قاعدة استثناء والبشر مختلفون ما ذكرته لم

يكن الا ملاحظاتي و استنتاجاتي و قد تحتمل

الصواب او الخظأ و قد تتوافق مع قناعاتكم او تختلف

هو انا مش خلصت دراسة ؟!

انا كنت فاكرة بما اني اتخرجت خلاص ربنا تاب عليا من

الواجبات بس مس كيكي ومس امل ليهم راي تاني

عشان دبسوني في حل الواجب

الواجب عبارة عن جزئين

1- 16 صفة عن نفسي ؟

والله كتيرالصفات دول

2- امرر الواجب للي عايزة يحله

طبعا هدبسكو كلكو زي مانا اتدبست فيه

نبدأ بقى حل الواجب بس الاول قولوماشاء الله اخاف


اتحسد وصفاتي الحلوة تروح و ابقى كلي عزاريب يعني عيوب

--------------------

1-

اني مريحة على حد قول صديقاتي و اللي يعرفني و الواحد

قلبه يتفتحلي بسرعة و عمري ما اتغير على حد الا لو هو اتغير

معايا و دي حقيقة بشهادة اللي حواليا لو حد قلي في يوم ريم

اتغيرتي تلاقي اي حد يعرفني يقوله يبقى انت اتغيرت و راجع

نفسك ريم مش بتتغير على حد الا لو هو اتغير و بجد يتكون

شهادة بعتز وافرح بيها اوي

2-

اني حكيمة بعرف احل كل مشاكل اللي حواليا او بالاحرى

مصايبهم وخصوصا صحباتي بيجولي في المصايب الكبيرة

بس مش عارفة ليه مش قادرة على مشاكلي اهو باب النجار مخلع

3-

اني رايقة امولتي دايما بتقولي يابختك بدماغك بصراحة

بشوف الدنيا مش مستاهلة الواحد يحرق نفسه عشانها

4-

معطاءة بزيادة بصراحة لدرجة اني ابتديت احد من المسالة

دي ودايما ببدي غيري على حساب راحتي عشان كدة

قررت اهتم بنفسي اكترو مش هدي زي الاول الا مع الناس

اللي عطائي ليهم من المسلمات

5-

ناضجة جدا على قولتهم رغم انه جوايا جانب كبير طفولي

بحس اني لسه طفلة عندها 10 سنين رغم اني الكبيرة بين اخواتي

و دايما بتعامل باني اكبر من سني بس الطفلة دي صعب تتطلع

بس بحبها اوي لما تطلع و يمكن اكتر حاجة بحبها في الانسان اللي

بحبه و اخوايا اللي اصغر مني انهم ببساطة فظيعه بيطلعو الطفلة

دي و بيعرفو يتعاملو معها و يحتوها و يدلعوها جدا لانها صعبة

و متطلبة ومحتاجة صبر و طولة بال ربنا يخليهم ليا بجد

6-

متسامحة جدا بس بسامح بالطيب يعني على قد ما

الشخص ده ليه طيب عندي ومواقف كويسة بعديله و

بسامحه لو مهما عمل وحتى لو مالوش طيب عندي

مش بحقد عليه بس بخلي علاقتي بيه سطحية جدا

7-

صبورة جدا جدا جدا في كل اموري الشخصية ومع الناس

عندي طولة بال رهيبة على الناس بجد ان شاء الله سنين

بمشي مع الانسان للاخر و بصبر عليه قد ما يطلب الصبر

بس يوم ما اتعب بتعب مرة وحدة وخلاص اسيب الشيء

اللي كنت صابرة عيله خصوصا لو مش باخد منه حاجة

8 -

اكتشفت مؤخرا من سنتين تقريبا اني غيورة بجد وانا اللي

كنت فاكرة نفسي لايمكن شيء يهزني طلعت غيورررة

جدا جدا على كل اللي بحبهم و خصوصا ماما

9-

حنينة و دي صفة انا كمان شايفها في نفسي و الكل بيقولها

عليا و يمكن ساعات بتوديني ورا خصوصا مع اهلي اللي

بيستغلوها احسن استغلال اغلب الي حواليا بشبهوني بالام

في حنيتي رغم انه مافيش زي الام ولا هيكون في

10-

قاسية جدا على اللي يغلط رغم اني بقف جمبه للاخر بس

برضو بقسى عليه بكلامي من كتر خوفي عليهم

ياويل لو صحبتي تغلط او تكون بتفكر في شيء مش

كويس او تعمل شيء يضرها و تجيني تقولي حتى لو

وقعت في مشكلة بحلها ليها بس بعدين ببهدلها و اشخط

فيها لدرجة واحدة بنوتة قالت بحسك ماما من كتر ما بتبهدلي

و تدي نصايح بس والله بيقى على قلبهم عسل زي ما بيقولو

بيحسو خوف من القلب على حد قولهم

11-

ساعات ببقى متسرعة جدا و بندم على تسرعي بعد فوات الاوان

و ساعات بحكم على الناس بسرعة كمان وبندم على حكمي

12 -

عاطفتي تغلب عقلي دايما و ده شيء غلط جدا و نفسي

اغيره فيا لكن مش عارفة

13-

لما بغلط بتوب عن الغلط من قلبي بس بكون ضعيفة ساعات

و برجعله و نفسي يكون عندي ارادة اكبر

14 -

هادية جدا و كلامي قليل بحب مراقبة الناس اوي

و دي حاجة بتفدني جدا لاني بعرف كل مداخل اللي قدامي بس

هو فعليا ما يعرفش كل مداخلي او ردود افعالي و بخليها يتفاجأ بيها

حتى اهلي بحب ارقاب من سكات و ممكن اللي قدامي يفتكرني

هبلة وسلبية بس بعدين بيتفاجاء بيا اوي

15-

رغم اني هادية الا اني عصبية جدا لو لفترات قليلة

عصبيتي دايما بتفاجاء اللي حواليا لانه مش متعودينها مني

و بتبقى عصبية شديدة و حتى لو حد اذاني لو حطيته في دماغي

باخد حقي منه بطريقة لا يتصورها و في وقت هو ما يتوقعش

فيه تقدرو تقول بلدغ بس ده قليل لانه لازم يكون الشخص ده اذاني

جداجدا جدا و لاني ساعات كتير بطنش و اسامح

واقول الدنيا مش مستهلة

16-

متفائلة جدا و بحب الضحك و بكره النكد و الكره و الاحاسيس

الهبلة دي اللي الناس بتتعب و تمرض قلبها بيها

ودايما سايبها على ربنا و بقول بكرة احلى ولو مش

بكرة اللي بعده المهم بكرة اكي احلى و عمرها الحكاية دي

ماخابت لانه في الاخر دايما بجد بيطلع بكرة ده احلى

---------------------------

انا مدحت نفسي كتير اوي عشان كدة ما كنتش عايزة

ارد على الواجب ده ( اوعى تقولو مادح نفسه كداب )

انا والله حاولت اقول الصفات اللي بجد

اللي حواليا بيقولها ليا كتير و اللي بحسه فيا نوهت اني

بحس بيه فيا بجد

و يارب تكون صفاتي حلوة وشخصيتي احلى من ما توقعتو

و كفاية رغي كدة اصلي مش هبطل اشكر في نفسي

عالم مكياج .. مكياج

هو البوست ده يمكن يكون بناتي شوية ولو انه احس الشباب

ممكن تشارك فيه اكتر لانه اغلبهم بحسه مفروس من مكياج البنات

المهم انا عادي زي اي بنت بحب المكياج والغلوسات و الحاجات

دي وغالبا في البيت تلاقيني بلخبط وشي عشان اعمل مكياج

جديد او دمج الوان مختلف بس اللي خلاني اعمل البوست ده

هو اني حاسة في جهل في استخدام الميك اب

يعني مثلا انا بروح الجيم كل يوم و بلعب ايروبيك و طبعا

زيزي في الايروبيك لا تعرف الرحمة .. زيزي دي المدربة ..

اليوم ببص على متدربتين من الفترة التانية البنات جايين ميك اب

كامل لدرجة انهم لابسين لانسيس زرقا بصراحة تنحت

يعني دي بجد جاية جيم و ايروبيك ولا بتهرج اصل شكلها

رايحة فرح طيب وهي بتحط البتاع ده ما فكرتيش

انها بمنتهى المنطقية هتشر عرق و البتاع هيسيح على وشها

و تبقى زي البلياتشو ولا يمكن انا اللي مزودها ..

ايام الجامعة نفس الوضع بيبقى ساعات محاضرات

اول النهار بلاقي نفس الطريقة بنات فول ميك اب

و اكيد بياخد وقت طويل طيب ازاي بتلحق وليه

كل الكمية دي هي مدركة انها رايحة جامعة

و نفس الوضع حر وقرف و كمان عندنا التعليم مش

مختلط يعني مافيش حد عشان تقول تعجبه الا اذا

عايز تعجب اخوات الولاد ويخطبوها جايز

نفس الوضع ايام الامتحانات الوحدة كلها الوان

طيب الدراسة وقلنا دراسة بس دي امتحانات يعني الوحدة

مالهاش نفس ولو في دقايق او ساعة زايدة يا براجع فيها

او انام فيها ولا يمكن انا اللي كسلانة زيادة ..

السوق كمان نفس الطريقة طيب ده سوق يا بنت الحلال

ليه الشخابيط دي كلها انتي نازلة تلفي في الحر و القرف

و تشتري غرضك لازمته ايه كل ده

طيب مصرة وحطيتي الميك اب حطي الشيء المناسب ليكي

اختاري الشادو لون معقول لبشرتك حطي روج فرايحي

بدل الاحمر اللي مهريين بيه و مش جاي لاي واحدة

و لا كله كوم و الاساس كوم ليه تحطي افتح منك وتبقي

زي الشبح او كانك لابسة قناع او مريضة وخصوصا

لو وحدة لونها من الدرجات اللي تتميز بالبياض

ده اغلب الماركات بتهتم بلونها امال اللي لونها من

درجات السمار الداكن لحد البشرة السودة يعملو

ايه ناردا ما ماركة تعبرهم ده كل خبراء التجميل

لسانهم نبت عليه شعر و شوية وهيبوسو ايد ورجل

البنات عشان تشتري كريم اساس مطابق للون بشرتها

جربي اتنازلي و اسمعي كلمتهم شوية ..

عارفة بوست بايخ شوية بس غصب عني زهقتوكو

اصل حمى الموضوع ده اللي زادات خلتني اكتب فيه

مش هقول بكره الميك اب و الكلام ده اللي البنات بتقولو

و اللي بيخليني اسال طيب لما كل واحدة مش بتحط امال

الي بنشوفهم دول جايين منين ؟!

عادي بحط ميك اب خفيف كان او تقيل بس لكل شيء

مكانه وزمانه حطي ميك اب بس شوفي قبلها انتي

رايحة فين او وضع المكان ده ايه و الميك اب هيحصل

فيه ايه ؟! ما تسيبيش نفسك سخرية للي يسوى واللي

مايسواش و تخلي بوست زي ده يتكتب فيكي

بتحبي الميك اب عادي حطيه كل وقت بس خليكي

واخدة بالك لكل مقال مقام و لكل مكان مكياج ..