كلمة صورة ..

الصورة كفاية اوي توصل الموضوع اللي

مستفزني و حارق دمي وعايزة اتكلم عنه ..

كان نفسي مدونتي تبقى اكبر و بيطلع عليها

شريحة من الآباء اللي من النوع ده لاني

نفسي اقوله كلمتين يمكن تهمه ..

مثل حاجة الابن في الدنيا لرضى الاب

الاب كمان احوج لدعاء الابن وهو تحت القبر ..

الجار قبل الدار ..

الصبح حكتلي ماما حكاية غريبة و صعبة

الله اعلم طبعا بصدقها من عدمه بس اثرت فيا ..

هي عيلة صغيرة الام كانت حامل وحست بآلام الولادة

فجأة فراحت هي و الاب المستشفى و سابو الولاد في

البيت على اساس يلحقو الام و يتصلو على حد من

الاهل في الطريق عشان يقعدو مع الاولاد بس

و هما في الطريق عملو حادثة الاب اتوفى و الام

مغمى عليها في حالة خطرة و بعد ما فاقت بعد

اربع ايام اتصلت بوالدها عشان يروح للاولاد و

راح ابوها و اول ما وصل لفتته ريحة وحشة جاية

من البيت دخل الاب لقاهم كلهم اتوفو وصولا لمرحلة

تعفن للاسف الشديد ( ربنا يرحمهم ) ..

الصعب في الحكاية انه الام والاب لما اتأخرو

الاولاد فضلو يعيطو طول الوقت اصلهم صغيرين

و طول عياطهم ده الجيران سامعين العياط اللي

مش راضي يوقف ومضايقين و عمالين يشتكو

من الجيران دول و من ازعاجهم لحد ما فجأة وقف

الصوت ولا احد فيهم فكر يروح يشوف ايه

اللي حاصل في بيت جاره و فعلا ده حال اغلب

الجيران دلوقت ..

للاسف البيوت كبرت و الاحياء رقيت و اتوسعت

بس فقدنا الجيرة بتاعت زمان اللي ماما كانت

تقول لو الجارة صحيت متأخر و جارتها ما سمعت

حركتها في البيت كانت تروح تسأل عنها لايكون

حصلها شيء لكن دلوقت فعلا بقينا صحيح مثل

صباح الخير ياجاري انت في حالك و انا في حالي

و في جيران حتى صباح الخيربينهم ضاعت ..

من ذاكرتي ..

.. انا في الأبتدائي ..

ماافتكرش مواقف دراسية معينة بس افتكر في البيت

كان روح قلبي كارتون اسمه سبانك كان كلب لذيذ اهبل

و غبي كدة وصاحبته اسمها رشا و عايشة مع خالها

عشان مامتها دايما مسافرة و كان شريط فيديو فكنت

اول ما افتح عيني ادخل الشريط في الفيديو و اخر حاجة

قبل ما انام اقفل الشريط تقريبا مجننة اهلي و على

قولت ماما حارمانا التلفزيون من تحت راس سبانك

قبل فترة لقيت محطة بتعرضه قولت اتفرج و استعيد

ذكريات و على جاية ماما لقيتها بتقول تاني سبانك

هو ورانا ورانا الكلب الاهبل ده حتى وانتي كبيرة

بتتفرجيه كمان مش كفاية زمان .. بصراحة ما كنتش

اعرف الموضوع معقد ماما كدة ..

افتكر كمان لاني كنت وحيدة 5 سنين فكنت بكره

ارجع البيت عشان ببقى لوحدي و ازن على ماما

عشان انام عند عمتي مع عيالها بس اللذيذ انه

كل مرة اهلي يوافقو اصحى بالليل و هاتك يا عياط

ودوني لأمي .. ابغى ارجع بيتنا ابغى اروح عند ماما

و يودوني لماما لانه بيت عمتي قريب فلما اروح

عند ماما ارجع اقولها خلاص مش خايفة اروح بيت

عمتي و طبعا كان مسلسل متكرر ماعاد الجزء بتاع

ارجع بيت عمتي لانه ماما طبعا ما كانتش بتطاوعني ..

*****

.. انا في اعدادي ..

اكتر سنة افتكرها تالتة لاني انحطيت في فصل

مشاغب جدا على مستوى المدرسة و دي اول

مرة تحصلي في حياتي لاني كنت مؤدبة في المدرسة

فقوم يوم ما يجو يعاقبو الفصل على الشغب

كل المشاغبات يغيبو وكأنه اتفاق و احنا المؤدبين

ندبس فيها و كان العقاب اننا نتوزع الحصة الاولى

على فصول اولى اعدادي و طول الحصة نفضل

واقفين عقاب مهين بصراحة و اللي يقهر انه

ولا حد من المشاغبات موجود و لما اشتكينا

و احتجينا كان الرد الخير يخص و الشر يعم

بجد مش مسامحة ولا ابلة اشتركت في تنفيذ

العقاب ده ..

بس اكترموقف قاهرني لما وحدة من البنات

كانت معجبة بيا لانه للاسف بقى منتشر نوع

تاني من الحب و الاعجاب غير الطبيعي اللي نعرفه

و قصص حب وغيرة وخناق و فضايح و حكايات

ف لقيت مرة وحدة بنت جابية لي وردة حمرا بتقولي

دي من فلانة هي معجبة بيك سألتها مين فلانة

شاورتلي عليها بس ما كانتش باينة بس بعدين

شوفت شكلها كويس و احنا في ثانوي اصل صادف

اننا نفس الثانوية المهم قولتلها طيب و خدت الوردة

و قعدنا انا وصحبتي فطسانين ضحك بس لما

خلصت الفسحة وجينا نطلع لقيت وحدة بتجري

ومكسوفة اوي تقولش بنت خارجة جرى كسوف

من عريس متقدملها و دي النقطة اللي قارهني

في القصة عارفين ليه؟؟؟؟

اصل البنت مش مسترجلة زي توقعي شكلها بنوتة و

المفروض في الهبل ده بيكون في طرف بيمثل

الشاب يعني و ده اللي قاهرني لحد دلوقت

اصلها اهانت انوثتي بتصرفها لاني مش

مسترجلة خالص لا شكلي ولاكلامي ولا لبسي

حتى لبس المدرسة كان فستان بحزام ومخصر

ازاي شافتني بالنظرة دي والله لحد اليوم مقهورة منها ..

*****

.. انا في ثانوي ..

و على سيرة الاعجاب و انا تالتة كانت ابلة علمم

الاجتماع بتعزني اوي بس الله يهديها بتطلع معزتها

بشكل غبي اول مرة و انا برد على سؤالها راحت

فجأة قايلة : ريم انا مرة احبك ليش ؟

انا تتنيحة كبيرررررة و البنات نظرات ريببببة

و بقيت كل ما اقف اجاوب في اي حصة ليها كل

العيون اللي في الفصل عليا و عليها ..

و موقف تاني لما البنات عايزينها تيعدلهم الامتحان

و انا روحت مرافقة معاهم عشان اكترهم يعني

و طول ماهم يترجو انا ساكتة او اسلم على

المعلمات اللي بيدخلو الغرفة و البنات يترجو

فيها راحت قايلة : ريم اعيدلهم الامتحان ؟

عارفين لما تتفرجو مسلسل او كارتون و فجأة

اللي فيه لما يلفو دماغهم على حد و يطلع صوت

كدة شششووووو وهما بيلفو اهو ده كان حال البنات

و هما بيلفو عليا بنظرات غريبة تخوف طبعا قولت :

ايوة اكيد عيدلهم الامتحان اكيد ..

مرحلتها كبرنا و بقى ولينا اهتمامات و كدة انا وصحباتي

انصب اهتمامنا على اللب جلوس و هنا الشباب

ممكن مش هتفهم و الكحل و القصص البوليسة و افلام

الرعب و يوم مايقولو تفتيش بقى نشتغل تخباية

شرايط الفديو كانت في كرتون المناديل كنا نفضي

نص الكارتون و نحط الشريط و نرجع النص

التاني من المناديل فوقه و نخليه فوق الديسك عادي

و يفتشو ما يفتشوش ماحد بيجي باله على الكرتون البريء

اما المكياج فكان فكان لو غلوس وكدة يبقى عينات

صغيرة و الكحل كمان عشان تكفي تدخل في الشراب

من جوه و ندخله في حافة الجزمة الروايات بقى

ما كانتش مشكلة طالما مافيهاش حاجة وحشة ..

و في الثانوي برضه اول مرة في حياتي شهدت

خناقة بنات من نوع شد شعر و خربشة

و كدة و كمان ضرب طالبة لمعلمة

اصل المعلمة اتهمتها زور و الطالبة كانت

عايزة تنتقم و المدرسة جبانة اوي راحت

استخبت في غرفة المديرة بس لما

جاه معادالانصراف و طلعت المدرسة الطالبة

راحت جري و راها عشان تضربها بس

اللي صعب انساه صراحة المدرسة

وهي بتخبط للحارس جامد و بتزعق

فيه عشان يفتح الباب بسرعة قبل ما تضرب ..

نفس المرحلة بدا الاهتمام بمجلة اسمها تحت العشرين

كنت اشوف البنات مجانين عليها بس انا ماكنتش

اعرفها وهي بصراحة المفروض مجلة تربوية

هبلة يعني تنصح البنات من خلال مقالات و قصص

عن الصحبوية و الهروب من المدرسة و كدة

بس المجلة بشكل غير مباشر للي زي كانت بتصدمني

بعالم ماكنتش اعرفه اصل منها عرفت انه في

بنات بتخرج مع ولاد و انه في بنات بتهرب من

المدرسة و انه و انه حقيقة المجلة دي كانت صدمة

صعبة بالنسبة لي مش حاجة توجيهية ابدا ..

و كمان ظهرت وقتها مجلة 12 \ 21 دي كانت

بقى مجلة مهيصة وايام الغربي و المطربين

الاجانب و مغنيات و ممثلات المراهقين و هبل

كدة كان بيعجبنا اوي و كنا بنحس اننا كول

واحنا بنتابعه ..

*****

.. انا في الجامعة ..

ياسااااااااتر قد ايه اكتشفت اني كنت هبلة و وحدة من

قرائي الاعزاء و هي سارة شاهدة لاني حكتيلها

حزء من الهبل بتاعي دي يومها شكلها ضحكت

ضحك مش معقول ..

المهم المرحلة دي صعقت بامور كتير و خصوصا

في عالم البنات اصلي الحمدلله خريجة بيت مربي

كويس بس مغمينا كتير عن مفاسد العالم اللي

للاسف بتجتمع كلها في الجامعة خصوصا اول

سنة كانت صواعق بنتزل عليا مش صدمات من

الي كنت بشوفه و اسمعه في عالم البنات بس

اقوى اكشنات لما قالو انه وحدة اتقتلت في الجامعة

و لما قالو انه اتمسك مع بنات مخطط ارهابي

وفعلا كان في تفتيش على كل الاوراق وقتها

للوحدة هي داخلة وهي خارجة ولا المرة

الي شلة ضربو بنت ودخلوها العناية المركزة

و بقت قضية لحد ما البنت فاقت بس ماعرفناش

حصل للبنات ايه و كنت لما اجي طبعا

احكي لماما كانت دايما تقول انا شكلي ما ارستلك

جامعة ارسلتك وكر مافيا و عصابات ..

الذ موقف كان وقت بحث التخرج اصل الدكتورة

اللي مشرفة عليه طلعت عين صحبتي خصوصا

من غير البنات و حتى انا اللي مشتركة معها في

البحث كانت معملتها اهون من لما بتعامل صاحبتي

تعبتها اخر تعب و عقدتها و لما صاحبتي وقتها كانت

رايحة تحج فمن جملة الناس قالت للدكتورة دي

عشان لو اتأخر البحث تبقى عارفة انها كانت

بتجح فتقولها تأمري على شي راحت الدكتورة

قالت : اه ادعيلي و ادعي لولادي فلان في مش

عارف في و اللي ساكن في ... وقولي ربنا يوفقهم

و يرجعهم و ... الخ صاحبتي خرجت مولعة

و قعدت تقول طول الطريق: عايزاني ادعيلها بعد

كل اللي عملته فيا عايزاني ادعيلها انا نفسي ادعي

عليها عايزاني ادعيلها و كمان ادعي لعيالها كانت

اول مرة اشوف صاحبتي دي مجنونة و عصبية كدة ..

*****

انتو بجد قرايتو البوست ده كله هو فضفة غالبا

اذا اه بصراحة مش لاقية اي كلمات تشكركم على

المجهود اللي بذلتوه والله بس ده للي قريوه للاخر..

الصمت أبلغ لغات الكلام ..

رغم حبي للمقولة دي واني من اشد انصارها

الا اني لأول مرة مش حاسة ولا مقتنعة بيها

لأول مرة اشوفها كدة بعين القيد مش بعين الحكمة

تقريبا من اول امبارح وانا حاسة اني حد جديد

حاسة اني غيري ومختلفة اوي عن نفسي اللي اعرفها

من ضمن الاختلافات دي رغبة كبيرة في الكلام صابتني

حاسة اني عايزة اقول واقول و اتكلم و اتكلم

لحد الصبح او لحد بكرة و بعده و بعده و بعد بعده كمان

لدرجة اني بفكر مدونتي المسكينة هتقدر تستوعب

كمية الكلام اللي جوايا .. بصراحة اشك ,اكيد

طبعا هتكلم فيها بس هحن عليها و اسبلي شوية

كلام كدة بيني و بين نفسي ..

بجد مش عارفة اوصف حالتي و اقول هي ايه

او يمكن عارفة بس كل اللي اقدر اقوله

اني اول مرة اكتشف انه في انواع تانية من الجوع

كنت فاكرة الاقوال دي مجرد عبارات مجازية

او صيغ بلاغية بس دلوقت اكتشفت انه ممكن

يكون في جوع لشيء غير الاكل و ممكن يبقى

الواحد فعلا جيعان كلام او لحالتي جيعانة كلام ..

ايوة فعلا انا حاليا جيعانة كلام

امممممم تصدقو فعلا هي ممكن لفظة مش

ظريفة جيعانة كلام دي بس اعمل ايه

بصراحة هي دي حالتي ..

فهمتوا حاجة ؟!

يمكن اه بس لو لا او احترتو

ابقو اسألو مدونتي بقى اكيد هتقولكو قصدي ..

شخابيط بتستهبل ..

منتداياي الغالي اصبحت المدينة الفاضلة

عشان كدة زهقت منك ..

****

لحظة قلق بس كانت كفاية عليكي بس

لحظة قلق ..

****

هو ايه قصة البنات و الحمامات تقريبا مافيش

حمام نسائي في اي مكان الا وماليان بنات

زي ما تقولو كدة بقى رابط وثيق بين الحمام

و بعض البنات ..

****

ملاحظين معايا انه في موجه جديدة من ستات عواجيز

بتتصابا في عالم الغناء العربي ماهولو كانو عايزين

يغنو حقهم جات عليهم بس لمايبقو فاكرين نفسهم

من دور نانسي و جنات دي مشكلة ..

****

المرأة و الرجل و الرجل و المرأة

كنت بحب المواضيع دي بس جالي صداع مؤخرا

امتى بقى نشوف حاجة غيرعلاقة ادم و حواء ..

****

اتعلمت انه لما الموقع اللي بحمل منه الافلام

يكتب للكبار او +18 على فيلم درامي رومانس

او كوميدي مش معناه كم قبلة و حضن زيادة

لا معناه انه دراما اباحي او كوميدي اباحي

يخليك تكره و تحتقر نفسك اسبوع بسبب مشهد

يلا كل طراق بتعلوم على راي هل الكويت ..

طراق = ضرب بالقلم , تعلوم = تعليم

****

شوفت اعلان كليب سانارا سانارا بتاع هيفا

هي سنرى طبعا بس هي بتنطقها كدة

قعدت اتأمل باستغراب ليه واحد بالغ عاقل حر

يدفع كل الملايين دي في وحدة ملك عام ..

****

الحب في المسلسلات التركي حاجة لذيذة اوي

حبيتي تهربي مع حبيبك وتتجوزو عادي حقك

و الكل يشجعك ويتعاطف معاكي و اللي حب وحبيبه

راح لحد التاني يا يتجنن يا يقتل يا يولع في

نفسه و اللي تقص شعرها و اللي تدخل غيبوبة

و اللي يضحك في الآخر بيرجعو لبعض طب

على ايه الخاسير دي كلها من الاول

بس اعترف عندهم دراما بسيطة تشد احسن

من الدراما العربي اللي قرفتنا بكى ومصايب

( انا مش متابعة والله بس بكون بستنى باب الحارة

باليل بعد ما المسلسل التركي يخلص )

****

في بعض مواقف تخليك ماتعرفش تعتب

على غباء الصغير و لا على هبل الكبير

سبحان الله في ناس بجد كبيرة وهبلة

سؤال كدة : هي الوحدة لما اللي قد جدها

الله يرحمه يعاكسها و يلاعبلاها حواجبه

تعمل ايه ؟!

****

زمان كان الكلمة القبيحة عيب و الشتيمة قلة

ادب دلوقت عايز توصل و تعجب و يقولو

عليك مبدع عليك بسيل من الشتائم و كمان لو

معاهم كلمات اباحية تبقى الله عليك و مافيش

زيك وانت اللي الدنيا كانت محرومة منه و بتستناه..

****

ياترى افكار الوحدة و وجهة و نظرها و اصرارها

عل اسلوب تعامل سيء مهم اوي تتمسك بيه حتى

لو كان نتيجته الحتمية ومن اغلب الناس كلمة دي

مش متربية تفتكرو اهلها اللي ربوها و كبروها و

تعبو عليها يستاهلو كلمة زي دي بسبب عند بنتهم

في اسلوب تعامل يا غبي يا منافق يقول عليه صح ..

****

برامج التوك شو بقت كتير اوي اوي

لوك لوك لوك لوك لوك لوك

في كل المحطات مش بيزهقو من الكلام

خاصة حضرات الفانين و السادة المغنيين

و ياريت كلام بنتيجة وفايدة كله في الهوا

بس نقول ايه ما احنا لما نمسك في حاجة

مش بنعرف نعتقها او حتى نجددها ..

****

رسالة

من ساعة قرارك و انا افتقد وجودك و النقاش

البسيط معاكي من خلال تعليقاتنا عند بعض

مش بقول كدة رغبة عشان ترجعي

( ما تفهمنيش صح )

بس عشان افتكر انك في مرة قولتي انك مرعوبة

لاتكوني حد عادي وماتسيبيش اثر في حياتك و للناس

اللي عرفوكي فلما تسيبي اثر كدة عند وحدة في عالم

افتراضي بكم كلمة وكم سطر في كم شهر اكيد هتسيبي

اثر اقوى بكتيرفي العالم الواقعي ..

يوم ميلادها ..

مدونتي العزيزة و صديقتي الاقرب

كل سنة وانتي طيبة في ذكرى ميلادك الاول ..

اعذرني لكلماتي في احتفالي الاول بيكي

انتي عارفة قد ايه في البداية كرهت و بعد

كدة قد ايه حبيتك .. يمكن لأنك اكتر مكان برتاح فيه

ومش بقلق اظهر فيه احساسي او وحدتي او ضعفي

او حزني و كل مافي خاطري ..

عشان كل ده برضو بخاف منك لانه جواكي انا

مش انا اللي ناس بتشوفها لا انا الحقيقة ..

بخاف منك لاني بخاف اللي اعزهم يدخولوكي

في يوم ويشوفوني فيكي لاني ماتعودش ابقى

غير الرزينة و العاقلة و القوية في نظرهم ..

بخاف منك لأني مش لاقية القدرة و الشجاعة لحد

اليوم اني اعترف بيكي لحد فيهم و عارفة اني انتي

فاهمة خوفي و قلة شجاعتي و عذراني بس ياترى

هما هيفهمو زيك ويعذروني ولا هيشوفو اني خنتهم بيكي ..

مش عارفة اذا بكرة هينطبق علينا فكرة السعادة مش

يتدوم واقفلك ونفترق او الصداقة هتعيش و اكمل معاكي ..

بس اللي متأكدة انك الصديقة الوحيدة اللي لقيت راحتي

معها و اللي بصمت استحملت كل ما في جعبتي ..

فشكرا لك صديقتي الغالية ..

هلوسات اخرالليل ..

اخيرا ادركت انها لم تخلق لدور القسوة

فتكفي كلمة ليتدفق سيل حنانها لكن من حولها

لم يدركو ذلك بعد

***

اخيرا ادركت انها طفلة و ليست اكثر من

طفلة يجب ان يبرع في التعامل معها

***

اخيرا ادركت انها مكسب لمن يعرفها فهي

تملك من العديد من الصفات النادرة هذا الزمان

***

اخيرا ادركت انها ليست بذلك الضعف و لكن

مشاعرها نحو من امامها هي احيانا ما يضعفها

***

اخيرا ادركت ان في داخلها انثى ضعيفة

لن تظهر الا لمن يقدر ضعفها

***

اخيرا ادركت انها تحبه اكثر من نفسها لكن

خجلها و كتمانها يمنعان ان يتسرب و لو جزء

من احساسها له

***

اخيرا ادركت انه هو فقط ولا احد غيره

صاحب الحضور الاقوى في حياتها و خيالها

***

اخيرا ادركت انها خلقت للدور الذي تهرب منه

و لما تخلق للدور الذي تتمنى ان تعيشه

***

اخيرا ادركت انه ليس اكثر ممنوع ترغبه بل

هو الممنوع الوحيد الذي ترغبه

***

اخيرا ادركت انها لن تكون سعيدة سوى بمنطقها

هي حتى و ان اختلف عن اهواء الناس

***

اخيرا ادركت انها تحتاج لصرخة قد ان اونها حتى

و ان انتهت بعكس ماتحب

***

اخيرا ادركت ان علاجها في قلب مفتوح يخبر

كل ما به و علتها من كبرياء يمنعها اقل البوح

***

اخيرا ادكرت ما تمنت انها لم تدركه فلو لم تدرك

لكانت مصيبة لكن ان صدق ما ادركته ففي فذلك دمارها

هما التلاتة اكتر من سكر نباتة ..

من فترة جالي حالة زهق من اخواني يعني

بحكم اني الكبير و اللي بعدي على طول بيني

وبينه 5 سنين فطول الوقت مسؤولين مني لحد

ما بقيت في مرحلة محاسبة عليهم محاسبة الام

مش الاخت الكبيرة بس فهنا حسيتهم حمل بجد

و كرهت الدور الي اتفرض عليا ده لدرجة اني

تقريبا بقيت لا مبالية بيهم و باي شيء يعملوه

بس من كم يوم كدة و كأنهم حاسين بيعملو حاجات

لذيذة كدة و مواقف شغب معايا لا شعوريا بترجعلي

احساسي القديم بيهم و ترجعني لذكريات طفولتهم

هاتكلم عن كل واحد فيهم نقول بموجز صغير

الكبير فيهم اصغر مني ب 5 سنين و طالب جامعي

ده بقى اللي دايما بحكيلكو عنه في مواضيعي و

اكتر حد بعشقه بجد و بحبه في حياتي

احب اسميه المتمرد حاليا لأنه بقى فيه شغب التمرد

اليومين دول عليا وماما تقولي تستاهلي انتي اللي

بتديه وش و مدلعته بس بجد مالوش حل و تعليقاته

رهيبة اوي و تفطس ضحك في عز ما انت متعصب عليه

عنده ثقة في النفس بخاف تقلب غرور يعني مثلا تبقى

معدي في الشارع تقول الله الشارع اليوم فاضي و رايق

يقولك طبعا اكيد تعرفي ياريم لازم مو انا سايق فيه لازم

يفضولي هو او مثلا تلاقي ماما في قمة العصبية بتهزأه

على تأخيره بمنتهى البساطة يقولها عادي يا ماما لازم

اتأخر عشان دخلتي يسير لها طعم و على كدة

***

التانية بقى طالبة ثانوي اصغر من بحوالي 7 سنين

او 6 ونص جات على نفس اخويا و حرمته من الدلع

و الدلال في حضن ماما و خدت كل حاجة منه و هي

صغيرة كانت لزقة لماما و محدش يشيلها غير خالي كان

اكره ما عليا بصراحة انه ماما تخرج و تسيبهالي ده كان عذاب

مش بتبطل عياط خالص دي مرة اضظرينا نجيب ماما

من فرح بدري بس عشان مش راضية تكست فجدتي

الله يرحمها قالت لخالي روح جيب امها انا ما اقدر

على الوضع ده

لو هوصفها هي طيبة و امورة و كويسة

بس بصراحة ندلة شوية معايا

يعني مش ندلة شتيمة بس عارفين ندالة الاخوات

و حركاتهم كدة نوعا ما مش بأمنها على سر عشان

هتروح تقول لماما اي نعم هي بطلت دلوقت بس الحرص

واجب برضو اخر موقف افتكر ندالتها فيه لما كنا عايزين

نشتري موبايلا ت قولتلها لو انا اللي شوفت بابا الاول اقوله

و لو انتي شوفته الاول تقوليله و قعدت اقولها قدام ماما كذا

مرة اوعي تنسي قولي لبابا ريم كمان هتشتري

موبايل قالت : حاضر طبعا هي شافت بابا الاول و قالتله

و طبعا قلب الاخت دليلها لما بابا قال بعد العشا نروح

قولتله يا بابا انا كمان هغير موبايلي قالي انتي كمان اختك

ما قالتلي طيب اجهزو و اجي اخادكو بعد العشا الباقي

لا تعليق بس تقريبا بقيت اندل معاها انا كمان

العين بالعين بقى

***

اما بقى الصغير طالب اعدادي ده بجد ابني اللي غرت

حتىمن ماما عليه لما بقى اقربلها مني اكتر واحد

فيهم ربيته لانه جاه و انا كبيرة طبعا يمكن بيني و بينه

حاجة بتاعت13 او 14 سنة اكتر حد بفتكر طفولته

و اكتر واحد فيهم اداني كورس الامومة من صحيان

بالليل و بكا من غير سبب لتغير بمبرز و احمي و اعمل

الرضعة و كل حاجة تخص البيبي اكتر موقف بفتكره بيه

لما كان يصحى بالليل و يقعد ساكت و لما يزهق يقوم ملاعباني

او مخربشني على خفيف في وشي و لما ادايق و افتح عيني

بنوع من الغضب يقوم يبتسم زي اللي بيقولي

اووبس هو انا صحيتك ..

عصبي جدا و بغباء عشان تقنعيه بحاجة تبقي

كأنك داخلة معركة لانه بينفجر من اسهل حاجة و

ابسط كلمة و عنيد موت و لا يخاف من حد بس بجد احلى

مافيه صريح في الحق لو ايه و كتوم في السر لو

على ايه يمكن اكتر من الكل

اخر موقف افتكره لصراحته لما الاستاذ ضربه

و اشتكيناه للمرشد جاه الاستاذ بثقة و اسوب خبيث

و قاله قدام المرشد هو انا ضربتك على اساس انه هيخاف

لكن اتفاجأ باخويا بيقوله ايوة ضربتني

و قعد يحكي الواقعة كلها

***

من ضمن مواقف ليهم

افتكر اختي و اخويا الكبير فيهم لما روحنا البحر في مرة

راحت اختي قالياله شايفة السمكة الدهبية اللي بتلمع

قالها فين ؟! ايوة شفتها دي العرجة !!!!

يومها خالي قال لماما ابقي ودي عيالك البحر كتير

عشان ما يقولو السمكة بتلمع و عرجة ..

***

و في مرة ماما بتقطف الملوخية و لقت دودة و طبعا

زمان كان ده حدث كافي يشدهم و يبهرهم في اليوم التاني

الاتنين واقفين على الشباك تلاقيها بتقوله شوف الدودة

اللي ماما امس لاقتها و هو بغباء يقول فين ؟!

و هي تقولها اهي ماشية في العشب و وهو يقولها ماني

قادراشوفها و هي تقولها اهي ناحية ... و طبعا انتهى

الموقف على انه شافها طبعا

***

من فترة لاحظت انه الحلاوة بتاعتي بيتاكل منها و طبعا

سألت كله قالي مو انا فقولت يا بنت ممكن تكوني

انتي اكلتيها و ماخدتيش بالك لحد ما في يوم فضلت

حبة وحدة قام الغبي اللي بياكل منها من ورايا اكل

الحبة الفاضلة و جيت لقيت الكارتون فاضي

و طبعا ده اثبات انهم كدابين بس اللي يقهر غريمك مين

ما التلاتة كلهم عندهم رد واحد : مو انا ..

***

اختي احلى مافيها لايمكن تاخد حاجة من غير اذن اما

الاولاد فانت هتشوفهم جاحتك عندهم طبعا و انتهى

الموضوع بس اختي غالبا لو اديتها حاجة بتحتكرها

و تبوظها او تدمرها فاهون الشرين اخواني ياخدو

حاجاتي على الاقل لو استرجعتها تكون سليمة ..

***

لما يعوزو حاجة طبعا بكل ود وخنوع و ادب

ياخواتي عليه و هدوء و احترام

الكبير بخباثة : اااه يا ريم ..

اختي ببراءة و صوت هادي : ابلة ريم ..

الصغير بإبتسامة طفولية : يا ابلة ريم ..

***

كل واحد شخصية وموقف و حكاية لو فضلت احكي

لبكرة مش هخلص الكبير بحنيته و بشغبه و دلعه عليا

و اختي و بكشها و خصوصا لما تبقى عايزة حاجة غالبا

مش هوافق عليها او هتعصبني

و الصغير بعنده و عصبيته و جنانه معايا

كل واحد بجد مكانة و ميزة عندي ..

و كفاية كدة لحسن البوست طول اوي

و مش عايزاكو تزهقو منهم ..

I Am Hero..

قبل كام يوم تقريبا الاسبوع اللي فات و انا رايحة

اصحي اختي فوجئت بهذا الخصم قدامي على غفلة

و من غير ما احس جمدت في مكاني من الخوف

و فضلت اراقب حركاته من بعيد و هو عند باب

غرفتي شوية يطلع فوق شوية ينزل و شوية يروح

يمين و شوية يجي شمال

بالعربي كدة شيء واثق من نفسه بصراحة حسيته

بيتمشى اصل طول عمري بشوف الصراصيربتجري

بس ده كان بكل ثقة بيتمشي و كأنه بيقولي :

هاع انا هو وريني بقى هتملي ايه ( وش شرير)

طبعا انا ما سكتش ابدا على استفزازه و رغم انه

بابا نايم واجهت التحدي و التعدي بتاعه ده

بكل ثقة قومت ايه ..

ندهت لماما ( يا ماما صرصار ) ( فين ؟ ) ( عند

باب غرفتي ) و ماما جات طبعا و قالت :

عادي اضربيه بالشبشب ..

تخيلو انا اضرب صرصار بالشبشب انا برضو

مقامي العالي و مستوايا ضرب شباشب انا ريم

البكرية الدلوعة الهيبة و الرزانة و الوقار ماما

عايزاني امسك شبشب و اضرب صرصار

مستحيل و طبعا قلب العند عند ماما على الفجر

( ايه رأيك انتي هتقتليه اليوم ) شكلها ماما حست

بالبوست اللي فات و بتأهلني لمهمة الام و تعلمني

ازاي ادافع عن بيتي و ولادي من الغزو الخارجي ..

و راحت ماما ورجعت لقتني نفس الوقفة فطبعا

يأست و قلبها رق ( قلب الام بقى طول عمره

شقي ) قالتلي طيب هقولك تقتليه ازاي

و كان وقتها المستفز بيمشي على باب الحمام

و تنفيذا لإرشادات ماما العزيزة قمت بالتالي :

روحت جبت المقشة الطويلة بمنتهى الشجاعة

وفتحت الباب بيها وبقى الصرصار جوه الحمام

و روحت جبت تايد في كوباية دوبته في ماية

و بمنتهى الدقة و البراعة روحت دلقاها عى الصرصار

و بفضل دقتي المتناهية مات من فوره و لما اتاكدت من

موت العدو بمنتهى البسالة وعزة الانتصار و جهت

برشاش الماية و هووووب وقعته في البلاعة ..

بجد بجد ماتصوروش فرحانة اوي بالانجاز ده

اول مرة اقتل صرصار من الحجم الكبير بالشجاعة دي

و طبعا كل ما اقابل حد في البيت اقوله اني قتلت

الصرصار و احكيله تفاصيل المعركة بتاعتي و هو

يبصلي و يسمعني و هو ساكت من الانبهار بيا ..

طبعا ماينفعش اي استصغاراو استهياف

لشجاعتي و لإنتصاري العظيم ده ضد خصم مهم

و على قدر من الهيبة بالنسبة ل 90% من بنات العالم ..

ماما اكتر وحدة كانت على حد قولها منخدعة فيا

عشان مش بعرف اقتل صرصار و فرحت لانها

علمتني اقتله و قالتلي : كدة لو يوم شوفتي صرصار

تعرفي تعملي ايه صح ؟!

انا : ايوة طبعا يا ماما اكيد حستناه يبقى كدة في ركنة

و اسيبله المكان و امشي ..

ملاك احلامي ..

اتوقعت اني اتأثر و عارفة الرغبة دي عندي

قوية قد ايه و الكل شايفها و حاسسها فيا و يارب

ما اطلعش عكس كدة ..

عند اهلي انا ام هحط عيالي تقريبا في علبة

عشان ما يجرالهم حاجة لدرجة بيتقال الله يعين

عيالك من كتر ما راح تحبيهم ..

و عند بعض صحباتي يا بخت ولادي هطلع

ام حنينة و هحبهم و هبقى عاملة زي يسرا لما

بتبقى ام في اي مسلسل ليها ..

من كام ساعة لما زرت صاحبتي اباركلها بعد

ما ولدت كان احساسي مختلف صحيح جوايا نفس

الرغبة بأني ابقى ام بكل المسؤولية و التعب اللي بتحمله

الكلمة دي و نفسي يجي اليوم و يبقالي ملاكي البريء

اللي احتويه و احبه حب الام المطلق اللي من غير

شروط او انتظار لعطاء ..

مش عارفة ليه المرة دي الرغبة جات بخوف غريب

خوف من مسؤولية الملاك ده خوف عليه من الايام

.. من الناس .. من الحياة .. من الجيل .. من المرض

..من الاهل .. من الدنيا .. ابوه اللي لسه ماجاش و

حتى مني انا ذات نفسي ..

خوف غبي مش لاقياله مبرر ولا سبب بس يظل الخوف

الاكبر و اللي يخنقني انه ما يكونش مكتوبلي ابق ام اساسا

و ملاكي او ملائكتي دي ما تجبيش ..

هلوسات نص الليل ..

بيقولو الانسان يتعرف من تصرفاته دايما

بس كل ما اكبر بكتشف انه القدرة على التحكم

بالتصرف بتكبر معايا يعني ممكن اضحك و انا

زعلانة ابقى صلبة وانا منهارة اتصرف بلطف

مع حد مش طايقاه خالص و طبعا اذا ده حالي اكيد

اغلب البشر كدة

...

ساعات بحس انه داخل الانسان يعتبر ماوراء الطبيعة

بالنسبة لتصرفه يعني في ناس تصرفها ممكن يكون

عكسها تماما

...

نفسي كلنا نتصرف باللي جوانا نكون صرحاء في مشاعرنا

يعني ازعل اقول انا زعلانة افرح اقول فرحانة محتاجة

احساس ما اقول محتاجة مساعدة اطلبها نفسي اوي في

العالم ده عالم كله وضوح مافيه ناس بتتعب نفسها و تضيع

وقتها في لعبة الفهم و الادراك للمشاعر الغيرمعلنة و

المدفونة للاخر

...

تصرفنا سلاح خطير بجد ممكن تبنى حاجز بينك وبين حد

بيعنيلك اوي زي الام لما تتعمد القسوة عشان مصلحة ابنها

حتى لو كان ممكن تاخد النتيجة نفسها منه مع الحنية في

الحالتين بيحبها و هيفضل يحبها وعارف قسوتها عشانه

بس غصب عنه بيتبني شيء زي الحاجز بينه و بينها سواء

كان الحاجز ده قوي و متين او ضعيف وسهل الانهيار

...

احيان بتتعمد تصرف معين عشان تبعد ناس عن طريقك

يمكن من وجه نظرك ده عشان مصلحتهم او عشان تعبت معاهم

او حتى عشان مش عايزيهم بس بتبعدهم ببعض التصرفات

عشان مش عايز تجرحهم مع انه الاسهل لو مش عايزتجرحهم

كان انك نصارحهم اصل ببساطة لو مكانك كبير عندهم

هيستحملوك اوي و فوق طاقتهم وكل مرة هتحتاج تصرف

اقوى و اقسى و النتيجة ان اللي ما كنت عايز تجرحهم و تبعدهم

بعدتهم عنك بس بتعب وجروح كتير يمكن يكرهوك بعدها

و الاصعب كل ما هيشوفو اثر جراحك دي مش هيعرفو

يسامحوك

...

بعض الناس بتدعي الذكاء في انه بتعرف اللي حواليها من

تصرفاتهم فعلا و ده حقيقة بس في قلة قليلة من الناس

لو حد من الي بيقرا فاكر نفسه من القلة دي ممكن انصحك

ترجع للي تعرفهم بجد و تشوف انت بجد من القلة دي

ولا كل اللي حوليك منقيهم او هم اقل ذكاء في التصرف منك فقط

او ممكن يكون الموضوع ببساطة انك لسه ما قابلتش اللي

اذكى و ادهى في التصرف منك

...

البوست ده كتبته لاني بصراحة تعبت من اللعب و تضيع الوقت

في لعبة معنى التصرف اللي الكل بيلعبها و منهم انا

و كمية الطاقة الذهنية اللي بتتحط فيها قررت اني اكون

صريحة في تصرفي .. واضحة في مطالبي ..

جريئة في بوحي بمشاعري ..

هنجح ولا لا .. هكسب ولا هخسرالناس .. هكمل و لا

ده اللي هعرفه مع الايام و بعد التجربة بس

المهم و الضروري عندي دلوقت اني اجرب

و ماحدش عارف يمكن الاقي الراحة في كدة

....