الصراحة راحة يا عيني وانت ........

رجعتلكو تاني بالشكاوي والانتقادات البوست اللي فات كان حاجة رومانس كدة لزوم تريح الاعصاب نبدأ الجد بقى

----------------------

بستغرب و بندهش من بعض الصفات اللي المفروض

انها صفات حميدة بس الناس خلتها او فسرتها بطريقة

غلط صورت الصفات دي شيء مكروه

ابتدي مثلا بالصراحة عنوان البوست يعني انت تكون

سعيد بشيء هتعمله او خطوة ناوي تقدم عليها تقول

اروح اناقش و احد صحبي اشوف رايه برضو

رايين احسن من راي

يجي الصحاب اللذيذ بعد ما فرغتله عن مكنونات

صدرك يرزعك كدة بكم كلمة تخليك تكره الساعة

اللي قولت تقوله فيها عن الموضوع بدعوى ايه انه

انا والله انسان صريح و اللي في قلبي على لساني

او يكون مثلا عندك عيب معين شكلي كان ام خلقي

بس مش شيء خطير او بيأذي او بيبقى الشخص ده

من معرفة بسيطة حب يتكرم و يقول رايه في شخصيتك

نفس الاسلوب يديك كلام دبش يخليك تحبط ومعنوياتك

تنزل لسابع ارض و طبعا تتعصب و تزعل و ممكن تدب

خناقة تلاقيه بيقولك و بكل فخر انا كدة انسان صريح

وصراحتي دي دايما بتوقعني في المشاكل

اصل الناس مش بتحب الصراحة وانا اقول

للاعور اعور في عينه ..

صفة تانية كمان بحس الناس بجد بقت تتفاخر بيها

الا وهي العصبية يعني في كل مرة تبدأ انك

تخش في نقاش او موقف او اختلاف في وجهات

النظرمعاه تلاقيه بيتعصب و يسمعك كلام عمرك

ما سمعته في حياتك و الوان بقى اللعن فيك والشتايم

اذا كان مؤدب يعني لانها ممكن توص لمد الايد ده

اذا ماهانش عليه الصحبه اصلا و قالك نخسر بعض

احسن بعد العشرة و بعدين يجي يقولك

اسف اصل مش قصدي والله انت عارفني بحبك و

انت اخويا و كأنك اصغر عياله كل مرة هيراضيك

بكلمتين بس انا كدة طبعي عصبي عيبي العصيبة

انا ممكن اخسر اعز صحابي بسبب عصبيتي ده

طبعي و بتحس كدة مع كلامه بنبرة فخرانه عصبي

يعني كأنه كدة بقى الحمش والجدع اللي محدش يقدر

عليه و مش بتنزل كلمته ..

اخر مثال هتكلم عنه واللي بقى بيشليني انا شخصيا

الكلام او الهزار بالشتيمة اللي طلع من كم سنة

الاول كان موضه و انك لو بتشتم كول و بتاع

دلوقت بقى يعني انت كدة صاحبه المقرب

يشتمك و تشتمه يعني خد عليك و دخلت قلبه و

بقى على طبيعته كدة معاك ومش متصنع و مش

هيعبرلك او يوريك قربك وغلاوتك الا بالشتيمة

تمر على الولاد تلاقي كل واحد بيشتم في التاني

بالفاظ مش عارفة بتيجي منين ده غير انه

الشتيمة ممكن بتطال الام والاب و قال ايه

كدة هما بهزرو امال لما يتخانقويعملو ايه ؟!

البنات كمان خدت حقها اصله لازم المسواة

البنت تشتم زي الولد هي اقل منه يعني زيها

زيه اكيد صحباتي اولهم الاقي الوحدة تقول

ريم وحشتيني ياحمارة و التانية تتصل عليا

ليش ماتتصلي ياحيوانة وحشتيني بجد يستغرب

بقولهم طيب اذا كدة واحشاكم امال لما نتخانق

هتقولولي ايه ؟!

و وحدة لسانها متربي منها وزعلانة البنات مش

بتعمر معاها و كل واحدة تصاحبها شهر و تمشي

لغاية ما اطرينا نصرحها انه لسانها زفر ولازم

تتغير احنا اتدبسنا فيها من اعدادي و انتهى

الامر لكن الناس مش ملزمة تستحملها يعني

اذا احنا الصحبات زهقنا من هزارها ده فمبالك الغريب

ده غير بقى هزار الايد اللي بقى كدة انت الغالي

وفوق الكل انت الصاحب و الكل في الكل يعني

لازم عشان تبان غلاوتك الصاحب ده يهبدك كم

خبطة كدة وانت وغلاوتك بقى على قد ما انت غالي

بتكون قوة الخبطة

كان معايا وحدة ايام ثانوي من النوع ده و للاسف

كانت بتعزيني اووووووووووووي ( اوعى تقولو انا

الي مش بعرف الا الاشكال دي لا والله صحباتي عسل

و الدليل شخصيتي بس لازم يكون في كدة حالات شاذة)

المهم بما انها بتعزيني اوي كدة فكانت الهبدة او

الضربة متوصية دي لما اشوفها جاية تصبح عليا

استعد اني هبدأ ادورعلى واحد من اكتافي اللي هتوقع

اصلها كانت بتصبح علينا كدة تخبط على الكتف بايدها

الكل بيتوجع بس انا ليا معزة بقى فكتفي بيوقع

ولا اليوم اللي زميلتي غابت و جات قعدت جمبي يومها

انا حسيت اني بقيت زي مكعبات ليجو كل حتة في

مكان و عايزة حد يعيد تركيبي ياااااااااااه

ده كان يوم طويل اوي ...

معلش بقى البوست طويل عارفة طولت عليكم بس

احب اقول كلمة للاستاذ صريح يا استاذ صحيح

انه الناس مش بتحب الصراحة بس دي مش

صراحة دي اسمها وقاحة يعني انت وقح حلو

الانسان يكون صريح بس لازم في صراحته

يراعي مشاعر الاخرين و مايبقاش وقح وقليل ادب كمان ..

معلش اصلي صريحة انا اقولك اعمى في وشك ..

اما بقى عصبي بيه فانت بقى غبي اه زي ما بقولك

غبي مش لانك عصبي لانه ممكن يكون طبع

فعلا بس غبي لانك سعيد بعصبيتك سعيد وانت

اعصابك بتشل عقلك و تفكيرك سعيد و انت بتبيع

عشرة حد في ثانية وتهينه بسبب غباءك في عصبيتك ..

انا اسفة مش قصدي والله ازعلك بس اصلي اتعصبت

وانا طبعي كدة مش بعرف امي لما اتعصب..

ابو شتيمه باشا و ام ضرب هانم او العكس بقى

يا معفنين يا ... يا .... يا .... يا ... و لا اقولكو

انتو بقى خلص عندكو الكلام و عن اذنكو ياقراء

اصلي هقوم اشمر اكمام البيجاما اصلي عندي

كلمتين راس مع ام وابو ضرب ...

أنت و أنا ..

أنت و أنا .. أنا و أنت ..

من نحن ؟! شخصان منطقي ..

حبيبان هذا ما يبدو .. عاشقان ؟!

امر بعيد او ربما صحيح ..

من يدري من نجن ..

ربما كنت اعرف ..

ربما كنت انت تعرف ..

لكن نحن .. مجرد اثنان

التقيا قبل ان يفترقا ..

و لكن لم يفترقان ..

ربما ليسا حبيبان .. ليسا عاشقان ..

مجرد شخصان .. يريدا ان يفترقان ..

لكن لا يستطيعان ..

لماذا ؟! ..

ربما يكون حقا هو .. الحب ..

إذا اين الشوق .. أين خفقات القلب ؟!

اين الدموع و الالم .. اين الورود ؟!

اين عذب العبارات .. اين الهمسات ؟!

و لكنها موجودة هي غائبة و موجودة ..

ربما تغير الحب ..

تغير مع التاريخ مع البشرية و الناس ..

اصبح كالمباني فوق السحاب ..

اصبح سريع كسمة هذا الزمان ..

أهو حب الالفية الثالثة ؟!

لما لا .. لم اعد اعرف و لم اكن يوما

من الايام اعرف ..

أتدري لنقل اننا شخصان..

عاشقان .. حبيبان او حتى صديقان ..

المهم هناك أنت و أنا او أنا و أنت ..

مصايب بريئة

بصراحة كترت من بوستات الشكوى و

المشاكل حبيت اكتب حاجة مسلية شوية

طبعا تناقض بين الصورة والعنوان بس فعلا

هما المقصودين لانهم ساعات فعلا

بيكونو مصايب بعمايلهم ..

حاجة كدة صغيرة و بمنتهى البراءة بتعشق

ضحكتها و و بتحب تصرفاتها و حركاتها

و فجأة تلاقي الحاجة دي قلبت مصيبة او

عملتلك مصيبة..

عن نفسي بصراحة رغم هدوئي اللي الكل يشهد

بيه و رزانتي اللي الكل بيشكر فيها بس وانا طفلة

كنت فعلا مصيبة بريئة ..

دايما ماما تقولي انتي مافيش حد بشقاوتك ومصايبك

سبحانه يغير ولا يتغير ده انتي تغيرك ده معجزة

ابسط مصيبة عملتها و كانت هتروح فيها المكسينة مني

لما في مرة اتلهت عني و ققرت اتكلم مع الناس اللي

في الشارع و طبعا وقتها كنا ساكنين في الدور الرابع

و كان ممنوع انزل الشارع يبقى الحل ايه؟!

الشباك طبعا.. و بمنتهى البراءة فتحت الشباك و قعدت

عليه و بقيت قاعدة على حافة الشباك ورجلي مدلدلة في

الهوا و هاتك يا رغي و ضحك مع الناس اللي تحت

لحد ما ماما استغربت دي بتكلم مين و جات شافت المنظر

و اترعبت بس ما قالتش حاجة و بشويش جات و

ساحبتني من ورايا بسرعة و يومها بقى خدت علقة انما

ايه اسيبها لخيالكو..

موقف تاني برضو كنت زهقانة ( اصلي كنت وحيدة 5

سنين ) قررت اخترع لعبة قمت جمعت كل الشوز اللي

في البيت وعند الشباك واعمل سباق بين كل جوز من يسبق

الاول و على جاية صحبات عمتي وقفو واستنوني لغاية

ماخلصت لعب و رميت كل الشوز اللي في البيت في

الشارع و لموها و طلعو جابوها لماما و لكم ان

تتخيلو منظر ماما وهي بتفتح الباب و شايفة شوز البيت

كله في ايد بنات الجيران..

موقف غيره بس لاخواتي وهما صغيرين عارفين احساس

الفرحة بالمصيبة عند الاطفال اهو ده اللي هحكي عنه

لما كنا في زيارة للرياض و مطبخ الشقة اللي احنا فيها اتحرق

انا كنت نايمة وكان ماما و اخوتي صاحين و هب ولع الزيت

اللي ماما نسته ومسك المطبخ و المشكلة انه بابا الشقة عند

المطبخ ماما طبعا ماعرفتش تتصرف لغاية ما ربنا

هداها و اتصلت على الامن بتاع العمارة تحت و طلعو

طفو النار كل ده و هما ناسين الغلبانة اللي نايمة جوه

المهم مش ده الموقف صحيت على الدوشة و منظر

اخواتي كان منظر غريب كان فرحانين اوي و عينهم

بتلمع من الاثارة و الانبساط و اللهفة انهم يحكولي

خير في ايه ؟!

هما :بكل حماس و تشويق والله راحت عليكي يا ابلة

ريم سارت حريقة .. انا : حريقة فين وكيف ؟!

هما :والله في المطبخ المطبخ ولع والرجال اللي تحت

جابوالحاجة الحمرة وطفوها والله مرة حلو وحماس

زي الافلام و 911 طبعا ده كان برنامج بتاع الحوادث

لو فاكرينه و سبتهم وسط الفرحة اللي هما فيها ورحت

للمسكينة ماما اشوفها..

اخر موقف هحكيلكو هو بقى ده حاجة تانية بصراحة

مصيبة مصيبة يعني و ليه علاقة بالفرحة بالمصيبة

ده كان في وفاة عمي الله يرحمه ماما بعتتني اجيب

حاجة من عند عماتي و نزلت و لقيت الجو مكهرب

و الكل وشه حزين ومعيط وجري على ماما ابلغها و

نزلنا و عرفنا انه عمي مات واحدة من عماتي ساكنة

بعيد شوية فطبعا ازاي يصحوها متاخر الفجر وتيجي

من غير ما تتخض راح اتصلو عليها و قالوها انه عمي

عمل حادثة وهو في المستشفى واول ما جات استقبلها

عمتي توأم عمي اللي اتوفى و انا معاها و بتقول في ايه

و حسن ماله؟! عمتي قالتلها ما تقلقيش هو بس في

المستشفى وطبعا هنا طلعت المصيبة اللي هي انا طبعا و

بكل ثقة قولتها لا عمي حسن مات و عمتي التانية تقولها

لاهو بس في المستشفى و انا بكل عصبية لا هو مات

حتى اسالي جدة وعمة فلانة كلهم كانو بيبكو وجدي جاه

و قال هيصلو عليه الفجر و طبعا عمتي انهارت

تماما بعد نزول الخبر عليها مني كالصاعقة و بقت تبكي

بهيسترية و عمتى التانية بتزغرني بنظراتها النارية

و انا بقول خير مالها دي عيطت فجأة كدة و اترمت في

حضن جدتي و طبعا بعدها الكل اتشغل بالعزا و زعلان

و انا هطير من الفرحة واقول اخير بقى عندنا عزا

اصل ماما دايما لما تخرج وماتاخدنيش بتقولي رايحة

بيت العزا فكان نفسي اعرف ايه هو بيت العزا و عمالة

ادور على عماتي و ماما واقولهم يعني احنا اخيرا بقينا

بيت عزا و هما يقولو اه و بقيت استنى قدام الباب وانا

الفرحة مش سيعاني و اقول لكل حد اقابله احنا بقينا

بيت العزا بمنتهى الفرحة بالمصيبة ..

و ده شيء لايذكر ابدا طبعا و هو ليس الا

مجرد جزء صغير اوي من ملف المصايب

اللي كنت بعملها ايام ما كنت مصيبة بريئة ..

ايوة ..انت ياللي بتعاكس

نفسي افهمك بجد و يمكن حلم عمري اخد رحلة

داخل دماغ حضرتك نفسي اتامل افكارك و ادرس نفسيتك

اعرف جواب سؤال جوايا محيرني انت بتعاكس ليه؟!

هو حضرتك لو اكتفيت بالبنت اللي مش كويسة و اللي

جابت لنفسها و الله مش هلومك هقول هي السبب زي

ما دايما بتقول بس لما شررك يتطاير على بنت محترمة

و برضو هي السبب اصدقك ازاي؟!

صدقني دي والله غلبانة وتعبت اوي عشان

رضى سيادتك بس عشان حضرتك ترتاح ..

مش مصدقني طيب اصبر عليا و تعال اخدك

رحلة مختصرة جدا في حياتها ..

البنت دي اول ماكبرت و احلوت و بقت عروسة

زي ما بيقولو و خرجت الشارع بالهيئة دي صادفها

شاب زيك ساعات بيبقى امور وساعات معفن و

ممكن على الاغلب بيكون التانية دخلت دماغه وعجبته

و قرر يتصرف معها بسلوك يسمى المعاكسة و دي اول

مرة تعرف السلوك ده وطبعا كبنت محترمة بتجري على

امها و تقولها اللي حصل هنا الرد ايه يا بنتي مانتي

كبرتي و ماعدش ينفع هدومك دي لازم تغيرها و تلبسي

واسع شوية اصل الشاب انتي كدة بتغريه و يجري

يعاكس و طبعا المحترمة بتقتنع لانه كلام حق و

توسع اللبس او العباية ..

ترجع تخرج تاني و فرحانة مش هتتعاكس

عشان وسعت الللبس وحجة الشاب بطلت تلاقي

اخينا ده لسه بيعاكس ترجع تاني تسأل عن العيب

الرد ماهو يا بنتي عطرك ملفت ليه و هخيلي

الولد ينجذب ليكي و يعاكس بلاش وطبعا برضو

الكلام ده حق و البنت بتنفذه اتقاء المعاكس و

تبطل العطر و تخرج برضه تلاقي الاخ مصر ترجع

تسال عن السبب الرد.. ماهو يابنتي المكياج ملفت

برضو بلاش كتر المكياج لو هنا في السعودية هيبقى

عشان كاشفة وشك غطيه عشان ماتتعاكسيش ماشي

عادي ومش مشكلة كله يعدي و يهون

عشان الوحدة تتقي شر المعاكسة و صاحبها ..

ترجع تخرج تاني و برضو الولد بيعاكس في ايه

تاني ؟! اصل يا بنتي مشيتك مش ولا بد صلحي

المشية وامش كويس الولد مش هيعاكسك

من فراغ ماشي مشينا زي العسكري وبرضو ده

وراها .. ايه تاني اصل يابنتي ضحكتك عالية و

صوتك كمان ماشي و على العين خلاص وطيناهم ..

طيب كل اللي اتطلب من البنت فوق صح وحق

ممكن يطلب من البنت فعلا عشان تتقي شر المعاكسة

يبقى تعبت عشان ترضي حضرتي ازاي ؟! ..

هنا جينا للمفيد و لمربط الفرس يعني المفروض كدة

بقى البنت عملت اللي عليها لبس وسعته .. و حجاب

و ممكن نقاب لبسته .. عطر و مكياج شالته .. مشية

و صلحتها .. الصوت و الضحكة وطتها يبقى بنت زي

دي عملت كل حاجة ترضيك و تقيها اذاك و شرك واللي

ممكن تبقى برضواختك او امك تتعاكس ليه ؟!

ياريتك تتكرم وترد عليا و المصيبة ياريت بقيت حضرتك

بتقف عند المعاكسة لا ده بقى بتوصل معاك للتحرش بيها

كمان و في اماكن لا يصدقها عقل

يعني انا هحكي قصتي مع حادثة تحرش كانت هتبدأ تحصل

معايا و والله دي حقيقة مش خيال ومش الحادثة اللي تخض

لا اللي يخض في الموضوع الكيفية والزمان والمكان

حادثة اتعرضتلها شخصيا قبل حوالي 4 سنين تفتكرو الحادثة

فين مش هتصدقو في الحرم المكي .. و امتى في شهر

رمضان .. المفروض بنعمل ايه بناخد عمرة بعد صلاة

التراويح .. و عارفين فين يالتفصيل حدثت المحاولة دي

و احنا واقفين ندعي على الجبل بعد انتهاء

الشوط مواجهين الكعبة للتكبيريعني في بيت الله و في

شهره المبارك وبنأدي مناسك العمرة و احنا في وجه

الكعبة متخيلين يعني ده الانسان انا اسميه ايه بجد ده

انسان ميت و الله ميت ماهو اللي في الموقف ده وما

افتكرش ربه اكيد ميت و يمكن من رحمة ربي انه

الموقف حصل في المكان ده عشان

بجد لما بفتكره مش بفتكر الحادثة اللي كان ممكن

تأثر على نفسيتي قد ما بفتكر المكان و الزمان

و بعيش حالة زهول لحد دلوقت من الانسان ده ..

شفت ازاي البنت غالبانه و شرك اللي بقى حلمها

تتقيه ممكن في يوم من الايام يوصل لفين معاها ..

و في الاخر بترجع تقولي العيب على البنت و البنت

هي السبب .. و ماتقولش انا مش ممكن اعمل ماهو اللي

فوق ده اكيد بدء شاب بيعاكس في الحي لحد ماقلبه

مات كدة .. مش هظلمك و احط اللوم كله عليك

اه في بنت هي السبب ماتروح تعاكسها هي بدل

دي المحترمة بس انا هنا بكلمك و بنقاشك عن

البنت المتربية بنت الناس المحترمة اللي طول حياتها

بتخرج و هي بتدعي ربنا يقيها شرك

ف يا سيادة المعاكس و يا حضرة المتحرش

ارحمنا بقى و اعتقنا لوجه الله .. خاف ربك شوية

وراعيه في بنات الناس حاول و انت بتعاكس تدي

نفسك ثانية حط امك مكان اللي بتعاكسها او حتى اختك

لو مش قادر بخيالك تتخيل انها بنتك ثانية بس فكر عد

للعشرة وفكر و الله في نظرك هي ثانية بسيطة بس

هتفرق كتير عند بنت ماشية في الشارع وكل همها

و امنيتها تتقي شرك وتسلم من ضرك ..

طفلتي انا ..

بجد مش عارفة ازاي اكتب عنك اول

مرة اعجز اني اعبر اول مرة احس الكلمات بتخوني

ومش عارفة اصوغها و ارتبها عنك انتي

انتي بالذات مش عارفة اوصفك ..

بعيدة عني في الوقت اللي المفروض تكوني قريبة

حنينة اوي بس بتحبي تغلفي حنيتك بالقسوة

بقيتي تحبي تفرضي رأيك اوي وكلمتك هي اللي تكون ماشية

حاسة بتعبي و حزني بس بتحبي تبقي بعيد وتراقبي

حلمتي بالاخت فيا و عملتيني اختك اوي لحد مانسيتي انك امي

لو احتجتلك لازم اجي مش انتي اللي ليا بتقربي

ساعات كتير بتستهوني بشخصيتي او ذكائي بتستهيفي رغباتي

مع انها مهمة عندي وجزء كبيرو مهم مني

بس بالنسبة لك بحسها مش مهم نفسك اوي ارضيك في الوقت

اللي بجد مافيش حاجة مني بترضيكي مهما اعمل بتستني الاحسن

مهما اقول في الغالب مش هيعجبك لحد مابقى عندي يأس اني

في يوم اكونلك زي ما تحبي و اعجبك ..

بحب ساعات لما تشاركيني الرأي و لما بتكوني معايا في وقت

فرحي وبحب ابعد عنك في وقت زعلي لانه الوقت

اللي دايما بتختاريه عشان تزيد الزعل عليا ..

بحب وجودك في حياتي بس محتاجة منك خصوصيتي وحريتي

بحب خوفك عليا بس محتاجة اجرب واعيش دنيتي

ياريتك تفهمني يا امي ياريتك تثقي فيا شوية ..

عارفة انه البوست غريب و الكل دايما بيدور على احلى

كلام يوصف بيه امه لحد ما تبقى صورة الملاك على الارض

مش كلمات زي العتاب بس انا اخترت اوصفك كدة بعيوبك عارفة ليه؟!

لاني بحبك غير كل البشر بحبك بطريقتي حب غيرعن

كل الناس بحبك كدة لعيوبك ايوة بحبك لعيوبك ..

بحب فيكي الحاجات الي بكرها قبل الحاجات اللي بحبها

بحب فيكي اللي بيدايقني منك قبل اللي بيسعدني منك

بحبك كدة بطريقتي انا .. غير كل البشر لعيوبك

لاني مش بحبك حب البنت لامها انا بحبك حب الام

لبنتها لانك اغلب الاوقات بتبقي بنتي .. طفلتي انا

بنتي اللي بعشق عيوبها و احب غلطاتها ..

بنتي اللي بغير عليها من الدنيا كلها لحد ياخدها مني

فاكرة وقت ما صاحبتي قربت منك لما كانت بتعوض

بعد امها عنها بقربك .. لما كانت بتنسى اهمال امها ليها

باهتمامك كنت عايزة وقتها ابعد عنها والله غرت منها

كان نفسي اقولها الزمي حدك دي امي انا ارجعي لامك

دي بتاعتي ملكي انا .. دي ليا دي بنتي انا و طفلتي

بس عارفة فضلنا صاحبات لحد دلوقت ليه عشانك انتي

مش عشان هي صحبتي و بحبها ..

عشان كنتي بتحيبيها عشان كان كلامها بيسعدك

و كانت حكاياتها بتضحكك و تفرحك

عشانك انتي بس اتنازلت عن غيرتي و انانيتي و

فضلت لحد دلوقت صاحبتها عشانك انتي يا طفلتي ..

رغم البعد اللي بينا و الحاجز اللي بنيناه انا وانتي بس

بينا شيء غريب علاقة لايمكن تتهد بنتقل على بعض

ساعات و نبعد .. بنعند مع بعض ايام ولايمكن نتنازل لبعض

بس بتلاقينا دايما مع بعض وروحنا و قلبنا متعلقين ببعض

بتدايقي اوي لما ازعل منك وانا بموت لما تسكتي و ماترديش عليا

و انا بسألك او اكلمك و في الاخر مش بنقوى على البعد و بنتكلم

عارفة اننا واحنا بنبني الحاجز ده اكتشفت اني اكتر وحدة شبهك

بختلف عنك كتير صحيح بس طلعت في الآخر شبهك

طلعنا اكفي القدرة على فومها تطلع البنت لامها

المثل اللي مش عايزة تصدقيه فينا و طول عمرك بتسخري منه

ادينا طلعنا المثل ده يا حنينة و بكل مافيه من معنى ..

يمكن اكون بدأت البوست بعيوبك اللي بحبها بس بجد مش قادرة

انهيه بميزاتك ومحاسنك لاني بجد والله مش قادرة اعدها

اقول ايه و لا ايه عنك .. وايه الكلام اللي يكفي فيكي

افضالك كتير عايزة كتب عشان تتجمع .. وتضحياتك اكبر

عايزة دواوين عشان تتوصف .. بجد يا امي عمره ما هيكون

في الدنيا دي ابدا ست زيك .. بعشق قوتك و بموت في طيبة قلبك

و حنيتك نفسي اكون ام هايلة زيك و اربي ولادي على المبادئ

و اعملهم الصح اكيد مش في كل حاجة هكون زيك اكيد في حاجات

هنقص او ازيد عنك بس في الاخر الاقي جواهم احساسي ليكي دلوقت

اني فخورة بيكي يا امي و فخورة اني تربيتك ..

اسفة على البوست الملخبط واعذرني لردئاة الكلام

و انه في بوستك انتي بالذات خاني وغرد بيا التعبير

يارب يخليكي لينا يا امي وتفضلي نوارة دنيتنا

سامحيني يا امي و بعتذرلك .. اعتذرلك على اللي فات

و بعتذرلك على اللي جي لاني على الاغلب مش هكون زي ماتحبي

مش هقدر اعجبك واعمل كل اللي انتي تتمني

ياريت يا امي تسامحيني على تقصيري في حقك و يارب عني ترضي ..

و آخر كلامي دعوتي ليكي بإنه :

ربي يفضل طول العمر راضي عنك في دنيتك واخرتك

و بنعيمه يا امي دايما تتهني و جنته العالية يرزقك ..

بقى انا ملكة !!!

المرأة السعودية ملكة والاكثر جمالا و دلالا !!

دراسة الاغلب ممكن يكونو عارفينها و سمعو عنها

بس بجد تضحك اوي لا وفي اللي مصدقين وفي اللي

زعلانين اوفرحانين

بالله عليكو بلا قلة عقل ده مجرد كلام بيضحكو عليكو بيه..

نفسي افهم بس الدراسة دي اعتمدت على ايه؟!

على المظهر بس و الحالة الاجتماعية ولا على البترول

و كتر الفلوس يعني و كم بنت دلوعة ومبسوطة ونقدر

نقول غنية مع انه مابقاش ده حال الكل زي مانتو فاكرين

لو دخلنا جوة المراة السعودية بصراحة مش ده الحال..

مش عارفة امتى هنتحرر شوية مش عارفة ليه

فاكرين اننا بتحررنا هننحرف انه لو اشتغلت مع زمايل

رجال ابقى مش كويسة وهغلط وانحرف .. اني لو سوقت

عربية برضو هصيع و انحرف .. اني لو بخرج وبجي مين

غير راجل هغلط ويحصل حاجة .. اني لو اتعاملت مع راجل

هيخدعني و يغشيني و في حبه هيعليقني .. اني لو اتجوزت راجل

اقل مني نسب ممكن اهلي في يوم ليهم الحق يطلقوني حتى من غير

رأيي و ومن زوجي و ولادي اتحرم .. اني لو عايزة اهرب من

سلطة راجل مفتري بطلاق او خلع ممكن الاقي الشيخ متضامن معاه

خصوصا لو كنت مكسورة و ضعيفة لمجرد انه راجل .. اني لو حبيت في

يوم كون انه اللي اتقدملي اتعرف انه بحبه و حتى لو كويس

و مافيش في اخلاقه وطموحه وشغله يبقي اني بحبه ده سبب

كافي جدا انه يترفض .. اني بس قبل 3-4 سنين اتكرم عليا بالبطاقة

الشخصية .. اني مش هقدر اعمل حاجة الا لو ليا راجل يضمني

اني الزم بالنقاب لما جرد فكرة عيب حد يشوفني و بره بقلعه

واني واني وده يمكن حاجات تافة وغيض من فيض ..

انا مش بتكلم عن نفسي و لا انه كلامي بيمثل كل بنت سعودية

و يمكن انا مرتاحة اكتر و مش منطبق عليا نص اللي فوق

بس هتلاقي منطبق على الاغلبية

في بنات راضية ومبسوطة و دي حرة بس في بنات عايزة

التغير ليه نصعبها قد كدة ؟! ما كل وقت وليه ادآن

كل زمن وليا ظروفه صعب اعيش عيشه امي و جدتي

ليه تبقى حياتي ماشي بتحكم رجالي فظيع متجاوز الحدود؟!

ليه كمية الخوف من تحرري و اعتمادي على نفسي بجد؟!

هو خوف من انه التحرر الاقتصادي تحرر كامل

خايفين على بناتكم السعوديات حقكم بس ليه متخيلين

انه في كل جديد هنضيع ليه متخيلين انه اي تجربة

هنغلط ونصيع و نبقى في المراقص و الديسكوهات زي

غيرنا على ما بتقولو مش عارفة ليه مقتنعين بالفكرة دي؟

على اساس انه دلوقت المجتمع خالي ..مش كل حاجة

شايفها العين تتصدق .. مش معنى انه اغلب بناتنا

منقبات انه كويسين .. مش معنى انهم مش بيشتغولو

مختلط انه محترمين ..مش معنى انها دايما في البيت

تبقى متربية وكويسة .. مش معنى انه صحباتها كلهم

بنات تبقى خجولة ومؤدبة.. و ليه اصلا اللي هتعمل كدة مذنبة

و ماخفي كان اعظم بنتاكو وصلو لمرحلة توهان و ضياع

بس انتو مش حاسين نفسهم يواكبو الوقت والعصرمعاكو

و قدام عينيكو و برضاكو بس انت عايزينهم متأخرين

الحياة مش بالفلوس وانك تديها و ماتبخلش ..مش بانك تسفرها

و تشوف العالم اديها فرصتها خليها تعيش تجربتها و عيشها

معها خليكو دايما جمبهم و وجهوهم وقت ما يحتاجولكو

و هما اكيد في تجرنتهم هينجحو

ارجعو عاملوهم بناء على دينا ارجعو فعلا لسنة رسولنا

ارجعو لمعاملة الدين بجد مش بتقاليدنا..

ليه ساعات بتدو الفرصة لكل حاجة تفضل في السر

ليه لازم توصلو لمرحلة الازمة عشان تقتنعو وتحلو الامور

ليه مش بتساعدو تطلعو الامورو المشاكل في النور..

بصراحة مش عايزة اكمل البوست بس هنزله رغم انه بقى

بايخ ودمه تقيل و عارفة كلامي مش هيعجب خصوصا لو

قراه سعودي او قراته سعودية وممكن اكون حتى في

نظرهم متحاملة او حتى ظالمة بس اللي فوق حقيقة و انتو

زي عارفين حتى لو مش انا و انتي و اختك و صحبتك بنعيشها

كلامي مش تجريح ولا اني انقص من حق الست السعودية

لانها فعلا ست مكرمة وهايلة ولأني اساسا بنت سعودية

ولا اني من مؤيدي حملات التحرر اللي متجاوزة الحدود

ولا بقول الست زي الراجل في كل حاجة ولا قصدي

على شغل كلام نواعم وبنات حوا وست ستات

بس كل كلامي و الله من حبي و خوفي ايوة خوفي ..

ياخوفي من اليوم اللي الست السعودية تقول كفاية و تحرر

ياخوفي من اليوم اللي عن اصلها تتغير

ياخوفي من عدم ثقتكو وضغتكوتخسروها وتروح

قيمها و بسبب الكبت و الضغط ماترجعش

وده اللي بدء يحصل بس احنا كالعادة ما بنشوفش و ما بنسمعش ..

هم الولاد

كلمة قالتها جارتنا خلتني افطس من الضحك بجد

( اللي عنده ولد اليومين دول مش مرتاح ده هم والله يعينه

لازم يجوزه عشان من همه يرتاح )

معقولة بعد ما كان هم البنات للممات بقى الهم دلوقت الولاد

جارتنا اعتمدت نظريتها العجيبة لما كبرو اخواتها الصبيان و بقو

في سن الزواج وقتها بدء الهم بحكم اننا في السعودية فالزواج التقليدي

هو السائد والدتك او اختك تشوف و انت تروح تشوف العروسة بعد كدة

و يا عجبتك و عجبتها والامور مشيت يا اما مافيش نصيب وتبتدي رحلة

البحث من جديد ولأن ولادنا مكبوتين و اغلب البنات هنا منقبات فبيبقو فاكرين

الست زي اللي بتيجي في التلفزيون فطبعا مش بيعجبه العجب اللي عايز

بياض نانسي و اللي عايز جسم هيفا و اللي عايز شعر زينب العسكري

و طلابات لذيذة اوي كأنهم رايحين يجبو عربية تفصيل مش عروسة

و نظرا لذوق الشاب السعودي الرفيع فهو بيطلع عين اهل اهله على مايلاقو

عروسة تعجب جناب حضرة سيادته و تنول الرضا انه اتجوزها واختارها

ياسلام على الكرم الرجالي ياسلام و ده اول هم ولد نظرية جارتنا

خلال فترة البحث المضنية دي شابنا الفتي بيكون عايش حياته اكيد

سهى و روئ و لمى وحصة و كل اللي قلبك يحبه طبعا دي بس

حاجات على الماشي تسالي كدة يصبر قلبه المسكين على مايلاقي

نصه التاني و طبعا سهى وروئ بيحبوه و لمى و حصة طامعنين فيه

يعني كلهم مستنين الاهل و المأذون والزفة و فاكرين نفسهم من اهل البيت

و هارين اهل صاحبنا اتصالات من غير حياء او كسوف ماهو عادي

ده زوج المستقبل اهله ياخدو على الوضع من بدري بس في مجتمعي

المحافط ده عيب و تجاوز يثير حفيظة العائلة وقلقها و سخط رب الاسرة

على المسخرة اللي بتحصل و بالتالي حل البلاء والنكد على اهل البيت لعصبية

الوالد الدائمة ده غير انه عريسنا بقى بيشوف البنات حواليه زي النمل على السكر

فبيتغر في شبابه زيادة ويقتنع انه الي ماجبتوش ولادة و تصعب عملية البحث

و تطول عشان عروسة من دول تعجب عريسنا المصون

وده السبب التاني للنظرية الجوهرية دي

نرجع بقى بالزمن شوية ايام ما كان الشاب اليافع ولد فتي في الحارة قبل

ما يبدأ حوار غطي على بنت عمك و بنت خالك دول يجوزو لك مايسير

تكشف عليهم طبعا عريسنا الفاضل كان في بداية شبابه و تألقة الصوت اخشن

بقى و الشنب خط وهناك من تراقب هذة التغيرات العظيمة وبدأت تراه رجلا و

زوجا لمستقبلها و طبعا هناك من يراقب ايضا من خلفها هذة التغيرات و هم اهلها

اللي ضمنو عريس من بدري ياحلاوة كدة البنت مش هتعنس و يفضلو يحلمو

و يلمو في الجهاز على اساس خلاص فلان اول ما يقول ياجواز هيدور على

قريبته و يروح بعيد ليه اهو زيتنا في دقيقنا و بقى الوان الترحيب و الحب و التقرب

لعائلة العريس المنتظر وترقب شديد ليوم تخرجه و السهر والدعاء له و تدوير

و سايط عشان يتوظف عشان يضمنو بنتهم تعيش في هنا

لكن للأسف عريسنا فكره في حتة تانية اصل قريبته مش على ستايله و هو عايز

يدخل عرق جديد يحسن نسل العيلة اصل العيلة شبة بعض وهو عايز يجيب

نسل مختلف يكون حدث العائلة و من هنا يبدأ العداء والكره لأهل المعرس

ازاي تاخدو من برا و تسيبو بنتنا ازاي ماتخدوش من عندنا ويبدأ النتجاهل و الجفاء

و العيلة تتفكك و كله بسبب عريسنا الفتي وده سبب تالت للهم

نتقدم بالزمن شوية كمان ايوة هنا خلال فترة البحث طبعا يبقى فيه

مواقف هايلة ممكن المعرس يحط اهله فيها ابسطها انه يكون مش بيفكر

في الجواز وياخد اهله على قد عقلهم و يروحو على نياتهم يخطبوو يروح

يشوف العروسة و بقى ياااااه لو فيها عيب فرجت اصل صوابع رجلها

مش متساوية اصل الشعرة الي على اليمين من ناحية ودنها طويلة

اما بقى الوكسة لو طلعت البت مزة وكاملة ايه العمل نفلفص ازاي

و يفضل الاخ يساير و الكل فرحان ويجهز ويقول بكرة الاقي عيب و بنت

الأية تطلع كاملة يقول بكرة نكتب واكلمها و اتعامل معها و الاقي العيب

برضو البت مش راضية تنقص ايه ده يعني اتجوزها لا عليا و على اعدائي

ووسط الفرحة العائلية يعلن نبأ رفضه للزواج و يكسر قلب المزة و اهلها

و يحط اهله في موقف زبالة الكل يتحاكى بيه واي باب يخبطوه بعد كدة

يبصولهم من فوق لتحت و يقفلو الباب وده سبب اخر للهم حسب

النظرية وهنا بيكتر الهم على عائلة المعرس و يعلنو التمرد

( خلالالالالالالالاص جيب عروستك بنفسك )

في الاخر عريسنا الفتي بيبقى لوحده ويعرف انه الله حق ويلاقي العمر

جري و الصلعة ابتدت تبان وبيجري على اهله يدوروله على عروسة

خلاص انا تبت و من غلطي اتعلمت لكن الاهل ابدا معصي زوج نفسك

بنفسك هنا عريسنا بيلجأ للأصدقاء و المعارف و اهل الخير اللي يمون

عليهم و عايزين يكسبو ثواب فيه و بيجبوله عروسة انما ايه ده القمر

يقولها اتفضلي مكاني من الخوف ويهرب و اهله ياحرام متحسرين عليه

و الدمعة في عين الام ادي اخرتها يابني دي نصيبك بس معرسنا فرحان

وبتبقى العروسة في عين معرسنا زي الغزال و بينسى بياض نانسي

و جسم هيفا و شعر زينب اصل خلاص اخينا عدت عليه ودي مش للي

زيه دي تطرده عريسنا الفتي من عند عتبة الباب و اهو حتى وهو

بيتجوز جاب الهم لاهله

و اخر الحكاية عريسنا اهله جوزوه و ارتاحو من همه خلاص

و خلف صبيان و بنات و بقو ينادو يا ابو صلاح

و صدقت نظرية جارتنا الجوهرية و بنتمنى لعريسنا عيشة هنية

يا حب العمر

حاسة بقلبك لسه هو ليها

لسه بيتمنها زي زمان و متحسر اوي عليها

بقيت خايفة اعتبر نفسي حبيبتك .. خايفة اقولك

يا حبيبي بحبك .. خايفة اكون بدي لنفسي مكان كبير

و مقام عالي عندك ويطلع انه وهم ومش ليا

عارفة انك بتحبني و عارفة اني غالية و ليا مكانتي

عندك .. بس نفسي ارجع و اثقة زي زمان

نفسي ابطل احس انك ليها مش ليا .. انك بتحبها

و بتحاول تنسها بيا..

في يوم هتقرا كلامي و عارفة انك هتزعل و عليا هتعتب

بس غصب عني ده اللي بجد حاسة بيه و بخبي عليك

ده اللي دلوقت بعيش بيه بس خايفة ازعلك

و خايفة باوهامي اشغلك واقلقك..

بس نفسي ارجع زي زمان لما كنت دايما معايا و تكلمني

لما اول ما تشتاقلي تبعتلي .. لما كنت بتفكر فيا و ببقى حاسة

و عارفة .. لما اول ما بتزعل بتجري عليا و تشكيلي

و لما انا ازعل تحايل فيا و تراضني زعلانة لاني

نفسي ارجع الاقيك في كل لحظة احتاجلك في وقت خوفي و

فرحتي في وقت حزني ودمعتي نفسي ارجع زي زمان دلوعتك

مش انا بندقتك بجد وحشني اني ابقى بندقتك ..

تعبت من احساسي بقلبك وهو بعيد .. تعبت وانا حاسة

اني اخر حد بيجي على بالك و اخر حد في قايمتك

عايزة ترجع تحسسني باللحظة والثانية اللي بتشتاقلي

فيها و بتفكر فيا ..

تعبت من احساسي اني لسه خصم ليها عليك .. انها لسه شريكة ليا

في حبك .. انها لسه ساكنة معايا جوا قلبك ..

حاسة انها لسه في قلبك و جواك .. حاسة انها اللي بتسهرلها لياليك

جرحني نسيانك عيد ميلادي و عارفة انك عيدها مش ناسيه

جايز اكون في كلامي اللي سبق ظلمتك بس اللي جي صدقني

هتلاقي انه بجد حقيقة ..

هي حبيبتك حب عمرك و يمكن ده اللي مخليني استحمل لان

حب العمر معاك عرفته ..عرفت يعني ايه حد يبقى حب عمرك

سكت لما حسيتك حب عمري وقتها فهمت

عرفت ازاي انت بتحبها لاني زي حبك ليها بحبك

عرفت ازاي بتشتاقلها لانه نفس الشوق و الله بشتاقلك

عرفت ازاي بتتمنها لاني زي كدة بتمناك .. عرفت ازاي متحسر

عليها لانك لو ضعت مني قد كدة هتحسر عليك

عرفت ازاي لو بإيدك تخلي الزمن يرجعها ليك لاني عايزة

اوقف الزمن وافضل جمبك وعايشة ليك ..

بس ياحب العمرانا تعبت ووالله مش غرور بس حاول انك على

قد ماتقدر تبقى ليا و ما تضعنيش لاني بحبك اكتر من حبك ليها

انت نور عمري و قلبي اكتر ما كنت بتحاول تنور لياليها

نفسي اوعدك اني استحمل استنى تحبني اكتر من حبك ليها

بس خايفة استسلم وابعد واسيبك عايش بيها

لما يدق القلب .. ( ده مش حكم مجرد رأي و بس )

في الوقت ده كل اللي بنعمله اننا بنستسلم

بنسيبه يمشينا و بنسمع كلامه لانه و قتها بيكون امر..

ساعات بنبقى بنمشي وراه و احنا عارفين انه طريقنا

صعب او مستحيل .. بنبقى عارفين انه في كل

خطوة هنتعذب و مع كل فرحة هنتألم بس بنمشي الطريق ..

في ناس بتقول انها قادرة على قلبها و مش بتمشي بعواطفها

انها عندها قدرة عجيبة انها و قت الجد تلغي قلبها

بس هل ده صحيح ؟؟!!

معقولة في ناس عندها القدرة اللي بعتبرها سوبرمانية ؟!

معقولة تقدر توقف قلبك بعد ما دق؟!

تقدر تلغي مشاعرك و هي بتطلع في عنينك والكل بيقراها ؟!

تقدر تلغي الفرحة بالاحساس اللذيذ اللي بيمشي جواك؟!

تقدر تتجاهل رعشة الحب اللي بتسري في جسمك ؟!

لو قدرت يبقى يا بختك بجد يا بختك..

مش عارفة جوايا مش مصدقة ازاي القلب ده اتقدر عليه

و اتغلى ؟! .. ازاي يرجع بعد ما دق و حب

و دخل عالم العشق و الهوى ؟!

هو القلب ده فعلا دق ولا كانت مجرد احاسيس عابرة ؟!

فعلا هو حب ولا كان مجرد اعجاب و انتهى؟!

هو فعلا عشق وهام ولا كان مجرد وهم و فاق منه ؟!

هو القلب ده بجد شارك العقل زي ما بيقولو و العقل اتغلب

عليه و وجهو ؟! .. بجد العقل اثر عليه و ازاي يتصرف علمو؟!

في رأي المتواضع يبقى ده مش حب و القلب ده لسه مادقش ..

لانه يا عزيزي لما القلب يبدق بجد مش هيبقى مكان للعقل

مش هتقول ليه وازي؟! مش هيبقى لك انت و عقلك مكان

مش هيبقى لك وقت للتفكير..

القلب لما يدق بتبقى انت مش انت بتبقى انسان جديد

بتبقى عن نفسك غريب تصرفك بيبقى عشانه و ليه ..

يا عزيزي القلب لما يدق بيملكك و في عالمه هو يعيشك

بيبقى السيد و الجلاد و انت ليه مطيع ..

بس افتكر يا عزيزي بعد ما قلبك يدق و في اي وقت تبقى انت

السيد و اللي بتقدر عليه ساعتها اياك تتخدع في نفسك و

تتغر اوعى يا ابني والله دي مش شطارة منك ولا انت

العاقل صاحب القوة السوبرمانية ..

كل الحكاية والموضوع قلبك ما عدش بيحب وبيعشق زي الاول

ودقتة هي اللي ما كانت او ما عدتش قوية ..