انا اللي مش بحبها ..

الموضوع مش عن الحاجات الشريرة فيا

او نصي الشرير زي ما بيقولو , كل الحكاية

اني حبيت اعترف بحاجات مش عجباني فيا

و ممكن يبقى فيها صفات شريرة او لا

..

انا اللي مش بحبها

كتومة في زعلها بغباء لدرجة انها مش هتعاتبك

لو غلطت معها يعني لو عايز تلمحلها بحاجة باسلوب

يدايقها هتستحملك و لما ماتعدش تستحمل هتسحب

نفسها من حياتك بدون ما تسأل عن سبب تصرفك ..

انا اللي مش بحبها

فاشلة في انها تكون انانية لمصلحتها و

دي مش ميزة بجد يعني مش على غرار انا

عيبي اني طيب خالص لأنه لما تدي غيرك

على حسابك هتتقهر على نفسك خصوصا لو

مافيش اللي بيديك على حساب نفسه ..

انا اللي مش بحبها

مستسلمة جدا صحيح لو حطيتها في تحدي

هتلاقيها قدها بس نفسي تبقى في تحدي

على طول حتى من غير مواقف ..

انا اللي مش بحبها

بتكدب و ينطبق عليها ( يقولون ما لا يفعلون )

بس بتقول يمكن في حد احسن منها ياخد

بقولها و يستنفع طالما مش نافعة نفسها ..

انا اللي مش بحبها

لو حد قالها و حشتني و ماردتش عليه

يبقى يفرح و افضل بكتير من لو قالتله

تشتاقلك العافية ..

انا اللي مش بحبها

مش معنى انها بتسمع حد بجد و بتخفف

عنه و واقفة معاه في معاناته انه

قلبها عليه بجد بس ماحدش هيعرف يفرق

لانها هتعمل نفس الشي لو بتعاني عشانك ..

انا الي مش بحبها

بتتحجج كتير انه الموبايل بيبقى بعيد و

ما شافت الاتصال الا متأخر مع انه ممكن

كان بيرن جمبها و بيكون الشخص عزيز

عليها اوي ..

انا اللي مش بحبها

لو قدرتك و استهونت بيها بتديك حق

العشرة كامل بس بتبقى ما تسواش عندها

لا مؤاخذة old shoe ..

انا اللي مش بحبها

لو اذيتها اوي خاف منها لانها لو قررت

تاخد حقها هتاخده بحقد و اذى كبير بس

عزائها في ده انها لما بتاخد حقها اللي قدامها

بيسكت و ينزل عينه لانه عارف عمل ايه

و كفاية لما امها تقول انتي ينخاف منك ..

انا الل مش بحبها

لما تهدا اوي مش معنها قربلها و انها رايقة

بالعكس ممكن تبقى في حالة انفجار رهيب

جواها ..

انا اللي مش بحبها

ناضجة اوي بطريقة حرقت بيها عمرها

و بتحاول لو مرجعتوش على الاقل تمشي

في اللي باقي خطوة بخطوة ..

انا اللي مش بحبها

قاسية بطريقة صعبة رغم انهم بيقولو

حنينة بس هي بجد قاسية اوي و ساعات

قلبها بيقلب حجر ..

انا اللي مش بحبها

ظالمة مشاعرها اوي معها مع انه من حق

المشاعر دي تطلع زي ماهي جواها

انا اللي مش بحبها

اكتر حد ساعات ببقى نفسي تهون على

نفسها اللي هي فيها على الاقل عشان

صحتها ..

انا اللي مش بحبها

للاسف فاشلة في كل حاجة و ماعندهاش

اي عزيمة عشان تبقى احسن او توصل

للي هي عايزاه ..

انا اللي مش بحبها

رغم انها مش عاجباني بس بحن عليها

اوي يمكن لأنها في النهاية هي ..

.. انا ..

شخابيط اي كلام ..

اليوم في مجلس الامهات في مدرسة اختي

المديرة بتحكي موقف هو الاتي :

المديرة : جايبة الموبايل المدرسة ليه ؟

الطالبة : امي سمحتلي !!

المديرة خدت الموبايل لحد مايجي ولي الامرلانها

مش اول مرة ..

الام اتصلت تزعق : ليه تاخدو الموبايل انا سمحت

لبنتي تاخده المدرسة عشان تكلم خطيبها !!!!!!

هو صحيح عيد الام بس في امهات غريبة في الحياة

كل سنة و ماماتي و امهاتكو و امهات العالم طيبين

**********

حلو اوي يكون في حياتك حد ضحكته معدية

في حياتي اخويا اللي في اعدادي ما شاء الله عليه

بجد لما بيضحك لو الواحد فيه حزن الدنيا لازم

يضحك بسبب ضحتكه معدية بطريقة رهيبة

و بجد بنصحكو تدورو على حد ضحكته

معدية ساعات كتير هتكونو محتاجينها ..

**********

لحد الان مش فاهمة ايه اللي يخلي راجل

يستمر مع ست بتضربه و ايه اللي يخلي

ست تقبل على نفسها تضرب راجل لو

بيعاملها كويس و مش بيضربها ..

**********

بعض الزوجات بتوصل لمرحلة بتبقى اسفة

في اللفظ بنت هوى عشان زوجها سواء بتصرفات

معاه او تصرفات مع الناس و قدامه ارضاء ليه

لو الحاجة ماتصحش بجد و حرام اذا هو نسي

فإنتي بنت ناس و متربية مش جايبك من الشارع

يعني عشان تتطاوعيه في قرفه غصبا ..

( انا بتكلم في محرمات)

**********

والله يا جماعة في السعودية اللبن غير الحليب

عندنا حليب و لبن و زبادي و ليه انا عيلة

عشان بشرب الحليب قبل النوم زي العيال ؟

بس و ماله ايوة انا بشرب حليب قبل ما انام ..

**********

احيانا في حاجات معقدة او ممكن تكون بسيطة

بس الناس بتقعدها و ناس كتير بتمشي ورا

الناس اللي بتعقد الامور دي بس عشان ماتبانش

سطحية و تافهة زيي انا و الافلام ساعات بشوف

تفاسير سياسية و تحليلات اقتصادية لفيلم انا

بشوفه بعيون سهلة و بسيطة خالص و ده بخلي

صحباتي احيان يضحكو عليا بس مش مهم

و اصلا ليه التعقيد الزايد الحياة مش ناقصة

و بعدين ده مش تخلف ده بعتبره عمق وتميز

اني اشوف حاجة بعين تانية غير الناس ..

**********

قطعت الشوكولاتة و والله واحشاني اوي دي

بهجة عمري بس عايزة اتحدى الحزن والاكتئاب

لمرة في حياتي من غيرمساعدة خارجية و

عشان الرجيم اللي بوظته النهاردة كمان ..

**********

بعض الانانية مفيدة

صدقوني لازم الواحد يكون عنده شوية

انانية و حب الذات بشكل متوازن و صحي ..

**********

على فكرة الا الان مصرة مهند مش حلو

ولا واو زي ما بتقولو ده عادي و رجالة

عرب كتير احلى منه اتلهو بقى بس وروني

شطارتكو وانتو بتسمو اسم قديم زي خليل

زي ما اتشطرتو وسميتو مهند ..

**********

كلمة محشورة في زوري اوي اوي اوي

الغو عبارة بكره الكدب او ما بحبش الكدب

او سمي و ما بطقيش في حياتي الكدب

من قاموس العبارات بقى لانه تقريبا كلنا

كدابين بشكل او باخر

هتقولي لا انا مش كداب هقولك

خليك شجاع و صادق و قد كلمتك

راجعلي حياتك كدة و تعالى قولي لقيت ايه

هتقولي كدب ابيض هقولك الكدب مالوش الوان ..

**********

بصراحة بشوف انه البوم العسيلي ضرب مع

اغلب الناس بسبب اغنية مش زي الافلام اصل

كل واحد ووحدة حطو نفسهم بدال البطل

بغض النظر بقى عن انهم غلطو او مادوش

العلاقة و الطرف التاني حقهم او حتى

ماكانوش واضحين في العلاقة

المهم شافو نفسهم بطل الاغنية

الغلبان اللي بيتعذب و بعدها حبو الالبوم كله

عن نفسي حبيت ولد رسام رغم اني دخلت

اسمع الالبوم عشان اغنية احساسك ايه

و رغم جمال الالبوم بس لازم العسيلي يضبط

الكلام مع اللحن شوية ..

**********

يارجال العرب احتو المرأة بكل مافي الكلمة من

معنى و افهم كيفيةالاحتواء للمرأة التي معك

فكل امرأة تختلف عن الاخرى و ستنعم بالمرأة

التي طلما تمنيت وحلمت بها ..

و اذا ماحصلش او حصل العكس يبقى العيب

مش فينا العيب في الست اللي معاك صدقني ..

**********

بصراحة انا كنت بفكر انزل بوست عن الحاجات

اللي مش بحبها فيا و في بنوتة شجعتني من تحت

لتحت على ده بس مش هنزله لدلوقت على الاقل

لا مايروحش فكرك بعيد انا شجاعة زي بس اللي

هيقراه هيقول بقلدك ..

Grey's Anatomy

افتكر ايام ما شوفت لهفة الامريكان على المسلسل

ده قبل ما ينعرض عندنا استغربت في ايه

المسلسل ده عشان يعمل فيهم كدة ؟!

ايه اللهفة دي و الاقبال عليه ؟!

و دلوقت فهمت ..

Grey's Anatomy

المسلسل اللي ماما شايفاه مجرد دكاترة مجانين

في مستشفى و مرضى اجن و دايما بتسألني

انتي ليه تحبي المسلسل ده كدة و تتفرجي حتى

الاعادة ؟!

المسلسل اللي بحب اتفرجه لوحدي و اكره حد

يكون معايا عشان ادمع او اعيط برحاتي في

بعض الحلقات او المشاهد بتاعته ..

المسلسل ده عندي مش حكاية مستشفى و

دكاترة و مرضى في فيلم ظريف بتابعه

دي مستشفى بجد لقيتها مراية ليا و لروحي

حكايات ناسها قد ايه بتحكيني قدا ايه

بلاقي فيهم نفسي اللي بتواجهني بصراحة

نفسي اللي بتفوقني و بتوريني الحقايق

من غير تزيفي انا ليها وبتحط قدامي

حاجات و وقائع بحاول اهرب منها ..

المستشفى دي و دكاترها دايما بيجرحوني

مع انه الطبيعي عندهم الدوا بس جرحهم

ليه هو الدوا فعلا لكتير من اللي جوايا

حاجات كتير كانت محيراني و حاجات اكتر

ما كنتش فاهماها بس ببساطة عبارات و صراحة

كلمات لقيتها في المسلسل ده حكتلي كل حاجة

عني و واجهتني بامور كتير في حياتي

و رتني النتايج و سابتلي الاختار ..

Grey's Anatomy

من السخافة اني الاقي حياتي و مصيري

و اختيارتي و نتايجها و حيرتي و حلها و المي

و جرحى و كل احساس فيا في مستشفى مسلسل بقت

هي مراية روحي بمعنى الكلمة لا والاقي احدى

شخصيتها بكل تفاصيلها انا ..

بجد سخافة بس سخافة بتوجعني اوي ..

انا و الانترنت ..

اول ماطلع الاختراع ده افتكر ايامها كان

زي البعبع بالنسبة للناس

وبقى خطب الجمعة و التحذيرات و انه

رجس من عمل الشيطان و كان لو حد

عنده نت يالهوي بيبقى شهقة طويلة و

خبطة على السدر و هما بيقولو البيت

الفلاني عندهم نت .. ياساتر عندهم نت

و ياويل لو حد في العيلة دي عمل حاجة

غلط ده لو ولدهم وقع الطلبات بتاعت البيت و هو

راجع يبقى السبب هو النت و طبعا ما

هو اهله جابو له نت مستنين ايه لازم

يبوظ ويوقع الطلبات ..

ده في ناس كانت بتوصل بيهم انه

يقاطعو اي عيلة عندها نت مقاطعة ولا

مقاطعة المنتج الدنماركي و اليهودي

في وقتنا الحالي ..

انا بقى رحتلي في النت بدأتها بسبب الجامعة

اصل عشان نواكب التطور والتوكنيشن يعني

الجداول و تضبيطهم و النتايج بتبقى ع النت

و مع الوقت و الابحاث المطلوبة طبعا

جيبنا نت و كأننا جبنا عفريت في البيت

الثواني كانت محسوبة في قعدتي عليه

افتكر اول مرة دخلت نت خالي وبابا كانو

قاعدين ورايا تمام يشوفو هعمل ايه و ادخل فين ؟

و كأني هبلة يعني لو هعمل حاجة مش ولابد

هعملها وهما لازقين فيا كدة ..

بعد بقى الرقابة ما هديت و اطمنولي و انا الكبيرة

برضو يعني عاقلة بقيت اخد حريتي اكتر

بس كانت كل متعتي اني ادخل غوغل

و اطلع صور حاجة غريبة بس كنت بحبها

اوي وخاصة الصبح لو عندي اجازة ..

و مع التطور عرفت المنتديات و طبعا عيني

اتفتحت على الواقع المؤلم اصل اهلي زمان يعني

كانو مفهميني انه العرب اخوة و كلنا بنحب

بعض ولا عندنا خلافات و لاحاجة و انه اليهود

الوحشيين هما الي بيعملو حاجات و يقولو كلام

وحش عشان نكره بعض ( اهلي بقى طيبين

و مثالين و عايزين بنتهم تطلع كويسة ) بس

طبعا لقيت الواقع عالم تاني من خلال المنتديات

و شوفت الحب العربي على اصوله

يالهوي على كمية الشتايم و المشاكل بين العرب

في المنتديات خصوصا الخليجية ( انا خليجية على

فكرة بس للتنويه ) و الفاظ عمري ماسمعتها

من امثلة افقع وجهك يال ... و يلعن خشتك يال...

و يا ....... يا ....... و اصلا انتو ...... و احنا

اللي مش عارف ايه لحد ماكرهت تربية اهلي

لانهم ضحكو عليا بس طبعا دي الصدمة

الاولى بعدها اتكيفت مع الوضع و هجرت النوع

ده من المنتديات نهائي ..

بس طبعا برضو لقيت اجابيات و عرفت

ناس و عقليات حبتها و احترمتها

و عرفت ناس من جنسيات تانية و عرفت

عن الحياة في بلاد تانية و العادات المختلفة

عن حياتي و بلدي ..

بعدها جاه الماسنجر بقى ولمة البنات فيه

و التهيس للصبح تجربة حلوة و طبعا انا

كنت اخاف اقول لحد عندي ايميل اصلي

كنت فاكرة الماسنجر هو الشات و طبعا

الشات منكر و حرام و صياعة و انا بنت ناس

بس بعدين اكتشفت انهم غير بعض خالص

فاعذروني بقى مش هتكلم عن الشات لاني

عمري ما دخلته والله ..

و في الفترة الاخيرة جات المدونة و طبعا

دي احلى مرحلة في حياتي مع النت حاجة كدة

غريبة و صفحة مع الوقت بتبقى انت بتقول

فيها كل اللي نفسك فيه و تخرج كل الي

جواك و طبعا عالم بيضم كل من هب و دب

بقى الصايع و المحترم .. المتشدد و المتحرر

.. السياسي و الهياف .. المريض نفسيا و السوي

عالم تلاقي فيه تفكير جديد و تعرف ناس جديدة

من غير ارتباط حقيقي و مؤلم وده احلى مافيه ..

اخر حاجة بقى حاليا الاختراع العظيم الي اسمه

.. Facebook .. ده اللي مش عارفة افهمه

عملته نوع من الفضول للتعرف على الوحش

اللي مخوف اهل السعودية و العالم العربي و بيوصل انه خطب

و زواجات بتبوظ لانه الطرف التاني مشترك

في الفيس بوك و بيبقى ده سبب كافي للانفصال

و تلاقي البنت كدة مرعوبة لا حد من اهلها

يعرف انها مشتركة في الفيس بوك

و كمان عشان مابقاش جاهلة و اكون مواكبة

العصر و اعرف اتكلم عن الفيس بوك بثقة

و من ساعة ما عملته و صحباتي شغالين

تهزيء فيا انتي اصلا عاملاه ليش ؟ و ايش التخلف

اللي انتي فيه ؟ و لما ماتعرفي للشي تشتركي

ليش ؟ لا بتدخلي و بتنضمي لجروبات و لا

بتدخلي شات مسويته ليش ؟!..

بجد نفسي افهم زعلانين هما ليه يعني عاملاه

مع الخيل ياشقرة و انتو ايش لكم؟! ..

و مؤخرا كانو اهل الفيس بوك عشامنين

فيا على اساس اني عربية يعني و هماعايزين

يعملوه بالعربي و عايزين تأيدي معاهم

بس شكلهم زهقو و هما بيستنوني و عملوه

عربي و خلصو الموضوع و طبعا قالولي

لو عايزاه عربي اغير اللغة و انا بعين قوية

طبعا غيرته لعربي قولت يمكن استوعبه احسن بس

للاسف بجد مش عارفة اتعامل مع الصفحة

الميتة دي و اديني ادخل افتح ساعات و انسى

بيه و ارجع اقفله على اساس اني انا كمان

بفسبك زي الناس يعني و احيان اعمل لفة

كدة على الجروبات و اعمل بحث و اشوف

بقى الناس اللي هبلة و اللي جادة اللي بتهيس

و اللي مقرفين و مرضى و هلم جرو لسه

بدخل اشقر عليه الى حين ميسرة بقى

و لما يدخل الاختراع ده مزاجي ..

و اخيرا بجد اشكر كل حد فيكو قرى البوست

ده لحد الاخر لانه طويل اوي و ان اللي كتبته

نزلته من غير مارجع اقراه .. فلكم جزيل الشكر ..

اللقاء المنتظر ..

إشتقت إليك

فأخبرني يا سيدي اما آن لشوقي ان يهدأ ؟!..

و ناري اما آن لها ان تطفأ ؟!..

اما آن لقلبي ان يرتاح و هو في غيابك يتمزق ؟!..

اما آن الوقت للقاء شوق بيني و بينك ؟..

لقائنا الذي انعم فيه بإحساس الامان معك ..

لقائنا الذي يكسوه حنين نتبادل فيه همسات

الحب و الحزن و العتاب ..

حقا إشتقت إليك فهل حان الوقت ام ليس بعد ؟

أخبرني لكي اعرف ءأحرر ما بداخلي ام

ابتاع لقلبي جلد اصلب و لناري حطب اجود؟!..

فشوقي هو كما عهدته هو منك و لك و لن يطفئ

ناره الا انت .. انت وحدك ..

كنا و كان ..

زمان اوي واحنا صغيرين كان روحنا

في بعض و كنا احلى شلة اصحاب

الضحك و اللعب و الدوشة و الحكايات ..

كنا لما نتجمع بنزعل لما يتأخر الوقت

و يجي وقت الفراق و نبقى عايزين الوقت

يطول اكتر ..

من كتر ما كنا جمب بعض و لمتنا كانت

حلوة كنا مكتفين ببعض مش حاسين اننا

محتاجين حد تاني من برا كنا لبعض و جمب

بعض و كان اخر الاسبوع احلى الايام

لأنه يوم لمتنا في البيت الكبيرو اجازة الصيف

اكتر حاجة بنستنها لانه القرايب اللي بعيد

بيجو فيها و تكبر اللمة ..

و جريت الايام وكبرنا و شوية شوية اتغيرنا

و دخلنا عالم الكبار و عرفنا مشاكل الكبار

و اتأثرنا و النفوس اتغيرت صحيح فينا اللي

لسه بنتجمع معاهم بقلب صافي زي بتاع زمان

و فينا اللي بيجامل و لسه فاكر ايامنا

بس للأسف ماتوقعتش انه فينا الي هينسى

ايامنا و حتى ينسي القرابة ..

سبحان الله و جاه زمن و طلع فينا اللي

خلاص نسيتنا و اللي في حزنها بتقدم

الغريب و اللي في فرحها بتبعد القريب ..

بجد قد ايه اتحولنا و عالم الكبار غيرنا قد

ايه بقينا زيهم .. شبههم و بنكمل مسيرتهم ..

سبحان الله على زمن يبقى الغريب اقربلك

من القريب .. زمن اهلك يعادوك و الغرب

يعزوك .. زمن صاحبتك اختك و قريبتك

ضيفتك ..

سبحان الله على زمن امسك اصحابك وجيرانك

لانه الاهل ماعاد فيهم خير ..

شخص مجهول ..

من شوية كنت بتفرج على حلقة من

مسلسل اهل الغرام اسمها ** طلي بالأبيض **

القصة عن اتنين بيحبو بعض من تلات سنين

و الحلقة عن يوم فرحهم و التفاصيل اللي

فيه و الخناقات اللي بتحصل لأتفه سبب في

اليوم ده و توتر و العريس و عصبية العروسة

ومع ضغط اليوم ده بتبدي تحصل مواقف

و تبان حاجات بتخلي الاتنين يحسو انهم مش

عارفين بعض او ماكانو يعرفو بعض

بس كتب الكتاب بيتم لكن العروسة و العريس

ماحضروش الفرح لانه كان جواهم سؤال

بعد ماحسو انهم مايعرفو بعض ..

اذا كان اولها كدة هيكملو في الباقي ازاي ؟!..

المسلسل وقف على كدة و لف الغموض

الاجابة .. بس على ارض الواقع ياترى كان

ممكن يحصل ايه ؟!..

يمكن على الاغلب هيكملو الزيجة و بقى الحظ

يا صابت يا خابت .. و يمكن العكس يحصل..

لكن اللي اعرفه من اصعب الحاجات اللي ممكن

الواحد يعيشها انه يكتشف انه مايعرفش حد بعد

معرفة و عشرة و سنين و هو كان متأكد انه

عارف الشخص ده و فاهمه ...

اليوم الأحمر ..

عمري ما كنت من انصار عيد الحب

ولا فكرت اني احتفل بيه و مش

مقتنعة بإنه الحب ليه يوم معين

و بستهيف المغالاة و الاحتفال

العظيم ده بيه ..

بس مش عارفة ليه السنة دي كان نفسي

اعيش اليوم ده .. كان نفسي احتفل بعيد

الحب .. بخناقة عبيطة .. بدلع .. بحب

بوردة .. بهدية .. بشكولاتة او اي من

الحاجات دي اللي بيعملوها الناس في اليوم

ده مش مهم عندي التفاصيل دي بس السنة

دي كان نفسي اعيش اليوم ده ..

يمكن بقى اتجننت او احساس بلحظة وحدة

او يمكن لاني حاسة اني كبرت مش عارفة هو

ايه جوايا اللي كان عايز بالقوة دي يحتفل بالـ

.. Valentine's Day ..

شخابيط صباحية ..

مش عارفة ليه غاوية شخبطةاليومين دول

قولت اصبح انا وقهوتي بشوية شخبطة

معلش بقى استحملوني ..

من فترة تقريبا فترة حرب عزة روتانا

نزلت البوم اسمه حزن هو انا ما سمعتوش

بس نقدر بقى نتخيل الاغاني ازاي

شكلهم ما كانوش بيتفرجو على التلفزيون ..

**********

في ناس غريبة مش عارفة هي مش عارفة

رايحة فين او مش مقدرة رايحة فين

زي كدة المركز اللي باخد فيه الكورس

يعني في ناس بجد والله بتستوقفني ويفضل

سؤال واحد في دماغي :

ياترى دي لما تحب تروح فرح او سهرة

بتعمل زيادة عن كدة ايه ؟! ..

**********

صاحبة ماما بتشتكي من مراة ابنها و قلة ادبها

معها و لما ماما حكتلي كل اللي قولته بصراحة

حتى لو البنت مش متربية اللوم مش عليها اللوم

على الابن اللي خلى مراته تكبر على امه و ما عرفها

من البداية انه امه فوق الكل ..

صحيح الولد ما يبقاش ابن امه و لا يظلم بنت الناس

و يهينها عشان رضى امه لكن لازم يعرف مراته

قيمة و قدر امه عنده ...

**********

حاسة انه عندي حالة نفسية مش عارفة ليه؟

بس بقالي فترة تقريبا بطلت اشوف رجالة

بقيت اتعامل مع كل ذكر على انه عيل قدامي

و مش بشيله من ارضه مع انه لسه الدنيا

فيها رجالة اكيد بس انا مش عارفة ليه بطلت

او مش قادرة اشوفهم ..

( بتكلم على حياتي في الواقع )

**********

الناس بقت تخلط كتير بين الزواج عن حب

و الزواج عن معرفة يعني مش كل اتنين

يعرفو بعض قبل الزواج و كانو بيكلمو بعض

يبقو اتجوزو عن حب لانه ممكن انت بس اللي

بتحب او العكس او انتو الاتنين مجرد شايفين

ده الشخص المناسب للزواج لكن الزواج عن

حب لما يبقى كل غايتك تعيش مع الطرف التاني

و بس من غير حتى ماتعرف انت ليه بتحبه

و بتتمناه كدة ..

**********

انا كل ما احتاج اتكلم مع حد قلبي بيرتاحله

يطلع كمان هو اتألم ماالحقش اكمل و اشرحله

من روائع انغام اللي غنتها و واقع متعاش

فعلا اصل الناس دلوقت بقت تعشق

الفضفضة و دور التعبان حتى لو مافيش

حاجة فعلا تاعباهم و خنقاهم

بقى الموضوع كدة زي مع الموجة

و مع الخيل يا شقرة

بس رغم احتياجنا الرهيب للناس

لازم نتعلم نشيل همومنا داخلنا لانك

ماتعرفش ببساطة حجم هم الانسان

اللي بتفضفضله ..

**********

مؤخرا بقيت متعلقة باغنية مريام فارس - ايام الشتى

اعتقد انها ارقى ما غنت مريام فارس ..

**********

بنلوم كتير اطفال ليوم ونقول مابقوش اطفال دول بقو

اوعى مننا مع انه احنا اللي سبناهم لهيفا و نانسي

وللنت و للشات و لنور و مهند و يحيى و لميس

و العاب البلاي استيشان و مافيها من هوايل احيانا

و لو الولد قال كلمة وقحة بنضحك و نقول ذكي و فطين

يبقى ليه كل الزعل ده و الاعتراض على ما فيه الاطفال

ماهم و بلا فخر نتاج الكبار ..

**********

بيعجني حب الولاد لعربيتهم و قد ايه بيهتمو

بيها و يسموها كمان اخويا مسمي عربيته ( بي )

قال عشان لما يدلعها يقولها بي بي ..

انا مش معترضة عليكو بس اهو زي الدلع و الاهتمام

و الحب للعربية ده ادوه للست و مش هتغلبو معانا تاني ..

**********

اغلب الهموم بتكون صغيرة واحيانا تافهة بس

مش عارفة ليه بنحب نكبرها و نخلق حالة

حزن نعيش فيها و نعيط و نوجع قلبنا

شكله فترتها بتكتر علينا الراحة ..

**********

في ناس كدة روحها العنطزة او الفشخرة

مش عارفة اوصل الكلمة بس هديكو المثال

يعني المحل اللي البياع مصدق نفسه انه

الباشا اللي مالك المحل و يعاملك انت يازبون

على اساس انك شحات و جاهل مش جي تشتري

بفلوسك لما روحت محل الورد لقيت البياع ده

كنت عايزة بوكية روز و توليب راح قايلي

التوليب بالطلب قولت له مافيش روز رايح

باصصلي كدة بصة ازدراء واستعلاء

وقالي روز في نرجس و لافندرو لي لي و

اوركيد تقولي روز لا مافيش ..

مع انه اشهر و اكتر محل ليه فروع في مدينتي

للورد متخصص تقريبا في الروز بالوانها و انواعها

فسبت حضرته و خرجت ..

**********

انا مش بدعو للاختلاط و لا بحبه بصراحة

نظرا لتصرفات الشباب بس فعلا المكان اللي بيضم

ستات بس يعني زي مثلا ملاهي معينة تعمل يوم

للستات بس اسوء من المكان المختلط بكتير ..

**********

ساعات احلى حاجة تعملها مع اللي حواليك انك

تبقى متفرج و تعمل عبيط و لما الكل يبصم انك

عبيط ساعتها خليهم يكتشفو انهم اعبط مما يتخيلو ..

*********

ممكن بس ليا رجاء للولاد بلاش تحطو صوركو على

المنتديات و خاصة بوضعيات كدة الواد الحليوة او

الروش او الحبوب ...الخ

اصل من وراكو و بين البنات يعني بتبقو ولا مؤاخذة

حاجة بايييييييخة ..

**********

اغلب الناس اللي بتنصح في الحب و العلاقات

زي حالاتي كدة وربنا يستر بتكون

مختلفة في الواقع بس بتدي منظر بغير كدة او تبقى

ماحبتش اصلا عشان كدة بتنصح او حتى مجرد حظ لا

ذكاء منهم ولا حسن اختيار و تدبير ساعات كتير فعلا بيكون

حظ لا اكتر و الناس دي لو حبت بجد في الغالب هتلاقيها

خايبة جدا في الحب ..

ايام الطفولة ..

كتير بلاقي مواضيع عن الطفولة

و ازاي كل العالم عايزين يرجعو اطفال

و يعيشو احساس الطفولة و براءته وكل

مافيه من روعة من غير مسؤليات ولا هم ..

بس الغريب اني مختلفة مش عايزة ارجع

طفلة و اعيش الطفولة من جديد بجد

لما بقيت اقرا المواضيع دي بدور جوايا

كتير على الاحساس و الحنين ده

بلاقي اني ماليش خلق ارجع طفلة

و اعيش حالات الطفولة و مافيها من

جهالة و براءة و ... الخ

يمكن العكس صحيح جوايا احساس

عايز يخرج من الماضي والحاضر و

يروح لبكرة عندي فضول اعرف ايه

اللي في المرحلة الجاية من حياتي

هبقى ايه ؟! هكون فين ؟! هتبقى حياتي

ازاي ؟! .. نفسي اوي يجي بكرة على خير ..

يمكن الحالة الوحيدة اللي اتمنى او عايزة

ارجع بيها للطفولة و ايام ما كنت طفلة

لما ربنا يكتبلي و يبقى عندي انا طفلة

ساعتها بس هرجع اعيش الطفولة من

تاني بكل لحظاتها و تفاصيلها

و احساسها ..

مضت من حياتي ..

النهاردة عيد ميلادي وهتم 24سنة

قررت اهدي نفسي الوردة دي

.. التوليب ..

او زهرة الحب الخجولة زي

مابيقول معنها بشوف فيها

نفسي وهي مادة نفسها للحياة بس

مخبية نفسها و داخلها بخجل

و احيان قليلة بتفتح قلبها

حابة الناس تشوفها بكل جمالها بس محتفظة

باللي جواها ليها و بس و خايفة

حد يشوفه ويعرفه

يمكن في يوم اغير الوردة و تبقى

وردة مفتوحة و كل اللي جواها

بيتشاف و يتقرا

بس لحد الوقت ده هتفضل وردة التوليب هي

انا الكل شايفها بس محدش عارف

ايه اللي بتخبي اورقها الا لما يقرب

كويس و يكتشف داخلها ..

زمان كنت شايفة اني لما اوصل24

هكون عملت حاجات كتير

ماتوقعتش انها تيجي عليا و انا كدة ..

مش عارفة اقول ايه عن السنة اللي عدت

من عمري دي؟!

هي احسن من السنين اللي قبلها بس اسوء

بكتير من السنين اللي قبلها ..

لما اراجعها بقبلها بس في نفس الوقت مش

راضية عنها ..

جوايا حاسة السنة دي هتكون احسن او هحاول

اخليها احسن او ممكن يكون مجرد

احساس كاذب و تفاؤل زايد ..

يلا المهم اني بصحة وعافية و كل سنة و انا

احسن من كل سنة قبلها ..