شخابيط صباحية ..

مش عارفة ليه غاوية شخبطةاليومين دول

قولت اصبح انا وقهوتي بشوية شخبطة

معلش بقى استحملوني ..

من فترة تقريبا فترة حرب عزة روتانا

نزلت البوم اسمه حزن هو انا ما سمعتوش

بس نقدر بقى نتخيل الاغاني ازاي

شكلهم ما كانوش بيتفرجو على التلفزيون ..

**********

في ناس غريبة مش عارفة هي مش عارفة

رايحة فين او مش مقدرة رايحة فين

زي كدة المركز اللي باخد فيه الكورس

يعني في ناس بجد والله بتستوقفني ويفضل

سؤال واحد في دماغي :

ياترى دي لما تحب تروح فرح او سهرة

بتعمل زيادة عن كدة ايه ؟! ..

**********

صاحبة ماما بتشتكي من مراة ابنها و قلة ادبها

معها و لما ماما حكتلي كل اللي قولته بصراحة

حتى لو البنت مش متربية اللوم مش عليها اللوم

على الابن اللي خلى مراته تكبر على امه و ما عرفها

من البداية انه امه فوق الكل ..

صحيح الولد ما يبقاش ابن امه و لا يظلم بنت الناس

و يهينها عشان رضى امه لكن لازم يعرف مراته

قيمة و قدر امه عنده ...

**********

حاسة انه عندي حالة نفسية مش عارفة ليه؟

بس بقالي فترة تقريبا بطلت اشوف رجالة

بقيت اتعامل مع كل ذكر على انه عيل قدامي

و مش بشيله من ارضه مع انه لسه الدنيا

فيها رجالة اكيد بس انا مش عارفة ليه بطلت

او مش قادرة اشوفهم ..

( بتكلم على حياتي في الواقع )

**********

الناس بقت تخلط كتير بين الزواج عن حب

و الزواج عن معرفة يعني مش كل اتنين

يعرفو بعض قبل الزواج و كانو بيكلمو بعض

يبقو اتجوزو عن حب لانه ممكن انت بس اللي

بتحب او العكس او انتو الاتنين مجرد شايفين

ده الشخص المناسب للزواج لكن الزواج عن

حب لما يبقى كل غايتك تعيش مع الطرف التاني

و بس من غير حتى ماتعرف انت ليه بتحبه

و بتتمناه كدة ..

**********

انا كل ما احتاج اتكلم مع حد قلبي بيرتاحله

يطلع كمان هو اتألم ماالحقش اكمل و اشرحله

من روائع انغام اللي غنتها و واقع متعاش

فعلا اصل الناس دلوقت بقت تعشق

الفضفضة و دور التعبان حتى لو مافيش

حاجة فعلا تاعباهم و خنقاهم

بقى الموضوع كدة زي مع الموجة

و مع الخيل يا شقرة

بس رغم احتياجنا الرهيب للناس

لازم نتعلم نشيل همومنا داخلنا لانك

ماتعرفش ببساطة حجم هم الانسان

اللي بتفضفضله ..

**********

مؤخرا بقيت متعلقة باغنية مريام فارس - ايام الشتى

اعتقد انها ارقى ما غنت مريام فارس ..

**********

بنلوم كتير اطفال ليوم ونقول مابقوش اطفال دول بقو

اوعى مننا مع انه احنا اللي سبناهم لهيفا و نانسي

وللنت و للشات و لنور و مهند و يحيى و لميس

و العاب البلاي استيشان و مافيها من هوايل احيانا

و لو الولد قال كلمة وقحة بنضحك و نقول ذكي و فطين

يبقى ليه كل الزعل ده و الاعتراض على ما فيه الاطفال

ماهم و بلا فخر نتاج الكبار ..

**********

بيعجني حب الولاد لعربيتهم و قد ايه بيهتمو

بيها و يسموها كمان اخويا مسمي عربيته ( بي )

قال عشان لما يدلعها يقولها بي بي ..

انا مش معترضة عليكو بس اهو زي الدلع و الاهتمام

و الحب للعربية ده ادوه للست و مش هتغلبو معانا تاني ..

**********

اغلب الهموم بتكون صغيرة واحيانا تافهة بس

مش عارفة ليه بنحب نكبرها و نخلق حالة

حزن نعيش فيها و نعيط و نوجع قلبنا

شكله فترتها بتكتر علينا الراحة ..

**********

في ناس كدة روحها العنطزة او الفشخرة

مش عارفة اوصل الكلمة بس هديكو المثال

يعني المحل اللي البياع مصدق نفسه انه

الباشا اللي مالك المحل و يعاملك انت يازبون

على اساس انك شحات و جاهل مش جي تشتري

بفلوسك لما روحت محل الورد لقيت البياع ده

كنت عايزة بوكية روز و توليب راح قايلي

التوليب بالطلب قولت له مافيش روز رايح

باصصلي كدة بصة ازدراء واستعلاء

وقالي روز في نرجس و لافندرو لي لي و

اوركيد تقولي روز لا مافيش ..

مع انه اشهر و اكتر محل ليه فروع في مدينتي

للورد متخصص تقريبا في الروز بالوانها و انواعها

فسبت حضرته و خرجت ..

**********

انا مش بدعو للاختلاط و لا بحبه بصراحة

نظرا لتصرفات الشباب بس فعلا المكان اللي بيضم

ستات بس يعني زي مثلا ملاهي معينة تعمل يوم

للستات بس اسوء من المكان المختلط بكتير ..

**********

ساعات احلى حاجة تعملها مع اللي حواليك انك

تبقى متفرج و تعمل عبيط و لما الكل يبصم انك

عبيط ساعتها خليهم يكتشفو انهم اعبط مما يتخيلو ..

*********

ممكن بس ليا رجاء للولاد بلاش تحطو صوركو على

المنتديات و خاصة بوضعيات كدة الواد الحليوة او

الروش او الحبوب ...الخ

اصل من وراكو و بين البنات يعني بتبقو ولا مؤاخذة

حاجة بايييييييخة ..

**********

اغلب الناس اللي بتنصح في الحب و العلاقات

زي حالاتي كدة وربنا يستر بتكون

مختلفة في الواقع بس بتدي منظر بغير كدة او تبقى

ماحبتش اصلا عشان كدة بتنصح او حتى مجرد حظ لا

ذكاء منهم ولا حسن اختيار و تدبير ساعات كتير فعلا بيكون

حظ لا اكتر و الناس دي لو حبت بجد في الغالب هتلاقيها

خايبة جدا في الحب ..

ايام الطفولة ..

كتير بلاقي مواضيع عن الطفولة

و ازاي كل العالم عايزين يرجعو اطفال

و يعيشو احساس الطفولة و براءته وكل

مافيه من روعة من غير مسؤليات ولا هم ..

بس الغريب اني مختلفة مش عايزة ارجع

طفلة و اعيش الطفولة من جديد بجد

لما بقيت اقرا المواضيع دي بدور جوايا

كتير على الاحساس و الحنين ده

بلاقي اني ماليش خلق ارجع طفلة

و اعيش حالات الطفولة و مافيها من

جهالة و براءة و ... الخ

يمكن العكس صحيح جوايا احساس

عايز يخرج من الماضي والحاضر و

يروح لبكرة عندي فضول اعرف ايه

اللي في المرحلة الجاية من حياتي

هبقى ايه ؟! هكون فين ؟! هتبقى حياتي

ازاي ؟! .. نفسي اوي يجي بكرة على خير ..

يمكن الحالة الوحيدة اللي اتمنى او عايزة

ارجع بيها للطفولة و ايام ما كنت طفلة

لما ربنا يكتبلي و يبقى عندي انا طفلة

ساعتها بس هرجع اعيش الطفولة من

تاني بكل لحظاتها و تفاصيلها

و احساسها ..

مضت من حياتي ..

النهاردة عيد ميلادي وهتم 24سنة

قررت اهدي نفسي الوردة دي

.. التوليب ..

او زهرة الحب الخجولة زي

مابيقول معنها بشوف فيها

نفسي وهي مادة نفسها للحياة بس

مخبية نفسها و داخلها بخجل

و احيان قليلة بتفتح قلبها

حابة الناس تشوفها بكل جمالها بس محتفظة

باللي جواها ليها و بس و خايفة

حد يشوفه ويعرفه

يمكن في يوم اغير الوردة و تبقى

وردة مفتوحة و كل اللي جواها

بيتشاف و يتقرا

بس لحد الوقت ده هتفضل وردة التوليب هي

انا الكل شايفها بس محدش عارف

ايه اللي بتخبي اورقها الا لما يقرب

كويس و يكتشف داخلها ..

زمان كنت شايفة اني لما اوصل24

هكون عملت حاجات كتير

ماتوقعتش انها تيجي عليا و انا كدة ..

مش عارفة اقول ايه عن السنة اللي عدت

من عمري دي؟!

هي احسن من السنين اللي قبلها بس اسوء

بكتير من السنين اللي قبلها ..

لما اراجعها بقبلها بس في نفس الوقت مش

راضية عنها ..

جوايا حاسة السنة دي هتكون احسن او هحاول

اخليها احسن او ممكن يكون مجرد

احساس كاذب و تفاؤل زايد ..

يلا المهم اني بصحة وعافية و كل سنة و انا

احسن من كل سنة قبلها ..

برضو مجرد شخابيط ..

من فترة كنت عاملة اغنية فيروز انا لحبيبي رنة العيلة

بصراحة كنت بستمتع بمنظر اللي حواليا لما يكون

المتصل اخويا او بابا او خالي مع النغمة بتحس الكل

بيرد معايا و ياسلام لو كان اخويا بحس ودانهم بتكبر

ناحيتي زي افلام الكارتون و ترجع تصغر لما يعرفو

هوية المتصل بالنسبة لي ..

احنا بجد حشريين و نفسيتنا سودة ..

************

لما يتقدم عريس و يذكرو مميزاته و يقولو

ماشاء الله عليه متدين بيصلي و يصوم

طيب مش المفروض انه مسلم يعني لازم يكون

بيصلي و يصوم مش ميزة اكسترا يعني ..

************

احنا العرب مانعرفش نتناقش مع بعض نعرف

نشتم بعض نمسك لبعض على ذلة نردح لبعض

لكن نقاش حقيقي و جا وحاد لسه بدري على

ثقافتنا البسيطة ..

************

يمكن جيل احفادنا يقدر يعمل امة اسلامية

موحدة بس جيلنا لا اصل جيلنا لسه

بيحب يتخانق على اللي جدك السابع عشر

عمله مع جدي السادس عشر و نفتح الكتب

و ايوة الحتة دي اللي هذلك بيها و ايوة الحتة

دي اللي هشتمك بيها يبقى مش احنا جيل الوحدة ..

************

لما حد يكلمك او يجادلك باسلوب راقي و محترم

و انت ترد باسلوب حاد ووقح و يتخلل ردك

بعض العبارات الي متصحش اعرف انك

قليل ادب لا تقولي تلقائي ولا طبيعي ولا عصبي

ولا اللي في قلبي على لساني ولا صريح

انت بس حد قليل ادب

************

لما الراجل يقول لمراته شوفتي انا كويس

معاكي قد ايه و مش بضربك زي رجالة تانية

طيب مش المفروض دي من الرجولة انك

ما تضربش ست يعني..

************

مش عارفة فين الرومانسية او التضحية

في صور القلب اللي منزوع من الصدر

و الدم بيتساقط و يقطر

دي مش رومانسية دي قوف و وحشية

*************

تزعل هالدنيا و ماتزعل حياتي انا

بحب الاغنية دي رومانسية و اقصى

تعابير الحب للمرأة بس لو فرضنا

كدة والدته قالت لو اتجوزتها لا انت

ابني و لا اعرفك هيرضي مين ؟!

يبقى من الاول بلاش دقة الصدر

الجامدة بتاعت الرجالة و خصوصا

لما يبقو مش عارفين او مش قد نتايج

الموضوع ده ..

************

خد بالك عليا

من فترة اليسا نزلت الاغنية دي

و البنات هجمو عليها بشراسة و كل وحدة

بقى زعلانة من خطيبها او حبيبها او بعد

و اهمالها ياتهدي الاغنية دي ليه يا تعملها

رنة يا توقيع منتدى المهم في حاجة هو ممكن

يشوف الاغنية و تدقه بيها

بس اللي محتاج يفتكر قيمتك او قدرك باغنية

عيدي النظر في علاقتك بيه ..

************

استغربت لما دخلت مدونة الاخ محمد سلطان

و لقتيه في اكتر من مرة كاتب اغنية ليوري

مرقدي اصلي افتكرت اني الوحيدة اللي ممكن

اسمعه من ردة فعل اللي حواليا و انه ذوقي

زبالة و افتكر او ما جبت البومه ماما حاولت

تمنني مرة بالحزم ومرة بالمحايلة و جبيته طبعا

وقتها ماكانش فيه حمل من النت كتير

بس بتعجبني حالات اللعب البسيطة باللغة

و الكلمات المجنونة و الاحداث الملخبطة

اللي بتحكيها اغانيه صدقوني بتشبهنا اوي

رغم اني فعليا اتأثرت بكلام من حوليا

و بطلت اسمعه ..

************

لو كان في حياتك وحدة بتحبها

و حاسس انها بتحبك اعمل خطوة اولى

و قربلها و لو حسيت او اتاكدت انها

مرتحالك و في شعور ليك من ناحيتها

مهما تصدك او تبعدك اوعى تسيبها

لانه طاما خايفة على قلبها كدة يبقى

بتحبك لو خافت منك و بعدتك صدقني

دي عايزاك و بتحبك ..

************

وبموت فيه موت طول مانا وياه

ماهو معنى الحب لقيته معاه

وازاى انساه وازاى ينسى

وانا ليا معاه حكايات فى هواه

من ساعة اصالة ما حبيت و هي

قلبت طفلة قلبها ابيض و حابه

الحياة و الفرحة و هي كدة الانثى

لما تحب و تتحب بجد بتبقى

طفلة كلها حياة و فرحة ..

حسبنا الله ونعم الوكيل دنيا و آخرة ..

هي اسرائيل دي ايه مش بتتهد خالص

و الاسرائلين دول مش بيتعبو مش بيزهقو

العالم كله تعب من حروبهم دي وهما زي ماهم

ربنا يحرقهم و يهد قوتهم و يجلعهم اذلة القوم

يارب سلط عليهم بلاء يتفشى فيهم و مشاكل

و نزاعات و مصايب تشغلهم و تلهيهم

عن العالم وما تقوملهمش قايمة تاني

خلاص تعبنا و الله العظيم الواحد تعب و اتهد

يكفي ربنا يهد حيلكو و يقبر قوتكم

اللهم اكيفهم هم بما شئت وكيفما شئت

حسبنا الله ونعم الوكيل فيكم

حسبنا الله ونعم الوكيل فيكم

حسبنا الله ونعم الوكيل فيكم

...Love With

بقالي فترة مش بكتب بصراحة مش لاقية

حاجة تتكتب في وسط الاحداث الصعبة

اللي احنا فيها اليومين دول ربنا يكون

مع اهل غزة وينصرهم على اعدائهم

و يثبتهم يارب و يرفع عنهم ماهم فيه

و يدمر اليهود و يجعل فيهم البلاء اللي

ما يفوقو منه ويشغلهم في نفسهم يارب..

بس حبيت انزل بوست كتبته من فترة بعيد شوية عن

اجواء الحرب و الدم رغم اني والله

حاسة اني وقحة شوية و ماعنديش

احساس و انا بنزله ..

فعلا حاسة اني بقيت مدمنة

ادمنت الشوكولاتة بشكل رهيب

لازم اكلها كل يوم وخصوصا اليندت دي

لازم على الاقل تلات مكعبات في اليوم

و القطمة منها بحس بحالة خيااال و لا لما

تدوب في الفم يالهوووووووووي بحس اني

طايرة و واصلة لحالة كدة من النشوة

و ببقى قاعدة اتمنى كل ما البار يخلص

او ينقص منه مربع يطول ..

بجد لاحظت انه لو في شكولاتة ببقى

راااايقة و اول ما تخلص بدايق واتعصب وازن على اخويا

يروح يجيبها اصل للاسف مش في كل مكان

بلاقي النسبة دي لازم 70% شوكولاتة ولو

كلت غيرها يبقى بعوض بيها مؤقتا يعني

و تقريبا بقى لها ميزانية خاصة عندي و لما بلاقيها

بشتريها بكميات عشان استمتع بيها اكتر

ده البيت كله مستغرب من الحالة دي

و طريقة اكلي ليها انا في الفترة الاخيرة

لاحظت كمان اني لو حد كلمني وانا باكلها

ممكن ماسمعش هو بيقول ايه زي الاعلانات

كدة لما الناس بتروح لعالم تاني بعيد عن اللي

حواليها و كدة بيبقو ريلاكس و حالمين..

و طبعا بكتب حاليا بالوصف ده لانه بقالي

اسبوعين مش واكلة ليندت حاسة اني مكتئبة

و حاجة مهمة ناقصاني و متعة كبيرة محرومة

منها بجد نفسي فيها ..

الحالة اللي بتوصلني بيها الشكولاتة و خلاني

متعلقة بيها بجد بقى يشكنني تفتكرو بقيت

مدمنة شكولاتة بجد ؟! ..

الشوق الغائب ..

دي مجرد محاولة بسيطة اجرب بيها ارجع

اكتب خواطر باللغة العربية ..

لم تكن يوما القسوة من طباعها و لم يكن يوما

الغياب و البرود من عاداتها ..

هي قد تسبب حيرته .. او بالفعل سببت حيرته

و ذهبت بعقله إلى افكار خاطئة ..

هي تعي كل الاحتمالات الواردة من جراء حالتها

هذة و لكنها تؤثر البقاء الآن على ماهي عليه

.. تؤثر هذا الصمت و الفتور ..

لاتسعى لحيرته .. او حتى ان تذهب

بعقله في رحلة من الاحتمالات الخاطئة ..

فقط احست الآن انها صاحبة كل المبادرات

.. صاحبة السبق و الوجود الاول في كل

الاعياد و المناسبات و افعاله لم تعد سوى رد

فعل لمبادراتها ..

قد تكون ساهمت في اعتياده ذلك لكنها الآن

تحتاج ان يبادر بذلك الشوق الغائب .. تحتاج

ان يفتقد وجودها و يبادر للبحث عنها .. ان

يعيد إليها الآن حالة الحب و السلام التي

كانت تعيشها معه ..

ليست انانية او مدللة او لا تجيد مراعاة و

تقدير الظروف كما يبدو و هو اعلم بذلك..

فهي تدرك جيدا ماهو فيه وتحترم انشغالاته ..

و لكنها تشتاق لكي تكون من ضمنها .. لا

ان تشعر انها آخر المهام في لائحته .. و

لا تسعى ان تكون اولها بل فقط من ضمنها ..

قد يكون من العدل ان تخبره بكل ما في

داخلها و تصارحه بكل احتياجاتها و لكن

كيف سيسمح لها كبريائها ان تطلب

إهتمامه ؟! كيف تسأله امورا هي تدري ان

كل آدم يعي احتياج حواء لها ؟! ..

ربما سبب كل ما يحدث هو انه لا يعرف

انها لا تحتاج الى الجهد والوقت الكبيران

كما يتخيل .. او حتى اطنان من الرسائل او

ساعات من المكالمات .. هي فقط بضع

دقائق او حتى ثواني من وقته التى تحتاج

اليها .. فهو بعبارة او حتى كلمة قد يطفئ

في ذات الآن حيرته و شوقها .. هو لا يعي

ان كل احتياجها منصب في شعور واحد ..

انه مهما حدث اوسيحدث فلتثق دائما انه سيكون

.. موجود ..

ماضي ، امنيات و تطلعات ..

كل سنة هجرية و انتو طيبين

السنة اللي مظلومة و دايما المسلمين ناسينها .

في موجه الاحتفال و التطلعات للسنة الجديدة

قررت انا كمان اعمل بوست عن السنة الجديدة

و اهدافي و امنياتي فيها ..

ماذا حقتت في العام الماضي :

- على الصعيد الشخصي حاجات كتير اتغيرت

في شخصيتي يمكن بقيت اقوى و بقيت اقسى

شوية مع الناس ما بقتش معطاءة بهبل زي الاول ..

الحاجة الجديدة اللي دخلت حياتي و هي مدونتي

اللي بقيت بحبها اوي و بقيت بعتبرها صديقة

افضفض و احكيلها عن اللي في بالي..

- على الصعيد الاجتماعي :

ناس كتييير اكتشفت معدنها السنة دي و ناس

كتير كنت فاكراهم حاجة و ينشد بيهم الظهر

طلعو ولا حاجة و فيه اللي افتكرت علاقتي

بسيطة معاهم وطلعو صحبات بجد عموما بقيت

اقدر على الاستغناء عن اللي بحسهم

وجودهم مش لازم في حياتي ..

- على الصعيد المهني :

مازال البحث عن وظيفة جاري و مازلت

مقضياها كورسات ..

************

امنياتي بقى للسنة الجديدة :

- انه ربنا يوفقني بوظيفة كويسة احس

اني بعمل حاجة متميزة فيها .

- اني استمر مع سري الجميل و هي مدونتي

و احكيلها و اكتبلها .

- اني اخس الكام كيلو دول و اخلص و ابقى

سمباتيك و انهي حالة الحرمان اللي بعيشها .

- اتمنى اتأكد تماما من حاجة في بالي عشان

اطمن بقى و احس بامان شوية .

- انه اهلي يفضلو بخير و سعادة دايما .

- نفسي بجد الحروب تخلص و نفسي

العصبية القبلية العربية تموت و نبقى ايد

وحدة ( ده حلم طبعا ) .

- انه كل الناس اللي بحبهم و يحبوني

امنايتهم تحقق السنة الجديدة .

- مش عارفة ليه عندي احساس خفي اني

هتخطب كم مرة وهرفض و رفضي يخلق

صراعات مع اهلي و ماما بالذات مع اني

كنت فاكرة اني هتمنى اتزوج و اكون عيلة

سعيدة مع زوج يخاف الله بس لقيتني جديا

مش مستعدة للخطوة دي و لو حصلت قبل ما

اشتغل و اعمل حاجة لنفسي و ماقدرت اوفق

بين الاتنين هحس انه الزواج دمر حلمي فعلا

( ربنا يكتب اللي فيه الخير )

و اخيرا اتمنى انها تكون سنة خير و سعادة على الجميع

في عالم المدونات ..

فكرة لبوست قديمة و كتبها كتير قبلي

بس برضو حبيت اكتبه .. حبيت اكتب عن

بعض الشخصيات اللي عرفتها عن طريق

عالم التدوين..

رغم اني ماعرفهمش شخصيا بس في رابط

غريب اتولد معاهم لمجدر اني بقرا مدونتهم

و بشوف افكارهم في كتابتهم ..

**********

.. سوسن او مس سوسا ..

اول مدونة تقريبا ادخلها و اول مدونة

ضحكتني و خلتني ادمع كمان

صاحبتها بنت لذيذة اوي شخصية

دمها شربات بس تحس انها في الحياة

جدية اوي واضحة اوي و حنونة اوي

و مدونتها مهرب ليها في حياتها و مكان

فضفضة بالنسبة لها من اللي مش بتقدر تقوله

يارب تنول اللي تتمناه و تبقى احلى عروسة

بحس اني بقيت استنى اليوم ده اكتر منها

مش عارفة ليه ؟ ..

.. الغزالي ..

اول مدونة احبها و اكرهها في نفس الوقت

بتتعبني جدا و بتجيبلي الصداع لأني بقراها بكل

كياني و كل عقلي عشان اقدر افهم كتاباته

و اقول لنفسي على ايه مش راجعلها

تاني بس برجع ادخلها تاني ..

بشوف صاحبها شخصية صامتة جدا بيقول المفيد

كلمة و رد غطها مش بيحب يزود في الكلام

بحسه زي العابر على المدونة بتاعته فكرة حب

يطرحها يحطها و يراقب من بعيد ردود الافعال ..

.. انسان بلا عنوان ..

مدونة صاحبها بخيل شوية في المواضيع

بس حلوة متنوعة تحكي عن اللي بيكتبها احيان

كتيرة .. كاتبها شخصية بحسها رومانسية

اوي و العاطفة بتاخده جدا مش عارفة

في الواقع هو ازاي لكن من روح مدونته اتوقعته

اصغر من سنه عنده وعي و نضج كبير

و روح فكاهة و حزن يعني جامع من كل حاجة..

.. شيماء علي ..

مدونة عميقة و بسيطة بشوف صاحبتها تتمتع

بنضج عالي جدا بشوفها انسانة راقية

جدا من الطبقة المخملية او برنسيس زي

ما بيقولو حاجة كدة في منتهى النعومة زي

مدونتها سلسة جدا لكن عميقة تدفعك لأنك

تدخل جواها عشان تعرفها اكتر و بتندم

لو عرفتها متأخر ..

.. استاذ نورالدين ..

شخص مبدع بمعنى الكلمة خسارة لو

قلمه ظل فقط حبيس المدونات ..

مدونة هي تاني مدونة اكرهها و احبها

بس هو اخف من الغزالي يعني في بعض

الاحيان بيراعي العقليات البسيطة زيي

و بتبقى لغة مدونته سهلة بس بحب انه

بيدفعني افكر بعمق اكتر و احاول افهم

ما و راء الكلمات ..

مش عايزة اتفهم غلط بس اغلب الاحيان

لما بقراله ببقى بضحك او ابتسم بحس روحه

في كتاباته لدرجة اني بتصور وش كاتبها

يعني لما يبقى رايق بشوف وش رايق و مبتسم

و انا بقرا لما بيبقى في حالة الهام بشوف

شخص كدة في حالة الهام بيبص للسما او

ممكن ساند راسه بصباعه يعن زي الشعراء كدة

و لما بيكون متعصب بشوف وش احمر و بيزعق

و هو بيتكلم و عروقة باينة .. مش قصدي سخرية

و الله بس مدونته مدونة بقراها بالصوت و الصورة

كشخص بحترمه فوق التصورو لو كان ليا اخ اكبر مني

اتمناه زي شخصيته بنفس الحزم و الهدوء

و العقل و الرزانة و اللين و خفة الظل احيانا ..

.. ليساندرا ..

بعتبرها توأم الاستاذ نورالدين مش عارفة

ليه ؟ بس بلاقيهم شبة بعض اوي

حتى مدونتهم رغم انه مدونتها ابسط شوية

عمري ما علقت يمكن غير مرة واحدة

و ماكانش بايدي مشاعري غلبتني

مش عارفة ليه بخاف منها و من مدونتها

رغم انه ما فيهاش حاجة تخوف لكن

بحب اقرا من بعيد و اجري زي ما بيقولو

لكن اعلق كانت خطوة كبيرة اوي ..

.. انا حرة او بنت مصرية ..

اكتر مدونة بدخلها و انا رايقة و مطمنة

مدونة بسيطة و جميلة منتهى السهولة

و السلاسة و ده اللي ميزها ..

افكارها عميقة و واقعية لكن بمنتهى البساطة

مش كتير بيعمل ده بتحسها بتكتب بداخلها

لما تكتب بوست وهي متعصبة ببقى

عايزة اقولها بالراحة خرمتي الكي بورد

من كتر ما احساسها بيبان ..

بلاقني فيها في حاجات و مختلفة عنها برضو

اكتر حد مش بقلق لو اختلفت معها لأنها

فاهمة انه اختلاف فكر مش اكتر مهما

بلغ الاختلاف .. بحسها شخص مرح

نوعا ما و بتحب الضحك و رومانسية

اوي و طفلة بمعنى الكلمة بس جواها مش

بتحب توري ده للناس او يمكن مش لاقيه

فيهم اللي يفهم الجانب ده فيها فبتبان جدية كدة

وعنيدة رغم اني بحسها غير كدة خالص ..

**********

احلى مافي عالم التدوين انه علاقاتك مع

اللي فيه سطحية فعلا لكن في عمق تاني غير

اللي بيكون مع الناس اللي في الحياة و

يمكن ده اللي شدني للمدونات لاني فعلا

الفترة دي مش حمل اعمل صداقات لكن

محتاجة في حياتي ناس مختلفة فكر تاني

وجهات نظر جديدة و اسمع كلام غير بس من

غير الرابط اللي يإذيك لو انفصلت عنهم..

يمكن عشان كدة مافيش ولا حد في حياتي الواقعية

يعرف مدونتي و مقتصرة على الناس اللي

في النت و حتى مش كلهم مع انه المفروض

اقولهم يدخلوها لأني بشتكي كتير انهم مش

فاهمني بس لو دخلو مدونتي هيفهموني كويس

لكن مش قادرة اسمح بده يمكن لأنه دلوقت

لو اختلفنا بعذرهم لكن لو فهموني

مش هيبقى في شيء اعذرهم بيه فده

هيخليني ابقى اشد و اقسى عليهم و توقعاتي

منهم تبقى اكتر من اللي يقدرو عليه ..

بجد مش بس اللي ذكرتهم هما اللي مهمين

و بحب مدوناتهم في عالم التدوين في كتير والله

و مش تجاهل ليهم لكن البوست ده طويل اوي

و مش هيستحمل يبقى اطول لكن ناس

كتير لمدوناتهم مكان مهم عندي و فكرهم

رائع بالنسبة لي ..

اهو كلام و بس ..

لا تبكي على أي علاقة في الحياة لأن الذي تبكي

من أجله لا يستحق دموعك فالشخص الذي

يستحق دموعك لن يدعك تبكي أبداً..

******

لاتحمل على عاتقك سوى هماً واحداً فبعض

الناس يحمل ثلاث هموم..

هم مضى.. و هم يعانونه الآن..و هم يتوقعونه..

******

عظَمة عقلك تخلق لك الحساد ..

وعظَمة قلبك تخلق لك الأصدقاء..

******

تكلم وأنت غاضب .. فستقول اعظم حديث

تندم عليه طوال حياتك..

******

اذا توقفت الحياه في اعيننا..

فيجب ان لا تتوقف في قلوبنا...

فالموت الحقيقي هو موت القلوب ..

******

لا تــــــــــــبكــي على حبيباً رحل وخلفك أشلاء

مهشمه فلا بُد من وجود شخصاً آخر يلملم تلك

الحطام التي خلفها الحب السابق ..

******

عظَمة عقلك تخلق لك الحساد ..

وعظَمة قلبك تخلق لك الأصدقاء..
******

الندم لمن عرفوا الحب والاسف للذين لم يعرفوه..

******

يسخر من الجروح كل من لا يعرف الألم..

******

الابتسامة كلمة طيبة بغير حروف ..

**********

دول مختارات لبعض الكلام لناس مش

عارفينهم او شوية حكم زي ما بنحب نسميها ..

بنقراها في حالات مختلفة و بتوجد جوانا

احاسيس مختلفة ..

مرة بنقراها و نحس انها صح و بناخد بعضها

شعار لينا .. و مرة بنلاقي من غير ما نحس بترتسم

ابتسامة خفيفة على شفايفنا او حتى ضحكة بقرايتها ..

ومرة بنقراها بحزن و جملة فيها تنزل دمعتنا ..

و ممكن نقراها و ما نحسش باي حاجة فيها .

بس الغريب و اللي بيكون الاغلب

اننا نقراها و احنا عارفين ان الكلمات

اللي فيها صح و مع ذلك نحسها ضحك على

الدقون و اهو مجرد كلام ..

عساكم من عوادهـ ..

عيد سعيد على الكل و كل سنة وانتو طيبين

و اللي بتحبوهم ويحبوكو بس

و جميع المسلمين و تدوم ايامنا

بالفرح و الاعياد ..

بس عشان خاطري بالراحة على الخروف وانتو بتدبحوه

بجد كان نفسي احضر الدبح زي زمان بس

ما ينفعش و ارجع اقول ربنا رحمك فاكرة نفسك

قوية زي زمان دول هيحتاسو في الخروف ولا فيكي ..

شكلي خلاص بقيت نعنوعة من نعانيع دلوقت

و هيغمن عليا لو شوفت الدم في الدبح

فاعلى ايه خلي الامور في الستر..

وعساكم من عوادهـ ..