من رقص .. نقص ..

المثل ده عندنا بيتقال للوحدة لما بتبقى

مش بتتهد من كتر الرقص ..

يعني في كل فرح تلاقيها فوق الكوشة مع

كل اغنية شغالة هز .. كل ما تسمع لحن

عاجبها تلاقيها بتتتمايل وتهز ..

فبيقولولها من رقص .. نقص بمعنى هو

في الاخر شيء ماهو طيب فخفي على نفسك

الموضوع قديم شوية بس من شوية كنت

بتفرج على احدى قنوات الاغاني

ولا خلونا نتكلم بوضوح و صراحة

قناة مزيكا وجاه اعلان لهدى و بتتمايل

و زكي يا زكي .. سيبنا من هدى لأني كنت

بتفرج على اللي ورا هدى رجالة طول بعرض

و بشنبات كمان و اقفين يترقصو

ولا اجدعها بنات كليبات وفي تحسهم

رجال كبار معدين التلاتين .. ولا البرنامج

اللي فيه الاخ ماعرفش اسمه ايه .. اللي

فرحان انه اشهر راقص شرقي في

مصر و الناس بتيجي تتفرج عليه ..

و عشان ما ازعلش حد و يقوللي

بتتكلمي على مصر ليه و مالك ومالها

لاني بقيت بسمعها كتير.. كلنا في الهوا سوا

حتى هنا في الخليج بقى الموضوع بزيادة

افتح روتانا خليجية اشوف جلسات

الطرب الخليجي اتفرج على شباب

يهزو الوسط و الجسم زي اللبان

و الله اجدع من اجدع بنت خليجية..

و في العيد على البحر كمان مسابقات

رقص الولد يتمايل و يتميع في التوب

ولا بنت العشرين و يقولولي نحارب شباب

الكول ورقص الراب و الهيب هوب

و الله عليا يبقى كول يرقص راب

وهيب هوب و لا المياعة اللي بنشوفها

من اصحاب الثياب و الشماغ و العقال ..

بجد بقى حد يقولي

خير ايه اللي حصل ؟!

هو في ايه في الدنيا ؟!

اذا كان البنت لما ترقص كتير بيتقالها

من رقص نقص افهم يقوم الشاب

يهز الوسط ليه ؟!

مافي رقص للرجال اقرصوه لازم

الرقص بتاع الستات ده ؟!

يعني معلش ده اللي بيهز الوسط بالذمة

هيخرج ايه للمجتمع هتشكم مراتك

بكرة ازاي ؟! دي من اول خناقة هتقولك

روح بالله عليك و انت مش فالح غير

في الهز..

ابنك هتقولو عيب و خليك راجل و اعمل

ماتعملش على اي اساس ؟!

على اساس يلا اديله و شوف الرعشة ازاي

و لما يجي يتجوز يقولو والدك بيشتغل

ايه يقولهم رقاص هيتشرف بيك ازاي

بنتك هتربيها على القيم ازاي ؟!

ولا لما تيجي تتجوز بالذمة تتباهى

بابوها قدام زوجها وترفع راسها بيه

ازاي ؟! شبكتها هيكون طقم صاجات مثلا..

بجد مش عارفة اقول ايه بس انا محروقة

اوي و مقهورة موووت على الرجال دي

اللي اخرتهم بقت هز الوسط ..

و لسه يابنوتة تقولي لي مش بتحبي يقولولك

بقيتي راجل و انتي بمية راجل .. ماهو لما

الراجل يعمل كدة يا قلبي لازم عشان جدعنتك

و قوة شخصيتك تبقي راجل ..

براءة صندوق ..

قال : قولي احبك

قلت : و لكني فعلا قلتها

قال : و كيف لم اسمعها ؟!

قلت : قلتها في صمتي في شوق عيناي

بنبضات قلبي و لمسة يداي ..

قال : لكني اريد ان تسمعها اذناي ..

قلت : و الميزة في ذلك ؟!

قال : لكي اشعر حلاوتها و استمتع بها ..

قلت :و لكنك تسمع الجميع باذناك تسمع الكذب

والنفاق تسمع كل الوان السباب و رياء الناس

تسمع كل المجاملات و اعذب الكلمات فما

الذي سيميز كلمتي ان سمعتها بأذناك ؟! ..

قال : و انا ايضا

قلت : انت ايضا ماذا ؟!

قال: الم تقولي احبك

قلت : ولكني لم انطقها بعد؟! ..

اللي فوق ده عبارة عن خرابيش

بعنى الكلمة و ركاكة فظيعة وملل

في الاسلوب .. دي ماهي الا عبارة

عن قصيدة من اوائل ايام الثانوي

لقيتها صدفة من سنة ومت عليها من الضحك

اصلي افتكرت احساسي بيها اول مرة كتبتها

احساسي اني كدة عبقرية وشاعرة حساسة

فرحتي و انا باخدها لصحباتي و بيقروها

بانبهار و الله حلوة ياريم ..

لكن دلوقت بقراها و انا ميتة يااااااه

ايه الهبل ده معقول الواحد كان فاكر حاجة

بالعبط ده مهمة لا و كنت شايفة اني استاهل

عامود في مجلة او صحيفة اصلي مش اقل

من اللي بيكتبو ماهم بيكتبو زي الكلام ده

عامود مين ده انا لو حصلت هامش

على طرف المجلة كتير عليا ..

بس بجد عجبني احساس قد ايه الواحد

كان بريء كان عبط زي ده عبقرية

عنده .. كان حاجة تافه كدة تفرحه

مش زي دلوقت صعب حاجة تعجبه

حتى الفرحة بيستكترها على نفسه

و بقى يتفنن يلاقي ازاي الحزن

..

قررت ارجع ادور على الحاجات القديمة

جمعتها في صندوق كل ما اتوه وعايزة

ابعد عن العالم ارجع للصندوق ده

و ادخل العالم اللي فيه انسى نفسي معاه

اضحك .. ابكي .. اتريق المهم في الاخر

ارجع شوية لريم بتاعت زمان

شخابيط في الحب ..

x

في الحب و الحياة بحس الطرفين المفروض

يكونو زي الحرف ده يشتركو في

جزء من الحياة مع بعض و لو حصل تقاطع

في جزء تاني كمان هيتخنقو ..

************

الحب = الصبر

تصبر عليه لما ينشغل عنك او يبقى

بعيد في فترة .. تصبر عليه لما تبقى

متخانق معاه .. تصبر لما تصرفاته

مش على هواك .. تصبرعليه لما يبقى

اسهل قرار انك تنهي كل حاجة و تمشي

وتكمل حياتك تصبر لما يبقى كل اللي

في دماغك جملة ( انما للصبر حدود )

كدة يبقى اكيد انت بتحب بجد ..

بس اتأكد انه الحبيب يستاهل ..

************

من ضمن حاجات بيعملها الرجال وهما

مش واخدين بالهم انه ينشغل عن

حبيبته مرة وحدة و يفضل انه يفضى

مرة وحدة مع انه ثانية سؤال وقت

انشغاله عنها بساعة من وقت ماهو

فاضي لها بالنسبة لها ..

************

غالبا غلط البنت بيكون سببه او مقدمته كلمة

( انتي مش واثقة فيا ) المرة الجاية لما

تسمعيها فرملي وماتحاوليش تثبتي ثقتك

فيه انتي حبيتيه واديتيه قلبك و ده دليل

كافي على ثقتك فيه ..

************

من ضمن حاجات بتعملها الستات

وهي مش واخدة بالها ساعات انها

لما تحب او تتجوز بتنعزل عن كل حد

في البداية و تبقى عايشة كل وقتها

للراجل ده و لما الحب ما بيكملش او

تعدي فترة على الجواز تلاقيه هو

انشغل بحياته و ناسه حواليه و هي

لسه هتبني حياتها و علاقاتها بالدنيا

و الناس بعديه ..

************

زهقت من اسطوانة الشباب اللي عايز

بنت زمان و البنات اللي عايزة رجال

زمان .. طيب لما الطرفين بتوع

دلوقت وحشين ازاي عايزين بتوع

زمان و مش كدة يبقى احنا شبه

بعض و نستاهل بعض ؟!

اللي فوق اكيد مش تعميم هي بس شوية شخابيط

..

بوست ع الماشي..

وحشتني المدونة والتدوين بس ما لقتيش

حاجة اكتبها فقلت اعمل البوست ده اهو

نمشي حال المدونة بيه ..

احكيلو بقى عملت ايه في فترة غيابي ؟!..

طبعا في الفترة اللي فاتت كان باين من بوست عندي

اني مش طايقة نفسي ولا اللي حواليا فاستغليت فرصة

رمضان وبعدت عن الكل طبعا الا اهلي لأنهم عايشين

معايا او انا اللي عايشة معاهم مش مهم ..

نجي لرمضان اولا دينيا بحس احرزت الحمدلله

تقدم عن السنة اللي فاتت و من غير تفاصيل طبعا ..

اعلاميا تابعت مسلسلات بصراحة يمكن شوية

او كتير شوية مش عارفة ..

شوفت يسرا بحكم انه و قتها بنكون بنطبخ و التلفزيون

قدامنا انا وماما و طبعا لا جديد بس لا يمنع انه المسلسل

عاجبني ..

بعدها مسلسل خليجي لسعاد عبدالله اسمه فضة قلبها ابيض

ولا تعليق انتي اكبر من كدة يا ام طلال ..

بعد كدة mbc 3 و استاذ حسن شاهين و بعده كارتون السيرة

النبوية و عارفة قناة اطفال وده للاطفال بس انا عاجبني

و كل سنة بشوفه و المهم بتعلم عن السيرة وده المهم ..

بعدها طبعا خواطر شاب لازم اشوفه و السنة عاجبني

انتقاداته و بقوة و يارب تقدر خواطره تغير حاجة ..

طبعا انا سبق نوهت اني بحضر الاكل وفي تلفزيون قدامي

يعني مش واحدة فاضية ..

بعد الفطار بقى حصة اجبارية لعيال قرية و الذي منه

العيلة بقى و بعده شر النفوس مضيعة وقت بس

كان هيكون احلى لو كان 20 حلقة و لخصو ..

مع شر النفوس بيجي مسلسل المبدعة حياة الفهد

و ابلة نورة رغم انه انتقده بانه تكرار لأبلة حكمت

بس كان رائع وماله لو اتكرر ما كل المسلسلات

تكرار لعرفي و مخدرات و الذي منه ماله لو كررنا

التذكار بالقيم ..

بعدها بروح الجيم طبعا بعد التراويح و ارجع على

بعد الفراق ده بقى مسلسل يستاهل بجد المتابعة

و هند صبري كانت رائعة ما حستش ابدا انها

بتمثل و خالد صالح استاذ فنان بجد ..

طبعا كمان تامر وشوقية بموت فيهم جوازة لذيذة

اوي بصراحة و مي بتعجبني اوي ..

بعد كدة حصة مصطفى حسني اللي مش بستغنى

عنه خالص في حياتي العادية فمابالكو برمضان

الانسان ده بجد غير حاجات كتيير في حياتي

و على ايده اتعلمت خيير كتيير كنت غافلة عنه

ربنا يكرمه و ينورله طريق ..

بعد رمضان بقى العيد طبعا كان على غفلة

و في شك في صحته للان فااتكركبنا خالص

و ماروحناش الصلاة و لا فطور العيلة اللي

في مدينة تانية بابا راح واحنا نمنا في البيت

و بعدها المعايدين و كدة و الفسح والخروج

و الملل ..

حاجة مهمة اوي حصلت في العيد البوم اصالة

( ماهو الشياطين اتفلتو بقى )

الست دي رااااااائعة بمعنى الكلمة انا بثق فيها

قبل ما اسمعها و البومها الجديد اتحدى انثى

ما تلاقيش نفسها فيها البومها حالة هايلة

اخاف عليها من اللي بعده لانها ابدعت فعلا

طبعا انتو ممكن تحسو البوست كلام فاضي و فيه

حتة نرجسية و عاملة نفسي حد مهم بيقولكو

هو عمل ايه في غيابه فهقولكو بقى مدونتي

و انا حرة فيها و كل واحد يعمل اللي هو عاوزه

في مدونته ..

عيد سعيد ..

كل سنة وانتو طيبين

و بكل اللغات

عيد سعيد على الجميع و على كل الامة الاسلامية يارب

ياريت كنا عيد واحد زي ما كنا صيام واحد بس يلا

بكرة يتحقق الامل ده وليس الغد ببعيد ..

و ان شاء الله يعود علينا شهر الخير السنة الجاية

و احنا بصحة وسلامة هشتاقله اوي بصراحة

و ودعته بزعل رغم فرحة العيد و المعيدين ..

اتمنى صيامكو مقبول و تكونو كسبتو رمضان

و خرجتو منه محملين بالحسنات و مغفوري الذنوب

كل عيد و انتو بالف خير ويارب عمركو كلو اعياد

و كل عام وانتم بخير

اختلف المضمون .. و الاناء واحد ..

مبدئيا مش هعرف اصنف الفئات اخوان سلفين وهائبين

متحررين مش عارفة ما تربتش على كدة و عمر اهلي

قالولي الدين بصنف الناس كدة لذلك هكتفي باني

اقول هما فريقين الفريق الاول متشدد و الفريق الثاني ضده..

دهشت عندما دخلت مدونتين ضد الحجاب او النقاب و

هجومهم على فئة متشددة ولا علاقة لتشددها بالدين الذي

اعرفه ولا الاسلام من اسلوبهم في التكفير و الارهاب ..

و هرود امثلة لما اعتقده مذهب كل من الفريقن..

---------------------

الفريق الاول يرى انه الولي على دين الله و هو من يفهم

الدين حقا و يعي معانية

الفريق الثاني يرى ايضا انه هو من فسر الدين كما اراد

الله و هو من يحمل لواء التحرير

-------------------

الفريق الاول تمسك برايه و كفر كل من على غير منهجه

و وجهته و طريقه

الفريق الثاني حقر و استهزاء بكل من هو ضده و لا يعي

اويدعو بمبدائه

------------------

الفريق الاول حكم بالمظهر و عمم شكل للمسلم من غيره

اصبحت انت من غير اهل الدين

الفريق الثاني ايضا حكم بالشكل و الثياب و منها اصبحت

من السفهاء المتخلفين

-----------------

الفريق الاول صنف من لاترتدي النقاب بالسافرة و

العاهرة و انها لاتعي الدين

الفريق الثاني على نفس النهج صنف المنقبة بالمتزمتة

المتشددة لا راي لها و لا كلمة بل لعبة في ايدي عابثين

-----------------

الفريق الاول يبغضك و يغلظ علي بالقول لمجرد انه

كلامي ليه بوجه مكشوف ولو من وراء نقاب مستعد

لتقلبي و مناقشاتي بصدر رحب و صوت عادي حتى

و لو كنت ضده في فرضية النقاب ..

الفريق الثاني ايضا استهزاء و رفض و نبرة احتقارلي

لاني اختلفت مع من وراء نقاب و لو كنت بوجه

مكشوف لاجلس معي و حدثني و ناقشني و باحلى

النبرات والطف الكلمات ..

--------------------

الفريق الاول اختار جهاده بالعنف والتكفير و التشدد
و التفجير و الارهاب

الفريق الثاني اختار جهاده بالشتم و اللعن و السباب
و التحقير باقذع الالفاظ و العبارت

-----------------------

ما ادهشني مدى التطابق بين الاثنين على الرغم من

الحرب و قوة الاختلاف كلامهما نفس اللاسلوب و ماوجدت

اسلوب احدهما في دين ولا في مناهج وسير النبيين فكلاهما

اسير لثياب و قطعة قماش كلامها يمشي حاملا قلمه و

يعطي الدرجات الفريق الاول غير المنقبة اكس و المنقبة

علامة صح و الفريق الثاني العكس .. كلاهما مليئ

بالكره و العنصرية و بعض العصبية القبلية ..

الفريق الاول نسي انه خلف الحجاب والنقاب ربما

توجد شخصية بلا اخلاق و خلف خصلات الشعر

توجد شخصية متدينة محترمة و الفريق الثاني ادعى

انه احسن و ليس بهو احسن فهو ايضا نسي

انه خلف الحجاب و التقاب ربما توجد عقلية رائعة

و متفتحة و خلف خصلات الشعر توجد عقلية

ورأس عنصرية فارغة ..

كلا الفريقان نسي الانسان الذي تحت هذة الثياب ..

كلاهما اصبح اسير في حكمه و مقيد بقماش فهل

هناك فرق اما انا وحدي من ارى وجهة التشابة هذا ..

اما انا منقبة سعودية مسلمة متدينة و متحررة لا

انتمي للفئة الاولى و لست من افراد الفئة الثانية ..

انا فرد في فئة ثالثة فئة احتوت على اناس من كل

الفئات يرتدون كل الازياء وكل انواع القماش .. اناس

من مختلف الاديان سماوية و بشرية .. اناس من كل

الجنسيات عربية او اجنبية .. اناس من كل المذاهب

الاسلامية .. فئة اتعامل كرسولي بالحسنى فيها مع

كل انواع البشرية طالما احترمتني ولم تبغي لي الاذية ..

ما يميز فئتي انها تعايشت مع بعضها رغم كل

التعارضات ..تكون فيها الاخوة والصداقات

رغم كل الاختلافات .. فئة سمت و رقت بانها

عرفت معنى الانسانية و جعلتها اساس التعامل بين

بني البشر .. فئة تحررت من الالوان و

انواع الاقمشة و الثياب و اختلاف اللسان ..

فئة اختلفت في كل شيء مع الاخر و لكنها نجحت

في تقبله .. فئة جعلت الحوار و احترام الاخر

شعارها فاستطاعو بحب ان يكونو اخوة .. فئة كلا

فيها عرف معنى الدين و مامعنى انسان ..

تلك فئتي التي اغفلتم وجودها بعد ان اعماكم

غبار الكره لبعضكم و صم اذانكم عن صوتها دوي

قنابل السباب و الشتائم و التكفير في مابينكم ..

تلك هي فئتي التي جمعت من كل ما ناديتم به

و تجردت من كل ما ملئكم من تفريق بين الناس

و كره للاخر لمجرد انه ليس على فكري و

منهجي و ليس عقله كعقلي ..

لا يهمني راي كلا الفريقين الاول والثاني فيي

لاني اعرف ارائهم مسبقا و ماذا ستقول احرفهم

و اجابتهم !! فليس غرضي من الموضوع اقناع

الفريق الاول لانني و بعد كلاماتي سلفا اصبحت

عندهم مرتدة.. و ليس هدفي ارضاء الفريق الثاني

لاني اعلم اني عنده مجرد رجعية مختلة ..

موضوعي ماهو الا تذكير بفئتي اللتي انتمي اليها و

اشعربراحة فيها فئة استطيع فيها ان احب من هم

غيري وان احترم من اختلف عني .. فئتي التي

افخر بها فهي لما تقيدني في تعاملي مع غيري بلون

و مذهب او بلد و لباس .. فئتي التي تربيت فيها بعيدا

عن الكره و الرفض والاستصغار فيها .. فئة كان

معدن الشخص فيها هواساس حبي و صداقتي له

و انا اعامل الاخر كانسان ..

ففئتي بمنهجها و مبادئها اعتقد انها و صلت للقمة

عند جميع الاديان و امنت بالسلام الذي هو

من غايات الاسلام ..

رمضان كريم يا كل فئات المسلمين

و دمتم سالمين ..

احلى هدية ..

ده هدية الاخت العزيزة ليساندرا

شكرا بجد على الهدية الحلوة دي

و ربنا يبلغك رمضان باحسن خال

و يباركلك فيه ..

عشان نرمضن صح ..

وحشتني المدونة جدا و المدونين وعالم التدوين

ماتخيلتش يوم انه ارتبط بالعالم ده كدة

اعتذر مرة تانية عن غيبتي وتأخري بالتعليلقات

لمشكلة في النت ..

------------------

احب اباركلكو بالشهر و اقولوكو رمضان كريم

بعد الزحمة طبعا ومبارك عليكو الشهرو كل سنة

وانتو بخير ويارب يبلغنا هو في احسن حال ..

و اسأل الله انه يكون شهر مكسب لينا جميعا و

نخرج منه باكبر قدر ممكن من الحسنات..

اسأل العلي القديرانه يقدرنا على الصيام الصحيح

و يبعد عنا التعصيب بحجة الحر و الصيام ..

و اننا نتقن عملنا و نخلص فيه و مش العكس لاننا

صيامين وتعبانين ..

و يارب نقدر نخفف من الاكل ومايبقاش الفطار

اول همنا ز كأنه اخر يوم هناكل عشان نقدر

على صلاة التراويح بإخلاص ..

و كمان نقدر نبعد نوعا ما عن كم المسلسلات
الرهيب و نتفرغ لقراءة وختم القرآن ..

يارب نقدر ننسى اللهو و الانبساط و الاختراع

الظريف اللي اسمه الخيم الرمضانية و نعرف

قيمة الفرصة العظيمة دي ..

و انه العشر الاواخر ما تضعيش مننا في جري

السوق عشان ملابس العيد كانه عمرنا ما هنلبس

تاني و ننسى تحري ليلة القدر والاعتكاف ..

دي شيء بسيط جدا من الامور اللي بنوقع فيها

في رمضان و الي يارب رمضان ده نقدر ننجو

منها هي و غيرها كتير من الاخطاء ..

اسأل الله انا يباركنا و يبارك لنا في هذا الشهر

و نكون من الصوامين القوامين و ختام

القرآن و واصلي الارحام .. ان نكون من من

ينالو المغفرة والرحمة و العتق من النار ..

اسأل الله ان نكون من من غسلت قولبهم عن لهو

الدنيا و طهرت بحب العمل للقرب من الله ..

و اخيرا اكثر ما اسأل الله لنا ان يثبتنا على ذلك

بعد رمضان وماكتب لنا في هذة الدنيا من ايام ..

هو و هي في شخابيط بنوتية ..

البوست ده عبارة عن شوية كلام على اراء متعلقة

بالبنات اوالولاد و ممكن حاجات عن الحياة

اراء مختلفة او متاشبهة مترابطة او متفرقة

كتير يبقى لكل وحدة فيهم بوست لوحدها لانها

في النهاية مجرد شخابيط ...

----------------

قالوا لازم الوحدة تتجوز واحد اكبر منها على الاقل بعشر

سنين عشان تحترمه ..

طيب مش غريبة انه اللي بشوفه دلوقت العكس ؟!

الاحترام مش بالعمر لانه الزواج بيدوب الفرق الاحترام

بحاجات تانية كتير ..

----------------

هو صحيح هيفا و هبي رمز الانوثة الطاغية ؟!

بس عشان حبايب هيفا ما يفهمونيش غلط الست

حلوة فعلا و انا شخصيا شايفاها جميلة جدا بس

يعني ايه الانوثة والاغراء في وحدة بتتلوى على الحصى ؟!

--------------

تصدقو فعلا لو الشباب بطل يعاكس البنات بنات كتير

هتحترم نفسها اصلي في المول شفت بنتين عمالين

يدورو و يلفو عند شلة شباب عشان يعاكسوهم بس

الشباب مش واخدين بالهم و شكله مش في دماغهم

و البنتين خلاص اتوترو وزعلو جامد و بوا ماشين

زعلانين و مكشرين لحد ما الشباب خدوا بالهم في

اخر لحظة من البنتين و ابتسمولهم والله بس ابتسمولهم

البنتين وشهم اتغير و ورد و الابتسامة الحلوة

طلعت بس عشان ابستمولهم تخيلو لو كل شاب

طنش البنات اللي زي دول كدة مش كانت البنات

احترمت نفسها اصل مافيش حد هيبصلها تتزوق

لمين ياريت بس نجرب كدة يمكن تنفع ! ..

--------------

الرجالة عندنا اليومين دول بقت تتطلق مراتاتها عشان

معجبين بمهند بغض النظر عن انه الستات مزودينها و

اللي هما طلبو الطلاق من نفسهم

مش غريبة دي مع انه الستات ياما استحملت

مشوار طويل مع الرجالة ابتداء من يسرا و باسكال و نوال

و حاليا هيفا و نانسي و اليسا و نساء البرتقالة و التفاحة و ..

و الطريق لسه مكمل و من رحمة ربنا لو اقتصرت مغامراته

و اعجابه على نساء الفن و مش نساء الواقع ..

هو صحيح الست غير الراجل يعني بس مش قادر تستحملها

مهند ده حتى يمكن مش معجبة بيه بي اهي محاولة تغيظك

و تحسسك بالنار اللي بتحسها هي تقوم بدال ما تتعدل وتبقى

رومانسي معها ترمي اليمين اومال العصمة فضلت في

ايدك ليه ؟! و ليه ربنا فضلك بالقوامة مش عشان حكمتك

و ترويك و عقلك .. يلا ماعلينا ..

--------------

هو الفرح مش المفروض يبقى زي ما اتسمى يعني الناس

تكون فرحانة طيب ليه المعازيم مش بيفرحو يشتغلو نم

على اهل الفرح ؟ و ليه دايما اهل العرسان بيتخنقوا ؟

على كدة مش المفروض نخترعله اسم تاني؟!..

-------------

(مو مهم الفرح و تكاليفه و تجهيزاته المهم العروسة تصمد )

كلمة شاب سعودي وسط موضة العرايس اللي بقت بتخلع

من اول شهر و اول اسبوع و اول يوم و حتى بعد الفرح

مباشرة ( والله العظيم حقيقة ) ..

--------------

قالو الحب عطاء بلا مقابل

بصراحة بحس المقولة دي كدب الحب اخد وعطاء بين

اتنين و العطاء من طرف واحد الا ما يقتل الحب في يوم

اذا كان رب العالمين اللي المفروض نعبده من دون ما نستنى

مقابل من كتر نعمه علينا مقابل عبادتنا واخلاصنا و طاعتنا

بيزيد نعمه علينا في الدنيا و يرزقنا الجنة في الآخرة ..

حتى عطاء الأم بمقابل و مقابله انك تفرحها بيك و تحن

عليها و تراعيها في كبرها صحيح هو مقابل فيه

مصلحتنا بس برضو مقابل يبقى ازاي الحبيب ياخد

بلا مقابل ؟! ..

---------------

قريت في مجلة موضوع عن ضرب الستات

واحد اكاديمي و يمكن صيدلي بيقول : الست لازم

تتضرب و تنهان عشان تتعدل و مراته تحمد ربها انه

بيخليها تشتغل عشان تصرف على ملابسها و زينتها و

مكياجها و لو يوم قصرت في حقه ياويلها و انه دي

الطريقة الوحيدة عشان الراجل يقوم الست و يبقى

راجل حقيقي مش رجل ناقص ..

طيب يا ابو المراجل رسولنا عليه افضل الصلاة و

السلام عمره ماعمل كدة ولا وصى و لاامر بكدة ده

كان العكس تماما يبقى مين اللي راجل ناقص ؟!..

----------------

بنتقص جدا الراجل اللي يأمر الست بحاجة لمجرد

انه الراجل و عايز كدة طيب ايه الانجاز اللي عملته

و ايه المرجلة في ده ما طبيعي في الاخر كلمتك

هتمشي لانك الراجل يبقى ايه الفخر و الابداع

و العظمة في ده ؟! ..

----------------

بيقولو الراجل اللي تتعاكس بنت تخصه و ما

يدافعش و يتخانق لها مش راجل ..

كلام سليم ومية مية بس مش دايما

اصله لو كانو اكتر من تلاتة يبقى تصرفه غباء

و اهدار لكرامة البنت اللي معاه هتقولولي لا و

وازاي كدة هحكيلكو على موقف و انتو احكمو ..

وحدة اعرفها راحت البحر مع اخوها في العيد و طبعا

بيبقى زحمة وشباب رخمة عاكسوها قام اخوها

اتحمق و دق الصدر وراح يتخانق معاهم وطبعا هما

اكتر منه ضربه و بالصدفة ابن عمه وشلته عدو

و طبعا دخلو يساندوه وجات دورية الشرطة ولمت

كل الشباب و ده اللي بيحصل عندنا بما فيهم اخو

البنت و طبعا البنت فضلت لوحدها و كل من هب و

دب بيعاكسها و يرزل عليها و يرقمها و هي ما كانش

معاها موبايل وقتها في الاخر قررت تاخد تاكسي

بس مشكلتها ماتعرفش توصف بيتها فطلبت من سواق

التاكسي يوصلها لمعلم قريب من بيتها ( وطبعا من

حسن حظها انه السواق بيخاف ربنا لانه ممكن طالما

عرف انها مش عارفة طريقاه يخطفها و شوفو انتو

هيحصل ايه ) المهم اتصلت من عند بقال و جم اهلها

اخدوها و طبعا انهالت عليها سيول التهزيئ على انه

هي السبب في اللي حصل لخوها ..

موقف زي ده انهي اكرم للبنت فيه انا كبنت شايفة

اكرملي اخويا يتنازل عن كبريائه و ياخدني من

المكان و نمشي على البيت معززة مكرمة بدال اني

اتبهدل بالشكل ده و لا ايه رأيكو؟!..

اقرو القصة كويس اوي قبل ماتحكمو ..

---------------

اسخف نصيحة سمعتها :

دلع البنت وانوثتها فن لازم تتقنه من قبل الزواج

و تمارسه و تشوف تاثيره و اتقانها ليه ..

لحد الزواج مقبول بس قمة السخف اللي بعد كدة

يعني الوحدة تروح تتدلع على البقال ولا سواق

التاكسي حضراتكو ؟! ..

كفاية اهدار لكرامة المرأة تحت شعار الانوثة ..

حالة غضب ..

شوفتو الولد ده اللي في الصورة دي بجد حاسة

نفسي عاملة زيه كدة مليانة بغضب فظيع مش

عارفة جاي منين و ليه ؟!

غضب على كل اللي حواليا و ما حواليا نفسي

اعمل اي حاجة انفس عن غضبي ده ..

نفسي في حد اتكلم معاه يمكن ارتاح بس عايزة

الحد ده يكون بيسمع مش عايزة قرف ابو

العريف الداء العربي الشهير و يقعد ينطلي

بحلول و نصايح و حكم يسمعني من سكات ..

و مش يسمع و خلاص كمان لازم يسمع و يحس

و من غير كلام و انا حاسس بيكي و عارف اللي

انتي فيه و الكلام ده و التعاطف البايخ ده

اللي ببيخليني عايزة اولع في اللي قدامي و

اهب فيه هو انت دخلت قلبي عشان تحس بس

عايزة اتكلم برضو مع حد يحس بيا و باللي اقوله

و يقعد ساكت ما يتكلمش واحس انه بيسمعني

و هو بيحس ..

ولا مش عايزة اصلا اتكلم مع حد .. عايزة اقعد

لوحدي في مكان بعيد مافهوش حد اعرفه ..عايزة

اقعد قدام البحر طول اليوم لوحدي .. مش عايزة

خروجة عائلية و جو لطيف مش طالبة لاطافة دلوقت ..

عايزة ابقى لوحدي بعيد عن كل الناس .. لا عايزة

اهل ولا اصحاب و لاحبيب ولاحتى المدونة دي

اللي بحبها لاني مش طايقها هي كمان معاهم دلوقت ..

عايزة اكون انا و ريم و بس .. عايزة اتنفس شوية

عايزة احس اني حرة ..اضحك ..ابكي .. اصرخ ..

اكسر الدنيا .. اتصرف بعقل ..اتصرف بجنان انا

حرة .. عايزة احس بنفسي احس اني حرة ..

و اللي بيزيد غضبي اني وسط الغضب ده بظلم

ناس كتير معايا بتحبني و خايفة عليا و دايما بسألو

عني و فاكريني بس انا مش طايقهم و حاسة انهم

تقال على قلبي .. حتى في الجيم اي وحدة بتقرب و

تحاول تصادقني بخترع مية موضوع عشان اوصلها

كلمة وحدة الفترة دي مش عايزة اعمل صاحبات ..

اه بدايق و انا بقولها كدة واصدمها و انا عارفة انها

حابة نبقى صحاب و ارتاحتلي بس معنى اننا نبقى

صحاب اني اقلق عليها و افرحلها .. ازعل لزعلها و

اشيل همها .. معناه سؤال و تليفونات .. ايميلات

ومسجات .. معناه اني اعيش معها مشاكلها .. و

اشاركها ضحكتها .. ده معنى الصداقة عندي صداقة

يعني اعطي و انا دلوقت مش قد العطاء تعبت و انا بدي

والله تعبت و ماعدش ليا نفسي ادي حد حاجة ..

ما اديت زمان وخدت ايه كل اللي بعمهل في لحظة

بيتنسي لا و كمان مش من حقي ازعل و انا اتغيرت

اقولكو ابقو سددو الديون الي عليكو ليا بعدين

تعالو ازعلو واتكلمو ..

بقيت مش طايقة حاجة من كتر الغضب اللي ماليني

واللي زاد الغضب ده اكتر اني بعد ما رجعت من

الجيم لقيت اخويا زعلان وانا لما اخويا بيزعل

الدنيا بتسود في وشي مش بطيق يزعل او حد

يزعله صحيح انه بقى احسن وبيضحك

بس برض زعلني زعله اوي ..

حاسة بخوف من حالة الغضب دي .. خايفة

على نفسي لاني كاتمة كل الغضب ده جوايا و

مش راضية اطلعه .. خايفة لاني حاسة نفسي

قنبلة موقوتة ماشية مستنية تكة و تنفجر ومش

عارفة من تعيس الحظ اللي هتنفجر في وشه

و مش فارقة معايا هو مين طالما مش اخويا ..

اول مرة احس بكدة اول مرة ابقى مكبوتة بغضب ..

اول مرة الاقيني مش انا .. اول مرة اعصابي

تخذلني و احس اني مش مستحملة .. اول مرة

احس فعلا اني عايشة حالة غضب..

كشف المستور ..

ده واجب اجباري من مستر نور الدين

و بصراحة مش واجب ده كشف المستور

ولاني طبعا فاضية وقاعدة في البيت دايما

وجزء كدة ضغنن خالص خالص جوايا فاكر

انه اشتاق للدراسة و المذاكرة وايامها فقلت

اعمل الواجب بدري

بصراحة انا عاجباني الصورة اللي حاطتها

فوق اوي ياجماعة

المهم

الواجب هو ما يلي :

---------------------

1- أذكر صفتين لا يعرفها من يحدثك لأول مرة

ممكن اني مرحة اوي وبحب الضحك لاني غالبا ببان

جد شوية و اني مجنونة اوي لاني دايما ببان عاقلة ورزينة

--------------------

2- أذكر صفتين يراها الناس فيك وهى ليست كذلك

- اني مش بزعل و اخد على خاطري بسرعة و بعدي كتير

بس ده مش حقيقي انا بفتكر الاذى كويس جدا جدا بس

الشخص بيحدد موقفي منه بباقي تصرفاته او انه يبقى في

نظري اقل من اني اتعب نفسي وابين زعلي له عشان كدة بعدي

- اني قوية وصلبة بس الحقيقة اني ضعيفة اوي بس هما مش بياخد

بالهم و بيتخدعو بالمظهر و مش بيحالو يحسو ضعفي و احمد ربنا

على كدة

----------------------

3- أذكر ثلاثة من مدوناتك المفضلة

كان نفسي اكتب اكتر من تلاتة بصراحة

- مدونة امل قبل ما تمسحها بس هختار غيرها

- طبعا مدونة مستر نور الدين

http://n78mg.blogspot.com/

- مدونة انا حرة

http://banoutamasreya.blogspot.com

- مدونة الطريق الى الكوشة

http://misssosa.blogspot.com/

----------------------

4- لو معك ثلاث وردات لمن تهديها

- ماما

- اخويا

- التالتة هقسمها نصين و هتحفظ بنص منهم

----------------------

5- من هو افضل رئيس عربى برأيك برر بسببين

هههههههههه

والله كلهم اضر.. قصدي زي بعض بس

ممكن الشيخ زايد حاكم الامارت الله يرحمه

خدم بلده و وصلها لمصاف الدول المتقدمة

---------------------

6- شخص كنت تتمنى وجوده بحياتك من زمان

مافيش او ما اقدرش اجزم بحاجة دلوقت

---------------------

7- شئ فعلته وندمت

- حاجة كدة احتفظ بيها لنفسي بلاش فضايح

- تقدر تقول ندمانة اوي

اني اتخصصت التخصص بتاعي في الجامعة

لكن برجع اقول الخيرة فيما اختاره الله يمكن خير

انا مش شايفاه دلوقت

---------------------

شئ لم تفعله وبردو ندمت

الحمد لله لحد دلوقت مافيش حاجة وصلت معايا

لدرجة الندم اني معاملتهاش بحلق نفسي دايما

و الحمدلله غالبا ربنا بيعوضني باحسن

---------------------

9- حلم تتمنى تحقيقه

- اني اشتغل و ادعولي بقى

- اني اقدر لو مرة اكون زي ما اهلي يتمنو

عشان احس انهم فرحانين بيا بس ما اعتقدش

هيرضو مهما حصل و اعمل بيلاقو عيب فيا

- اني ابقى ام و اربي عيالي كويس

و يكونو شخصيات تفرح بجد

----------------------

10- إختصر نفسك فى ثلاث أسطر

ده سؤال صعب اوي بصراحة اصل تلات

سطور قليلة على ريماية حبيبة قلبي

ريم انسانة راضية و صبورة بكلمة تسعدها

بنت هادية جدا ورزينة بس انفعاليه اوي

لكن لو استحملتها و احتويتها في اسوء حالتها لاني

صعبة وقتها بتملكها و بتفضل شايلة الجميل ده العمر كله

و تقدرك اوي (اخويا الوحيد اللي فهم الجانب ده) ..

بسيطة و سهل التعامل معها بس لازم تكون حذر

لانه هدوءها مصيبة بس الناس بتفتكر انه روقان

لكن لو وصلت للهدوء التام الاسلم جدا تخرجها

منه بتبقى واخدة بالها من كل حاجة كويس اوي بس

بتسكت ومش بتعرف تبين زعلها نفسي ازعل زي الناس..

بتحب الحياة املها الكبير تبقى ماما في بيت هادي من غير

دوشة وفيه حب ومودة ورحمة و احترام وتفاهم و يكون

جمبها انسان حنين يطلع الطفلة الرقيقة اللي حبسها سنين

تحت قناع الاخت الكبيرة العاقلة والرزينة و اللي بتتحمل

المسئولية و يعرف يتعامل معها اوي ويديها الامان

و لازم يعرف يخليها تعيط في حضنه و ما تبقاش قوية

وصلبه قدامه لازم يعرف يحتويها جدا لالالالالازم

يخليها معاه تبقى ريم بجد مش اللي الكل يعرفها ..

هما بقو تقريبا 18 مش تلاتة مش كتير عليا اكيد

----------------------

أهدى التاج لثلاثة مدونين

- اهديه لشمس صاحبة مدونة جديدة لسه

- انسان بلا عنوان

- قباري

و طبعا اي حد عاوز يحله ما يمنعش برضو

---------------------